Yhn 3

Kukumana ka Yesu na Nikodema

1Afa kuni mun'we wa vafarisi lweyi afaka vaku hi Nikodema; afa ali mun'we wa tindruna ta va-Yuda. 2Ayi ku Yesu ni vusiku, atlhasa aku: Mudondrisi, haswitiva leswaku u mudondrisi lweyi apfaka ku Xikwembu Nkulukumba, hikusa akuna mhunu lweyi angayentxaka mahlolana lawa umayentxaka, loko Xikwembu Nkulukumba ange na yene.

3Yesu amuyangula, aku: Nihlayelamfuri nili ku wene, akuna mhunu lweyi angavonaka Mfumu wa Xikwembu Nkulukumba, loko angatlhelanga apswaliwa hi vumpswha#3:3 Hi vumpswha: a ritu ledri, ku Xigirika dritlhamuxela kupfa Tilweni, anga kubelekiwa hi Moya. Lavisa 3:5-6.

4Nikodema aku ku yene: Loko mhunu aduhwalile, swingayentxisa kuyini a kutlhela apswaliwa xana? Xana angaswikota kutlhelela ndreni a khurini dra mamana wakwe, atlhela apswaliwa ka vubiri xana?

5 # Lavisa 1:26-32. Yesu ayangula, aku: Nihlayelamfuri nili ku wene, loko mhunu angapswaliwi hi mati ni Moya, angaka anganhingeni Mfun'wini wa Xikwembu Nkulukumba. 6Leswi swipswaliwaka hi nyama i nyama; kambe leswi pswaliwaka hi moya i moya. 7Ungahlamali loko niti ku wene hinkwavu vafanekela kubelekiwa ximpswha. 8A moya wuhungela#3:8 Hi Xigirika i ritu drin'we ledri drihlayaka a moya luwu wuhungaka ni Moya wa Kuxwenga. lomu wu kudjulaka, kutani uyingela mpfumawulu wa wone, kambe awukutivi laha wu humaka kone, ni laha wu yaka kone. Switanu ni le ku hinkwavu lava vapswaliwiki hi Moya.

9Nikodema avutisa, aku: Xana leswi swingayentxekisa ku yini? 10Yesu amuyangula, aku: U mudondrisi wa tiko dra Israyele, kambe a timhaka leti awutitivi xana? 11Nihlayelamfuri nili ku wene, hine hi khanela hi leswi hiswitivaka, kutani hihamba vumboni bya leswi hiswivoniki; kambe an'widjuli kuyamukela leswi niswihlayaka. 12Leswi n'wingapfumelikiki loko nin'wibyela hi swa la misaveni, xana n'witapfumelisa ku yini loko nin'wibyela hi swa le Tilweni xana? 13#Fananisa na Rm 10:6. Akuna mhunu lweyi asamaka antlhantukela Tilweni, loko ange kuva lweyi axikiki hi le Matilweni, anga N'wana wa Mhunu. 14#Fananisa na Tnh 21:9. Kufana ni leswi Moxe angahayeka nyoka huleni, N'wana wa Mhunu na yene atafanela kuhayekiwa#3:14 Afanela kuhayekiwa: swikombisa a xihambano swanga ntrindra wa vukhongoti bya huluku: Lavisa 12:32-33; 19:37. hi ndlela yoleyo, 15leswaku mun'wana-ni-mun'wana lweyi apfumelaka ku yene, akuma vutomi lebyi byingahelikiki.

16Hikusa Xikwembu Nkulukumba arandri misava swakunhati, ako anyika N'wanakwe lweyi apswaliwiki ali swake, leswaku mani na mani lweyi apfumelaka ku yene, angatxhuki alahleka, kambe akuma vutomi lebyi byingahelikiki. 17Xikwembu Nkulukumba angarumanga N'wanakwe misaveni akuta yavanyisa misava, kambe afa ayentxela leswaku misava mihuluxiwa hi yene. 18Lweyi apfumelaka ku N'wana, angayavanyisiwi; kambe lweyi angapfumelikiki ayavanyisiwile ni swoswi, hikusa anga pfumelanga ku N'wana wa Xikwembu Nkulukumba lweyi wa mun'we. 19A kuyavanyisa hi loku: A kuvaninga kuti misaveni, kambe vhanu varandri munyama kutlula kuvaninga, hikusa mintiro yavu afa mibihile. 20Mun'wana-ni-mun'wana lweyi ayentxaka swakubiha, avenga livaningu, angarandri kuya livaningweni akuva a mintiro yake mingativaningiwa. 21Kambe lweyi ahanyaka xihlayelamfurini, ata livaningweni, leswaku mintiro yake mitavoneka mili leyi mitiriwaka hi kulandra kurandra ka Xikwembu Nkulukumba.

Yesu na Yohana Mubabatisi

22 # Lavisa 4:1-2. Antrhaku ka leswo, Yesu ni vadondrisiwa vakwe vaya tikweni dra Yudeya, kutani atrhama kone masikunyana na vone, ababatisa vhanu. 23Yohana na yene afa ababatisa le Enoni, kusuhi ni le Salime#3:23 Enoni na Salime i matikwana mabiri manga nkhinsini wa Yordana, kambe mangativiwikiki ngopfu., hikusa afa mati matalile kone. A vhanu afa vaya ku yene, vayababatisiwa. 24#Lavisa Mt 14:3; Mrk 6:17; Lk 3:19-20. Ankameni wolowo Yohana afa angasanganapfaleliwa abohelweni.

25Kutani kuhumelela kukanetana amakari ka vadondrisiwa va Yohana ni mun'we wa mu-Yuda#3:25 Ni mun'we wa mu-Yuda: a man'wana Matralwa mahlaya leswaku ni va-Yuda., amhakeni ya swakubasisiwa. 26Vahangata ku Yohana, vaku ku yene: Mudondrisi, a mhunu lweyi afaka uli na yene halahaya ka nambu wa Yordana, ni lweyi ungamuhambela vumboni, akari ababatisaka na yene, kutani hinkwavu vaya ku yene. 27Yohana ayangula, aku: A mhunu angaka angavina ntxhumu, loko angawunyikiwanga wupfa Tilweni. 28#Lavisa 1:20; ni kufananisa na Mlk 3:1. N'wine ha vuswenu n'witimboni ta leswaku niti: Ahi mine Kriste. Ntsena nirumiwile amahlweni kwake. 29A n'winyi wa mutekiwa hi muteki. Kambe a n'winyi wa ndlela ayingiseta muteki, atrhava swinene hi kumuyingela. Kolahu-ke a kutrhava kwanga loku, swoswi kuhetisekile. 30Yene swifaneli akula, mine niya nitrongahateka. 31Lweyi apfaka henhla, ale henhla ka hinkwavu; lweyi ahumaka misaveni, i wa misava, kutani akhanela hi swa misava. Lweyi apfaka Tilweni, ale henhla ka hinkwavu. 32Ahlaya vumboni bya leswi aswivoniki ni kuswiyingela; kambe akuna lweyi ayamukelaka vumboni byake. 33A mhunu lweyi ayamukelaka vumboni byake, atiyisa leswaku Xikwembu Nkulukumba awadumbeka. 34Lweyi arumiwiki hi Xikwembu Nkulukumba, ahlaya maritu ya Xikwembu Nkulukumba, hikusa Xikwembu Nkulukumba amunyiki Moya kunge ha mpimu. 35Tatana arandra N'wana, kutani abeki hinkwaswu a mavokweni yake. 36Lweyi apfumelaka ku N'wana, anani vutomi lebyi byingahelikiki; lweyi ayalaka kupfumela ku N'wana, angakumi vutomi, kambe a mahlundru ya Xikwembu Nkulukumba matrhami ahenhla kwake.

Выбрано:

Yhn 3: NTX2007

Выделить

Копировать