Genesis 4
4
Naghalad hi Cain ngan hi Abel
1Niyan nakighilawas hi Adan kan Eva nga iya asawa. Nagburod hi Eva ngan nag-anak hin lalake ngan nagsiring, “Tungod han bulig han Ginoo nagkamay-ada ako anak nga lalake.” Sanglit iya ginngaranan hiya nga Cain.#4:1 CAIN: Pareho han Hebreo nga pulong para han “nagkamay-ada” an tungod hini nga ngaran. 2Ngan nag-anak liwat hi Eva hin lain nga lalake, hi Abel. Nahimo hi Abel nga usa nga magmarangno hin mga karnero, kundi parauma hi Cain. 3Usa ka adlaw nagdara hi Cain hin mga abot han iya inani ngan iya iginhalad ini ngadto han Ginoo. 4Niyan nagdara hi Abel han suhag nga nati nga karnero nga igin-anak hin usa han iya mga karnero, gin-ihaw ini, ngan iginhatag an gimamay-upayi nga mga bahin hini. Nalipay an Ginoo kan Abel ngan han iya halad, 5kundi iginsikway niya hi Cain ngan an iya halad. Napungot hin duro hi Cain ngan nagkuriot hiya hin kasina. 6Niyan nagsiring an Ginoo kan Cain, “Kay ano nga nasisina ka? Kay ano nga nagkukuriot ka? 7Kon maupay an imo ginbuhat, mahiyomhiyom ka unta;#4:7 mahiyomhiyom ka unta; o kinakarawat ko unta an imo halad. kundi tungod nga maraot an imo ginbuhat, nagama ha imo an sala ngan karuyag na hikaptan ka niya, sanglit kinahanglan nga madaog ini nimo.”
8Niyan nagsiring hi Cain kan Abel nga iya bugto, “Tana, pakadto kita didto ha kaumhan.”#4:8 Ha pira nga kadaan nga mga hubad Niyan…kaumhan; waray hini nga mga pulong ha Hebreo. Han nakadto na hira han kaumhan, dinasmagan ni Cain an iya bugto ngan ginpatay niya.
9Pinmakiana kan Cain an Ginoo, “Hain na hi Abel nga imo bugto?”
Binmaton hiya, “Ambot. Ako ba an magmarangno han akon bugto?”
10Niyan nagsiring an Ginoo, “Kay ano nga ginbuhat mo ini nga makangingirhat nga butang? Nagoliat ngadi ha akon tikang ha tuna an dugo han imo bugto sugad hin goliat hin pagbulos. 11Yana gagabaan ka ngan diri ka na makakag-uma han tuna nga hinumban han dugo han imo bugto ngan an tuna daw binmuka han iya baba basi makausop han dugo han imo bugto nga imo ginpatay. 12Kon mag-uma ka, diri mahatag hin bisan ano nga abot an tuna; maglilinayawlayaw ka nga waray himangkaagan ug urokyan ha bawbaw han tuna.”
13Ngan ginsiring ni Cain an Ginoo, “Makuri ko ini maantos nga kastigo. 14Ginpapaiwas mo ako tikang han tuna ngan tikang ha imo atubangan. Maglilinayawlayaw ako nga waray urokyan ha bawbaw han tuna, ngan pagpapatayon ako han bisan hin-o nga makaagi ha akon.”
15Kundi binmaton an Ginoo, “Diri ini mahinanabo. Kon may-ada magpatay ha imo, pagbabaydan liwat ini hin pito nga kinabuhi.” Sanglit ginbutangan han Ginoo hi Cain hin tigaman basi diri hiya pagpatayon han bisan hin-o nga makakita ngan igkatapo niya. 16Ngan pinmahirayo hi Cain han Ginoo ngan nag-ukoy hiya didto hin usa nga tuna nga ginngaranan nga Nod#4:16 NOD: Karuyag sidngon, “Naglilinayawlayaw.” ha sinirangan han Eden.
May mga Tulin hi Cain
17Nag-anak hin usa nga lalake hira Cain ngan han iya asawa, ngan ginngaranan hiya nga Enoc. Niyan nagtindog hi Cain hin syudad ngan isinangay ini han iya anak. 18May-ada usa nga anak nga lalake hi Enoc nga ginngaranan nga Irad nga amo an amay ni Mehujael nga amay ni Matusael nga amay ni Lamec. 19May duha nga mga asawa hi Lamec: hira Ada ug Zila. 20Nag-anak hi Ada kan Jabal nga amo an ginikanan hadton mga magmarangno hin kahayopan ngan nag-uokoy dida hin mga tulda. 21An iya bugto amo hi Jubal nga ginikanan han ngatanan nga mga musikero nga nagtutukar han arpa ngan han plauta. 22Nag-anak hi Zila kan Tubal-cain nga maghirimo hin magkalainlain nga mga garamiton#4:22 nga naghimo hin mga garamiton; ha usa nga kadaan nga hubad, nga ginikanan han ngatanan nga mga panday hin puthaw. tikang hin bronse ug puthaw. Hi Naama amo an babaye nga bugto ni Tubal-cain.
23Ginsiring ni Lamec an iya kaasaw-an,
“Ada ug Zila, pamatii ako.
Nakamatay ako hin batan-on nga lalake kay ginsuntok ako niya.
24Kon pito nga kinabuhi an iginbabayad para hin pagpatay kan Cain,
setentay siete nga kinabuhi an igbabayad kon pagpatayon ako.”
Gin-anak ni Set hi Enos
25Nag-anak liwat hin lain nga lalake hira Adan ngan han iya asawa. Nagsiring hi Eva kan Adan, “Gintagan ako han Dyos hin usa nga anak nga lalake nga liwan kan Abel nga ginpatay ni Cain.” Sanglit iya ginngaranan nga Set#4:25 SET: Pareho an tunog hini nga ngaran han Hebreo nga pulong para han “iginhatag.” an bata. 26May-ada usa nga anak nga lalake hi Set nga ginngaranan niya nga Enos. Amo adto an panahon nga nagtikang an mga tawo hin pagsangpit ngan pagsingba han baraan nga ngaran han Ginoo.
Выбрано:
Genesis 4: MBBSAM
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Baraan nga Biblia © Philippine Bible Society, 1984
