Matiyo 4
4
Yang Pagsasat ni Iblis kang Isa
(Mark. 1:12-13; Luk. 4:1-13)
1Ansinyan dyaa si Isa ng Nyawa ng Tohan adto sang kamingawan kay untak sasatun yan ni Iblis. 2Na, pagkatapos ni Isa magpowasa sa suud ng 40 na allaw aw 40 na gabi, yamagutum da yan. 3Ansinyan dyomood kanan yang mangsasatay aw laong nan, “Kong bunna na ikaw yang Anak ng Tohan, #4:3 Yang pyaglaongan na Anak ng Tohan sambok na ngaan atawa titolo para kang Isa Almasi na way labot sang pagpanganak kanan. Yang karim ipasabot sini na titolo na yang kariko ng kinaiya aw kabarakat ng Tohan iyan kang Isa Almasi. sogowa yani na mga bato na ma-inang ng pan.”
4Awgaid tyomobag si Isa aw laong nan, “Yakasorat sang Kitab, ‘Yang manosiya di amabowi sabap sang pagkan gaid, kondi sabap oman sang pyaglaongan ng Tohan.’ ” #4:4 Yani na ayatan yakasorat sa Kitab Tawrat, Pangagama 8:3.
5Pagkatapos sinyan dyaa yan ni Iblis adto sa Awrosalam, yang tyawag na sotti na syodad, aw pa-induga nan adto sang labi na makagwas na bain sang Baay ng Tohan. 6Ansinyan yagalaong si Iblis kang Isa, “Aw bunna na ikaw yang Anak ng Tohan, layog adto sang daum. Kay yakasorat sang Kitab na
“ ‘Asogoon ng Tohan yang mga malaikat nan sang pag-atiman kammo.
Asakgawon kaw nilan untak yang siki mo di komuug sang bato.’ ” #4:6 Yani na ayatan yakasorat sa Kitab Jabor 91:11-12.
7Tyomobag si Isa, “Aon oman yakasorat sang Kitab na yagalaong, ‘Ayaw pagtigia yang Tohan na kammo Tagallang.’ ” #4:7 Yani na ayatan yakasorat sa Kitab Tawrat, Pangagama 6:16.
8Pagkatapos sinyan dyaa da oman yan ni Iblis adto sang tanto mataas na butay aw pyakita nan kanan yang kariko ng mga pyagdatowan adi sa babawan ng donya aw yang kadyawan sinyan. 9Ansinyan yagalaong si Iblis kang Isa, “Yang kariko ninyan i-atag ko kammo kong somojod kaw kanak.”
10Tyomobag si Isa, “Panaw da, kay Iblis, kay yakasorat sang Kitab, ‘Yang Tohan na kammo Tagallang, yan gaid yang asambayangan aw apangagadan mo.’ ” #4:10 Yani yang yakasorat sa Kitab Tawrat, Pangagama 6:13.
11Pagkatapos sinyan pyanawan da yan ni Iblis. Ansinyan dyomatung yang mga malaikat aw yatiman nilan si Isa.
Yagasogod si Isa Mag-osiyat sang Probinsya ng Jalil
(Mark. 1:14-15; Luk. 4:14-15)
12Ansinyan pagdungug ni Isa na yapiriso da si Yahiya, byomarik yan sang probinsya ng Jalil. 13Awgaid wa da yan paga-uya adto sa Nasarit kondi adto da sa Kapirnaom, sambok na longsod sang kilid ng Linaw ng Jalil na adto yakabutang sang lopa na yatag singaon sang mga tribo ni Sibolon aw Naptali. 14Na, ansinyan yatoman yang pyaglaongan ni Nabi Isayas na laong nan,
15“Yang lopa ni Sibolon aw yang lopa ni Naptali
na iyan sang daan paduug sa dagat, yang banwa na adto sang dipag ng tobig ng Yordan,
yan yang banwa na tyawag oman ng Jalil na pyaga-uyaan ng mga dili ng Yahodi.
16Yang mga otaw na yaga-uya ansan maynang iyan silan sang kadugguman,
awgaid makakita da silan ng allag na labi na masilaw.
Maskin iyan silan sang kadugguman aw yamalluk silan matay,
aka-allagan da silan.” #4:16 Yani na mga ayatan yakasorat sa Kitab Tawrat, Nabi Isayas 9:1-2.
17Sikun sidto na wakto yagasogod da si Isa mag-osiyat aw laong nan, “Pagtawbat kamo aw biyai mayo yang mga dosa mayo kay masaid da domatung yang pagdato ng Tohan.”
Yang Pagpili ni Isa sang ona na mga Inindowan nan
(Mark. 1:16-20; Luk. 5:1-11)
18Ansinyan sarta yagapanaw si Isa sang kilid ng Linaw ng Jalil, kinita nan yang dowa na maglomon na si Simon na tyawag oman ni Pitros aw yang mangod nan na si Andriyas. Yamamokot silan kay mangingisdaay silan. 19Yagalaong kanilan si Isa, “Bita da, agad kamo kanak. Sikun adon inangun ta kamo na mangingisdaay ng otaw untak magpangagad silan kanak.” 20Na, pagdungug sinyan biniyaan dayon nilan yang kanilan pokot aw yamagad silan kang Isa.
21Ansinyan pyomanaos si Isa pagpanaw aw kinita oman nan yang dowa na maglomon na si Yakob aw si Yahiya na mga anak ni Sibidi. Yanagpona silan ng pokot adto sang bangka upud sang ama nilan. Tyawag silan ni Isa na amagad kanan. 22Ansinyan biniyaan da nilan yang bangka aw yang ama nilan aw yamagad silan kanan.
Yaga-indo si Isa aw Yagapakadyaw yan sang mga Masakitun
(Luk. 6:17-19)
23Ansinyan yakarimpud si Isa pomanaw sang tibok probinsya ng Jalil. Yaga-indo yan adto sang mga pagsasambayangan ng mga Yahodi aw yaga-osiyat yan ng Madyaw na Gogodanun makapantag sang pagdato ng Tohan aw pyakadyaw nan yang kariko ng mga masakitun. 24Na, yang gogodanun makapantag kanan yakarimpud oman adto sang bangsa ng Siriya. Agaw, dyaa da ng mga otaw yang kariko ng mga masakitun adto kanan, mga otaw na bali na kasakit yang lawas nilan, mga kyasaytanan, mga pyagababoy-baboy aw mga yamasadi yang lawas nilan. Aw yang kariko nilan pyakadyaw ni Isa. 25Ansinyan madaig yang mga otaw na yamagad kanan. Aon mga taga Jalil, aon oman sikun sang probinsya ng Dikapolis, #4:25 Yang mana ng Dikapolis Sampoo na mga Longsod. taga Awrosalam, taga Yahodiya aw sikun oman adto sang dipag ng tobig ng Yordan.
Выбрано:
Matiyo 4: KI
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2012, Wycliffe Bible Translators, Inc. All rights reserved.