Mak 12
12
Iru-mịẹ Chịnmgbọlụ Ozu Ọkọapụ Ma Ḅe Kaḅo Mị
(Mat 21.33-46; Luk 20.9-19)
1Anịeso, Jizọs Ḅe Ọ̀ kaḅo ḅụ ọkwẹịn ini pịrịmẹ, “Iru-mịẹ chịnmgbọlụ ozu nwọ ḍipi gbọrị owuḅọ simemẹ. Ò ye se anị ogbokia kelemamẹ, se anịa ḅie iru imimaḅịanyọ soku anị pịrịmẹ, se ọ̀ pịkị sime nyọ koruḅịa ọgọnọ warị namamẹ. Anịsịkị ọ̀ irumịẹ chịnmgbọlụ ozu mị se ọkọapụ pịrị, se pakaso jịn anga mun mẹ. 2Mgbọlụ kaịn sịkị mị ḅo lasịkị, ọ̀ gbọrị omoniḅọ nwọ fịrịmamẹ, iniḅọ mun ọkọapụma ḅara ọ̀ lalamaye nwọ ọkịḅo ọ̀ pịrịye-ẹ. 3Ọkọapụma omoniḅọ ḅe kun, ò fomu, se gbọrịye sọnị nwọse ọ̀ pịrịka ḅụ ò se sẹịnmẹ. 4Anịeso, ozu nyanaḅọ ḅe ọ̀ pịkị jịn omoniḅọ fịrịma sẹịnmẹ; se ọkọapụma omoniḅọ ḅe tịḅị ḅụ ò fomu se ḅụgerere ma ḅara nwọse ọ̀ mịẹmẹ. 5Ozu nyanaḅọ ḅe ọ̀ pịkị jịn omoniḅọ fịrịma sẹịnmẹ, se ini ọ̀ ḅaamẹ; se anị ḅara mị pịkị nwọse tọn apụ mịẹmẹ, ini dapụ fomu, se pịkị ísíapụma ḅaamẹ. 6Kọn se ò se fịrịmaḅịa jịnḅọ anị ozu nyanaḅọ ḅe ḅụ yela oria tọkụ ḅe kẹngẹ-ẹ. Yemamgba ḅe kuluma ori oria tọkụ ḅe nwọse ọkọapụma fịrịmamẹ. Ọ̀ nwọ ḅẹmẹ, ‘À ḅerenimẹ na ini osi se ị̀ya tọkụ ḅe pịrịḅịa.’ 7Ọkụma ọkọapụma nwọse jịnḅọ jịnḅọ ḅẹmẹ, ‘Ḅe anị ozu mị nyanaḅọ ḅe yaḅe-ẹ. Ó ḅo, ó ye wa ọ̀ ḅaa, se ọ̀ nyanaye mị pịkị mịnaye nwọ sọḅịa!’ 8Anị ini tọkụ ḅe ọkị, se ọ̀ ḅaaye-ẹ, se oria oju mị nwọse irumịẹ chịnmgbọlụ ozu mị ḅe ọḅụju gbin wokumamẹ.
9“Cheye anịọkụma, irumịẹ chịnmgbọlụ ozu mị nyanaḅọ ḅe nwọ mịẹ ḅe?” Jizọs Ḅe nwọ gbelamẹ, “Ò ḅo inia owuapụma nwọ ḅaaḅịa, se irumịẹ chịnmgbọlụ ozu mị nwọ saḅama jịn ọkọapụ pịrịḅịa. 10Pikipikiye ofori-ẹ, mị fịafịa ḍiri mị ó gosam?
‘Warị namapụma sịkị ḍụparị mị
vinpịkị ḅo yelatẹịn ḍụparị nwọ sọsam.
11Nyanaḅọ Ḅe mịn mị mịẹmẹ;
anị ḅụgbiripuma ọkụ ḍiki!’ ”
12Juapụ tịḅịnịma ini Jizọs Ḅe kun ịkasị ḍọkịmẹ, anịatịḅị ini nemisam na mị kaḅo mị ini gose Ọ̀ kọnmẹ. Ọkụma ini tomonikpo mị ḍikiḅalafamẹ, anịgose ini Ọ̀ wẹrịso se somẹ.
Taksị Gbẹịn Na Gboloma Ḅẹrẹ Mị
(Mat 22.15-22; Luk 20.20-26)
13Da Farisiapụ na, Hẹrọd ḅe ḅụ sime jịn apụ na ini nwọse Jizọs Ḅe fịrịmamẹ, ḅẹrẹ gbela ḅụ ḍẹịntu Ọ̀ pịrịḅịa ḅara. 14Ini Ọ̀ damaḅo se nwọ ḅẹmẹ, “Yeḍieḅọ, wa nemimẹ na ị́ kọkọmaye ḍukoḍukomẹ, tomoni ḍukoḅịaye nwọ abalaka ḅụ. Ị́ pịkị tomoniḅọ ḅe lakiri nwọ ḍikikẹ, ọkụma Tamụnọ Ḅe tọn tomoniḅọ ḅe pịrị kọkọmaye mị anị ị́ ḍiearịye-ẹ. Ḍuko wa pịrị, anị mịna Olokoma na kuraka amaigbiki ocho se Rom Sẹdaḅọ ḅe pịrị? Wa àrị gbẹịn na iḅi mụnọ, se gbẹịn na iḅika?”
15Ọkụma Jizọs Ḅe inia epele mị nwọ ọrị sịkị, Ọ̀ nwọse ini pẹkẹrẹmẹ, “Nde ó gose ḍẹịntu ị̀ pịrịarịye? Ọ́ gbọrị seleḅa igbiki nwọ ọkịḅo, se ye àrị anị ḍiki.”
16Ini gbọrịye ọkịḅo Ọ̀ pịrịmẹ, se Ọ̀ nwọse ini gbelamẹ, “Mịn tọrụ mị na ẹrẹ mị na tụḅọye?”
“Sẹdaḅọ ḅe-aye-ẹ,” ini nwọ pẹkẹrẹmẹ.
17Anị ḅụ Jizọs Ḅe nwọ ḅẹmẹ, “Iḅimẹ, anịọkụma, Sẹdaḅọ ḅe lalamaye nwọse Sẹdaḅọ ḅe pịrị, pịkị Tamụnọ Ḅe lalamaye nwọse Tamụnọ Ḅe pịrị.”
Se ini ḅụgbiripu nyana Jizọs Ḅe pịrịmẹ.
Fịḅụsịsẹ Na Gboloma Ḅẹrẹ Mị
(Mat 22.23-33; Luk 20.27-40)
18Anịeso da Sadusiapụ Jizọs Ḅe damaḅomẹ. (Ini nwọ ḅẹmẹ na tomoni fịḅụsịsẹ ẹkẹ.) 19Ini nwọ ḅẹmẹ, “Yeḍieḅọ, Moziz ḅe mị oloko mị gịẹịn wa pịrịmẹ: ‘Tomoniḅọ tọkụ yika se tarọ ma koroma fịmẹ ḅẹḅẹ, numbireowu ḅe árị ọkị sime se fịḅọ ḅe ẹrẹ ḅụ tọkụ yiḅịa.’ 20Gbọrị sịkị ḅụ, sọnọma owuapụ mịnapụ simemẹ; inia ḅụ sẹnịtẹịnḅọ ḅe, ori ere simemẹ, se tọkụ nyanaka ḅụ ọ̀ tarọ ma koroma fịmẹ. 21Se maịn karamaḅọ ḅe eremeniḅọ ma ọkị simemẹ, se ori sọnị tọkụ nyanaka ḅụ fịmẹ. Anị gbọrị ḅara anị pịkị nwọ sime tẹrẹ karama mịnaḅọ ḅe pịrịmẹ, 22se anị pịkị ọkọ sime kọn apụma pịrịmẹ: ini sọnọma mịnapụ mamgba eremeniḅọ ma simemẹ, se awọ yika ḅụ fịmẹ. Anịḅe kuluma, eremeniḅọ ma sọ fịmẹ. 23Mịọkụ, fịapụ mamgba fịḅụsịsẹḅịa ene mị ḅụ, tụḅọ ta á nwọ sọ ḅe? Ini sọnọma apụ mamgba nwọ árị na sime sa sịkị.”
24Jizọs Ḅe ini pẹkẹrẹmẹ, “Ó koroma irima ọkụ ḍiki! Cheye mịẹ anị ọkọpaka? Anịatịḅị ọ́ Fịafịa ḍiri ma anịkanịka Tamụnọ Ḅe kụrọ mị nwọ nemikẹ. 25Anịatịḅị fịapụma sịsẹ se ḍumoḅịa sịkị, ini soḅie sime enjẹlapụma simeọkụ simeḅịa, se ini ḅarị ama na ere na sime kọn ẹkẹ. 26Mịọkụ fịapụma fịḅụsịsẹ mị na gbolomaye ḅụ: Moziz Ḍiri mị ḅie ḅụ, kọrịsime piri mị gbolomaye mị ma ó goka? Anịnyọ anị gịẹịn waraḅẹ na, Tamụnọ Ḅe nwọse Moziz ḅe ḅẹmẹ, ‘Ị̀rị̀ anị Ebraham Tamụnọ Ḅe-ẹ, Aịzịk Tamụnọ Ḅe-ẹ, pịkị Jekọb Tamụnọ Ḅe-ẹ.’ 27Ori fịapụ Tamụnọ kẹ, ọkụma ḍumoapụ Tamụnọ-ẹ. Ó jokoma koroma irimamẹ!”
Opu Oloko Mị
(Mat 22.34-40; Luk 10.25-28)
28Gbọrị Oloko ḍieḅọ anịnyọ sime ini ḍukoarịyema nwọ naamẹ. Ori ọrịmẹ na Jizọs Ḅe ori iḅi pẹkẹrẹḅịpị nwọse Sadusiapụma pịrịmẹ, se anị ḅụ ori ọ̀ damamun se ḅẹrẹ seni Ò gbelamẹ: “Nde Olokoma ḅụ mgba kụrọtẹịnye?”
29Jizọs Ḅe pẹkẹrẹmẹ, “Mịn oloko mamgba ḅụ kụrọtẹịnye mị-ẹ: ‘Poki, Izrẹl! Nyanaḅọ mịna Tamụnọ Ḅe, ori kẹngẹ mị Nyanaḅọ Ḅe-ẹ. 30Ị́ kuḅiemgbọlụ mgba, ị́ya ịma mị mgba, ị́ya koroma mị mgba, pịkị ị́ya ịnyọ mị mgba, ị́ nwọse ị́ Nyana Tamụnọ Ḅe ḅẹlẹmaḅịa.’ 31Maịn karama kụrọtẹịn oloko mị anị: Ị́ ḅụ ḅẹlẹma ḅara nwọse ị́ juo tomoniḅọ ḅẹlẹma. Kụrọtẹịn ma mama olokoma nẹngị jịn oloko ofori-ẹ.”
32Oloko ḍieḅọ ḅe nwọse Jizọs Ḅe ḅẹmẹ, “Ị́ ḍuko ọkụ anị-ẹ, Yeḍieḅọ! Kọkọmaye-ẹ, ị́ ḍuko ḅara mị na: Nyanaḅọ Ḅe kẹngẹ mị Tamụnọ-ẹ, na jịn oru ofori-ẹ, Ò sikima. 33Na tomoniḅọ ḅe ori ò kuḅiemgbọlụ mị mgba na oria koroma mị mgba na, pịkị oria ịnyọ mgba na nwọse Tamụnọ Ḅe ḅẹlẹmaḅịa; pịkị ori ọ̀ ḅụ ḅẹlẹma ḅara nwọse ò juo tomoniḅọ ḅẹlẹmaḅịa. Ma mama olokoma koko mị kụrọtẹịn nama na jịn aye na se ẹbẹ ọgọnọ agbamịẹ Tamụnọ Ḅe pịrị mị nẹngịmẹ.”
34Jizọs Ḅe oria pẹkẹrẹḅịpị mị ḅụ sime nemi mị ḅụ elekima chụa, se nwọse ọ̀ ḅẹmẹ, “Tamụnọ Amanyanakiri mị ḅụ ị́ sasakẹ.”
Mịn mị ḅọrọ sịkị, gbọrịḅọ sọnị ḅarị dadama ḅẹrẹ se Jizọs Ḅe gbelakẹ.
Mẹsaya Ḅe Gboloma Ḅẹrẹ Mị
(Mat 22.41-46; Luk 20.41-44)
35Jizọs Ḅe Oputẹkẹwarị mị ḅie sime yeḍiearị sịkị Ọ̀ nwọ gbelamẹ, “Nde Oloko ḍieapụma ḅẹ ọkụ, na Mẹsaya Ḅe Devid furoḅọ-ẹ? 36Fịafịa Tẹmẹ Ḅe Devid ḅe jike se ọ̀ nwọ ḅẹmẹ:
‘Nyanaḅọ Ḅe nwọse ị̀ Nyanaḅọ Ḅe ḅẹmẹ:
Mịọ ị̀ya amaḅara anga ḅụ sime
ọkịmun àrị ị́rị́ na tarakapụma se ị́ ḅụọ gbanamaye nwọ mịẹ sịkị la.’
37Devid ḅe na mịnaḅụ na ‘Nyanaḅọ’; nwọse ọ̀ chịnmẹ; anịọkụma nde Mẹsaya ḅe ineda Devid tọkụ sọḅịa ọkụ?”
Jizọs Ḅe Oloko Ḍieapụ Ma Gbolomaye Ḅụ Tomoni Ma Ḅerijinemẹ
(Mat 23.1-36; Luk 20.45-47)
Ḅaka tomonikpo mị ḅieḅẹlẹ ḅụ Jizọs Ḅe poki simemẹ. 38Ò ye se ini ḍiearị sịkị ḅụ Ọ̀ nwọ ḅẹmẹ, “Oloko ḍieapụma ḅụ ọ́ ḅụ ọbị, ini nwọ inia vọdọ ḅụchụayema ḅie sime nwẹngị kelekelema ḅọrọ mị nwọ ḅẹlẹma pịkị osi nyana ḅara nwọse fẹ-a chirima ḅie ini kereni nwọ ḅiapụma, 39se tẹkẹwarịma ḅie ḅụ ọrụtọnma sime kirima na pịkị alalị koro nyọma ḅụ iḅitẹịn nyọma sẹlẹọkị apụma. 40Ini deapụ fị eremeni ma ḅụbinmẹ, se ini inuma inia warịma nwọ ọkịmẹ, anịsịkị nangwọ-a tẹkẹ nwọ kọn ḅụ iniaḅụ ḍiepakụmamẹ. Inia ḅụfụka sitẹịnḅịa!”
Deḅọ Fị Eremeniḅọ Ma Pịrịye Mị
(Luk 21.1-4)
41Jizọs Ḅe Oputẹkẹwarị mị ḅie igbiki koko nyọ mị ḅụ kpekima sime se tomonima igbiki se chụarị ḅara mị nwọ ḍikimẹ. Tọn-a igbiki nyanapụ ḅakama igbiki se chụamẹ. 42Anịsịkị ḅụ gbọrị igwein deḅọ fị eremeniḅọ nwẹngị ḅo se mama kala kọbọ nwọse ḅie chụamẹ; àrị mama kala kọbọ ma àrị pa gbọrị kọbọ pembe igbiki nwọ lamẹ. 43Ori oria ọḅụḍukoapụma chịn koḅirima se nwọse ini ḅẹmẹ, “À ḍuko ọ́ pịrịaḅẹ na ma deḅọ fị igwein eremeniḅọ ma ḅakatẹịnye nwọse pịrịye igbe mị ḅie chụa ísíapụ mamgba nẹngịmẹ. 44Anịatịḅị ísíapụma ini nyana ḅaka ngọma ḅụ kalaye mị ini se chụaye-ẹ; ọkụma árị, árị igwein la-ọkụ mị ḅụ, á nyana yemamgba nwọse chụamẹ—á se ḍumoḅịaye mamgba á nwọ pịrịmẹ.”
Выбрано:
Mak 12: OBTP
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
The Bible Society of Nigeria
