Matius 4

Si Yesus pinangepé'an i kikiiten é sétang

(Luk. 4:1-13; Mrk. 1:12-13)

1 # Ibr. 2:18, 4:15 Kekawus in itu si Yesus iwali i Roh Le'nas an tana' kapayasan em pangepé'an i kikiiten é sétang. 2Sia muasa eng kauréna epat ngapulu' ngando wo epat ngapulu' ngawengi, wo Sia makapendamo in arem. 3Wo si kikiiten é sétang mai wo kumua, “Ampa'paan Ko Toyaang i Amang Kasuruan, peréntano sé watu anio' wosama' mamuali roti.”

4 # Ul. 8:3 Taan isowat i Yesus, “Ang Kitap Le'nas aipatic in tana'i,

‘Sé tou menonou ra'ica asaloke' i roti,

taan ka'i asi Taar

si cumesot am ba'ba' i Amang Kasuruan owo.’ ”

5Kekawus in itu, si Yesus iwali ka'i i kikiiten é sétang ang Kota Le'nas, wo itulungna Sia am buwungan im Balé Le'nas. 6#Mzm. 91:11-12Wo icuana a si Yesus, “Sa Ko Toyaang i Amang Kasuruan, ilepoko mio' en owak-Mu! Ampa'paan ang Kitap Le'nas aipatic andumoro' Ico in tana'i,

‘Iru'du' oka i Amang Kasuruan sé malaékat-Na

en sumépa Ico

maké ing kama éra,

wosama' eng kécéi-Mu ra'ica tumena am batu.’ ”

7 # Ul. 6:16; Luk. 4:12 Taan icua i Yesus ai sia, “Awéan ka'i en aipatic ang Kitap Le'nas in tana'i,

‘Tioo ko mangepé' a si Casuruan,

Amang Kasuruanmu.’ ”

8Kekawus in itu iwali ka'i i kikiiten é sétang si Yesus a si esa kuntung rumangka-rangka'. Ituru'na asi Yesus pakasa eng kakolanoan ing kayo'baan wo eng kasiyaanna. 9Wo icuana a si Yesus, “Pakasa en itu iwééku oka ai Co, sa Ko kumundu en sumiri' yaku.”

10 # Ul. 6:13; Luk. 4:8 Taan icua i Yesus ai sia, “Mangém ko, é kikiiten é sétang! Ang Kitap Le'nas aipatic in tana'i,

‘Ico musti kumuru en sumiri' a si Casuruan,

si Amang Kasuruanmu,

wo wayake' Sia em patus pengaselewiranmu.’ ”

11Kekawus in itu, si Yesus itela'u i kikiiten é sétang. Wo sé malaékat mai en sumelewir Sia.

Si Yesus tumo'tolo kumua in taar i Amang Kasuruan ang Galilea

(Mrk. 1:14-15; Luk. 4:14-15)

12 # Mat. 14:3; Mrk. 6:17; Luk. 3:19-20 Kelinga i Yesus sapaoka si Yohanes Mabaptis tinangka'o wo ayuntepo am bui, wo si Yesus sumingkir angé ang Galilea. 13#Yoh. 2:12Wo itela'u-Na e Nazaret wo mento' ang Kapernaum, an tembir in lour Galilea an sangkum in Zebulon wo Naftali. 14En itu mamuali, wosama' malekep en taar si aicua i nabi Yesaya,

15 # Yes. 9:1-2 “En tana' Zebulon wo en tana' Naftali,

an tembir in lour Galilea, an lewet in doyongan Yordan,

en tampa itu paento'an é bangsa ra'ica Yahudi.

16Sé tou sé menonou ang kariréimbengan

isuméréo in Sendot wangko',

wo séra sé maento' an tampa

si kinawasa im papaté,

ai séra mantango mai en Sendot.”

17 # Mat. 3:2 An tutuw itu si Yesus tumo'tolo kumua a sé tou, “Mape'diso mangé, ampa'paan eng Kakolanoan i Amang Kasuruan makatawio!”

Si Yesus tumowa sé murit-Na kataré

(Mrk. 1:16-20; Luk. 5:1-11)

18An tutuw i Yesus imawaya' an tembir in lour Galilea, sérén-Na sé rua metuari, séra ituo si Simon si patuulen Petrus wo si Andreas tuarina. Séra ang karoro'an malombo' in lolombo' an lour, ampa'paan en tawoien éra mengaéré sera'. 19Icua i Yesus ai séra, “Mayo, kumiito mai Yaku! Émaan-Ku oka kamu mengaéré tou eng kumiit Yaku.” 20Kelinga in itu, makala'us itela'u éra en lolombo' wo kumiit si Yesus.

21Kekawus in itu, si Yesus lumala'us im bawayaan wo kaséréan-Na ka'i sé rua metuari walina toya-toyaang i Zebedeus, sérao si Yakobus wo si Yohanes tuarina, mewali-wali wo si amang éra si ang karoro'an mawutul in lolombo' an untep in londéi. Séra towan i Yesus. 22Wo makala'us itela'u éra en londéi wo si amang éra, wo kumiit si Yesus.

Si Yesus sumusui wo sumama' sé tou sumakit

(Mrk. 1:16-20; Luk. 6:17-19)

23 # Mat. 9:35; Mrk. 1:39 Wo si Yesus mangé ka'i lumi'cir im pakasa ing Galilea wo masusui am balé-walé paapo'an é agama Yahudi. Sia kumua in Abar Kaaruien andumoro' ing Kakolanoan i Amang Kasuruan. Wo samaan-Na waya sé tou am pakasa in sakit wo sé tou ra'ica lekep en owak. 24Wo icaseraro en abar andumoro' i Yesus am pakasa in Siria, ampa'paan in ituo séra mai ai Sia. Wo iwali éra mai pakasa sé tou sé membam-balinaan en sakit, sé mawendu, sé rinasuk é sétang, sé sumakit ayan wo sé késo' wo séra im baya sinama'-Na. 25Ampa'paan in ituo sé tou keli meréro-rérot makiit si Yesus. Séra an sangkum ing Galilea owo, Dekapolis, Yerusalem, Yudea wo an lewet in doyongan Yordan wo mai am bitu.

Выбрано:

Matius 4: TNT

Выделить

Копировать