La Cantica di li Cantici 5
5
1Vegna lu me dilettu ’ntra lu so ortu, e si manciassi li frutti di li so puma. Vinni ’ntra lu me jardinu, soru mia spusa, arricugghivi la me mirra cu li mei aromi: mi manciavi la vrisca cu lu meli miu, mi vippi lu me vinu cu lu me latti: manciati, e biviti, amici, e ’mbriacativi, o carissimi.
2Iu dormu, e lu me cori vigila: la vuci di lu me dilettu, ca tuppulia: Aprimi, soru mia, amica mia, palumma mia, immaculata mia: giacchì la me testa è vagnata di l’ acquazzina, e li me capiddi di li stizzi di la notti.
3Mi spugghiavi di la me vesti, comu farrò a mittirimilla? mi lavavi li pedi, comu mi l’ allurdirrò di novu?
4Lu me dilettu trasiu la manu pri la ’ngagghia di la porta, e li me visceri si commossiru a lu tuccari.
5Mi susivi, pri apriri a lu me dilettu: li me manu scularu di mirra, e li me jidita si jincheru di mirra purissima.
6Grapivi la toppa di la me porta a lu me dilettu: ma iddu s’ era ritiratu, e passatu avanti. L’ anima mia si squagghiau, appena iddu avia parratu: lu circavi, e nun lu truvavi: lu chiamavi, e nun mi rispunniu.
7Mi truvaru li guardii, ca firrianu pri la cità: mi vastuniaru, e mi fireru: mi livaru lu mantellu li guardiani di li mura.
8Vi pregu, figghi di Gerusalemmi, si truvirriti lu me dilettu, di diricci, ca ju languisciu d’ amuri.
9Qual’ è lu to dilettu fra li diletti, o la cchiù bedda di li fimmini? qual’ è lu to dilettu fra li diletti, pri cui tu nni prigasti accussì?
10Lu me dilettu è biancu e russu, lu megghiu ’ntra milli.
11La so testa è comu l’ oru finu: li so capiddi comu li fogghi di li parmi, niuri comu lu corvu.
12Li so occhi comu li palummi supra li ruscelli di l’ acqui, ca sù lavati cu lu latti, e posanu vicinu a l’ abbunnanti surgenti.
13Li so masciddi comu un ariola d’ aromi chiantati da un profumeri. Li so labbra sù gigghi, ca distillanu mirra perfetta.
14Li so manu d’ oru turniatu, chini di jacinti. Lu so ventri d’ avoliu, ’ntarsiatu di zaffiri.
15Li so gammi sù culonni di marmu, ca sù pusati supra basi d’ oru. Lu so aspettu comu lu Libanu, distintu comu li cedri.
16La so gula suavissima, e lu tuttu desiderabili: tali è lu me dilettu, e chistu è lu me amicu, o figghi di Gerusalemmi.
17Unni jiu lu to dilettu, o la cchiù bedda di li fimmini? unni si diriggiu lu to dilettu? e lu circhirremu cu tia.
Выбрано:
La Cantica di li Cantici 5: SCN
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
First published in 1860 and 1861.