Lk 22

Makungu ya kudlaya Yesu

(Mt 26:1-5,14-16; Mrk 14:1-2,10-11; Yhn 11:45-53)

1A nkhuvu wa makati lawa mangekena handrelo, lowu wuhlayiwaka Paska, afa wu kusuhi. 2Kutani a vaprista lava vakulu ni vadondrisi va Nawu afa vadjula leswi vangamudlayisaka xiswone Yesu, hikusa afa vatxhava tiko. 3Kambe Sathana anhingena ku Yudasi, lweyi ahlayiwaka Iskariyota, lweyi afaka ali wa lava vakhume na vabiri. 4Yudasi asuka ayakhanela ni vaprista lava vakulu ni tindruna ta Tempele, a yingelana navu leswaku angayentxisa kuyini akuva anyiketa Yesu.#22:4 A tindruna leti afa tidondrisiwa kun'we ni valevi. 5Vone vanyoxa, vapfumelelana kumunyika mali. 6Yudasi apfumela; ahangadjula nkama lowu wunene wa kuvanyiketa yene na kungena xitrhungu.

Kululamisa xilalelo xa Paska

(Mt 26:17-25; Mrk 14:12-21; Yhn 13:21-30)

7A siku dra makati lawa mangekena handrelo, ledri afaka vafaneli kutlhava Paska ha drone, dritlhasa. 8Yesu aruma Petrosi na Yohana aku: Fambani n'wiya hilulamisela Paska hitadrida. 9Vaku ku yene: Urandra leswaku hiyadrilulamisa kwini xana? 10Aku ku vone: Lavisani, loko n'winhingeni mutini, n'witatlhangana ni mhunu na arwali hotro ya mati. Mulandrani andlwini leyi atakanhingena ku yone. 11N'wibyela n'winyi wa yindlu n'wiku: A mudondrisi ali: hi yini yindlu leyi ningadelaka ku yone a Paska kun'we ni vadondrisiwa vanga xana? 12Lweyo-ke atan'wikomba yindlu ya le henhla leyi yikulu, leyi longisiwiki. Lulamisani Paska kone. 13Vafambiki, vayakuma swanga hi swoswi avabyeliki; vahangalulamisa Paska.

Xilalelo xa wugamu Hosi.

(Mt 26:26-30; Mrk 14:22-26)

14Kuti loko nkama wutlhasile, Yesu atrhama kudeni, kun'we ni vapostola 15aku ku vone: Nanaveli hi kunavela kukulu akuda Paska ledri kun'we na n'wine, na ningasinafa. 16Hikusa nan'wibyela nili: Ningahatlheli nida a Paska, drikota drihetiseka aNfun'wini wa Xikwembu Nkulukumba. 17Atekiki ntrheko atlangela Xikwembu Nkulukumba aku: Tekani, n'wisiyelisana ha wone, 18hikusa nan'wibyela, akusungula swoswi ningahanwi swa mihandru ya nvhinya, a Mfumu wa Xikwembu Nkulukumba wukondra wutlhasa. 19Atekiki kati, atlangela Xikwembu Nkulukumba, akhemelela avanyika aku: [Leyi i miri yanga leyi minyikiwaka hinkonta yenu. Yentxani leswo n'witanidrimuka ha swone. 20Nawo ntrheko, ayentxisa xiswoswo, a ntrhaku ka kuda aku: A ntrheko lowu i xipfumelelanu lexi ximpswha xa Xikwembu Nkulukumba angatini yanga leyi yihalatiwaka hinkonta yenu.]

21A tlhela aku: Kambe vonani a voko dra lweyi aniwongaka drina mine atafuleni. 22Hikusa N'wana wa Mhunu asuka swanga hi leswi ayimiseliwiki swone hi Xikwembu Nkulukumba; kambe yowee a mhunu lweyi awongiwaka hi yene! 23Vone, vasungula kuvutisana, leswaku atava mani ku vone, lweyi atakavani kuyentxa leswo.

Lweyi nkulu a Mfun'wini wa Xikwembu Nkulukumba

24Kavini nkanetanu amakari ka vadondrisiwa, leswaku i mani ku vone lweyi angapimisiwaka lwenkulu. 25Kambe Yesu aku ku vone: A vafumi va-Matiko vamafuma; lava vamafumaka hi ntamu vahlayiwa vatovokisi va wone. 26Kambe n'wine n'wingavi tanu; kambe lwenkulu ku n'wine a ave swanga hi lweyi ntrongo, nayene lweyi aleletaka, ave swanga hi lweyi atirelaka. 27Hikusa lwenkulu hi wini? Xana hi lweyi atrhamiki kudeni, kumbe hi lweyi amutirelaka? Ahilweyi atrhamiki kudeni xana! Kambe mine ni le makari kwenu swanga hi lweyi atirelaka.

28Kambe n'wine, n'wilava vatiyiseliki na mine akudringiweni kwanga. 29Na mine nin'winyika Mfumu swanga hi leswi anganinyika Tatana wanga, 30akuva n'wida, n'winwa atafuleni dranga aNfun'wini wanga; n'witrhama switrhan'wini swa vufumi, n'witrema timhaka ta tinxaka leti ta khume na tibiri ta Israyele.

Yesu ativisa Petrosi

(Mt 26:31-35; Mrk 14:27-31; Yhn 13:36-38)

31Kutani Hosi yiku: Simoni, Simoni, lavisa, Sathana akombeli kun'wihehera swanga hi mavele 32kambe nikukhongotelile ku Xikwembu Nkulukumba leswaku a kupfumela kwaku kungaheli. Kutani wene, loko undrulukile, tiyisa vamakwenu. 33Petrosi aku ku yene: We hosi, nitibekiseli kuya na wene abohelweni ni le kufeni. 34Kambe Yesu aku ku yene: Nakubyela Petrosi, a nkuku wungatiyimba namunhla, na ungasilandrula kuraru, uku awunitivi.

Yesu avoniwa swanga mudohi

35Kutani Yesu aku ku vone: Loko nin'wirumi na n'wingalina nkwama wa mali, ni hwama, ni swifambu, xana mapfumali ntxhumu xana? Vaku: Ahapfumalanga ntxhumu! 36Yesu aku ku vone: Kambe swoswi lweyi angani xikhwama axiteke, nawo nkwama. Mfuri lweyi angekena lipanga, axavise nkhantxu wakwe, ataxava drone. 37#Lavisa: Ezy 53:12. Hikusa nan'wibyela nili: leswi swingatraliwa leswi swiliki: Ahlayiwi ni vadohi, swahafanekela kuhetiseka ku mine. Hikusa leswi swihlayiwiki ha mine swini kuhetiseka. 38Vaku ku yene: Hosi, lavisa, timpanga tibiri hi leti. Yesu aku ku vone: Swidringanile.

Xikhongoto a Nhaveni ya Minhlwari

(Mt 26:36-46; Mrk 14:32-42)

39Kutiloko Yesu ahumile, aya Nhaveni ya Minhlwari hi matolovelela yake; a vadondrisiwa vamulandra. 40Aku loko atlhasa kumbangu lowo, aku ku vone: Khongotani Xikwembu Nkulukumba, n'wingatinhingena kudringiweni. 41Yene, atrhindreka kule navu, kufana ni vangonyana dra loko kutxukumeteliwa ribye, akhisama akhongota aku: 42Tatana, loko uswirandra, susa ntrheko lowu ku mine, kambe kunga yentxiwe kurandra kwanga, ake kuva kwaku. [ 43Kutani a ntrumi yi voneka ku yene, yipfa Tilweni, yitatamutiyisa. 44Kuti loko ali kuvavisekeni loku kulu, atshimisisa kukhongota, lakakuva ni nyuku wakwe wuva wufana ni mantrhonsi ya ngati lawa mathonelaka misaveni.]#22:44 A tindrimana ta 43-44 atikumeki ku matralwa ya kuhlawa.

45Atiki asekeleka kukhongoteni kwake ata ku vadondrisiwa vakwe, avakuma vakhutriyelile hi xiviti. 46Aku ku vone: N'wikhutriyelela yini xana? Pfukani n'wikhongota, n'wingatinhingena kudringiweni.

Kukhomiwa ka Yesu

(Mt 26:47-56; Mrk 14:43-50; Yhn 18:3-11)

47Yesu aku na ahavulavula, kakutlhasa xitrhungu. Na yene lweyi ahlayiwaka Yudasi, mun'we wa lava vakhume na vabiri, afa axirangeli mahlweni, atrhindrekela ku Yesu kumunyunta. 48Yesu aku ku yene: Yudasi, unyikela N'wana wa Mhunu hi kumunkunta xana? 49Lava afaka vali na Yesu, vavona leswi switaka yentxeka, vaku: Hosi, xana hifanele kuteka timpanga hilwa xana? 50Mun'we ku vone a ba nandra wa muprista lwenkulu, amutrema ndleve ya xinene. 51Yesu ayangula aku: Trikani! N'wingahaswiyentxi. Akhumba ndleve ya lweyo amuholisa.

52Kolahu Yesu avulavula ni lava vamuteliki, vanga vaprista lava vakulu ni tindruna ta Tempele, aku: Ingi n'widjula xiyivi, n'wihumiki na n'witameli timpanga ni tinhonga? 53Afa nina n'wine masiku hinkwawu andlwini ya Hosi, an'wanikhomanga. Swakuva leswi a nkama lowu wunga wo wenu, ni ntamu wa munyama!

Petrosi alandrula Yesu

(Mt 26:57-58,69-75; Mrk 14:53-54,66-72; Yhn 18:12-18,25-27)

54Vatiki vamukhoma vafamba naye, vaya munhingenisa andlwini ya muprista lwenkulu. Kambe Petrosi afa landra hi le kule. 55Vatrhiveliki ndrilo amakari ka linxonxa, vatrhamisa. Na yene Petrosi atrhamisa makari kwavu. 56Mun'we lweyi wanhwanyana wa nandra, amuvona na atrhami awora ndrilo, amupondrolela aku: Ni yelweyi afa ali na yene! 57Kambe Petrosi alandrula aku: Wansati animutivi. 58Antrhakunyana amun'wana amuvona aku: Na wene u wa kwavu! Kambe Petrosi aku Nandruwe, ani yene! 59Kuhundriki a nkama lowu wufanaka ni hora drin'we, amun'wana atiyisa aku: Kunene, lweyi na yene afa ali naye, hikusa mfuri i mu-Galileya! 60Kambe Petrosi aku: Nandruwe aniswitivi leswi uhlayaka swone! Hi nomu-lo na ahavulavula, a nkuku wudringa. 61A Hosi yindrulukiki, yilavisa Petrosi, kahangava laha Petrosi adrimukaka a ritu dra Hosi, leswi afaka yi mubyelisi xiswone leswaku: A nkuku wungasinayimba namunhla, utanilandrula kuraru. 62Ahanga huma handle adrila hi xiviti

Yesu loko atreketreliwa hi valaveleli, abiwa

(Mt 26:67-68; Mrk 14:65)

63A vavanuna lava vangakhoma Yesu, afa vamuhleka, vamuba hi ntamu. 64Vamufukumetiki mahlu, vamuvutisa vaku: Loko u muprista, pfhumba: i mani lweyi akubiki. 65Ni swin'wana leswi swakutala, swimuvulavulela swimuruka.

Yesu loko ayisiwa hubyeni ya xi-Yuda

(Mt 26:59-66; Mrk 14:55-64; Yhn 18:19-24)

66Byiku byaxa, a vakulu va tiko, a vaprista lava vakulu, ni vadondrisi va Nawu, vahlengeletana, vamuyisa hubyeni ya xi-Yuda. 67Va vutisa Yesu vaku: Loko u Kriste hibyele! Yene aku ku vone: Nambi nin'wibyela, ana n'wingakholwi, 68ni loko nin'wivutisa, an'winiyanguli. 69Akusungula swoswi, N'wana wa Mhunu atatrhama axineneni xa ntamu wa Xikwembu Nkulukumba. 70Hinkwavu vaku: Xake, u N'wana wa Xikwembu xana? Yesu aku ku vone: N'wihlayelamfuri, ni yene! 71Vahangaku: Xana hahadjulela yini vumboni? Hikusa na hine hi swiyingeli hi nomu wakwe!

Выбрано:

Lk 22: NTX2007

Выделить

Копировать