John 5

1O̱ki. Ki a̱nnika po̱o̱hsapoohtsika sota̱moʼtsstsiiwa omii o̱mahksiksistsikoi. Omi̱i̱ksi Jews oto̱mahksiksistsikomssoaawa. Ki a̱nniayii oma̱a Jesus itsita̱poowa Jerusalem.

2Kii omii Jerusalem itsstsi̱i̱wa omiihkai ata̱nakssini ita̱i̱sapaohkiimioʼpi. Ito̱ʼtsstsiiwa omii kitsi̱mi niitsi̱nihkatoohpi i̱i̱mahkihkinaohkitsim. A̱a̱mohka ita̱i̱sapaohkiimioʼpi iihtani̱stsinihkatoomiaawayi Bethzatha. Itsstsi̱i̱yi amo̱stsi nisito̱yi oyi̱kihtaani iihta̱i̱staahtaaoʼpi. 3Ki itsi̱pstaisstsiiyi aka̱i̱tapiiyi a̱i̱sttsiistoomiksi; na̱a̱psstsiiyaawa, a̱i̱ʼniikaayaawa, ki a̱i̱ʼniistoomiaawa. [A̱yoohkimiyaawa omiihka aohki̱i̱yi ma̱a̱hkiʼnakawattsimsskaahsi. 4A̱ʼpistotookiwa ota̱toyitapiimi ita̱i̱kkamsokita̱psainnisooyinai amiihka aohki̱i̱yihka. Ma̱tainoawa. Kii itsipi̱ʼkawattsikimsskimayi. Ki oma̱a i̱i̱tomssowoowa aiksista̱wakimsskaasi a̱nnayi a̱kitamiʼtsitaohtohkottotoawa otsi̱sttsiistomssini.]

5Ki a̱nnimayi a̱a̱mo ni̱naawa a̱kaanista̱isamisttsiyistomiwa niiyi̱ppo na̱nisiikopotoisstoyii. 6Omi̱i Jesus oso̱taminooka otsi̱tsisttohkaisstsissi. Oso̱tamssksinookayi oka̱i̱samanistaissi. Otsi̱tanikkayi, “Kika̱taiʼssta̱a̱hpa ka̱a̱hkohkoisokaʼpssii?” 7Omo̱a a̱i̱sttsiyistomiwa itani̱i̱wa “Ki ma̱tsitsstsiiʼpa na̱a̱hksspommoki na̱a̱hkitapsso̱yi̱ipoʼtooki awa̱ttsikimsskaasi aohki̱i̱yi. Ta̱i̱ssksaohkoikayisskitsimokoowa.” 8Oma̱a Jesus sota̱manistsiiwayi, “Sta̱miipoaoot. Sta̱moʼtsita kisi̱i̱ʼkaani. Kii sta̱miipoomatapoot.”

9Ki oma̱a ni̱naawa itsi̱kkamsokaʼpssiwa. Sota̱moʼtsima osi̱ʼkaani. Sota̱miipoomatapoowa.

O̱ki. Issiko̱piiksistsikowa annihka ksiistsiko̱yihka. 10Ki a̱nnihkayi omiiksi isto̱ʼtotamaʼpssiiksi Jews iihtani̱stsiiyaawa omi̱iska iihko̱ttotoayiska, “O̱ki. Issiko̱piiksistsikowa a̱nnohka. Aka̱kihtsimaani iihtawa̱a̱nioʼpa a̱kohkottsaitohpaatakioʼpa siʼka̱a̱ni.” Kii itsipo̱ʼtanistsiiwaiksi, 11“Anna̱a̱hkai ni̱tohkottotooka, nita̱a̱nikka, ‘Sta̱moʼtsita kisi̱ʼkaani. Sta̱miipoomatapoot.’ ” 12Otsi̱tanikkaiksi “Taka̱a kita̱a̱nikka.” 13Ki oma̱a iihko̱ttotoawa iina̱o̱ʼksaissksinoyiiwa a̱a̱nistahpiayi omi̱i Jesus. Aka̱i̱tapiiyi ita̱ʼpawaawahkaiksi omiim. Ki Jesus a̱kaitaisimiiyistapoowa.

14O̱ki. A̱nnika Jesus ito̱ʼta̱attsiimiiwa omi̱i o̱tohkottotoai. Itoʼta̱atsiimiiwayi o̱mahkitawaatsimoihkaaoʼpi. Ki itani̱stsiiwayi, “O̱ki. A̱nnoohka kika̱i̱sokaʼpssi. Ksiwa̱atoota kipahtsa̱ʼpssistsi. Sayiksi̱watoominikiaawa kita̱kohtoʼtsitsskokohkoyi.”

15O̱ki. Oma̱a ni̱nawa itsi̱i̱stapoowa. Iito̱i̱sopoatomoyiiwa Jesusi a̱nniskaoʼkini anniska o̱tohkottotookiska issiko̱piiksistsikoi. Itani̱stsiiwa omi̱i̱ksi isto̱ʼtotamaʼpssiiksi Jews, “Anna̱a̱hka ni̱tohkottotooka a̱a̱nistawa Jesus.” 16Ki a̱nnihkayii omi̱i̱ksi oʼtota̱maʼpssiiksi iihtoma̱tapoksistotoyiiyaawa Jesus takaa itawa̱nisttotosim a̱a̱mostska a̱nna a̱nistapaʼpiistska issiko̱piiksistsikosi.

17Jesus itani̱stsiiwaiksi o̱mohta̱ohkottotsimaahpi i̱makssikopiiksistsikosi. Itani̱i̱wa, “Ni̱nna A̱ʼpistotookiwa, ma̱tomaikakssikaʼpoʼtakiwaatsi kii niisto̱wa nino̱o̱hkattaʼpaoʼtaki.”

18A̱nnyayii a̱a̱niiwa Jesusa. Kii a̱nnihkayii omi̱i̱ksi isto̱ʼtotamaʼpssiiksi Jews iihtsi̱i̱taʼpayiikaʼkimaayaiksi ma̱a̱hksiʼniyissaiksi. A̱waaniiyaawa omiiksi ni̱naaiksi, “Jesus a̱i̱ssinnima omi̱i̱stsi issiko̱piiksistsikookakihtsimaanistsi. Ki ma̱ttsitsspiaiʼtaniiwa oto̱nnimmahsayi A̱ʼpistotookiiyi, ki a̱nniayii mi̱i̱ksistaniwa osto̱yi ota̱i̱ʼtoomanistssayi A̱ʼpistotookiiyi.” A̱nniayii iihtoki̱mmiiyaawa omiiksi isto̱ʼtotamaʼpssiksi Jews anniiska Jesusiska.

19Ki a̱nnihkayii Jesus iihtani̱stsiiwaiksi anniihka o̱mohtaniihpihka “Ni̱nna ma̱ta̱o̱noaiksistaʼpoʼtaki ki a̱nnihkayii nino̱o̱hkattohtaʼpaoʼtaki i̱makssikopiiksistsikosi.” A̱a̱nistsiiwaiksi, “Nitohkoyimi̱yissi A̱ʼpistotookiwa no̱mohtanistaʼpaissi osto̱yi manista̱ʼpaisspi. Nima̱tawawattanisttotsiiʼpaatsi niisto̱wa. Osto̱yi ta̱waistama̱atsooka manista̱ʼpaisspi niʼto̱i̱ na̱a̱hkoohkattanistaʼpaissi. Ki nitsi̱tawanisttotsiiʼpi nanista̱waistamattsi̱yihpi. 20Ni̱nna nitsi̱kohtakomimmoka nitohkoyi̱mmi̱yissi ki a̱nnihkayii nita̱waistama̱ttsooka annohka osto̱i̱ manista̱ʼpaisspi, niʼtoi na̱a̱hkoohkattanistaʼpaissi. Ki nino̱o̱hkattaistama̱atsooka na̱a̱hkanisttotsiihpa anniihka nitsipisa̱taistamatstohkatoohpihka. Ki nitsi̱tsstakka na̱a̱hkoʼtsitssksipisatanisttsissi ki a̱nniayii kita̱kanistsskaiʼtakia̱ttsookoaawa.

21-22Na̱toʼkai nita̱ʼpsskonataʼpistsi nitsi̱tssta̱yihpistsi na̱a̱hkanisttotsissi. Nita̱kanikka na̱a̱hkanipaitapia̱ttsaahsi mata̱piiwa, ki nita̱kanikka na̱a̱hkokakihtsimatahsi mata̱piiwa.

Ṉinna, osto̱yi a̱i̱ssksipoa̱aa̱ttsiiwa a̱kaiʼniiksi, ki a̱kattsskohkotsiiwaiksi niipa̱i̱tapiʼssini. Kii niisto̱wa, ta̱koohkattomatskahtaki manipa̱i̱tapiʼssini. Ni̱tsstatawa ta̱kohkotawa. Takaa nito̱nnimmawa A̱ʼpistotookiwa, kii a̱nnihkayii no̱mohtanistaʼpaissi osto̱yi manista̱ʼpaisspi.

O̱ki. Ki ni̱tohkokka na̱a̱hkokakihtsimatahsi mata̱piiwa. Osto̱yi ma̱takokakihtsimatsiiwaatsi mata̱piiksi. Niisto a̱nnahkayii ta̱kokakihtsimaa.

23Osto̱yi ni̱tohkokka na̱a̱hkomatskahtoohsi manipa̱i̱tapiʼssini ki na̱a̱hkokakihtsimatahsi mata̱piiwa, kiisto̱aawa ka̱a̱hkohtainaaimmokihpoaawa. Ni̱nna kita̱waanikkoaawa ka̱a̱hkainaimmokssoaayi oosto̱yi a̱nni kanista̱i̱naaimmahpoaawayi. Takaa ni̱tohkoyimmoka. Ikka̱msawa̱i̱naimmokiinoainiki niʼto̱yi a̱kanistsiwa ka̱a̱hksawainaimmoawaawa annaahka ni̱nnahka, takaa osto̱i̱ nitsi̱tapipoʼtooka anno̱o.

24Kita̱yoohtsiʼpoaawa kita̱wanistohpoaawa. Ki a̱nnihkayii kita̱kohkottomaiʼtoawaawa annaahka nitsi̱tapipoʼtookahka a̱nnom. Kii ikkamo̱maiʼtoainoainiki ki ta̱kohkokkoaawa a̱i̱ssksipaitapiʼssini. Ikkama̱o̱maiʼtakiinoainiki kima̱takohtokakihtsimattspoaawa kitoka̱ʼpanisttsissoaawaistsi. Kita̱ksskomatapa̱aatoʼpoaawa anniihka manipa̱i̱tapiʼssinihka. Kima̱tako̱noaiʼtaʼpiʼnihpoaawa. 25Kita̱kanistohpoaawa niitsi̱i̱yi. A̱kanistsiwa i̱ssoohtsika ki a̱kaomatapanistsiwa mata̱piiksi amokska nita̱yisstsiwokikska ki a̱nnikskai a̱koʼtsimiaawa anniihka manipa̱i̱tapiʼssinihka. Ki mi̱i̱ksi mata̱piiksi ka̱taʼyayisstsiiksi ma̱takoʼtsi̱maiksaa a̱a̱mohka manipa̱i̱tapiʼssinihka. I̱i̱kanistssiiyaawa a̱nni a̱kaiʼniiyaawa. Ikkama̱yisstsiiyisaawa a̱koʼtsimiaawa anniihka manipa̱i̱tapiʼssinihka. 26Takaa niipa̱i̱tapiiʼssini iihtsi̱i̱stapitsstsiihpa ni̱nna A̱ʼpistotookiwa. Ki niʼto̱yi niisto̱yi ohko̱yi. Ni̱tohkokka ma̱a̱hkohtsitsiistapitsstsissi niisto̱yi niipa̱i̱tapiiʼssini. 27Ki niisto̱yi nini̱ʼtaohkokka na̱a̱hkokakihtsimatahsi mata̱piiwa. Takaa niisto̱akaoʼka annaahka Mata̱piiwahka i̱kayissiinapanistawahka ota̱koʼtoohsi. 28Kii pinohtsi̱pisatsiʼtakik a̱a̱mohka nita̱waaniihpihka. I̱ssoohtsika iʼni̱i̱ksi itoya̱aksstsaaiksi nita̱kohkanayoohtookiaawa nitaiʼpoyissi. 29Ki a̱kitssksipoa̱ooyaawa. Omi̱i̱ksi iika̱moʼtsipaitapiiksi a̱kohtsitssksipoa̱aa̱ttsaayaawa ma̱a̱hkiipaitapiiʼssaawa, kii omi̱i̱ksi sao̱kamoʼtsipaitapiiksi a̱kohtsitssksipoa̱aa̱ttsaayaawa a̱a̱hkokakihtsimatahsaawa. 30Niisto̱wa ma̱tsitsstsiihpa nita̱kohkottawattanisttsiihpi; nanisto̱o̱htoahpi A̱ʼpistotookiwa ki a̱nniayii ta̱kanistokakihtsimaa. Nima̱taʼpaisskiihpa na̱a̱hkanisttotsissii nita̱wattsitsiihtaanistsi. Otsitsi̱i̱htaanistsi annaahka nito̱ʼtsskookahka, a̱nnistskayii nita̱wanisttotsiihpi. A̱nnihkayii kita̱kohtoʼtssksiniihpoaawa nita̱o̱kamoʼtokakihtsimaahsi.

31O̱ki. Niisto̱wa nanistsi̱ʼtsitapiiyihpi ikkama̱wattsiʼpoatomoohsiiniki kima̱takstsinaoʼmaiʼtookihpoaawa. 32Ki ina̱o̱ʼkitsstsiihpa istsi̱ka nita̱o̱kamoʼta̱i̱ʼpoatomooka. Kii ni̱tssksiniihpa oosto̱yi i ihta̱o̱maniiʼpoyiiwa niisto̱yi. 33Nima̱tohtaiʼpoyiihpa oma̱a John. Kiisto̱aawa kitsi̱tapssksksimoʼtaahpoaawa John, ki i̱i̱manistoma mani̱stohtaiʼpoyihpi niisto̱i. 34Kii ki niisto̱wa nima̱takstsinaiʼtotosttohpa mata̱piiksi nita̱i̱ʼpoatomookiksi. Kitsi̱i̱ksstatohpoaawa ka̱a̱hksikamotsi̱i̱piotssoayi. A̱nnihkayii no̱mohtsitotostto John. 35Osto̱yi annaahka Johna otsi̱ʼpoahsini a̱nni ana̱ʼkimaʼtsisi. Iihpako̱yittsi, kii a̱anaʼkakiwa. Kiisto̱aawa kitsi̱stsitsaoʼksistsisstsiiwawaawa. 36Nipi̱ʼkanisttsissiistsi annohka kita̱kohkottohtoʼtssksiniihpoaawa nitsipo̱o̱hsapsskoyissi A̱ʼpistotookiwa. John kino̱o̱hkattanikkoaawa nitsipo̱o̱hsapsskoyissi A̱ʼpistotookiyi. Ki amo̱stska nipi̱ʼkanisttsissiistska iʼtsi̱tsskstsiimatoomiaawa John ota̱nissiistsi. 37Ki annaahka ni̱nnahka nito̱ʼtsskookahka, i̱i̱manistooma nanistsi̱ʼpoatomo̱yihpi. Kiisto̱aawa kima̱to̱noayoohtoawaawa. Kima̱tsinoawaawa manistsi̱naʼpi. 38Kima̱tohtaikiihpoaawa A̱ʼpistotookiwa ota̱a̱niihpi. Ki a̱nnihkayi ko̱mohtsawaakomaiʼtookihpoaawa. Niisto̱akaoʼka anniska oto̱ʼtsskoayiska.

39Ki̱niitaʼpiyikokakio̱paatoohpoaawa omiistsi nato̱i̱si̱naakssiistsi. Kanistsi̱ksimsstaahpoaawa kita̱kohtohkooʼtsiihpoaawa a̱i̱ssksipaitapiiʼssini. Ami̱i̱stsi nato̱isi̱naakssistsi iihta̱o̱kamoʼtsiʼpoyiiyaa niisto̱yi. 40Ki kimi̱ssksawaisstaahpoaawa ka̱a̱hkomaiʼtookssoaawayi ka̱a̱hkohtohkotohsoayi amoohka manipa̱i̱tapiiʼssinihka, amoohkkita̱yiikaʼkimatoohpoayihka.

41A̱a̱mohka nima̱a̱tohtanistoohpa ka̱a̱hkohtsitsspimmokssoaayi. 42No̱mohtanistoʼpa kitsayikakakomi̱mmahsoaayi A̱ʼpistotookiwa. 43Niisto̱wa no̱mohtoʼtoowa na̱a̱hkitaʼpoʼtomoahsii Ni̱nna A̱ʼpistotookiwa. Kii ki̱tsstsimimmokihpoaawa. Ikkami̱tsstsiihki kayi̱sstaʼpitawaanii A̱ʼpistotooki otsipo̱o̱hsapsskoyissi kita̱kitsiksimatomaiʼtoawaawa.

44Kika̱a̱ksstaahpoaawa ka̱a̱hksokimmi̱yissoaayi mata̱piiwa. Ki a̱nnihkayi ko̱mohtsaohkottomaiʼtakihpoaawa. Kita̱kohkottaʼpaisskiihpoaawa ka̱a̱hksokimmi̱yissoaayi annaahka A̱ʼpistotookiwahka ka̱kiʼtsitsstsiiwahka.

45Niisto̱wa nima̱takanistawa ni̱nna ka̱a̱hkohtokakihtsima̱yissoaayi kitsawa̱omaiʼtakssoaayi. Moses a̱nnahkai a̱akanistsiiwayi. Kiisto̱aawa ka̱a̱hkanistaiksimsstaahpoaawa Moses ma̱a̱hkanistahsi A̱ʼpistotookiiyi kito̱kamoʼtsipaitapiʼsoaayi annohka komohta̱i̱sapoohsoaayi otoka̱kihtsimaani. Saa. Ma̱tanistsiiwa. Iihta̱i̱ʼpoyiiwa kani̱stssaommitsitapiʼsspoaawayi komohtsawa̱o̱maiʼtookssoaayi. 46Kimi̱i̱ksistsawaomaiʼtoawaawa. Takaa a̱nnihkayii iihtsitsi̱kayissitsinssinaimi nato̱i̱si̱naakiaʼtsiistsi nita̱koʼtoohsi. A̱nnihkayii ko̱mohtanistohpoaawa ikkamo̱maiʼtoainoainiki ki a̱nniayii kita̱koohkattomaiʼtookihpoaawa. 47Kii kima̱tsiitaʼpomaiʼtsiihpoaawa osi̱nakssiistsi. Ki a̱nnohkayii kita̱kstamoohkattsaomaiʼtookihpoaawa nita̱waaniihpi.” A̱nniayi a̱a̱niiwa Jesus.

Выбрано:

John 5: BLA1979

Выделить

Копировать