Matius 21
21
Yefun Yesus ma kom mo kota Yerusalem tepsu yepasye
(Mrk. 11:1-11; Luk. 19:28-40; Yoh. 12:12-19)
1Yefun Yesus si bi pakon karowa ma kom mo kota Yerusalem sa, án ma kom mo kampung gato gum do Betfage mo bobuk Zaitun. Mone Yefun Yesus syogat An bi pakon ge we yo mu nyim. 2Yefun Yesus ki nai an we ne do, ”Nin ka we mu nyim mo kampung gato karo mone. Nin ka we do mu kom mone it yo, bere nin ka we ku keledai ge dik yo si bi gan gato yé jik mone. Nin ka we sombok, ete nin ka we gwat ge we ne ma mo Ji et. 3Ye to ndo nin ka we subot keledai ge we ne yo, nin ka we ki nai ye ne do, ’Men bi Yekwesu mitmo keledai ge we ré,’ sane bere ye ne misyar nin ka we dakai gwat ma sor.”
4Ye we mu ete gwat keledai ma subere suktaru gato Yefun Allah tarubot yenabi ne bor. Yenabi ki do,
5”Men ki nai nje mo Sion do,
’Nin bi Yekwesu ana ma ku nin it,
An bes An nggwa kok nde, An it mo keledai ete ma,
An it mo keledai bi gan ma.’ ”
6Sane, pakon ge we ne mu benbot suk gato Yefun Yesus syogat pa we ben ne. 7Pa we ne gwat keledai si bi gan ma, ete pa we sya bi sansun mo keledai ge we yu, orete Yefun Yesus it kem mo keledai gan ne yu. 8Yefun Yesus mubot os ne sa, yé mwa mone mit iwa ku Yefun Yesus ma tepsu án bi yepasye. Sane ye deyo sya án bi sansun mo os mit wa Yefun Yesus. Yé deyo tot kwebu mo nggwe ete gwat ma, án sya wa mbrau os gato Yefun Yesus muket. 9Yé mwa gato mu nyim si yé mwa gato boribot, án sino saiye do, ”Men un yeraja Daud bi Dat et! Ye gato Yefun Allah syogat ma ré, Yefun Allah ben sukndo su An et! Men yetu ete bes Yefun Allah gum kok sye wai o et!”
10Yefun Yesus kom mo kota Yerusalem sa, yé mwa ne sino mone me An ma. Yé mwa ne nutbot ndo nde. Yé mwa ne saiye sino ete ndo mo yu do, ”Je u ana ré ne?”
11Yé mwa gato mu wairi wa Yefun Yesus ki do, ”Yefun Yesus anare. An yenabi gato ma kadit kota Nazaret mo bur Galilea.”
Yefun Yesus sok mo Yefun Allah bi nu
(Mrk. 11:15-19; Luk. 19:45-48; Yoh. 2:13-22)
12Orete Yefun Yesus mu mo Yefun Allah bi nu. Yefun Yesus sok mo ros gato ye nggo wairi wa Yefun Allah bi nu ne de mit. An sok mone sa, An syun yé bok ne sino gato so suk mone titi wé kadit pe ne. An brek yé gato win sugum bi meja, An brek yé gato so ndabu bi bangko. 13An ki nai yé mwa mone do, ”Ye krom mo Yefun Allah bi sukdu do, ’Ji bi nu ré yo, yé kendo do nu gato yé benadi mó,’ wo nin gato so suk mo Yefun Allah bi nu mit ré, nin ben nu ré tepsu nu wa yé gato syimsi suk ne ma kem mó.”
14Ye gato gro ndu e, ye gato gwes út e ne ma ku Yefun Yesus mo Yefun Allah bi nu, ete An ben yé ne ge. 15Wo yekwesú mo Yefun Allah bi nu si yeguru agama me suk gato Yefun Yesus ben gato ben yé mwa mone yeket sa, án maskwa. Sane dom yekwesú si yeguru jam pa wokgan saiye mo Yefun Yesus do, ”Men un yeraja Daud bi Dat ne et,” sane yekwesú si yeguru maskwa wai o it anane.
16Sane án ndo mo Yefun Yesus do, ”Nan jam suk gato pa saiye ne, bado?”
Yefun Yesus ki do, ”Ji jam re. Nin jam Yefun Allah bi sukdu gato duwe do, ’Yefun Allah, Nan anato duno pa wokgan si pabom wa un Ji ndo wai o re.’ Nin baca sukdu ré mó bado, nde tó e?”
17Yefun Yesus ki sane, orete An mu kadit yé ne. An mu kadit kota ne mu mo kampung Betania. An mu kom mo Betania, ete An sem mone.
Yefun Yesus dufo mo kwe ara ke
(Mrk. 11:12-14, 20-24)
18Ik, nyotkwo gan, Yefun Yesus satu mu mo kota saresa, mo os miten, Yefun Yesus on de. 19An me kwe ara ke dik yo mo os de sa, An mu nai kwe ara bo ware, kwebo yo mo nde, wo kwenat sor re ana mó. Sane An ki nai kwe ne do, ”Kwe ara, nan yo bo o nde it anare.” Yefun Yesus dufo mo kwe ara ke, or kwe ne gu it anane.
20Yefun Yesus bi pakon me kwe ne gu sa, án yeket. Án ndo mo yu do, ”Suma ben anato kwe ara ré gu kekro sare ne?”
21Yefun Yesus ki do, ”Suk gato Ji ki ré suksangge anare, nin onyar kem mo Yefun Allah, ete nin bi sukjimnut we mone nde yo, bere nin nggiwa nin ben suk tepsu Ji ben mo kwe ara ré. Suk ne sor nde, wo bere nin nggiwa nin ki nai banbo ne do, ’Nan mu am nan dakai ngga mo sem et,’ sane bere banbo ne benbot suk gato nin ki ne. 22Nin onyar kem mo Yefun sisu sangge yo, bere nin ku suk gato nin ndek mo An ne re.”
Yepasye ndobot do, ’Je u anato bes Yefun Yesus gum kok ne?’
(Mrk. 11:27-33; Luk. 20:1-8)
23Yefun Yesus satu ma sok mo Yefun Allah bi nu de, mo ros de mit. An duno nje mone saresa, yekwesú mo Yefun Allah bi nu si ye Yahudi bi yepasye ma ku Yefun Yesus. Yé ne ndobot Yefun Yesus do, ”Je u anato bes Nan wa Nan ben suk mwa more ne? Je u anato syogat Nan ma more ne?”
24Yefun Yesus ki do, ”Ye gato bes Ji gum kok wa Ji ma ben suk more ne, bere Ji frot An gum nai nin jam, sarewo Ji waii ndo mo nin subot kwa dik yo or et. Nin ki sukdu ne ma yo, bere Ji waii ki sukdu satu mo sukdu gato nin ndobot Ji mone. 25Ji ndo mo nin do, ’Je u anato bes Yohanes wa ras nje mo syur ne, Yefun Allah bado, yetu e?’ ”
Orge yekwesu si yepasye ne kibot su yu ware, án yo ku os nde, án ndo mo yu do, ”Men ki sa u nai An ne? Men do ki do, ’Yefun Allah anato bes Yohanes’ it yo, bere An ndo mo men do, ’Sane nin yo jammo Yohanes nde wa suma ne?’ 26Wo men do ki do, ’Yetu anato bes Yohanes,’ it yo, bere men nyuwa yetu mwa more, sawe yé mwa ne maskwa, we yé mwa ne onyar kem mo Yohanes tepsu yenabi gato Yefun Allah bes ne.” 27Sane yekwesú mo Yefun Allah bi nu si ye Yahudi bi yepasye mu ki nai Yefun Yesus do, ”Men jam nde.”
Orete Yefun Yesus ki nai án do, ”Sane yo, Ye gato bes Ji wa Ji ma ben suk more ne, Ji yo frot An gum nai nin jam dom nde.”
Sukamno subot pa ge we
28”Nin nutbot sukamno ré sa u ne? Yetu ge dik yo bi pa yebris ge we. An mu ku pa futmo, ete an ki nai do, ’Pa, su kam ré yo, nan mu ben suk mo nggwe et.’ 29Pa ne ki do, ’Ji bari re.’ Wo bergan, ete pa bi sukjimnut brek kadit suk gato pa ki ne, ete pa dakai mu ben suk mo nggwe. 30Pa we bi ai waii mu ku pa dowok ete kiwa pa dowok mu ben suk mo nggwe. Pa ne ki do, ’Ya, ji mu it anare.’ Wo pa ne yo mu nde.” 31Sane Yefun Yesus ndo mo yekwesú mo Yefun Allah bi nu si ye Yahudi bi yepasye mone do, ”Kadit pa we ré, je u anato benbot suk gato pa we bi ai ki ne?”
Án ki do, ”Pa futmo.”
Sane Yefun Yesus ki nai án do, ”Suk gato Ji ki ré suksangge anare, yé gato ben sukibit sato yé gato nai sugum kadit nje wa pemerintah si nggon gato ben siri mwa ne bere án sok mo Yefun Allah bi rus-i nyim kadit nin re. {Án tepsu pa futmo, wo nin tepsu pa wari.} 32Yohanes gato ras nje mo syur da ma ete kadum os gato ndo tepsu Yefun mit wa nin muket ne ware, nin yo onyar kem mo an bi sukdu-i nde, wo yé gato ben sukibit sato yé gato nai sugum kadit nje wa pemerintah ne si nggon gato ben siri mwa ne sa, án kwet, ete án jammo Yohanes bi sukdu-i. Nin da me yé gato ben sukibit ne kwet ete jammo Yohanes bi sukdu-i, sarewo nin yo nai sukjimnut wa nin kwet ete jammo an bi sukdu-i dom nde.”
Sukamno subot yé gato mewa nggwe anggur
(Mrk. 12:1-12; Luk. 20:9-19)
33Yefun Yesus gwat sukamno dik yo o. An ki nai yekwesú mo Yefun Allah bi nu si ye Yahudi bi yepasye do, ”Nin jammo sukamno dik yo o gare et. Wam dik yo, yenggras ge dik yo bi bur det. Mone yenggras ne jan bi nggwe anggur, an gat ros wairi wa, ete an po bur wak wa yé jomuk anggur bo mó. Orete an nggo nu gwes kok wa yé ti mó subere yé mewa nggwe ne. Suk mwa ne fro, orete yenggras syogat yetu ge bok yo mewa nggwe ne. An ki nai yé bok ne do, ’Anggur ré do bo it yo, nin wat i-we, napyo wa ji, napyo wa nin.’ Orete yenggras mu mo nat yi kadit. 34Su kam gato anggur ne bo um, yenggras ne syogat an bi pakwerut ge bok yo mu mo ye gato mewa nggwe ne subere yé ne wat anggur bo napyo wa an. 35Sarewo pakwerut ne do ma sa, ye gato mewa nggwe ne but pakwerut ne, yé kwam ge dik yo e, yé gu ge dik yo kwop e, yé am dik yo su jok. 36Sane yenggras ne syogat pakwerut ge bok yo o waii mu mone. Pa ne mwa wai kadit wam futmo ne. Pa mu mone ware, ye gato mewa nggwe ne ben saga wam futmo ne o re. 37Kom mo rut sa, yenggras ne syogat an dakai bi gan mu mone. An nut do, ’Ye gato mewa nggwe ne bere jammo ji bi pa re.’ 38Wo ye gato mewa nggwe ne do me pa ne ma sa, án ki nai yu do, ’Yenggras gato bi bur det ré bi gan anare. Men gu pa kwop wé et, subere bur det ré sok mo men.’ 39Sane yé ne but pa ne, ete yé gwat pa mu kadit nggwe ne, orete yé gu pa kwop wé mo nggwe de nden.”
40Orete Yefun Yesus ndo mo yekwesú mo Yefun Allah bi nu si ye Yahudi bi yepasye mone do, ”Sane, yenggras gato bi bur det ne ma yo, bere an ben suma su ye gato mewa an bi nggwe ne?”
41Yekwesú si yepasye ne ki do, ”Bere an gu yé bok gato ben sukibit ne wé sor. Orete an syogat ye be yo o waii mewa an bi nggwe ne. Bere an kendo yé bok yo gato bere wat anggur bo napyo su an tepsu bi kam gato anggur bo um mone.”
42Sane Yefun Yesus ki nai yekwesú si yepasye ne do, ”Nin baca sukdu kwa ré mo Yefun Allah bi sukdu mó bado, nde tó e? Sukdu ré ki do,
’Jok gato yé nggo nu su ne, su ketke yé bariwa, án nut do ibit re,
ri ma sa, yé nai jok ne tepsu jok gato ndo wai wa yé nggo nu ne su o re.
Yefun Allah anato fro jok ne.
Men me, ete men nut do, suk gato Yefun ben ne ndo wai o re.’ ”
43Yefun Yesus ki o do, ”Sane Ji ki sare do, nin ben sukibit sane bere Yefun Allah syun nin wé kadit An bi rus-i. Nin bi yewis-i yo tep wa sok mone o nde, wo yewis gato iwa jammo Yefun bere sok mo Yefun Allah bi rus-i ne win nin or re. [ 44Yé mwa ne sino gato gwes ti mo jok gato ndo ne ges, bere an kaim mbrur re, wo ye gato jok gato ndo ne ges gwa it yo, bere an dat de su bur.]”
45Yekwesú mo Yefun Allah bi nu si ye Farisi jam sukamno bok yo gato Yefun Yesus ki ne sa, án jam do, Yefun Yesus kiket án. 46Sane án werwa án but Yefun Yesus, sarewo án nyuwa yé mwa gato sum mone gato nut do, Yefun Yesus anato tepsu yenabi.
Выбрано:
Matius 21: KGR
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
@LAI 2004, 2014
