Matyù 10
10
Yěsû a twuumə̀ ɨ̀zùŋə̀ ndzùmə̀ ɨ̀pe pa ntsòbə̀ ɨpaa
1Yěsû à lə̀ fuŋə̀ ɨ̀zùŋə̀ ndzùmə̀ ɨ̀pe pa ntsòbə̀ ɨpaa ŋŋâ a ghobə nɨ mɨ̀tɨ̀ŋnə̀ lo pobə̂ kantə̀ ɨ̀zhwùə̀ tɨ̀pòŋə̀ nkɨ mbarə̀ mbuurə̀ ɨghoonə ɨ̀tsùmə̀.
2Lə̌ mɨ̀linə̀ mɨ ngàŋə ntwuumə̀ ɨ̀ze za ntsòbə̀ ɨpaa: ntsàambyə̀, Shimùnə̀ nɨ pɨ lə̀ mənə nfuŋə̀ e nɨ Pità nɨ ndyimə e Andrù; Jemə̀ moonə̀ Zebedì nɨ momaa e Jònə; 3Filibə̀ pobə Bartholomew; Thomas pobə Matyù ɨ̀nkẅiirə̀ pɨ̀taghə̀; Jemə̀ moonə̀ Àlfeyùsə̀, nɨ Tàdyusə̀; 4Shimùnə̀ ŋwùə̀ Kanàanə̀ pobə Yudà Iskaryòtə̀, ẅùə̀ nɨ à lə̀ shwùunə̀nə a Yěsû la.
5Yěsû à lə̀ tsàa pèrə pə ntsòbə̀ ɨpaa a àpyìinə nshwəŋə̀ ambo pobə lo, “Kò nɨ̀ lèrə̀ a wɨghə ambo pànə̀ nɨ ka pobə pə ghobə pɨ̀Jew kə̀ nkwuunə̀ amwuə mɨ̀mbòmpə mɨ ɨ̀laʼà mɨ Sàmariyà. 6Nɨ̀ lèrə̀ pə ambo pànə̀ pɨ Israel nɨ pobə pənə mbyə̂ ndzìrə̀ Nẅùə̀ za nɨ zèrə pînə la. 7Tsaʼnə nɨ̀ mənə ndèrə̀, nɨ̀ pìʼnə̀ a nɨ mə nchwìitə̀ ntwuumə̀ ambo pobə lo, ‘Ànwùə̀ Nɨ̀fò Nɨ̀pwuurə̀ a paatə̀.’ 8Nɨ̂ parə̀ pɨghoonə, mbə̀ʼkə̀ pɨ̀kwuə̀, nsùu ngàŋə àkɨ̀kẅinə, nkɨ nfuukə̀ ɨ̀zhyə̂ amwuə mɨ̀pùmə̀ mɨ pə̀ənə̀. Nɨ̀ kẅiirə̀ tɨghu nɨ̀ zwuunə̀, nɨ̂ kɨ ŋŋâ tɨghu nɨ̀ kẅiirə̀ nkabə̀. 9Kò nɨ̀ lòo a wɨghə ɨ̀pwuumə̀ pɨ tsèntə̀nə nɨ pɨ pa nfuŋə̀ nɨ goldə̀ kə̀ silbà amwuə pɨ̀məpàamə̀ ɨ̀pɨghə. 10Kò nɨ̀ lòo a wɨghə àpàamə̀ aŋunə àkwùə̀ nɨ̀yìinə̀ ghu kə̀ ɨtsəʼə nɨ ɨtabə pɨ̀nyaanə, kə̀ mbàŋə̀; mbə̀ʼnə a kùʼnə̀ lo pɨ̀ ŋâ mɨ̀zɨghə̀ ambo ngàŋə̀ àfàʼà.
11“Nkwùə̀ nɨ nɨ̀ pyàanə amwuə mbòmpə àlaʼà kə̀ amwuə àlaʼà, nɨ̀ naŋə̀ a ŋònə̀ nɨ à kẅiirə̀nə a wɨghə ɨ̀shìʼnə̀, nchyə̂ pɨghə pɨ pobə tə mbyàa nkwùə̀ nɨ nɨ̌ myàʼtə̀ alyiʼə ghu. 12Tsaʼnə nɨ̀ kwuunə̀nə amwuə ndâ, nɨ̀ ŋâ àchàʼtə̀. 13Ndâ ghu ɨ̀ kùʼnə̀, àporə̀porə̀ àzɨghə a ghoŋə̀ amwuə; nkɨ ka kùʼnə̀ e, àporə̀porə̀ àzɨghə a kẅirə̀ ntô ambo pɨghə. 14Pɨ tə mbəla ka kẅiirə̀ e a wɨghə kə̀ shwəŋnə̀ nɨ pɨghə, nɨ̀ kwùrə̀ àpùbə a mɨ̀kwùə̀ pɨghə nkwùə̀ nɨ nɨ̀ myàʼtə̀nə ndâ ghu kə̀ mbòmpə àlaʼà ghù. 15Ǹshwəŋə̀ tyìʼə̀ nkǔŋə nkuŋə ambo pɨghə lo, Nẅùə̀ à ghǎ koorə̀ mɨ̀lɨŋə̀ mɨ pànə̀ pɨ àlaʼà Sodòmə̀ pobə Gomorrah njyə̂ ntsoʼtə̀ mɨ̀sàʼa tsàarə̀ pànə̀ pɨ mbòmpə àlaʼà ghu. 16Ngwə̀ ntsàa a wɨghə a àpyìinə lə tsaʼa mɨ̀mbyə̂ a tɨ̀tɨ̀rə̀ pəfuunə. Nɨ̀ zhìʼtə̀ tsaʼa mɨ̀nyoorə̀, nkɨ mbonə̀ tsaʼa ɨ̀lwuʼə̀.
17“Nɨ̀ zhìʼtə̀ a wɨghə; pɨ̌ kô a wɨghə ŋŋâ ambo ngàŋə saʼà mɨ̀sàʼa pobə̂ kəʼə̀ a wɨghə amwuə mɨ̀ndâ mɨ àshwatə̀ ɨ̀mobə. 18Pɨ̌ sùŋə̀ a wɨghə tô a mbyə̀ ɨ̀twuə̀ àlaʼà pobə pɨ̀fò ntii nɨ̀linə̀ ɨ̀tsâ, lo nɨ̀ shwəŋə̀ ntwuumə̀ ghù ɨ̀shìʼnə̀ wa ambo pobə farə ambo pànə̀ nɨ ka pobə pə ghobə pɨ̀Jew. 19La nkwùə̀ nɨ pobə kônə a wɨghə, kò nɨ̀ kwàŋə̀ ndwuumə̀ nɨ nɨ̌ shwəŋə̀ kə̀ ànwùə̀ nɨ nɨ̌ shwəŋə̀. Nkwùə̀ ɨ̌ tô kùʼù pɨ̀ ŋâ a wɨghə nɨ ànwùə̀ nɨ nɨ̌ shwəŋə̀. 20Mbə̀ʼnə ka la pə shwəŋnə̀ e pɨghə, la ghǎ shwəŋnə̀ Àzhwùə̀ Tǎ ɨwɨghə làŋə̀ a ndzùmə̀ pɨghə.
21“Pànə̀ ghǎ mə ŋâ pɨlyimə ɨ̀pobə lo pɨ̀ zhwuutə̀, pɨ̀tǎ kɨ mmə ŋŋâ ɨ̀poonə̀ ɨ̀pobə lo pɨ̀ zhwuutə̀; ɨ̀poonə̀ ghǎ pə̀ŋə̀ zòŋnə̀ pɨ̀tǎ ghobə pɨ̀mǎ zhwuutə̀ a ghobə. 22Ŋwùə̀ ntsùmə̀ à ghǎ pàanə̀ a wɨghə mbə̀ʼə nɨ̀linə̀ ɨ̀tsâ. La ŋònə̀ nɨ à təəmə̀nə ntɨ̀ŋnə̀ ngə̀ ndẅùunə̀ la à ghǎ chwarə̀. 23Lenəla, pɨ mə nnyàŋə̀ a wɨghə amwuə zə mbòmpə àlaʼà, nɨ̀ kɨ̀ɨrə̀ ndèrə̀ amwuə yɨ̀ nyàanə. Ǹshwəŋə̀ tyìʼə̀ nkǔŋə nkuŋə ambo pɨghə lo, ka nɨ̀ pə myàanə̀ a wɨghə àfàʼà àzɨghə amwuə mɨ̀mbòmpə mɨ ɨ̀laʼà mɨ Israel zaʼà Moonə̀ Ŋwùə̀ â pòŋə̀ tô.
24“Ka mɨnkɨ̂ àŋwàʼnə̀ â tsàarə̀ e a ɨ̀nèrə̀; ka ngàŋə̀ àfàʼà a kɨ ntsàarə̀ e a masàa e. 25A kùʼnə̀ ambo mɨnkɨ̂ àŋwàʼnə̀ a nɨ pə tsaʼa ɨ̀nèrə̀ e, ngàŋə̀ àfàʼà â kɨ mbə tsaʼa masàa e. Pɨ tə pəla nfuŋə̀ àtwuə̀ ngẅàrə̀ nɨ ɨ̀fò pɨ ɨ̀zhyə̂, yi pɨ̌ fuŋə̀ pànə̀ pɨ ngẅàrə̀ ghu nɨ mɨ̀linə̀ nɨ mɨ pɨ̂nə ntsàarə̀!
Ŋònə̀ nɨ à kùʼnə̀nə lo mbə̀ʼə pɨ pô e
(Luk 12.2-7)
26“Kò nɨ̀ pô a wɨghə pə̀ənə̀. Ka àzwuumə̀ àtse â pə e ghu nɨ pɨ lə̀əmə̀nə nɨ ka pɨ̀ pə ghǎ zhyə̂ e. 27Ànwùə̀ nɨ ngwə̀ nshwəŋə̀ a wɨghə amwuə ndzùmə, nɨ̂ shwəŋə̀ a zèrə amwuə njyə̂; zhyə̀ nɨ pɨ chùmpə̀nə ambo pɨghə, nɨ̀ təəmə̀ a mɨ̀kẅùə̀ mɨ ndâ nshwəŋə̀. 28Kò nɨ̀ pô a wɨghə pànə̀ nɨ mbə̀ʼə pobə zhwuutə̀ mbɨ̀ŋmə̀, la ka pə zhwuutə̀ a ghobə ntɨŋmə̀. Nɨ̀ pô pə a Nẅùə̀ nɨ mbə̀ʼə a màʼà mbɨ̀ŋmə̀ pobə ntɨŋmə̀ amwuə àkɨɨnə̀ ɨ̀mǔ. 29Yi pɨ pa ndzwuunə̀ pɨ̀zɨghə̀ àkòʼò pɨpaa la nɨ taʼà kapà, la mbə̀ʼə taʼà a kunə̀ e a ɨ̀shyə̂ tɨghu Tǎ ɨwɨghə à zhyə̂ apə̀. 30La ngə̀ aŋunə pɨghə, pɨ shaŋə̀ mə mɨ̀nyùŋə̀ mɨ àtwuə̀ ɨ̀mɨghə. 31Lenəla, kò nɨ̀ pô; nɨ̀ tsàarə̀ pɨ̀zɨghə̀ àkòʼò pɨ̀noʼnə.
Pànə̀ nɨ pobə pyiimə̀nə a Yěsû pobə pyə̀ nɨ pɨ twuunə̀nə e
(Luk 12.8-9)
32“Ŋònə̀ nɨ à nèrə̀nə a sàŋə̀ lo à zhyə̂ mə̀, ngǎ kɨ pyiimə̀ e a sàŋə̀ a mbyə̀ Tǎ ɨwəə a nɨ̀pwuurə̀. 33La ŋònə̀ nɨ à twuunə̀nə mə̀ a sàŋə̀, ngǎ kɨ twuunə̀ e a mbyə̀ Tǎ ɨwəə a nɨ̀pwuurə̀.
34“Kò nɨ̀ kwàŋə̀ lo ǹtô la nɨ àporə̀porə̀ amwuə àtwuə̀ ɨ̀shyə̂. Ngaŋə! Ǹtô la lo ghɨ̀rə̀ pànə̀ tə ndzòŋnə̀ nɨ mɨnẅuə ntsòo. 35Ǹtô la a nɨ ghɨ̀rə̀ lo mômbyàŋnə̀ â zòŋnə̀ a tǎ ɨghobə, mômə̀ngyə̌ â zòŋnə̀ a mǎ e, pə̀ngyə̌ zòŋnə̀ pɨ̀mǎ pɨ ndâ ɨ̀pobə; 36ngotə ngàŋə kɨpaanə ŋwùə̀ ghǎ tyiʼə̀ pə ngàŋə ngẅàrə̀ ɨ̀ze.
37“Ŋònə̀ nɨ à kòŋə̀nə a tǎ ɨghobə kə̀ a mǎ e ntsàarə̀ mə̀ ka à kùʼnə̀ e a nɨ pə àzùŋə̀ ndzùmə̀ mə̀; ŋònə̀ nɨ à kòŋə̀nə a moonə̀ e ghu mbyàŋnə̀ kə̀ a ghu mə̀ngyə̌ ntsàarə̀ mə̀ ka kùʼnə̀ e a nɨ pə àzùŋə̀ ndzùmə̀ mə̀. 38Ŋònə̀ nɨ ka à pìʼì e àtɨ̀ghə pànkə̀nə e ndzùŋə̀ mə̀, ka à kùʼnə̀ e a nɨ pə àzùŋə̀ ndzùmə̀ mə̀. 39Ŋònə̀ nɨ à wa ntàʼà pə a nɨ̀chyə̂mbyə̂ e, ǎ pî a ẅèrə; ŋònə̀ nɨ à pînə a nɨ̀chyə̂mbyə̂ ntii mə̀, à ghǎ zəənə̀ a ẅèrə.
40“Ŋònə̀ nɨ à kẅiirə̀nə a wɨghə, à kẅiirə̀ la a gha; ŋònə̀ nɨ à kẅiirə̀nə mə̀ à kẅiirə̀ la ŋònə̀ nɨ à tsàanə mə̀. 41Ŋònə̀ nɨ à kẅiirə̀nə a ngàŋə̀ ntwuumə̀ Nẅùə̀ ntiinə à pənə ngàŋə̀ ntwuumə̀ Nẅùə̀ à ghǎ kẅiirə̀ mɨntyaŋnə mɨ ngàŋə̀ ntwuumə̀ Nẅùə̀; ŋònə̀ nɨ à kẅiirə̀nə a ŋònə̀ ɨ̀shìʼnə̀ ntiinə à pənə ŋònə̀ ɨ̀shìʼnə̀, à ghǎ kẅiirə̀ mɨntyaŋnə mɨ ŋònə̀ ɨ̀shìʼnə̀. 42Lenəla, ŋònə̀ nɨ à wa ŋŋâ ndoŋə̀ nchyə yɨ̀ fiitə̀nə ambo taʼà mɨlyiʼə mɨnkɨ̂ wə̀ yɨ̀tse ntiinə à pənə àzùŋə̀ ndzùmə̀ mə̀, ǹshwəŋə̀ a wɨghə nɨ nkǔŋə nkuŋə lo, ka à pə ghǎ pî e mɨntyaŋnə ɨ̀me.”
Выбрано:
Matyù 10: pny
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2017, Cameroon Association for Bible Translation and Literacy
