Luke 22

Jisu Thatnasik ah chongminsuuk

(Matt 26:1-5; Mk 14:1,2; Jn 11:45-53)

1Chol inchelmak waipool bakna kahoi tia inkoi Rakaanna kahoi phakha hongnaijei. 2‘Khale inruoiya thiampu kalian khat-um Dan karu ngai'n Jisu kha angtho thoa thatsikme tia ruuk ah inleiensui, takkha inmani'n mipui kha um inleichi.

Judas in Jisu Kajuorsik ah Ileizoot.

(Matt 26:14-16; Mk 14:10,11)

3Seitan in Judas Iscariot inti asiamruoi soomleini ngai karra inchel amadiang aleiluut. 4Khale inruoiya Judas in thiampu kalian ngai khat-um biak-inn kangaak kalok kalian ngaidiang asiya Jisu kha angtho thoa nangnidiang kanapesikme tia inlei inbiak. 5Inmani'n ama kha inleirokpui halli sial penasik ah inlei inzootna. 6Judas in aphakacha enna mipui ngai minjetleiya inmani diang Jisu penasik aleizootpi.

Jisu'n Rakaanna Kahoi Bubak nasik ah Insuukna

(Matt 26:17-25; Mk 14:12-21; Jn 13:21-30)

7Khawa makheiya chol inchelmak waipool bakna nikhuo, tichu rakaanna kahoi sik-ah keelngamteii inthatnasik nikhuo kha hongtungjei. 8Halli Jisu'n Peter li John diang hin tipiya aleitir, “Si inlang rakaanna kahoi bu kha eini baksik-ah juominsuuktaru.””

9Halli inmani'n Jisu diang inheirakel, hunme keini'n minsuuknasik nimanuom?

10Ama'n aleimasang, “Nangni'n khuopui suungnga ningsi phakhan, miring inkhat beella tui choiya kaheiwa inkhat intongpui ningte, ama kha jui inlang aluutna innkhan juoluutru, 11halli khawa inn mapupa diang tipiru, “‘Karu'n hongti, kei kasiamruoi ngaile Rakaanna kahoi bu kinbaknasik inn kha hunme?’’ 12Ama'n chung-inn khan inndunglai kaloktak angrakip indoon dimma kaomkha namingmute, khawa khan leiminsuukru.””

13Inmani'n ang rakip Jisu iti angnga inleimujei, halli inmani'n rakaanna kahoi bu kha inleiminsuuk.

Pumi Zaansak Minsuuk

(Matt 26:26-30; Mk 14:22-26; 1 Cor 11:23-25)

14Khat-um apha juotung phakhan, Jisu'n khamtuolla ama tirton ngai khale inlei in-ong, 15Ama'n inmani diang aleiti, “Kei'n kapoongnasik hongtung ma-ah hiwa Rakaanna kahoi bubaksik hi kamanuom theijei. 16Ajarchu kei'n kanati, Pathian Rengram kha juotung maklaiseng kei'n bakkhai nuningjei.””

17Halli Jisu'n rabing kha aleiya Pathian diang minpaak ah ati, “Hiwahi lei-inlang nangni karra semru. 18Ajarchu kei'n nangnidiang kanati, atuunna inphut Pathian Rengram kha juotung maklaiseng hiwa theibomju hi kei'n inkhai nuningjei.””

19Halli ama'n waipool kha aleiya Pathian minpaak ah halli akatherra inmani diang hin tipiya aleipeii, “Hiwahi nangni sik-ah kinpesuok kei kapumtak kha eii, hiwahi kei ningna ngaidonnasik ah thoru.”” 20Khawale in-angnga waipool kha inbak suoli rabing kha aleiya aleiti, “Hiwa rabinghi nangni sikbeiya akasar kei thisen makheiya inzootna kathar kha eii.#22:20: Larik lekkha ah chu Jisu iti ching hi hapmu, Hiwahi kei kapum kha eii alam 19 halli 20 raja um eii.”” Jer 31:31-34

21“Takkha, enru! kei kanajuorsik mipa kha keile khamtuolla kin omsuom! Minpkla 41:9

22Miring sapachu Pathian izoot nuoiya athisik eii, takkha ama kajourpa khachu angtuk poongna kaesikme!””

23Halli inmani karra inlei inkel, atukhame hiwa kathosik.

Chungkanung Esik jarra Murruolsiak

24Halli inmani karra tume kalokkhet tijarra inmani'n murruolsiak inleitho. Matt 18:1; Mk 9:34; Luk 9:46

25Jisu'n inmani diang aleiti, “Zaatlop reng ngaichu ami ngai chungnga ranak kanei khat-um waikaroon ngai in eii, “‘Mipui ngai sap kin eii inmani'n inleiti.’’Matt 20:25-27; Mk 10:42-44

26Takkha nangnidiang chu etheinuni, khaneek achu, nangni karra kalokkhet pa'n naipang khet angrase, halli lamkakei pa'n suok ka-ang erase. Matt 23:11; Mk 9:35

27Tichu atukhame akalokkhet, kabaksik-ah in-ongpa khabe, emakli nangni sepa kanathopa khabe? Halle kabaksik-ah in-ongpa kha emak niabe, takkha keichu nangni sepa katho inkhat kha ka eii.”” Jn 13:12-15

28“Nangni ngaihi ning eii kei poongna rakip ah kanahong deipui. 29Halli Kapa'n kei diang wairoonnasik ranak i-nape angnga, kei innum nangnidiang khawa angnga kanapesik eii. 30Nangni'n kei Rengramma kei khamtuol khan kabak ka-in ning esik eii, halli nangni'n reng in-ongna munna in-ong ningta Israel zaat soomleini chungnga wai ningroonsik eii.

Peter in Jisu Zootmaksik jarra Jisu'n Iril

(Matt 26:31-35; Mk 14:27-31; Jn 13:36-38)

31“Simon, Simon! rangairo! Seitan in nangni ngaihi leikanei pa'n gehu li gehu rasi ikhoithen angnga nangni ngai um nakhoithen nasik inzootpijei. 32Takkha, Simon, kei'n nang ngamna kha mangmak nasik ah Pathian kananipi, halli nang in namalung nathuulnook phakhan, na-u nanai ngamna kha mincheetro.””

33Ama'n Jisu diang aheiti, “Pumi, Kei'n nangle mikhumna khat-um nangle kathisik-ah ka-inringchak ah kaomjei.””

34Jisu'n aleimasang, “Peter, kei'n kanati”” “Awini zaan woithum kei nazootmong natimak laiseng arkhong kha khuongnuni.””

Sialkok, khouchou halli Chem

35Khale inruoiya Jisu'n ama siamruoi ngaidiang aheiti, “Kei'n sialkok, khouchou emakli kekok choileiya kanaminsi phakhan, ang ning-insam ame?””

“Iteii insam mung”” tia inmani'n inleimasang. Matt 10:9,10; Mk 6:8,9; Luk 9:3; 10:4

36Jisu'n ati, “Atuunchu”” “Tu ka-ang in sialkok emakli khouchuo ningnei inchu choitaru, halli atu ka-ang in chem ningneimak inchu ningpuondiar juor inlang inkhat rachoru. 37Ajarchu Kei'n nangnidiang kanati, “‘Ama kha manu karoon ngai Poongna kha adei’’ tia kei kajarra iril Pathian chongkha inthiangnga huui latungsik eii, ajarchu kei kajarra lei-injia rakip kha huui hongtung sikjei.””Isa 53:12

38Halli inmani'n inleiti, “Enro! Pumi hiwahin chem inni om!””

Halli ama'n inmani diang aleiti,#22:38: Hiwahin hunjei; emakli Khawa khan hunjei. “hiwahin hunjei!””

Jisu'n Olives Chingnga Pathian Ini

(Matt 26:36-46; Mk 14:32-42)

39Halli Jisu'n aheisuok ah Olives chingtiang a-ngai angnga aleisi, halli asiamruoi ngai'n inleijui. 40Ama'n khawamun khan atungli inmani diang aleiti, “Matheemna ah chulmak nasik nangni'n Pathian niru.””

41Ama'n lungtum inkhat nideengjuon inkardanna inmani diang makheiya alei inlaak, halli kemurkhup thep ah Pathian aleini. 42Ama'n aleiti “Kapa,”” “Nang nalungduo e-inchu, Kei diangnga inphut poongna rabinghi nakhaipiro, takkha kei kalungduo emarase, nang nalungduo erase.”” 43Marwaan makheiya Pathian tirton inkhat juominlarra amadiang ranak ngarna aleipeii. 44Khat-um ama'n poongnakhan asipjarra kheella aleini, halli ama rathan kha neipilla thilom kasar angnga aleisar.#22:44 Leiilaak larik ah achu alam hapmu.

45Halli ama'n Pathian nina makheiya ahong intheili ama asiamruoi ngai koolla aheiwa ah inmanikha inmalung poonghei jarra inleizaalbirra inleiom kha ama'n ajuomu. 46Jisu'n inmani diang aleiti, “Angsik ah ningla zaalme? Inthei inlang matheemna khan namator maknasik Pathian niru.””

Jisu Surna

(Matt 26:47-56; Mk 14:43-50; Jn 18:3-11)

47Jisu'n chong arilla omleitak phakhan, mi katamtak inheiwa ah asiamruoi soomleini karra inchel Judas inti ama'n lam heikeiya Jisu kha juonaiya mazoop sik aleitho. 48Takkha Jisu'n amadiang aleiti, “Judas, Miring sapa hi mazoop nata najuorsik bejei?””

49Amale kaom asiamruoi ngai'n angme kasuoksik tihi inleijet phakhan, inmani'n inleiti, “Pumi, keini'n chemma tukjeinungbo?”” 50Halli inmani karra minring inkhat in Thiampu kaliankhet suok inkhatpa changtiang kuor aleitukthakpi.

51Takkha Jisu'n aleiti, “Hiwahin hunjei!”” Ama'n akuor kha katook piya mindampi nookjei.

52Khawa suoa Jisu'n Thiampu kalian ngai, biak-inn kangaak, kalok kalian ngai, khat-um katar ngai'n ama kasur inheiwa phakhan inmani diang aleitipi, “Mi kathamak kasursik angnga chem khat-um ramol ningchoiya ningheiwame? 53Kei'n nangnile biak-inna nisuo rakip kaomlai khan nangni'n nasursik thomakchu, takkha nangni'n hiwa thonasik apha ejei ajarchu kaziing in wai roonjei.”” Luk 19:47; 21:37

Peter in Jisu Zootmakna

(Matt 26:57,58,69-75; Mk 14:53,54,66-72; Jn 18:12-18,25-27)

54Inmani'n Jisu kha insurra Thiampu kaliankhetpa inna inleiruoi, halli Peter in inmanile inkar jenna aleijui. 55Halli inmani'n tuollaidung laiya mei inlathoa inraya ah inlei in-ong, Peter um inmani ngaile alei in-ong. 56Halli suok numeisa inkhat in Peter kha khawa meikoolla in-ong aheimu phakhan numeisanu'n Peter diang ahei enna aleiti, “Hiwa mipa hium Jisule kaomsuom ah eii!””

57Takkha Peter in leizootmak, halli “numeisanu diang aleiti, ama kha kei'n jetmong.””

58Halli apha lekkha athengsuo nuk miring inkhat in aheimunook ah aleiti, “Nang um inmani karra na inchelnu!””

Takkha Peter in aleimasang, “Mipa, kei e-mong!””

59Phadan inkhat thengnookli miring inkhat innum natheiya aheitinook, “Kadik kha eii hiwa mipa hium Jisu le kaomsuom ajarchu ama hi Galilee mi eii.””

60Takkha Peter in aleiti, “Mipa, Kei'n inthiangnga nang etikha jetmong”” halli chong arilla omlaitak khan arkhong kha ahongkhuongjei.

61Pumi'n ahei inlet ah Peter diang ahei-en, halli Peter in Pumi ileiti chongkha ahongngaidon, “Wini arkhong kha hongkhuong ma-ah nang in kei kha woithum najetmong natisik eii.”” 62Halli ama'n asuok ah malung intooktheiya aleichapjei.

Jisu kha Indeii Khat-um Inleiwuok

(Matt 26:67,68; Mk 14:65)

63Halli Jisu kangaak mi ngai'n ama kha inlei innuipui khat-um inleiwuok. 64Inmani'n ama kha amit inkhumpiya inleirakel, “Tunme nang kanawuok? heitiro!”” 65Halli inmani'n amadiang rangaizoot kaommak chongkase angjet inleiril.

Jisu Uparup ngaidiang Inleiruoi

(Matt 26:59-66; Mk 14:55-64; Jn 18:19-24)

66Khawasuoli khuo ajuowarra, uparup ngai, thiampu kalian ngai, halli Dan karu ngai intuupna inleineiya Jisu kha chongtanna inna inleiruoiya inleiti, 67“Keinidiang natipiro,”” “nang Christa kha naebe?””

Takkha ama'n aleiti, “Kei'n kanatipi innum, nangni'n ngamna nutun. 68Halli kei'n nangnidiang rakelna kananei innum nangni'n namasang nutun. 69Takkha atuun makhei achu Miring sapa hi ranak kanei Pathian ama kutchangtiang in-ongsik ejei.””

70Halli inmani'n rakip in inleiti, halle, “Nang Pathian sapa na-ebe?””

Ama'n inmani diang aleimasang, “Nangni'n kei ka-ei ningna tijei.””

71Halli inmani'n inleiti, “Eini'n iteii sakhi leisik arei ommakjei! ajarchu amur tak-in irilkha eini'n nijetjei!””

Выбрано:

Luke 22: KHMNT

Выделить

Копировать