LUKA 5

1KANDI kyahika ekitebe obukyamufunzire nibahu’ra ekigambo kya Ruhanga, akaba ayemerire ha nyanja ya Genesalesi; 2yarora amato abiri gaikaire ha nyanja: baitu abasohi bakaba bagarugiremu nibagya ebisoha byabu. 3Yagwe’ra omu bwato bumu, obwa Simoni; yamugambira okubuirizayo hake okuruga ha musa. Yaika’ra nayegesa abebitebe ali omu bwato. 4Kandi obuyamazire okugamba, yagambira Simoni ati I’ra omu nziha hagati munage ebisoha byanyu, musohe. 5Simoni yagarukamu nagamba ati Omwegesa, tutabaine okusisa obuire, titukwasire kintu: baitu obwekigambo kyawe ndanaga ebisoha. 6Kandi obubakozire bati bakwasa encunyingi muno: ebisoha nibi’sana okucweka; 7kandi basima abatahi babu abakaba bali omu bwato obundi, baije babakonyere. Baija, baijuza amato gombi, kandi gaija okundikira. 8Baitu Simon Petero obuyakiboine, yainama ha maju ga Yesu, nagamba ati Ndugaho; baitu ndimuntu anyakuina ebibi Mukama wange. 9Baitu akaba ahunirire, na bona abakaba bali nauwe, obwencu enyingi ezibakwasire; 10na Yakobo na Zebedayo, abakaba bakobere ahamu na Simoni. Kandi Yesu yagambira Simoni ati Otatina; baitu okuruga hati orasohaga abantu. 11Kandi obukalesere amato gabu ha musa, basiga byona, bamukuratira. 12Kandi kyahika, obwakabali omu rubuga rumu hali ezi, dora, omuntu akaba aijuire ebigenge: kandi obuyaboine Yesu, yainamya amaisoge namwesengereza, nagamba ati Mukama wange, obworaba nogonza, nosobora okunsemeza. 13Yago’ra omukonogwe, yamukoraho, nagamba ati Ningonza; semezebwa. Ahonaho ebigenge byamurugaho. 14Kandi yamutere’ra atagambiraho muntu: baitu oyegendere, oyeyoleke hali nyakatagara, ohonge obwokusemezebwa kwawe nka Musa okuyaragire, okuba kaiso namberebali. 15Baitu okuranganwakwe kukeyongera muno okuhika honahona: nebitebe bingi byaso’rokana okuhu’ra nokukizibwa endwara zabu. 16Baitu uwe yayesororamu wenka, yagenda omu irungu, yasaba. 17Kandi kyahika ha kiro ekimu hali ebi, akaba nayegesa; kandi

Abafalisayo nabegesa bebiragiro bakaba baikalire aho, abarugire omu bika byona ebyomu Galiraya na Buyudaya na Yerusalemu; kandi amani ga Mukama gakaba gali nauwe okukiza. 18Kandi dora, abantu bakaletera ha kitabu omuntu akaba azingamire: nibase’ra okumutahyamu, nokumubyamisa omu maisoge. 19Kandi obubataraboine mwanya ogwokumurabyamu obwekitebe ekingi, batemba ha ruguru yenju, bamurabya omu byase, bamusirimukiza ha kitabu hagati yabu omu maiso ga Yesu. 20Obuyaboine kuikiriza kwabu yagamba ati Omuntu, ebibi byawe bikuhirweho. 21Abahandiki Nabafalisayo babanza okuhakana, nibagamba ngu Ogu noha arukugamba ebyokujuma?

Noha asobora okuihaho ebibi, rundi Ruhanga wenka?

22Baitu Yesu yamanya empaka zabu, yagarukamu nabagambira ati Nimute’ra ki empaka omu mitima yanyu? 23Ekirukurahuka kiraha, okugamba nti Ebibi byawe bikuihirweho, nandiki okugamba nti Imuka, ogende? 24Baitu mumanye Omwana womuntu okwanyina obusobozi hansi okuihaho ebibi [akagamba ogu akaba azingamire]

Ninkugambira nti Imuka, ohimbe ekitabu kyawe, ogende omuka yawe.

25Ahonaho yaimuka omu maiso gabu, yahimba ekyakaba abyamireho, yagenda omukaye, nakugiza Ruhanga. 26Okuhuni’ra kwabakwata bona, bakugiza Ruhanga; batina muno, nibagamba ngu Tuboine ebyamahano hati. 27Kandi hanyuma yebi yaturuka, yarora omuhoza, ibaralye Levi, aikalire omu iholezo, yamugambira ati Kuratira nyowe. 28Yasiga byona, yaimuka, yamukuratira. 29Kandi Levi yamucumbira obugenyi bwingi omunjuye: kandi hakaba haloho ekitebe kingi ekyabahoza nabandi abaikalire nabo ha byokulya. 30Kandi Abahandiki babu bahyemera abegeswabe, nibagamb ngu Kiki ekirukubalisa nokunywa hamu nabahoza babasisi? 31Yesu yagarukamu nabagambira ati

Abomire tibataga mufumu; baitu abarwaire.

32Ntaije okweta abahikirire, baitu abasisi okwegarukamu. 33Bamugambira ngu Abegeswa ba Yohana basaba; Nabafalisayo nukwo bati; baitu abwe balya banywa. 34Yesu yabagambira ati Musobora okusibisa abana bobugole, omuswezi obwaba aloho nabo? 35baitu ebiro biriija; nomuswezi obwalibaihwaho, nubwo balisiba omu biro ebi. 36Kandi akabacera orufumo; busaho muntu acwaho akakoba ha kyokujwara ekikuzire; kakuba agira ati akutemuire ekihyaka, nekicweka kyekihyaka tikikuteraine ahamu nekinyakukuzire. 37Kandi busaho omuntu ata amarwa agomutara’ra omu ndyanga ezikuzire; kakuba agira ati amarwa agomutara’ra gakutemuire endyanga zakusisikaire. 38Baitu kihiki’ra amarwa agomutara’ra okugata omu ndyanga empyaka. 39Kandi ndi busaho muntu araba anywire ha amwarwa amakuru, aragonza amahyaka; baitu agamba ati amakuru nigo marungi.

Выбрано:

LUKA 5: BRR64

Выделить

Копировать