LUKASE 22
22
Jesu o a lakanwa
(Mat. 26:1-5; Mar. 14:1-2; Joh. 11:45-53)
1 Monyanya wa Dinkgwa tše di se nago komelo, wo ba rego ke Paseka, o be o šetše o batametše. 2Baprista ba bagolo le boramangwalo ba be ba nyaka ka mo ba ka bolayago Jesu ka gona, ka gobane ba be ba tšhaba setšhaba.
Judase o rekwa gore a eke Jesu
(Mat. 26:14-16; Mar. 14:10-11)
3Ke moka Sathane a tsena Judase yo ba rego ke Iskariote, yo e bego e le yo mongwe wa barutiwa bale ba lesome le ba babedi. 4Yena a tloga a ya go baprista ba bagolo le go mantona a baleti ba Tempele, a fihla a lakana nabo ka mo a ka ba gafelago Jesu ka gona. 5Bona ba thaba, gomme ba kwana naye gore ba tla mo lefa ka tšhelete. 6Judase a dumela, gomme a thoma go nyaka nako ye e lebanego ya go ba gafela yena batho ba sa tsebe.
Go lokišetšwa go yo ja Paseka
(Mat. 26:17-25; Mar. 14:12-21; Joh. 13:21-30)
7Letšatši la fihla la Monyanya wa Dinkgwa tše di se nago komelo ge dikwanyana tša Paseka di swanetše go hlabja. 8Jesu a roma Petrose le Johanese a re: “Sepelang le yo re lokišetša dijo tša Paseka.”
9Bona ba mmotšiša ba re: “O nyaka gore re yo go lokišetša tšona kae?”
10A ba fetola a re: “E tla re ge le tsena motseng la gahlanetšwa ke monna yo mongwe a rwele motšega wa meetse. Le mo latele le tsene ka lapeng le a tsenago ka go lona, 11gomme le botše monglapa leo le re: ‘Moruti o rile re tle re botšiše gore na phapoši yeo yena le barutiwa ba gagwe ba ka jelago Paseka ka go yona e kae.’ 12O tla le bontšha phapoši ye kgolo ya ka godimo, ye e lokišeditšwego go jela. Le lokiše dijo tša Paseka ka go yona.”
13Barutiwa bale ba tloga, ba fihla ba hwetša go le bjalo ka ge Jesu a be a ba boditše, gomme ba lokiša dijo tšeo tša Paseka.
Selalelo sa Morena
(Mat. 26:26-30; Mar. 14:22-26; 1 Bakor. 11:23-25)
14Ge nako e fihla, Jesu a dula dijong le baapostola ba gagwe. 15A re go bona: “Ke dumile kudu go ja Paseka ye le lena pele ke hlokofatšwa. 16Gobane ke le botša gore nka se sa e ja go fihlela e phethagatšwa mmušong wa Modimo.”
17Ya ba o tšea senwelo, o leboga Modimo o re: “Tšeang senwelo se le se nweng ka go šielana. 18Ke le botša gore nka se sa nwa beine go fihlela mohla mmušo wa Modimo o hlongwa.”
19A tšea senkgwa, a leboga Modimo, a se ngwathaganya, a ba neela sona a re: “Se ke mmele wa ka wo o gafiwago ka lebaka la lena. Le dire bjalo gore e be gona go nkgopola.” 20 Ka wona mokgwa woo a ba neela le senwelo ge ba seno lalela a re: “Senwelo se ke kgwerano ye mpsha ya Modimo ye e tiišitšwego ka madi a ka ao a tšhollelwago lena.”
21 “Fela tsebang, yo a nkekago o na le nna gona mo tafoleng. 22Morwamotho go tloga gona o tla tloga, bjalo ka ge Modimo a beakantše, eupša yo madimabe ke motho yo a tlago mo eka!”
23Ba nama ba thoma go botšišana seng gore na e ka ba ke mang mo go bona yo a tlilogo dira taba ye.
Barutiwa ba Jesu ba phegišana ka tša bogolo
24 Gwa tsoga kgang mo go barutiwa ba Jesu ya gore na ke ofe mo go bona yo a swanetšwego ke bogolo. 25 Jesu a re go bona: “Magoši a baditšhaba a gatelela ditšhaba tša ona, le babuši ba tšona go thwe ke ‘Bomothušabatho’. 26 Fela go lena go se ke gwa ba bjalo; go upše go re yo mogolo mo go lena e be yena yo monyenyane, le moetapele a be bjalo ka mohlanka wa lena. 27 Kgane yo mogolo ke ofe? Ke yo a dutšego dijong goba ke yo a mo hlankelago? Ga ke re ke yo a dutšego dijong? Eupša nna mo go lena ke etša yo e lego mohlanka.
28“Lena le bile le nna ka mehla melekong ya ka, 29ka gona, bjalo ka ge Tate a mpeile mmuši, le nna ke tla le bea babuši. 30 Le tla ja, la nwa le nna mmušong wa ka, la dula ditulong tša bogoši la buša dikgoro tša Israele tše lesome le metšo ye mebedi.”
Jesu o botša Petrose gore o tlilo mo latola
(Mat. 26:31-35; Mar. 14:27-31; Joh. 13:36-38)
31Morena a re go Simone: “Simone, Simone! Tseba gore Sathane o inyaketše go le leka a le fefera bjalo ka mabele; gomme Modimo a mo dumelela. 32Eupša wena ke go rapeletše gore o se felelwe ke tumelo, gomme ge o šetše o boetše o mpotegela, o thuše badumedikawena go tielela tumelong.”
33Petrose a mo fetola a re: “Morena, nnaena ke ikemišeditše le go ya le wena kgolegong, ešita le gona go hwa le wena!”
34Jesu a re go yena: “Petrose, ke a go botša, gona bošegong bjo mokoko o tla re o sešo wa lla, wa be o ntatotše gararo.”
Tša go ba le sekhwama le mokotla le tšhoša
35 A ba botšiša a re: “Na nako yela ke le romile le se na sekhwama, le se na mokotla wa mokgopedi, le se na dieta, le kile la hloka selo?”
Ba mo fetola ba re: “Aowa, le gatee.”
36Yena a re: “Fela bjale yo a nago le sekhwama a se tšee, le yo a nago le mokotla wa mokgopedi a o tšee; yo a se nago tšhoša a rekiše kobo ya gagwe a e reke. 37 Gobane ke le botša gore Mangwalo a Makgethwa a a mpolelago a re: ‘O badilwe le dikebeka,’ a swanetše go phethega, gobane tše di ngwadilwego ka nna di a phethega.”
38Bona ba re: “Tše pedi ditšhoša šedi, Morena!”
Yena a ba fetola a re: “Taba ye e tlogeleng.”
Jesu o rapela Thabeng ya Mehlware
(Mat. 26:36-46; Mar. 14:32-42)
39Jesu a tloga motseng, a ya Thabeng ya Mehlware bjalo ka mehleng; barutiwa ba gagwe ba mo latela. 40Ge a fihla fao a re go bona: “Rapelang gore le se lekwe.”
41Ke ge a fetela pejana mo go fihlago leswika ge le fošwa ke motho, a fihla a khunama, a rapela a re: 42“Tate, ge o rata, tloša senwelo se sa tlaišego mo go nna; fela go se phethege ya ka thato, go upše go phethege ya gago.” 43Morongwa wa go tšwa legodimong a itšweletša go yena, a mo tiiša. 44Jesu a tiiša go rapela a tlaletšwe a etšwa kudumela ye nkego ke madi a rotha.
45Ge a emelela moo thapelong ya gagwe, a boela go barutiwa bale ba gagwe gomme a ba hwetša ba robetše, ba lapišitšwe ke manyami. 46A re go bona: “Ao! Le robetše? Tsogang le rapele, gore le se lekwe.”
Go swarwa ga Jesu
(Mat. 26:47-56; Mar. 14:43-50; Joh. 18:3-11)
47E rile ge Jesu a sa bolela gwa fihla lekoko le etilwe pele ke Judase, e lego yo mongwe wa barutiwa bale ba lesome le ba babedi. A ya go Jesu gore a mo atle. 48Jesu a mmotšiša a re: “Judase, na o ka napa wa eka Morwamotho ka go mo atla?”
49Bao ba bego ba na le Jesu ge ba bona se se tlago direga, ba mmotšiša ba re: “Morena, re ba hlasele ka ditšhoša?” 50Ke ge yo mongwe wa bona a rema mohlanka wa Moprista yo Mogologolo a mo kgaola tsebe ya la go ja.
51Jesu a re: “Lesang! Le se sa boeletša!” A napa a kgwatha tsebe ya mohlanka yoo, a mo fodiša.
52A re go baprista ba bagolo le mantona a baleti ba Tempele le bagolo ba setšhaba ba ba bego ba tletše go mo swara: “Le reng le tlile ka ditšhoša le dithoka mo nkego ke nna mohlakodi? 53 Ke be ke ehlwa le lena Tempeleng tšatši le lengwe le le lengwe, le sa ntshware. Eupša bjale ye ke yona nako ya lena, nako ye e laolwago ke Sathane, molaodi wa mmušo wa leswiswi.”
Petrose o latola Jesu
(Mat. 26:57-58,69-75; Mar. 14:53-54,66-72; Joh. 18:12-18,25-27)
54Ba re go swara Jesu ba tloga naye, ba mo iša ga Moprista yo Mogologolo; Petrose le yena a ba latela a le kgojana. 55Go be go goditšwe mollo mo gare ga lapa, gomme a ya a dula le ba ba bego ba oretše mollo woo. 56Ngwanenyana yo mongwe a mmona a dutše moo mollong, a mo lebelela ka mahlong a re: “Monna yo le yena o be a na le Jesu!”
57Petrose a latola a re: “Kgarebe, nna le go mo tseba ga ke mo tsebe!”
58Ka moragonyana monna yo mongwe le yena a mmona a re: “Etse le wena o yo mongwe wa bona!”
Petrose a mo fetola a re: “Monna, ga go bjalo!”
59Gwa feta nako ye e ka bago iri e tee gomme yo mongwe monna a bolela a tiišitše a re: “Ka nnete, monna yo le yena o be a na le Jesu! Ebile ke Mogalilea!”
60Petrose a mo fetola a re: “Monna, se o se bolelago nna ga ke se tsebe!”
A sa realo, gateetee ke ge mokoko o lla. 61Morena a retologa, a hlaba Petrose ka leihlo ya ba gona Petrose a elelwago se Morena a mmoditšego sona mola a re: “Gona bošegong bjo, pele mokoko o lla, o tla be o ntatotše gararo.” 62Ke ge a tšwela ka ntle a lla gabohloko.
Jesu o a kwerwa, o a bethwa
(Mat. 26:67-68; Mar. 14:65)
63Banna ba ba bego ba letile Jesu ba be ba mo kwera ba bile ba mmetha. 64Ba mo khupetša mahlo, ba mmotšiša ba re: “Ka ge o moprofeta, re botše gore o bethilwe ke mang!” 65Ba mo nyefola le ka tše dingwe tše dintši.
Jesu o sekišwa ke Kgorokgolo ya Bajuda
(Mat. 26:59-66; Mar. 14:55-64; Joh. 18:19-24)
66Ge go esa, bagolo ba setšhaba le baprista ba bagolo le boramangwalo ba kgobokana mme ba tliša Jesu kgorong ya bona. 67Ba re: “Ge eba ke wena Mesia, re botše.”
Yena a ba fetola a re: “Le ge nka le botša le ka se nkgolwe, 68le ge nka le botšiša taba le ka se mphetole. 69Fela go thoma gonabjale Morwamotho o tla dula ka letsogong la go ja la maatla a Modimo.”
70Ka moka ga bona ba napa ba mmotšiša ba re: “Kgane ke wena Morwa wa Modimo?”
Yena a ba fetola ka go re: “Le a bolela.”
71Bona ba re: “Dihlatse re sa di iša kae? Rena beng re a ikwela ge a bolela ka wa gagwe molomo!”
Выбрано:
LUKASE 22: NSO00
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Bible in Sepedi 2000 translation © Bible Society of South Africa 2000. Digital Version © Bible Society of South Africa 2012. All rights reserved. www.biblesa.co.za.
