प्रेरितान काम 6

हात सेवक

1ता दिह्या माय जेवी चेलान गेणती जुलूम वोदणे बाज गियी, तेवी युनानी बाषा बोलनारे यहुदि इब्रानी बाषा बोलनारा यहुदि पोर कुरकुर केरने बाज गीया, काय दाड़ीन दान माय तान रांडायेल बायकुन एर नाह केराय जात। 2तेवी ता बारा प्रेरित विश्वासीन मोंडलीह ता फाय हादिन केया, “ज्यो ठिक नाह सोतो काय आपु बोगवानान वचन सोड़ीन खावाड़ ने पिवाड़नेन सेवा केरी। 3तानकेरता एय बाय बोणहा, तुमरे माय रेन हात हाजाह एदम्याह जा चोखाला जीवा केरीन एने इकेल माय पुरा हेते, निवाड़ लिवो काय आपु ताह ज्या कामा पोर ठेराव देहु। 4पुण आमु ते विन्ता एने वचनान सेवा माय लागीन रेहु।”

5ज्यी वात आखी मोंडलीह हाजी लागी, एने ता स्तिफनुस नावान एक एदम्याह जो बोरहाम एने चोखाला जीवा माय पुरो ईतो, एने फिलीपुस, प्रुखुरूस, नीकानोर, तीमोन, परमीनास एने अन्‍ताकियान नीकुलाउसाह जो यहुदिन बोरहा माय आव जायेल ईतो, निवाड़ लेदा। 6ता न्याह प्रेरितान सामने लेन आवा, एने ता विन्ता केरीन ता पोर आथ मेल्या।

7बोगवानान वचन पोसेरते गीयो। एने यरूशलेम माय चेलान गेणती जुलूम वोदते गियी, एने चाकर्‍यान एक मोटलो सोमाज ज्या बोरहाह मान्नार बोण गीयो।

स्तिफनुसान देराणो

8स्तिफनुस गीण एने ताकेत माय पुरो एन माणहान विची माय मोट मोटला बोंगलाय ओहला काम एने चोमेत्कार देखाड्या केरतालो। 9#6:9 आजाद पोंथवाला; जा यहुदि पेल गुलाम एता पुण ता तान आजादी लेय लेदा, नाहते आजाद केराय गीया एती; ओहला ज्या माणहे एता। तेवी ता बोक्ती केरन्या गेरा माय रेन जो लिबीरतीन केवाताली, एने कुरेनी एने आलेकजांडरीया एने किलीकीया एने आसीयान माणहाम रेन थोड़ाक माणहे उठीन स्तिफनुसा हेऱ्या बोलचाल केरने बाज गीया। 10पुण स्तिफनुस ओहली इकेल एने जीवा माय बोलतालो काय ता तान सामनो नाह केर सेक्‍या। 11तेवी ता थोड़ाक माणहाह ज्यो केणेन केरता ईरेचेड़ाया, “आमु ज्याह मुसान एने बोगवानान विरोद माय चिहटान वातु केरतालो होमलेल हेते!” 12एने माणहाह एने डायडायाह एने देरेमगुरूह ईरेचेड़ाया, एने ताह देरीन मोटला पोंचाम लेन आवा। 13एने जुठा गोवाह सामने लावा जा केया, “ज्यो माणुह ज्या चोखाला मोंदिर एने मुसान नेमान विरोद माय तालताल बोलते रीथे। 14काहाकाय आमु ज्याह ज्यो कितेन होमलेल हेते काय ज्योच यीशु नासरी ज्या मोंदिराह तोड़ देय, एने ती रितीह बोदेल देय जो मुसो आपुह होपेल हे।” 15तेवी आखा माणहे जा मोटला पोंचा माय बोह रियेल एता, स्तिफनुसा पोर हास केरीन नेजेर टाक्या, ते तान मुय हेरोगदुतान गेत देख्या।

Выбрано:

प्रेरितान काम 6: NTNii2020

Выделить

Копировать

Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь

The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020

Узнать больше о खेरलो वचन नोवालो नियम