Luk 5
5
Jizọs Ḅe Tatarị Ọḅụḍukoapụ Ma Chịnmẹ
(Mat 4.18-22; Mak 1.16-20)
1Gbọrị ene Jizọs Ḅe Gẹnẹsarẹt Ḍapa mị aka ḅụ chịẹ simemẹ, tomonima pụnụma Ọ̀ damaḅomẹ, Tamụnọ ọkwẹịn mị naaḅịa ẹrẹchị. 2Ini dọkụḅo pọkụ aka sọma mama arụ ma Ọ̀ nwọ ọrịmẹ, kọnịma arịa ḅie koro se inia ịgbọma sịkịrịaḅẹ. 3Jizọs Ḅe arụma ḅụ gbọrịye ḅụkụlọmẹ—anị Saịmọn ye mị-ẹ, se ọ̀ ḅara ḅimẹ na ò kele anga sịkị ḅụ anị suma sikima-ẹ. Jizọs Ḅe arụ mị ḅie kpọnjị sime se ye se tomonikpo mị ḍiemẹ.
4Ori ọkwẹịn so sịkị, Ọ̀ nwọse Saịmọn ḅe ḅẹmẹ, “Arụ mị iderima ḍapa mị ḅụ gbun nyọ mị mun, se ị́rị́ na ị́ya arụapụma na ọ́mịna ịgbọma koroma se inji kun.”
5Saịmọn ḅe pẹkẹrẹmẹ, “Yeḍieḅọ,” “wa kụrọma bebe ḍin mị mgba fịrịnwẹngịmẹ, se gbọrịye sọnị wa kunkẹ. Ọkụma ị́ nemikase ọkọ ḅẹmẹ ḅẹḅẹ, àrị ịgbọma koromaḅịa.” 6Ini ịgbọma koromamẹ, se ini kun injima ḅaka so ọkụma inia ịgbọma kan-ẹ tọnmẹ. 7Anị ini ḅara se ini na agbama apụma fọngụmaye-ẹ, ḅo ḅarachụa ini pịrịḅịa ẹrẹchị. Ini ḅo se mama arụma nwọse injima sẹịn ḅeinmamẹ, àrịmgba gẹdẹgẹdẹ so ọkụma, kalaye kọnmẹ ini ḅilesam. 8Saịmọn Pita ḅe pakaye mị ọrị sịkị, ori ọ̀ ḅụọ ịkpụkụma se Jizọs Ḅe tọrọkọ kpẹrẹkịmẹ se nwọ ḅẹmẹ, “Ị̀ ḅụ wẹrị sikima, Nyanaḅọ! Anịatịḅị ị̀rị̀ si ḅọ-ẹ!”
9Ini kun injima ḅaka laḅara mị gose ori na sime apụ mamgba ḅụgbiripumẹ. 10Anị gbọrị ḅara mị anị pịkị nwọse Saịmọn ḅe na oria arụapụma na ḅụ simemẹ, anị Jems ḅe na, Jọn ḅe na, Zẹbidi awọma. Jizọs Ḅe nwọse Saịmọn ḅe ḅẹmẹ, “Ḅalafama mịọkụ ọkị tọrọkọ mun ị́ sakị nweni kunma ḅọrọḅịa.”
11Ini arụma dọkụ mun pọkụ ḅie sọma, yelayelaye ḅụḅarasin se Jizọs Ḅe ḍukomẹ.
Jizọs Ḅe Gbọrị Owuḅọ Gwọmẹ
(Mat 8.1-4; Mak 1.40-45)
12Gbọrị sịkị Jizọs Ḅe gbọrị ama ḅie simemẹ, anịanga ḅụkan obi ḅụ mgba ḅein gbọrị owuḅọ omi-ẹ. Ò Jizọs Ḅe ọrị sịkị, ori Ọ̀ ḅụọ chuku ḅịkị koro se Ọ̀ tẹkẹmẹ, “Sẹnịḅọ, ị́ ḅụḅẹlẹḅịa ọkụma, ị́ ineda ị̀ mịẹfịafịamaḅịa!”
13Jizọs Ḅe ḅara sụma mun ọ̀ lamamẹ. Ọ̀ pẹkẹrẹ se nwọ ḅẹmẹ, “À kọkọma ḅimẹ, ye ị́ fịafịa!” Anị kirikiri ḅụkan obi mị owuḅọ ḅe ḅụ somẹ. 14Jizọs Ḅe nwọse ọ̀ ḅẹmẹ, “Mịn mị ḍuko gbọrịḅọ sọnị pịrịma, ọkụma dada agbamịẹḅọ ḅe damamun se ori ị́ simeọkụ ọrị anịsịkị Moziz ḅe tọn koroma agba mị mịẹ, se ḍiepakụma ḅẹḅọ ḅẹḅọ pịrị na ị́ fịafịasam.”
15Ọkụma Jizọs Ḅe ḅụ ḅẹrẹ mị ini nwọ ḍuko wasama tẹịnmẹ, se tọn-a tomonikpo Ọ̀ damaḅomẹ Ò pokiḅịa ẹrẹchị, Ọ̀ pịkị inia obima gwọḅịa ẹrẹchị. 16Ọkụma Ò so gbọịn-a nyọ nwọ mun mẹ, se anịnyọ tẹkẹmẹ.
Jizọs Ḅe Oju Mgba Fịsa Owuḅọ Gwọmẹ
(Mat 9.1-8; Mak 2.1-12)
17Gbọrị ene Jizọs Ḅe yeḍiearị sịkị, da Farisiapụ na Oloko ḍieapụ na anịnyọ simemẹ, Galili na Judia na ḅie sime ama kịrịkịrị ḅụ ḅo apụma na, pịkị Jerusalẹm ḅie ḅo apụ na. Nyanaḅọ Ḅe kụrọ mị Jizọs Ḅe na omi-ẹ obi gwọ gose. 18Da owuapụ oju mgba fịsa owuḅọ nwọ pụra ḅomẹ, mọnọye ọgọnọ ḅụ, ini ḅụkụrọma ori ọkị warị mị ḅie sọmun Jizọs Ḅe tọrọkọ koromaḅịa ḅara nwọ ḍọkịmẹ. 19Tomonikpo mị gose ini ineda achọ nyana se sọmunkẹ ini mịẹọkụ mịẹọkụ sọnị. Anị ini ọ̀ pụra iwo warị ochu mị ọgọnọ mun ye-ẹ, se ochu mị ọgọnọ ẹmbẹ finji pakụmamẹ, se oria mọnọye ọgọnọ wẹrị ò sin tomonima ogboku Jizọs Ḅe tọrọkọ koromamẹ. 20Jizọs Ḅe inia ḅereni mị ḅaka la-ọkụ mị nwọ ọrị sịkị, Ọ̀ nwọse owuḅọ ḅe ḅẹmẹ, “Ị́ya sima ḅụ ini ḅarasin ị́ pịrịsam, ị̀ nikio.”
21Oloko ḍieapụma na Farisiapụma na sakị ḅịpị se inia ḅụ fiemamẹ, “Ḅe ḅọrọ tụḅọ se mị ḅara mị nwọse Tamụnọ Ḅe fiesima-ao! Tamụnọ Ḅe kẹngẹ mị ineda siḅụ-ḅarasin tomoniḅọ pịrịḅịaye-ẹ!”
22Jizọs Ḅe inia koromama nemimẹ, se nwọ seni ini ḅẹmẹ, “Nde ó gose nwọ simeaye koromarịye? 23‘Ị́ya sima ini ḅarasin ị́ pịrịsam,’ nwọ ḅẹ mị sarasaratẹịn mụnọ, anịkanịka, ‘Sịsẹ se nwẹngị’ nwọ ḅẹ mị sarasaratẹịn? 24Anịọkụma à mịẹse ó ḍieḅịa na Tomoniḅọ Tọkụ Ḅe Ọ̀ kụrọ nyanamẹ tomonikiri, si ḅụḅarasin nweni pịrị.” Anị Ọ̀ nwọse oju mgba fịsa ḅọ ḅe ḅẹye-ẹ, “À nwọse ị́ ḅẹmẹ, sịsẹ, ị́ya mọnọye deki, se so warị mun!”
25Anị kirikiri tomoniḅọ ḅe inimgba tọrọkọ ḅụ sịsẹ ò se mọnọ sime mọnọye mị deki, se Tamụnọ Ḅe tokonima warị mun mẹ. 26Anị gbọtụḅara inimgba ḅụgbiripumamẹ! Ḅalafa inia ḅie sọ so ọkụma, ini tokoni se Tamụnọ Ḅe pịrị se nwọ ḅẹmẹ, “Ma ḅọrọ nde nde ọkụ sime ḅụgbiripumaye wa nwọ ọrị-ao mịmgba!”
Jizọs Ḅe Livaị Ḅe Chịnmẹ
(Mat 9.9-13; Mak 2.13-17)
27Mịn mị ḅọrọ sịkị, Jizọs Ḅe pakaso mun gbọrị ama ocho ḅọ ọrịmẹ, Livaị nwọ chịnḅọ, oria fịrịnwẹngị warị ḅie kpọnjị sime waraḅẹ. Jizọs Ḅe nwọse ọ̀ ḅẹmẹ, “Ị̀ ḍuko.” 28Livaị ḅe sịsẹ, yelayelaye ḅụ ḅarasin se Ò ḍukomẹ.
29Se Livaị ḅe Jizọs Ḅe gose oria warị ḅie opu alalị koromamẹ, anịnyọ tọn-a amaochoapụ na jịn apụ na dẹbụl mị ḅụ simemẹ. 30Da Farisiapụ na Oloko ḍieapụ na anị inia ogbo apụma, ḅẹrẹ se Jizọs Ḅe ọḅụḍukoapụma gbelamẹ, “Nde ó gose amaochoapụma na ini depakụmapụma na yefị se pịkị ḅu gbolomarịye?” Ini nwọse ini gbelamẹ.
31Jizọs Ḅe pẹkẹrẹmẹ, “Obi ka apụ, ḅịrịḅọ ḅụpalịmakẹ, ọkụma obi apụ kẹngẹ-ẹ. 32À ḅo karakara apụma chịn-ẹḅokẹ na si ḅụ ini vinpịkị, ọkụma ini depakụmasa apụma-ẹ.”
Ḅuruse Ḅụḅama Gbolomaye
(Mat 9.14-17; Mak 2.18-22)
33Dapụ nwọse Jizọs Ḅe ḅẹmẹ, “Jọn ọḅụḍukoapụma, ini saramasarama ḅuruseḅụḅaama tẹkẹ kọnkọnmẹ, Farisiapụma ọḅụḍukoapụma sọnị pịkị anị ḅara mị mịẹmịẹmẹ ọkụma ị́ya ọḅụḍukoapụma yefị pịkị ḅuḅumẹ.”
34Jizọs Ḅe pẹkẹrẹmẹ, “Ó koroma ḅara ómine ineda mịẹse ereya nyọ sime igoniapụ yefịka ḅụ sime ḅe ereyaḅọ ḅe ini na simearịogbo? Ye mịẹmịẹ ḅara ḅụ ọkọ ẹkẹ! 35Ọkụma ene mị ḅoḅịa, ini inia ogboku ereyaḅọ ḅe nwọ ọkị soḅịa sịkị, anịsịkị mị ini ḅuruseḅụḅaamaḅịaye-ẹ.”
36Jizọs Ḅe pịkị mịn kaḅo mị kọn ini pịrịmẹ: “Gbọrịḅọ sọ ofori-ẹ ịwọ ḅụchụaye ḅụ yekansin, se anị seni olomu ḅụchụaye sẹlẹḅịa ḅọ. Ò nemikase ọkọ mịẹmẹ ḅẹḅẹ, ori ịwọ ḅụchụaye mị ḅụ yekansinḅịa, se ịwọ pẹkẹrẹ mị na olomuye mị na kura ẹkẹ. 37Pịkị ịwọ iru se olomusa nama apụra ololo ḅie chụaḅịa gbọrịḅọ sọnị ofori-ẹ. Ori ọkọ mịẹmẹ ḅẹḅẹ ịwọ iru mị olomusa nama apụra ololoma kanḅịa, iru mị ọsụn faḅịa, nama apụra ololoma pịkị papa igweinḅịa. 38Anịnakaraka ini ịwọ iru mị se ịwọ nama apụra ololo ḅie chụa gbẹịnmẹ! 39Ịwọ iru nwọ ḍọkịḅịa gbọrịḅọ sọnị ofori-ẹ iniḅọ olomu iru nwọ ḅu so sịkị. ‘Olomu ye mị iḅitẹịnmẹ,’ ọ́ nwọ ḅẹḅịa.”
Выбрано:
Luk 5: OBTP
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
The Bible Society of Nigeria
