OKHUCHIAKA 2

1Kho likulu nende esibala biahwa, nende ebiali nibilombeywemwo biosi. 2Khwitukhu liakhane nakhataru Nyasaye yali namal'le emilimochie ma nahuluukha.#Heb. 4:4,10#Okhur. 20:11 3Yamala nalaamila litukhu liakhane nakhataru ikhabi ma naliahula okhuba lichoomekhe, sichila nilio eliayahuluukhilamwo khumilimo chiobulonji. 4Ma nimbwo likulu nende esibala bialombwa.

Omukunda kwa Edeni

Olwo MWAMI Nyasaye yalomba esibala nende likulu, 5emimela chiosi sichialikhwoho tawe kata tsimwo sitsianyala okhumela tawe sichila yali nasili okhukwisia ifula ma khandi omundu siyaliho onyala okhulima liloba tawe, 6nebutswa amaatsi kelifumbi karula hasi nikanyisia esibala.

7Kho OMWAMI Nyasaye yabukula liloba okhurula hasi, nalomba omundu okhurula khulio; ma nafuura emiiya chiobulamu m'moolu kaake ma, omundu naba omulamu.#1 Kor. 15:45 8OMWAMI Nyasaye naraaka omukunda mu Edeni, Ebukwe, ma naramwo omundu owayali nalonjele. 9Yamesia khwiloba tsana siomusaala omulahi okwokhwama amatunde amalahi. Hakari womukunda kwaliho omusaala kwobulamu nende omusaala okwokhumanyia amalahi nende amabi.#Okhub. 2:7; 22:2,14

10Omuchela kwarula mu Edeni okwokhusama omukunda ne kwakabukhanamwo okhuba emichela chine. 11Omuchela kwokhuranga kulangwa Pishoni, nikwo okwabotokhana esibala siosi esia Hawila, 12esilimwo omukasa omulahi, khandi amafura kesuswa indahi kaliyo nende oruchina rwobukusi obutinyu. 13Omuchela kwakhabili ni Kihoni, nikwo okwabotokhana esibala sia Kushi. 14Omuchela kwakhataru ni Tigurisi, okubir'ranga ebukwe wa Asiria, ne omuchela kwakhane ni Efurate.

15OMWAMI Nyasaye yara omundu m'mukunda kwa Edeni khulwokhulima nende okhukulinda. 16Namubool'la mbu, “Onyala okhulia khumatunde komusaala kwosi m'mukunda, 17nebutswa orakhaliakhwo amatunde kokhumusaala kwokhumanya obulahi nende obubi tawe. Litukhu liawakhaliekhwo wakhafwe.”

18OMWAMI Nyasaye naboola mbu, “Sibuli obulahi omundu uyu okhuba yenyene tawe, namulombele omukhonyi oumukhoyele.” 19Ma nabukula liloba nalomba etsisolo tsiosi nende amanyonyi, naleer'ra omundu uyo alole amera kabikulikha. Eliira liosi eliomundu yakulikha buli sindu, nilio eliali eliira eliasio. 20Omundu yamala nakulikha etsisolo tsiosi amera nende amanyonyi, nebutswa sibulaho khubio esiakhabeye singa omukhonyi oumukhoyele tawe.

21OMWAMI Nyasaye yahelesia omundu tsindoolo tsisiro, ne olwa yali nakonanga, Nyasaye yahiinia olubafu lulwe l'lala ma nakalusia inyama habundu tsana. 22Nalomba omukhasi okhurula khulubafu yilwo ma naleer'ra omundu. 23Omundu naboola mbu,

“Uno luno nelikumba liokhumakumba kanje,

inyama khutsinyama tsiom'bili kwanje.

Alalangwa omukhasi, sichila yahiinibwa khumusaatsa.”

24Khulweyako omusaatsa alalekha samwana nende nyina, ahambaane nende omukhasiwe, ma babe om'bili mulala.#Mat. 19:5; Mk. 10:7-8; 1 Kor. 6:16; Ef. 5:31 25Ne omusaatsa uyo nende omukhasiwe, bombi bali esihechenye, nebutswa sibalolakhwo es'simba murwe tawe.

Выбрано:

OKHUCHIAKA 2: EBAIBO

Выделить

Копировать