OBUCHACHILO 11
11
Omunaara kwa Babuloni
1Mukhuchaaka, abandu beshialo shiosi basunganga mulimi lulala, ne khandi balinji namakhuwa matiiti. 2Ne olwa abandu bahuuya nibarula ebukwe, boola habundu hashiangalamwe, mushialo shia Babuloni ne nibamenyaho. 3Kho nibaboolelana abeene khu beene bari, “Chende khulonje amatofari mana khukasambe kayie obulayi.” Mana nibaba nende amatofari mushilenje shiamachina nende ihula yokhumbakha. 4Kho nibaboola bari, “Chende khwiyumbashile litookho lirambi, eliobutenje bwalio buula mwikulu, mana khwikaasilie eliira kho mbu, khuleshe okhusalaasibwa khushialo shiosi.”
5Mana OMWAMI Nyasaye niyekha khushialo, okhulola litookho nende omunaara, ebiabandu abo bali niboombaashe. 6Mana OMWAMI Nyasaye naboola ari, “Lola, abandu bano boosi naboluyia lulala, ne khandi baboolanga mululimi lulala. Buno nobuchaachilo butswa obwamakhuwa aka balakhola. Ne libulaho elia balakhaywa okhukhola khu koosi akabenya tawe. 7Chende khwishe khutsie aha bali mana khukoyasie aka baboola mululimi lwabwe kho mbu, baleshe okhuhulilisania tawe.” 8Kho OMWAMI Nyasaye nabasalaasia buli habundu khushialo, ne nibalekha okhumbakha litookho elo. 9Niko akachila litookho elo nililangwa mbu, Babuloni, okhuba niho aha OMWAMI Nyasaye yakoyasiliaho amakhuwa kolulimi lwa abandu boosi. Ne okhuchaachila ebise ebio, yabasalaasia buli habundu khushialo.
Abolwibulo lwa Shemu
(1 Akak. 1:24-27)
10Bano nibo abolwibulo lwa Shemu. Shemu nali nemiyika eshikhumi shilala, emiyika chibili nichiwele olunyuma lwomuyembo kweifula, yebula Aripakishadi. 11Ne olunyuma lwokwibulwa khwa Aripakishadi, Shemu yamenya emiyika ebikhumi birano, ne niyebula abaana bandi abasiani nabakhaana.
12Olwa Aripakishadi yali nemiyika amakhumi kataru nachiraano, yebula Shela. 13Olunyuma, Aripakishadi yamenya emiyika chindi ebikhumi bine nachitaru, ne niyebula abaana bandi abasiani nabakhaana.
14Olwa Shela yali nemiyika amakhumi kataru, yebula Eberi. 15Olunyuma, Shela yamenya emiyika chindi ebikhumi bine nachitaru ne niyebula abaana bandi abasiani nabakhaana.
16Olwa Eberi yali nemiyika amakhumi kataru nende chine, yebula Pelegi. 17Olunyuma, Eberi yamenya emiyika ebikhumi bine namakhumi kataru, ne niyebula abaana bandi abasiani nabakhaana.
18Olwa Pelegi yali nemiyika amakhumi kataru, yebula Reu. 19Ne olunyuma lwokhwibulwa khwa Reu, Pelegi yamenya emiyika ebikhumi bibili nende shienda ne niyebula abaana bandi abasiani nabakhaana. 20Olwa Reu yali nemiyika amakhumi kataru nachibili, yebula Serugi. 21Olunyuma, Reu yamenya emiyika chindi ebikhumi bibili nende musaafu ne niyebula abaana bandi abasiani nabakhaana.
22Olwa Serugi yali emiyika amakhumi kataru, yebula Nahori. 23Olunyuma, Serugi yamenya emiyika chindi ebikhumi bibili ne niyebula abaana bandi abasiani nabakhaana.
24Olwa Nahori yali nemiyika amakhumi kabili nende shienda yebula Tera, 25olunyuma lwokhwibulwa khwa Tera, Nahori yamenya emiyika eshikhumi shilala nende ekhumi nashienda ne niyebula abaana bandi abasiani nabakhaana.
26Olwa Tera yali namenyile emiyika amakhumi musaafu, yebula Aburamu, Nahori, nende Harani.
Abolwibulo lwa Tera
27Bano nibo abolwibulo lwa Tera. Tera yebula Aburahamu, Nahori nende Harani. Naye Harani yali samwana Loti. 28Harani yafwila mwitookho liabwe elilangwa mbu, Uri, mushialo shia Babuloni, Tera samwana nashiliho mwoyo. 29Mana Aburamu nateeshia Sarai, naye Nahori nateeshia Milika, owali omukhaana wa Harani samwana Milika nende Isika. 30Sarai yali omukumba, shiyalikhwo nomwana tawe.
31Tera nabukula Aburamu omusianiwe, Loti omwana wa Harani, ouli omwitsukhuluwe nende Sarai omukhasi wa Aburamu, ouli nyakhufialanyene, ne nibarula Uri, nibatsia okhumenya mushialo shia Kanani. Batsia niboola Harani ne nibamenyayo. 32Tera yamenya emiyika ebikhumi bibili nachirano ne nafwila mushialo shia Harani.
Выбрано:
OBUCHACHILO 11: OLUPR
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
