Лука 9
9
Ӏисайи гьикуная Учин цӀеӀу ученик
1Унахъуна Учин цӀеӀу вакилас, Ӏисайи йиная гебурис хӀавелна кьуват кӀилди шейтӀанар адикасра, итталар сагъ акьасра. 2Ӏисайи гьикуная гебур Аллагьдин Паччагьвелдихъас хабар акьас, итталара сагъ акьас. 3Ӏисайи пуная вакиларис:
– Фера магъуяна рекъуьди: я Ӏесса, я чанта, я гуни, я пул, я духӀуба аркьа кунар. 4Нае хулади ачушучин, гьетисаъ экьве, чун хаб рекъуьъ учӀасттегьен. 5Чун кьабул дакьу мукьуйиъ, тебурин хӀуриас верегуна, чве лекарил алекьуна кумра кехӀей кейхӀуна ате тебурис. Гьегилди ягӀархьурай тебурис.
6Вакилар ушуна алдаркай хьуная хӀурарил иджвелин хабар аркьай, джалла усари итта инсанара сагъ аркьай.
Иродас агвас кканди ахьуная Ӏиса
7Ӏисайи аркьа джалла курарихъас унихьуная хӀекимвелдиъ ая Иродас. Гис фи фикир аркьайчира ягӀай хьуна адава, сур инсанари, кӀина ЯхӀъя э Те гъайшинаф агъай хьуная, 8сури – Илйа пайгъамбар э Те адинаф, сасрабури – фушчин са авалдин пайгъамбар э Те джан керхьунаф агъахӀела. 9Ирода пуная:
– ЯхӀъяйин зун кӀил алдихьуне. Те инсан фуш эгьан, мидегьенттар унихьа зас Тихъас?
Иродас агвас кканди ахьуная Ӏиса.
ГӀифу агъзур инсан тухъ хьуная
10Адегуна, вакилари ахъакьуная Ӏисайис джалла чиппи акьуттарихъас. Сасрабури мушат дакьас, Ӏиса хъай Учин вакилара ушуная Вифсаида агъа шагьурдин багулив фая сакин мукьуйиди. 11Амма инсанарис хабар хьуна, Ӏисайин кьабахъай чабра ушуная. Ӏисайи гебур ачухъди кьабул акьуная, агъай хьуная гебурис Аллагьдин Паччагьвелдихъас, иттаттара сагъ аркьай хьуная.
12ГӀуьбехъми гагь вей хьуная. Вакилари, гьучадина, пуная Ӏисайис:
– Фадат инсанар, ушуна багулив фая хӀураридина галариди, джикӀирай чиппис Ӏуьш акьас эркьва мукьна Ӏелеф, хьин мисаъ инсан адава мукьуйи э аяф.
13Ӏисайи пуная вакиларис:
– Чун фачи гебурис Ӏелеф.
Вакилари пуная:
– Чав фера фадава, Ӏаре гӀифу гунира Ӏу балугъ дала, гьал ягӀайдава чин ушуна джалла ге инсанарис гъуланчин Ӏелеф.
14Гебур гӀифу агъзур дегьен инсан ахьуная. Ӏисайи пуная Учин ученикарис:
– Гьер усагь гӀифцӀур инсан аркьай, экьвас акье гебур.
15Гьегиштти акьуна, гебури джаллабур экьвас акьуная.
16Гъушуна гӀифу гунира Ӏу балугъ, аккедурфуна завариккди, Ӏисайи акьуная дуьгӀе, ая баракатис шукур аркьай. Хуппай пай акьуна йиная ученикарилди, инсанарис алихьас. 17ӀуьтӀуна, джаллабур тухъ хьуная, хъара цӀеӀу кӀватт ацӀу кьурцар амилгуна, завал акьуная гебури.
Аллагьдин Месигь. Ӏисайи пуная Учин Ӏеджалихъас
18Сагелай Ӏиса ахьуная дуьгӀебур аркьай инсанар адава сакин мукьуйиъ. Гихъай ахьуная Учин ученикара. Ӏисайи хабар гъушуная гебурифас:
– Фуш хӀисаб аркьа Зун халкьди?
19Ученикари пуная:
– Сури агъа, Вун – хьеттигӀ гӀучӀуна гӀайчӀва гӀедат аркьа ЯхӀъя э пуна, сури – Илйа э пуна, сасрабури агъа, Те авалдин са пайгъамбар э джан керхьуна гъайшинаф.
20Ӏисайи хабар гъушуная ученикарифас:
– Ппай чун фуш хӀисаб аркьа Зун?
– Вун – Аллагьдин Месигь э, – пуная Петтруйи.
21Ӏисайи кьацӀра сайисра гихъас варттал маркьа пуна, 22пуная Учин ученикарис:
– Инсандин КӀиркӀ ацӀуна гӀезабарикк ккихуна ккандея, хӀа къуджабурира, хӀа маллабурира, Ӏелимарира Ге кьабул акьасттава, гебури Ге кӀесе, амма хьибудпе ягъас Ге джан керхьуна гъайшасе.
Фикьуна кканчин Ӏисайихъай вес кканетти
23Хуппай джаллабурис Ӏисайи пуная:
– Захъай вес кканетти, учихъас кӀвалас гьатуна кканде, гьер ягъа ге хӀезурди кканде четинвеларин къакъ гъадивас, герек хьучин, учин Ӏуьмур есра кехӀей. Тагьа гьетегуна ге Захъай вей ахьасе. 24Учин Ӏуьмур ухӀас кканеттифас Ӏуьмур фаттархьасе. Зун бадала Ӏуьмур фаттархьетти, Ӏуьмур ухӀасе. 25Фи муфиӀет кея инсандис, кӀилди дуьнйа фацуна, учи уч пуч акьухаб, яра учис зарар хьехаб? 26Захъасра, Зе гафарихъасра неч хье инсан, Инсандин КӀиркӀасра неч хьасе кьабул акьас, Учинна, Учин Даданна гирами малайикаринна тегӀриф хъай адегуна. 27Зун чвас агъая, мисагь гъузунаттаригӀас са Ӏу инсанар, джилил Аллагьдин Паччагьвел дагуна, кӀесттава.
Пайгъамбар Мусана Илйа агуная Ӏисайихъай
28Ге гафар пуна, са муя ягъалас, Ӏиса хъай Петтрура, ЯхӀъяра, Якьубра алгъушуная сувалди дуьгӀе акьас. 29ДуьгӀе аркьа арайи, Ӏисайин сурат садпуна джуьре хьуная, кунар нур ичай, ибхь суман, джагвар хьуная. 30Ӏу инсан гъургъай ахьуная Ӏисайихъай, гебур хьуная Мусана Илйа, 31заварин нуругӀай адинаттар. Гебур гъургъай хьуная Ерусалимдиъ хьас ккея, Ӏисайин Ӏеджалихъас. 32Петтруна гин илдешар цӀуьппи гъархьуна ахьуная, кетӀугуна, гебурис агуная Ӏисайин Ӏекун нура, Ӏисайин багулив гъузуна Ӏу инсанна. 33Мусана Илйа Ӏисайигьас верегуна, Петтруйи пуная Ӏисайис:
– Е МегӀелим, фи иджи ая хьин мисаъ! Див чин хьибу чардах акьас: сад Вас, сад Мусайис, сад Илйайис. Петтруйис учис ягӀай хьуна адава, фи ичин учи агъаяф.
34Петтру гъургъа арайи, алчадина къири, кичадивуная гебур учин эхъуьккди. Къири ахтт аладина, ученикар дифугӀ гӀачархьегуна, ученикарис гучӀ хьуная. 35КъиригӀас унихьуная сес: «Ле Зе КӀиркӀ э, Ле Зун гӀаттивунаф э. Лил юркӀв алихь!» 36Ле сес хъайшугуна, Ӏиса хаб сатти ахьуная. Ученикари джин акьуна, сайисра те вахттуни ахъакьуна адава те чиппис агуттарихъас.
Ӏисайи сагъ акьуная гӀанаъ шейтӀан архьа кӀиркӀ
37Сасра ягъас, гебур сувалас алаверегунас, Ӏисайигьди гьучадина гъузуна ахьуная ппара халкь. 38Садпуна халкьдигӀас са инсанди гьараяр акьуна пуная:
– МегӀелим, Вас миннат э, хъуттурф зе кӀиркӀахъ! Ге хъая са кӀиркӀ э зе! 39ШейтӀан архьуна, кӀиркӀа садпуна вевер аркьа. ШейтӀанди гин джан зурзас аркьа, сивигӀас гъурт гӀархьасттегьен. АцӀуна гӀезаб егуна дала, сакинди артайдава кӀиркӀ шейтӀанди. 40Зун тӀалаб акьунуйи Ве ученикарис шейтӀан адик пуна, амма гебурифас хьундава.
41Ӏисайи пуная:
– Агь чун инсанар, хъудугъаттар, чӀир хьунаттар! Фидегьен вахттунисттегьен Зун чвахъай ахьасе? Фидегьен Зун чвакк ккиха? Фаша мич ве кӀиркӀ.
42КӀиркӀ гьучаверегуна, шейтӀанди гин джан зурзас акьуна, фадихьуная ге джилилди. Ӏисайи къадагъа акьуная шейтӀандис, кӀиркӀ сагъ акьуна гьикуная дадалди.
Ӏисайи Учин Ӏеджалихъас пегуна, ученикар гъавурдиъ архьуна адава
43Джалла муьхӀтал хьуная Аллагьдин кьудратил. КӀилди Ӏисайи аркьа курарил муьхӀтал хьуна арайи, Ӏисайи пуная Учин ученикарис:
44– Ме гафарил юркӀв алийина кӀвалди ате: Инсандин КӀиркӀ инсанарин гъилиъ ихьасе.
45Амма ученикар ге гафарин гъавурдиъ архьуна адава, ге гафарин мегӀна ягӀар акьас вей хьуна адава гебурифас. Ӏисайифас хабар гъушанасра, фиттихъас ичин Ги пеф, гебурис гучӀай хьуная.
Фуш хӀаф ичин
46Ученикарин арайиъ хӀуьджат хьуная, фуш ичин чиппигӀас ке зурба. 47Ӏисайи, гебурин фикирар ягӀай, гъушуна бицӀи шиниккв, атуна Учин багулив, 48пуная ученикарис:
– Зун бадалди гьина ме бицӀи шиниккв кьабул аркьаячин, ти Зунна кьабул аркьая, гьина Зун кьабул акьучин, ти Варттал Алефра кьабул аркьая, Зун джилилди Гьикунаеф. ЧвагӀас ке бицӀи инсан – джаллабурилас зурба инсан э.
«Чвас Ӏайвел даркьаф, те чвахъди э»
49ЯхӀъяйи пуная Ӏисайис:
– МегӀелим, час ве ттур гъургъай, шейтӀанар адика са инсан агуне, амма чин гис къадагъа акьуне, ге хьехъай аяф давахӀела.
50Ӏисайи пуная:
– Къадагъа маркьа. Чвас Ӏайвел даркьаф, те чвахъди э.
Самари дерейин хӀуриъ, Ӏиса кьабул акьуна адава
51Ӏиса, Аллагьди уч завариди агъагъа вахтт хъучавехӀела, хӀезур хьуная вес Ерусалимдиди. 52Ӏисайи Учин удигьай гьикуная Учин инсанар. Гебур адиная Самари дерейиъ ая са хӀуриди, джалла Ӏисайис геректтар хӀезур акьас. 53Амма Ӏиса кьабул акьуна адава тисаъ, Ӏиса Ерусалимдиди веяф идеф ягӀархьегуна. 54Гебури акьу кар агугуна, Ӏисайин ученикари, Якьубана ЯхӀъяйи, пуная Ӏисайис:
– Е ХӀаф, кканчин заварин цӀа йирхӀуна ккедихь агъав чин ме инсанар?
55Ӏисайи, алдаркуна ученикарилди, маркьа пуная. 56Хаб ушуная гебур джуьре хӀуриди.
Ӏисайихъай вере инсан
57Гебур рекъуьъ ай верегуна, са инсанди пуная Ӏисайис:
– Зун хӀезурди ая Вун вере усади найич кканчира Вахъай вес.
58Ӏисайи ге инсандис пуная:
– Суларихъ мугар хъая, заварин нахширарихъ мугар хъая, Инсандин КӀиркӀахъ кӀил йирхӀас мукь хъудава.
59Сасра инсандис Ӏисайи пуная:
– Шаб захъай вес.
– Е зе ХӀаф, Ӏуьссе дад ая зе, те сакин дакьуна, зафас вес хьасттава, – пуная ги.
60Ӏисайи гис пуная:
– ЮркӀвар кӀинаттари икӀурай чиппин кӀинаттар. Вун ях Аллагьдин Паччагьвелдихъас иджвелин хабар фай.
61Джуьре инсанди пуная Ӏисайис:
– Е зе ХӀаф, зун весе вахъай, амма сагелай ахттигьар тин зас хулаъ аттарис сагъди илгурай пас.
62Ӏисайи гис пуная:
– Сагелай гъилив дуруц гъушуна, хаб кьабахъди алдаркаф, герек дава Аллагьдин Паччагьвелдис.
Выбрано:
Лука 9: AGU
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© Библия тарджума аркьа институт, Москва, 2005
