Amatiyu 5

Oshpa baŋ a nyum Akũ

1Eyesu a ka moare nzenze, nga a vre ezhim a dzu ma. Moanwyeotum baŋ a shki a ta ŋa a kpaŋ. 2Aŋa nga a zga esĩ a nye mo a lu mi le,

Oraŋ ba adlidzi

3Oraŋ o wo ma okyku moa la a yi ba moa a sheŋ anye, okyku eshi Oreŋ Ongyeŋ o wo o mo angyiŋ!

4Oraŋ o wo ma okyku moa la a la a gbu ogbrẽ, okyku eshi Ahogbrẽ á gbu mo esõ obiŋ!

5Oraŋ o wo ma okyku moa la a wo la esõ ble-ble, okyku eshi moa á hwiŋ ekplo ba Ahogbrẽ a hwim okyku mo!

6Oraŋ o wo ma okyku moa la a shri esõ mo a zga okyku o kpo ayakplo ba Ahogbrẽ a klo,

okyku eshi Ahogbrẽ á shri ekployaŋ a mbo á shri á da mo!

7Oraŋ o wo ma okyku moa la a ka moahwõ ayiekŋe, okyku eshi Ahogbrẽ á ka mo a mbo ayiekŋe!

8Oraŋ o wo ma okyku moa la a wo la esõ pse, okyku eshi moa á ka Ahogbrẽ!

9Oraŋ o wo ma okyku moa la a shri onyuŋokpo a shri a zga agʼbaha moarehwĩ,

okyku eshi Ahogbrẽ á bzi moahi lo moanwye baŋ!

10Oraŋ o wo ma okyku moa la a la a kpo ewu okyku moa a kpo ayakplo ba Ahogbrẽ a klo,

okyku eshi Oreŋ Ongyeŋ o sheŋ o wo o mo.

11Agimi e gno oraŋ angyiŋ omba ba moare a la a dzĩ gimi, nga a la a kpo gimi efye, nga a la a sheŋ akpro a ghwo gimi okyku bimi e lu me ma. 12Agimi e kpo ovye, nga e gno oraŋ, okyku eshi egbre egagre e wo ma Ongyeŋ okyku gimi. Moare a kpo pa la moarehwĩ ba Ahogbrẽ a hom mo otum a mbo ekakahelo angyiŋ omba la o sheŋ o gre mi.

Eŋe ta la ayimom

13Agimi e wo eka eŋe angyiŋ obiŋ hi. O wo ba oraŋ o kpu eŋe le, moa á kpo á gbu moa a bla a shri oraŋ lo a shri a ghwo ma nga mbo. E wo owlama nga mbo, okyku eka he moa á shri lo á ygi a bi, nga moa á pre lo adga.

14Agimi e wo eka ayimom angyiŋ obiŋ hi. Odne ba moa a mbdzi lo akũ ongyeŋ o ghre o gbu mbo. 15Arekyeŋ a la a ta ovo emgbuovo nga, a shri atku a shum lo mbo. Ambo a la a shri emgbuovo lo a shri a zga ambgu okyku o da ayimom a tra aku lo. 16Ekakahelo, o raŋ o gre ba agimi e da ayimom bimi a tra egi ayi moarehwĩ, okyku o da mo a ka otum adlidzi bimi e la e kpo, nga okyku o da mo a hlu Adigi la a wo Ongyeŋ eshko.

Onyenye eshri Odaŋ

17Agimi e sko lo e zga eka ba ame e ba okyku o bga Odaŋ ba Omusa, ta la onyenye moarehwĩ ba Ahogbrẽ a hom otum mbo. Ame e ba okyku o bga lo angyiŋ mbo, ambo okyku o wre lo pim. 18Agimi e tne aga e ka! Odzudzu ba Ongyeŋ, ta la obiŋ hi pyeŋ, moa á nyiŋ ekplokyeŋ ku-ku eshri ba Odaŋ he lo mbo. Amom-abgo ba ayakplo pyeŋ a mbo, moa á nyiŋ mbo. 19Okyku eka he, areyaŋ a mbo la a pre odaŋ otsitsi a mbo, nga a sa a nye moahwõ a da mo a pre lo le, aŋa á wo ekplokyeŋ angyiŋ Oreŋ Ongyeŋ mbo. Nga areyaŋ a mbo la a la a kpaŋ odaŋ lo, nga a nye moahwõ a da mo a kpaŋ lo, aŋa á dzu la ekʼpo Oreŋ Ongyeŋ. 20Ame e lu e da gimi, agimi é kpo é gbu bimi e yi Oreŋ Ongyeŋ, o wo ba odzudzu bimi o wo odzadzi o gre moa la a nye odaŋ, ta la odzudzu moaEfarisi.

Onyenye eshri olom

21Agimi e sheŋ e gno eka ba moa a nyuŋ moarehwĩ ogbyi a lu mi le, Agimi e bga ebga mbo, areyaŋ a mbo la a bga ebga moa a sõ ŋa ombgu. 22Ambo ohuhuhi ame e lu e da gimi, areyaŋ a mbo la a kpo olom ta la anáŋ, moa á sõ ŋa ombgu, nga areyaŋ a mbo la a bzi anáŋ ma Arehwĩ ba ototno, moa á shri ŋa á yi egi ayi moandakʼpo. Nga areyaŋ a mbo la a bzi anáŋ ma Adro ba ototno, a wo oyla baŋ á yi enzheovo. 23O wo boŋ o shri oshriondba o shri o gre ambgu okyku o shri o ndba Ahogbrẽ, o wo boŋ o ka boŋ o wo odlokyeŋ ma ta la anóŋ le, 24o dzu lo o zga ma egi ayi ambgu lo, nga o zhiŋ ogbu o yi o sla lo o ghwo ayi ka la ŋa ayga o ba o shri oshriondba o shri o ndba Ahogbrẽ.

25O wo ba arekyeŋ a shri ŋo a gre akuombgu le, aŋo o ri ekpom ka la ŋa omba bimi e yi e wo otsotse. Omba ba bimi e gre akuombgu le, aŋa á da moanwyeopi á vu ŋo á shri á ta aku. 26Aŋo ó dzu ahe lo, o tsa boŋ o hre engre boŋ pyeŋ.

Onyenye eshri orieshra

27Agimi e sheŋ e gno ba moa a sheŋ a lu mi le, Agimi e ri eshra mbo. 28Ambo ame e lu e da gimi, areyaŋ a mbo la a ka ashe nga a gro ayi baŋ le, aŋa a ri eshra ka la ŋa esõ baŋ. 29Okyku eka he, o wo ba eyi boŋ ba obgori e la e doŋ o kpo odlobi le, aŋo o gʼbu lo o shri o ta a bi! O wo odzi o gre boŋ o gbaŋ okro okyekyeŋ sha egʼba boŋ, o sku boŋ o yi enzheovo la ango egʼba boŋ pyeŋ. 30O wo ba obgori boŋ o la o doŋ o kpo odlobi le, aŋo o kplu lo o ta a bi! O wo odzi o gre boŋ o gbaŋ okro okyekyeŋ sha egʼba boŋ, o sku boŋ o yi enzheovo la ango egʼba boŋ pyeŋ.

Onyenye eshri ba obgaeble

31Moa a sa a lu mi le, Areyaŋ a mbo la a klo o kyu ashe baŋ abgo le, o dzu omgbybi baŋ a ta akpa o bga eble a shri a daŋ. 32Ambo ohuhuhi, ame e lu e da gimi, o wo ba are a klo o kyu ashe baŋ abgo le, o wo ashe lo a wo blibli angyiŋ mbo le, alom lo a wo la ombgu ma baŋ a daŋ a ri eshra, o wo baŋ a kyu alom ahe. Alom la a kyu edgu ashe he lo a mbo, a ri eshra angyiŋ.

Onyenye eshri okʼpiashum

33Agimi a mbo e sheŋ e gno moa a lu a da moare ayga a lu mi le, Aŋo o nyiŋ ohwihwim boŋ mbo, ambo aŋo o bli ekplo boŋ o kʼpi ashum boŋ ó ba o kpo egi ayi ba Adigi-odne. 34Ambo ame e lu e da gimi, agimi e kʼpi ashum omba bimi e hwim mbo. Agimi e kʼpi ashum la Ongyeŋ mbo, okyku eshi alo o wo emgbakyiŋ oreŋ ba Ahogbrẽ angyiŋ. 35Agimi e ka e kʼpi ashum la obiŋ hi mbo, okyku eshi alo o wo okro odzudum ba adga baŋ angyiŋ. Agimi e kʼpi ashum la Orushalima mbo, okyku eshi alo o wo osku ba Anyuŋ-areŋ angyiŋ. 36Agimi e ka e kʼpi ashum la eshri bimi mbo, okyku eshi agimi e wo ekʼpo ma bimi e da amasẽ eshri bimi akyakyeŋ a zhiŋ a dzu akyle o mbo le ahwĩ mbo. 37Agimi e bmi, o mbo le e tla, nga o khwo. O wo bimi e klo elomkyeŋ nga le, Areabi lo angyiŋ a da gimi e la e lu a mo.

Onyenye ehsri ohreokŋe

38Agimi e sheŋ e gno eka ba moa a lu mi le, Arekyeŋ a kpo ŋo akplokyeŋ le, aŋo o kpo ŋa ma! 39Ambo ohuhuhi ame e lu e da gimi, arekyeŋ a ta ŋo ezhim le, aŋo o ta ŋa ambgu. O wo ba arekyeŋ a sheŋ ŋo obgo agba ba obgori le, aŋo o zhiŋ agba ba obgoehre o ta ŋa ma. 40Nga o wo ba arekyeŋ a shri ŋo a gre akuombgu okyku ariga boŋ le, aŋo o shri ariga agre boŋ o ta ŋa ma. 41O wo ba anwyeakyuŋ-akyeŋ a vu ŋo, ma aŋo o shri ŋa anzho okyku emil ekyeŋ le, o shri ŋa alo emil eha. 42O wo ba arekyeŋ a vẽ ŋo okyku emakyeŋ le, aŋo o shri lo o shri o daŋ. O wo ba arekyeŋ a klo o kʼpo emakyeŋ okro boŋ le, aŋo o kʼpo ŋa alo.

O klo moafpu

43Agimi e gno ba moa a lu mi le, Aŋo o klo moakyeŋoazba, nga o tla moafpu ŋo. 44Ambo, ohuhuhi ame e lu e da gimi, agimi e klo moafpu gimi, nga e fa olu e tne aga moare la a la a kpo gimi efye, 45okyku o da gimi e dzu moanwye ba Adigi la a wo Ongyeŋ. Okyku eshi aŋa a la a da olum o la o tra moareabi, pa la moareadzi a mbo pyeŋ. Nga aŋa a la a da ogbu o ba okyku moareabi, pa la moareadzi a mbo pyeŋ. 46Okyku eshi aŋo o klo o da Ahogbrẽ a shri egbre a shri a doŋ o wo boŋ o la o klo moare la a la a klo ŋo sha? Moare la a la a yga ewaŋ a mbo a kpo eka he angyiŋ! 47O wo boŋ o la o lu odlo pa la moakyeŋoazba sha le, aŋo o kpo ekplokyeŋ la e wo ondundum pa la moahwõ? Moaevbu a mbo a la a kpo eka he lo! 48Agimi e bli shasha, eka ba Adigimi la a wo Ongyeŋ a bli shasha.

Выбрано:

Amatiyu 5: EGONT74

Выделить

Копировать