Ləwke 22

Mbeli nyi te ghə katsa ghena yitea Yɛsə

(MAT 26.1-5; MRK 14.1-2; ZHŊ 11.45-53)

1Takwa takwa gəsəkəa pɛaŋe nya ɗema tenjɛne hwe, nya heka mbeli kaPake. 2Ntake mbeli nyi te ghəa ka dzeghe Shala ba'a ka rafe wəsə mahalegə kaghweze ntsehwele kepesle Yɛsə, ama pa hɛ ghazlənənji va mbeli.

Zhəwdas kapamte nda Yɛsə ke mbeli nyi te ghə

(MAT 26.14-16; MRK 14.10-11)

3Tagha gɛ, shilimə Satan dzembe mbe Zhəwdas Iskariyote, kwete wəndəa mbeli nyi meŋe bakeghəmbe. 4Cape Zhəwdas kalə sha mbeli nyi te ghəa ka dzeghe Shala ba'a mbeli nyi te ghəa ka ya ghɛa Shala kezha sepa ntsehwele kekese nda Yɛsə ke hɛ. 5Fare fare wənəa nci, pa hɛ meɗeyi nda ve nda cɛdɛ. 6Pa Zhəwdas yɛte, ntake ŋkɛ kazele və nya nza ŋkɛ kakeseve Yɛsə kwa kaɗema mbeli keɗepe.

Yɛsə kazeme gəsəkəa Pake le mbelia ŋkɛ

(MAT 26.17-25; MRK 14.12-21; ZHŊ 13.21-30)

7Pa vecia pɛaŋe nya ɗema tenjɛne hwe se. Vəa ŋkwa shɛ tehene zhɛgwəa lɛmə timɛti mbeli kezha wəsə kezeme ta gəsəkə. 8Ma ke Yɛsə ghwenakɛ yɛ Piyɛre le Zhaŋe: «Kwiɗi mə kalə kamene ɓəmə wəsə kezeme yitea gəsəkəa Pake.» 9Ma ke hɛ shɛ: «Tema ɗe na kalə ghen'yɛ kamene ŋkɛ wa?» 10Ma ke sha hɛ: «Fa mə: ma vəa ŋkwa nya tedzeme meleme yɛ ne, katebegeme yɛ le kwete wəndə nya nza ghwelepe ta yɛmə kwa ghə ve. Təkwə təkwəte mə ŋkɛ kalə kadzeki ghɛ nya tedzeki ŋkɛ. 11Ma pe yɛ sha wəndə ke ghɛa shɛ: Ma ke Nde sleke n'yɛ sha gha: Tema cɛ nya tezeme gəsəkəa Pake 'ya mbe le mbeli nyi ketəkwə təkwə ɗa wa? 12Ma pelɛ ghəa cɛ nya mencikə ne, katencɛ ŋayɛ cɛ nya wəba le pɛtɛa wəshi nyi kehi ŋkɛ. Tagha temene ɓəmə wəsə kezeme yɛ.» 13Cape hɛ kalə, tsagha shɛ sləyi hɛ kala nya gezete nda Yɛsə ke hɛ, pa hɛ menete wəsə kezeme kezha gəsəkəa Pake.

Zeme geva ta Yɛsə ba'a sa mimia ŋkɛ

(MAT 26.26-30; MRK 14.22-26; 1 KOR 11.23-25)

14Ma kwa dzeghete geva və ne, ntishɛ yɛ Yɛsə le ka ghwene ta ŋkɛ kazeme wəsə kezeme. 15Ma ke sha hɛ: «Kwele kwele ɗehwe 'ya kezha zeme wəsə kezeme ta Pake nya le gheyɛ nda tesa yaka 'ya. 16Kwa nza ŋkɛ ma 'ya sha gheyɛ: Katezhɛne 'ya kazeme ŋkɛ hwa'a te veci nya tencɛte geva ghena nya mbe mbe mbe Meghea Shala we.» 17Ma kwa ndeke nda zlerekwea wəsə kesa mbeli ne, pa ŋkɛ tsate nda ŋ'wese ke Shala, ma ke sha hɛ: «Kele mə zlerekwe nya ba'a sa mə wəsə nya kwa kwelɛ gheyɛ. 18Kwa nza ŋkɛ ma 'ya sha gheyɛ: se mɛa ɓeshi ne, katezhɛne 'ya kasa tɛ tɛape hwa'a te və nya se Meghea Shala we.» 19Laŋe ŋkɛ sha ɗafa, pa ŋkɛ tsate nda ŋ'wese ke Shala ba'a neheve mbe, pa ŋkɛ ndeke nda ke hɛ. Ma ke sha hɛ: «Nya ya kageva ta ɗa nya kendeke ŋayɛ geva. Mene mə kala nya kezha zəzə ɗa.» 20Tsagha shɛ ndeke nda zlerekwe ŋkɛ ke hɛ kwetere wəmbəa ɗafa. Ma ke sha hɛ: «Nahe zlerekwe nya kenza kajikə geva mɛnɛfɛ le Shala, va nya shekeyi geva mimia ɗa kezha gheyɛ.

21Ama newema mə: ma wəndə nya ketepamte ɗa ne, teke ŋkɛ kənəa ɗafa le 'ya. 22Ghəpə yite we, wa nya Wəzege ta za katemte kala nya zəzəte Shala. Ama wa nya yaka te wəndə nya ketepamte ŋkɛ gɛ!» 23Ntake mbeli nyi ketəkwə təkwə ka'yɛwe wəndə nya ketemene wəsə nya kala nya kwelɛ ghəa nci.

Wa ŋkɛ ya kwele ma wa?

24Ntake mbeli nyi ketəkwə təkwə Yɛsə kazhɛne ghəpə le berete kezha ɗepe wəndə nya ketenza kwele hwa hɛ. 25Ma ke sha hɛ: «Ka meghea kɛfia kweci hwelefefi ne, ghenci ka sleke mbelia nci. Kaɗe hɛ kaheka hɛ mbeli kaka mene ganyɛ. 26Ama gheyɛ ne, menema yɛ kala hɛ ma. Ma wəndə nya kwele ma hwa gheyɛ ne, nza ŋkɛ kanya ɓɛhwɛ ma. Ma wəndə nya kesleke ŋkwa ne, nza ŋkɛ kala wəndə nya kemene nda slene ke mbeli. 27Kwa nza ŋkɛ ne, wa ŋkɛ ya kwele ma wa? Wəndə nya mentishɛ nda keleke nda ɗafa mbeli na, na, wəndə nya kekeleke nda na? Ashɛ wəndə nya mentishɛ wəka? Yawa, 'ya le ŋa ɗa ne, hwa gheyɛ 'ya kala wəndə nya kemene slene.

28Ma gheyɛ ne, mbeli nyi kese kanza le 'ya vəa ŋkwa nya sahwe yaka 'ya. 29'Ya ne, nahe 'ya kehite ŋayɛ ŋkwa mbe Meghea Shala, kala nya hite ɗa ŋkɛ Yiteyɛ ɗa. 30Te ŋkwa shɛ tezeme wəsə kezeme ba'a tesa wəsə kesa yɛ le 'ya. Katentishɛ yɛ pelɛ pasla kameha ghwə te ka yitehɛ ta ka Israyɛl meŋe bakeghəmbe.»

Yɛsə kageze kateɗema ŋkɛ Piyɛre

(MAT 26.31-35; MRK 14.27-31; ZHŊ 13.36-38)

31Ma Yɛsə sha Simon Piyɛre: «Simon, Simon, fama ghena ta ɗa. Wa nya Satan nya kazele hweŋkwa kezha dzaŋele ŋayɛ kala nya dzaŋele ha mbeli. 32Ama nahe 'ya kesəkwəte ghə kezha gha, yitea ɗema yɛ ta ŋa kazamte geva. Ama gha, vəa ŋkwa nya zhɛneke geva na kase sha 'ya ne, mbakete nda berete ke ka kesaka meyɛ ŋa.» 33Ma ke Piyɛre shɛ: «Nde sleke ŋkwa, nahe 'ya kenza ɗeke ɗeke kadzawa daŋgayɛ ba'a kamte le gha.» 34Ma ke Yɛsə zhɛnete nda: «Ma 'ya sha gha Piyɛre: ma ɓeshi nda teheka ŋələ ne, kategeze na mahekene zhigə kaɗema na keɗepe ɗa.»

Slibə cɛdɛ, slibəa wəsə kezeme ba'a kafayɛ

35Ma ke Yɛsə geze nda ke hɛ ɓiyitsa: «Ma kwa ghwenakɛ ŋayɛ 'ya kaɗema slibə cɛdɛ, slibəa wəsə kezeme, tsahwa mbe seɗa va gheyɛ ne, nahe yɛ keshaŋe va kwete wəsə na?» -- «Ewə», ke hɛ shɛ. 36Ma ke Yɛsə sha hɛ: «Ma wəndə nya nza slibə cɛdɛ ve ne, kelete ŋkɛ. Tsagha wəndə nya nza slibə dɛafe ve. Ma wəndə nya ɗema kafayɛ ve, kelete lekwesa ta ŋkɛ ŋkɛ kezha pave. 37Kwa nza ŋkɛ ma 'ya sha gheyɛ: nda wəsə nya kerafete geva te 'ya kamene geva, ma ke: Nahe mbeli keɓelahwe ŋkɛ hwa ka mefətekwə. Kwa nza ŋkɛ ma ghena nya kerafete geva te ghəa ɗa ne, katemene geva ŋkɛ.» 38Ma ke mbeli nyi ketəkwə təkwə: «Nde sleke ŋkwa, wa nyi kafayɛ nyi bake.» Ma ke zhɛnete nda ke hɛ: «Wərə tsagha.»

Yɛsə kasəkwə Shala pelɛ ghweme ta Bekele

(MAT 26.36-46; MRK 14.32-42)

39Ma kwa shave Yɛsə ki ghɛ ne, cape ŋkɛ kadzeme ghweme ta yɛ Bekele kala nya seneve ŋkɛ ghalanza. Ntəŋə mbeli nyi ketəkwə təkwə kwa sebe ta ŋkɛ. 40Ma kwa kekave ŋkwa shɛ hɛ ne, ma ke Yɛsə sha hɛ: «Səkwə mə ghə kezha ɗema yɛ kateɗe kadzembe ghwete ŋkwa.» 41Pa Yɛsə hendemte geva vare hɛ gare bezaghe pelɛ wəndə kadzete, gwəɗəŋə ŋkɛ kasəkwə ghə. 42Ma ke gezete: «Yita, ma kenza nde kaɗe na ne, fɛake ɗa mte nya. Ɗe ta ɗa nde mene geva we, ama ŋa ŋa.» 43Pɛkwe nde ghwene ta Shala sawa pelɛ ghweme kezha mtsehe nda berete. 44Ma kwa yirənyɛ Yɛsə ne, ntake ŋkɛ kasəkwə Shala kevə kevə. Ma hwələ nya ketiɗi sawa yite kadzete hɛɗi ne, kala mimi.

45Ma kwa kiɗimte səkwə ŋkɛ ne, pa zhɛneke geva kase sha mbeli nyi ketəkwə təkwə. Ma se ŋkɛ ne, yitea hɛ va yirə ta mehele. 46Ma ke sha hɛ: «Wa raberə hɛ yɛ wa? Sate mə ba'a səkwə mə ghə kezha ɗema yɛ kateɗe kadzembe ghwete ŋkwa.»

Kese ta Yɛsə

(MAT 26.47-56; MRK 14.43-50; ZHŊ 18.3-11)

47Ma mba Yɛsə kageze ghena ne, ŋkeɗe mbeli senji. Zhəwdas nya hwa mbeli nyi meŋe bakeghəmbe nde begheke hɛ. Pa ŋkɛ hendeke geva kase sha Yɛsə kezha həməwə. 48Ma ke Yɛsə shɛ: «Zhəwdas, laka həməwə ŋkɛ nza na kapamte Wəzege ta za ka.» 49Ma kwa nakɛ wəsə nya ketemene geva mbeli nyi yitea Yɛsə ne, ma ke hɛ: «Nde sleke ŋkwa, tsasle hɛ ghen'yɛ le kafayɛ na?» 50Pa kwete wəndəa nci tsaslekɛ nde mene slene ta wəndə kwelea ka dzeghe Shala, kwɛ'a ŋkɛ tsaslakawa sleme kwa zeme va ghə ve. 51Ama ma ke Yɛsə: «Sərəakɛ mə, wərə tsagha.» Pa ŋkɛ kwaɗakɛ sleme ta wəndəa shɛ ba'a mbete ŋkɛ.

52Ma ke Yɛsə sha mbeli nyi te ghəa ka dzeghe Shala, mbeli nyi te ghəa ka ya ghɛa Shala ba'a mbelia jama nyi kese kezha kese ŋkɛ: «Le yɛ kafayɛ ba'a yɛ geta hi yɛ kase kakese ɗa kala wəsə nya nza 'ya kande ŋwasle ŋkwa na? 53Keveci keveci 'ya le gheyɛ mbe ghɛa Shala, ama kese yɛ kazele hweŋkwa kekese ɗa we. Ama nahe və nya kenza kaŋa ŋayɛ ba'a kaŋa berete ta ŋkwesle.»

Piyɛre kaɗepema Yɛsə

(MAT 26.57-58, 69-75; MRK 14.53-54, 66-72; ZHŊ 18.12-18, 25-27)

54Pa hɛ keseve Yɛsə, pa hɛ keleghe ŋkɛ kadzeki ghɛ wəndə kwelea ka dzeghe Shala. Mbe təkwə təkwə hɛ Piyɛre cakeɗake. 55Nahe mbeli kemehate ghwə ki ghɛ shɛ, pa Piyɛre ntishɛ hwa mbeli nyi yite. 56Pa kwete kwatera nakɛ Piyɛre mentishɛ yitea ghwə. Ntake nde kavereghe ŋkɛ, ma ke: «Nahe wəndə nya perə kese yitea Yɛsə.» 57Ama pa Piyɛre ɗepetema Yɛsə, ma ke: «Male, keɗepe wəndəa shɛ 'ya we.» 58Temə vireɗi, pa kwete wəndə nakɛ ŋkɛ, ma ke shɛ: «Gha perə ne, kwete na wəndəa nci.» Ma ke Piyɛre sha wəndəa shɛ: «Ewə, hwa hɛ 'ya we.» 59Ma kwa teməhwe temə mbeli gare lerə kwetɛŋe ne, ma ke kwete wəndə shɛ shɛ dazhɛ dazhɛ: «Ghəpə yite we, nahe wəndə nya kese le Yɛsə, zhɛne ne, nde Galilɛ ŋkɛ.» 60Ma ke Piyɛre: «Keɗepe ghena nya ɗe na kageze 'ya, gha le ŋa ŋa we.» Te ŋkwa shɛnyɛ mba ŋkɛ kageze ne, pa ŋələ hekate heka. 61Pa Nde sleke ŋkwa zhɛrete geva kanewe Piyɛre, mteghere vate ntsə te. Tagha gɛ, pa Piyɛre zəzəte ghena nya se ŋkɛ geze nda, ma ke shɛ: Ma nda teheka ŋələ ɓeshi nya ne, kategeze na kaɗema na keɗepe ɗa mahekene zhigə. 62Pa Piyɛre shavenyɛ le nehwene sərəɓə sərəɓə.

Mbeli kaŋele ba'a kaɗa Yɛsə

(MAT 26.67-68; MRK 14.65)

63Ntake mbeli nyi keya Yɛsə kaŋele ŋkɛ ba'a kaɗa ŋkɛ. 64Pa hɛ hwepekɛ kema ta ŋkɛ le zlave, ma ke hɛ 'yɛwete ve: «Wa nde mpave ŋa wa? Ɗepete gɛ!» 65Ntake hɛ kaŋele ŋkɛ le kweci ghena keghə keghə.

Yɛsə te kema ta mbelia jama ta ka Zhəwif

(MAT 26.59-66; MRK 14.55-64; ZHŊ 18.19-24)

66Ma kwa pesle ŋkwa ne, pa mbelia jama ta ka Zhəwif, mbeli nyi te ghəa ka dzeghe Shala ba'a ka rafe wəsə mahalegə tsenete geva. Pa hɛ keleke Yɛsə kase kadzawa kema ta mbeli nyi te ghəa hɛɗia ka Zhəwif. 67Ma ke hɛ 'yɛwete ve: «Gha ya kaMɛsi na? Gezete n'yɛ.» Ma ke Yɛsə sha hɛ: «Ma kegezete ŋayɛ 'ya ne, kateyɛ ghena ta ɗa yɛ we. 68Ma ke'yɛwe ghena 'ya va gheyɛ ne, katezhɛne ɗa yɛ we. 69Ama tsetsenya ne, katentishɛ Wəzege ta za te kwa zeme ta Shala nde berete.» 70Ma ke hɛ pɛtɛ nci: «Gha ya kaWəzege ta Shala gɛ na?» Ma ke sha hɛ: «Gheyɛ ka gezete gheŋkɛ 'ya.» 71Tagha gɛ, ma ke hɛ: «Mba gheɓəmə kazele kwete fete ta ŋkɛ we, nahe gheɓəmə le ghəa ɓəmə kefate ghena nya gezete ŋkɛ le mɛa ŋkɛ.»

Выбрано:

Ləwke 22: BEKDC12

Выделить

Копировать