Matta 4

Ibiliisa sii'ake Iisa

1Nder wakkati mum, *Ruuhu Alla ɗowi Iisa nder ladde yeeruure, ngam Ibiliisa sii'oo mo. 2Jemma he nyalooma faa ɗum waɗi balɗe lasooji ɗiɗi, Iisa no suumi, o rafaa. 3Nden, Cii'otooɗo oon ɓadii mo, wi'i :

—Se goonga fuu a *Ɓii-Alla, tilsin kaaƴe ɗee laatoo nyaamdu.

4Sey Iisa jaabii mo, wi'i :

—Dewtere Alla wi'i : Hanaa nyaamdu tan neɗɗo wuurdata, amma haala fuu ƴuwka to Alla.#4.4 Wi'itaade Tawreeta 8.3

5Gaɗa mum, Ibiliisa yaari Iisa nder *Ursaliima huɓeere seniine, darni mo dow hoore *Juulirde mawne. 6Nden wi'i mo :

—Se goonga fuu a *Ɓii-Alla, jikku dow leydi, ngam Dewtere Alla wi'i : Alla tilsinan maleykaaɓe mum taɓɓite to koyngal maaɗa fii he hayre.#4.6 Jabuura 91.11-12

7Sey Iisa jaabii mo, wi'i :

—Dewtere Alla wi'i kaden : A sii'ataako Alla Joomiraawo maa.#4.7 Wi'itaade Tawreeta 6.16

8Gaɗa mum Ibiliisa yaari Iisa dow waamnde toowne sanne gom, holli mo laamuuji duuniyaaru fuu he no ɗi ngoodiri darja. 9Nden wi'i mo kaden :

—Mi hokkete ɗi, ɗi fuu, nde nii a hofake, a sujidanii kam.

10Sey Iisa jaabii mo, wi'i :

—Woɗɗam Ibiliisa ! Ngam Dewtere Alla wi'ii : Alla Joomiraawo maa tan kaanɗaa sujidande. Kanko tan kaanɗaa rewude.#4.10 Wi'itaade Tawreeta 6.13

11Nden Ibiliisa dilli acci mo. Maleykaaɓe gom ngari to makko, no ngollana mo.

Puɗɗol golleeji Iisa nder leydi Galili

12Wakkati Iisa nanunoo ko Yahaaya uddaama, o fa'i Galili. 13O eggi Nasaratu, o hoɗowi Kafarnahum takkol peta Galili, ci'e gonɗe nder leykoy Jabulon he Naftali. 14Ɗum waɗi ngam humnude haala ka annabi *Esaaya haalunoo wakkati o wi'unoo :

15 Onon leykoy Jabulon he Naftali

ngonkoy takkol peta Galili,

ngonkoy gaɗa maayo Urdun,

tawaakoy nder leydi Galili,

leydi ɓe kanaa *Yahudankooɓe :

16 Wonɓe nder nimre,

hi'uɓe jeyngol manngol.

Wonɓe nder ɗowdi maayde,

jeyngol wanngani ɓe. # 4.15-16 Esaaya 8.23–9.1

17Nder wakkati oo non, Iisa fuɗɗi waajaade no wi'a :

—Tuubee, ngam Laamu Alla ɓadake.

Noddol aahiiɓe Iisa aranɓe

18Wakkati Iisa gosotonoo daane peta Galili, o hi'i worɓe ɗiɗo nanngooɓe liƴƴi gom, Simon inndirteeɗo Piyer he rimdaaɗo mum Andiire. Iɓe paɗɗa taaruuji maɓɓe. 19Nden Iisa wi'i ɓe :

—Ngaree, tokkee kam. Mi waɗan on nanngooɓe himɓe.

20Wakkati mum da ɓe mboppi taaruuji maɓɓe, ɓe tokki mo. 21O yehi yeeso, o hi'i kaden rimdaaɓe ɗiɗo gom Yakuuba he Yahaaya he baabiiɓe Jebede, iɓe nder laana, iɓe moƴƴina taaruuji maɓɓe. O noddi ɓe, kamɓe duu. 22Wakkati mum da ɓe mboppi laana kaan, ɓe acci baabiiɓe, ɓe tokki mo.

Waaju Iisa he nyawtol himɓe

23Iisa tinni no fiiloo nder leydi Galili, omo waajoo nder *baajorɗi maɓɓe. Omo filloo filla *Habaru lobbo, filla Laamu Alla. Omo nyawta iri nyawuuji he iri laruuji fuu. 24Nden habaru makko sankitii nder leydi Siriya fuu. Himɓe no ngadda nyawɓe mum'en, wonduɓe he nyawuuji feere-fereeji to makko. Woɓɓe no ngondi he ginnaaji, woɓɓe no ngondi he paɗɗe, woɓɓe duu no bonnguuɓe. O nyawti ɓe, ɓe fuu. 25Jama'aare mawne tokki mo. No woodi ƴuwɓe Galili, ƴuwɓe leydi Gure-sappo, *Ursaliima, Yahudiya, he ƴuwɓe gaɗa maayo Urdun.

Выбрано:

Matta 4: FUH

Выделить

Копировать