Лука 12

ЭхӀттият ухь сурат Ӏуьрччан курар аркьа фарисеяригьас

1Те вахттунис агъзурарилди завал хьуная халкь, инсанар гӀукъуна ахьуная са сайихъ хъузиланди. Ӏисайи сагелай Учин ученикарис пуная:

– ЭхӀттият акье фарисеяригьас, гебурин сурат Ӏуьрччан кураригьас. 2Фера адава джинабанф, вартталди агъдархьуна илгванф, фера адава ашкаранф, ягӀардахьуна илгванф. 3Чун Ӏуьшуй пеф, ягъуй унихьасе, чун хазин хулаъ ибурихъди пеф, хулагъарилас ун алихьуна агъай ахьасе.

4– Зун чвас агъая, Зе дусттар: ГучӀ мева тебуригьас, чун кӀина сара чвас фера акьас деветтаригьас. 5Зун пасе чвас, гьинагьас гучӀ хьуна кканчин: гучӀ ухь Тигьас, чун кӀина, хаб чун джегьенемдиъ ихьас вереттигьас. Зун чвас агъая, Гьетигьас гучӀ ухь. 6Ӏу кепекигьас ду гӀифу джакьв масса ирцӀанф? Амма ге джакьварикес садра Аллагьдин кӀвалас ушуна адава. 7Чве кӀилил але чӀарара кехӀей кӀилди сан акьуная! ГучӀ мева, чун ппара багьайи э джакьварилас!

Ӏиса кьабул акьубахъас

8– Зун агъая чвас: гьина Зун инсанарин удигь кьабул акьучин, те Инсандин КӀиркӀара кьабул акьасе Аллагьдин малайикарин удигь, 9амма гьина Зун инсанарин удигь кьабул дакьучин, те Инсандин КӀиркӀара кьабул акьасттава Аллагьдин малайикарин удигь. 10Инсандин КӀиркӀахъас дава гаф петтилас, гъил гъушанасе, амма Аллагьдин РуьхӀдихъас гиран вере чӀире гаф петтилас, гъил гъушанасттава. 11Чун дуьгӀебур хура хулариди файдегуна, хӀекимарилдина хӀаттарилди, чун фикир маркьа, фишттин джувабар ирцӀангьан пуна, я фигъагьан пуна. 12Аллагьдин РуьхӀди гьеге сеӀетти ягӀар акьасе чвас, чун фи пуна кканчин.

Гаш имикӀа юркӀураъ

13ХалкьдигӀас гьинаичин пуная Ӏисайис:

– Е МегӀелим, уп зе ччуччус, дада атуная девлет засра пай акье пуна.

14Ӏисайи пуная гис:

– Е идеми, гьина э Закес диванчи акьунаеф, чве арайиъ учӀуна пайяр акьас?

15Ӏисайи хаб пуная:

– Хъуттурфен гьа, гаш имикӀа юркӀураъ. Инсандин Ӏуьмур девлетилди дава алцандеяф.

Мисала са гашин девлетлу инсандихъас

16Ӏисайи ахъакьуная гебурис мисала:

– Са девлетлу инсандис учин хуппуриас идже бегьер завал хьуная. 17Ги фикир аркьай хьуная: «Фиркьагьан Зун, Завал акьуна ризкь атас, мукь адава зе. 18Зун миштти акьасе, – пуная ги, – зе цӀуьре тахар аргӀуна, цӀае хӀа тахар акьасе, тисади завал акьасе зун кӀилди зе кьура, зе сасра девлетра. 19Тагьтегуна зафас зас пас хьасе: – Гьал вахъ икӀуна ппара девлет хъая, ацӀуна исарис гьуркьасе. РехӀет акье джандис, ӀуьтӀен, ух, кеф кеттив Ӏуьмурдикес». 20Аллагьди пуная ге инсандис: «Агь эхӀмакь! ЯгӀа Ӏуьшуй вун кӀесе. Гьинас хьасе ле ве завал акьунаттар?» 21Гьерттис, Аллагьдин девлет завал даркьай, учис девлет завал аркьаттис, гьетиштти хьасе.

Фикирар гъамар маркьа

22Хаб Ӏисайи пуная Учин ученикарис:

– ДехӀела Зун чвас агъая: фикир маркьа Ӏеле гунихъасна аликӀа кандихъас. 23Ӏуьмур хӀайи э Ӏелеттилас, джанна хӀайи э кандилас. 24Хъуттурфен хъветтарихъ, гебури е узайдава, е уцайдава, хъудава гебурихъ е хазина хулара, е тахара, амма Аллагьди ирцӀанде гебурис Ӏелеф. Ппай чун ацӀуна багьайи э джакьварилас. 25Гьинафас чвакес хьасе, гъамар акьунегъай, учин Ӏуьмурдихъди са сеӀет хьунара хъучихьас? 26Гьеге са бицӀифра кехӀей чвафас акьас девегуна, фас чун сасра курарихъас фикирар аркьаттар э? 27Хъуттурфен, фиштти кегъучӀайчин цӀантукар: гебури е загьмат аркьайдава, е ттунар аркьайдава. Амма, Зун чвас агъая: паччагь Сулейманара кехӀей, гьетидегьен девлетар хъай, ге цӀантукари суман батӀарди аликӀайдавуйи. 28Нагагь, ягӀа ай, багагь пичиди агъихьа чӀирин ӀуькӀил Аллагьди гиштти аликӀахаб, чваал хъара иджи аликӀастту, хъудугъаттар! 29Чун маруца чвас Ӏелеттихъасна ухаттихъас, гъамра маркьа. 30Ме гунагьарин дуьнйайи гьеле задарихъ э джалла инсанар ахъихьунаф. Чве Заварин Дадас ягӀая чвас лебур герекди идеф. 31Ке удигьай Аллагьдин Паччагьвелдихъас руц, аметтар чвас Ли есе. 32ГучӀ мева, бицӀи кӀаратӀ! Чве Дада Учин иджвелин амур акьуная, шатти чвас Паччагьвел ес. 33Масса йина чве шейъер, кумак акье касибарис, джикӀен чвас кьацӀра ерсе деве пӀапӀушникар, завал акье девлетар заварил: лич е тӀафал адесттава, лисал е кьабкӀ архьасттава. 34Чве девлет нанди аячин, гьетисаъ чве юркӀвра ахьасе.

Эессихъ гъузуна лукӀ

35Гьемишан хӀезурди ухь, яӀарилас чӀилла дивуна, лампабура кикӀуна. 36Эесси цӀакӀинаригӀас адесттегьен, ти хъирхӀугъилди ракк дахъас гъузуна лукӀ суман, гьетиштти хӀезурди чунна гъузен. 37Бахттлубур э те лукӀар, эесси адесттегьен гъадархьуна гъузунаттар. Зун чвас дузди агъая, эесси учин яӀариккес чӀилла ккейтӀуна, экьвас акьуна лукӀар суфрайихъ, уч гьударкай ахьасе гебуригь. 38Бахттлубур э тебур, эесси мус адичира, кканчин сурӀуьшари, кканчин завкураригӀди, гъадархьуна, эессихъ гъузунахаб. 39ЯгӀарухь, хулан эессис хабарди уйихаб, нае вахттуни адес ичин тӀафал, эесси тӀараш акьас атасттавуйи учин хал. 40Чунна хӀезурди ухь, чвасра ягӀай адава нае вахттуни адесичин Инсандин КӀиркӀ.

41Петтруйи хабар гъушуная Ӏисайифас:

– Е ХӀаф, Вун ле мисала агъаяф час эв, хъара джаллабурис эв?

42Ӏисайи пуная:

– Гьал фуш э те, эессин хулан хӀаф, эессин эхӀттибар але Ӏекьуллу хӀеким, эесси учин лукӀарил хӀавел йинаеф, гебурис вахттуни Ӏелеф ес? 43Бахттлу э те лукӀ, эесси адегуна, эессис кар аркьай алчархьуф. 44Зун чвас дузди агъая, эесси кӀилди учин хулан хӀавелдиъ алихьасе ге. 45Нагагь те лукӀу учин юркӀураастти фикир акьучин: «Кьана аркьая зе эесси адес», пуна, йирхӀай хьичин лукӀарис, хумбарисра, идемарисра, Ӏелди, ухай, пиянди авейчин, 46ге лукӀун эесси хабарсузди адесе, кьацӀра лукӀ дагъузуна ягъа, дагъузуна вахттуни. Эесси гин диван акьуна, сасра эхӀттибар алдава инсанаригӀ гӀачихьасе гера. 47Нагагь учин эессин кьасттра ягӀай ай, лукӀ хӀезур дахьухаб, я учин эесси пеф дакьухаб, гишттин лукӀус зулумилди йирхӀасе. 48Нагагь эессин кьастт дагӀай, лукӀу фиичира дава кар акьухаб, лукӀус чукь йирхӀасе. Гьинас Аллагьди ппара йичин, ти хӀа джувабра есе, гьинал ппара эхӀттибар акьучин, ти хъара хӀа джуваб есе.

Зун Ӏаре маслихӀет фай дава адинаеф

49Зун цӀа фай адинаф э джилилди, фидегьен ккандея Зас цӀа тегӀди бугъмиш хьуна! 50Зун цӀигӀди гӀучӀуна ккандея, цӀигӀас ушуна, гӀадайчӀудегьен гагьди, Зун гӀезабикк ккея! 51Чун фикир аркьаяв, Зун Ӏаре маслихӀет фай адинаеф э пуна джилилди? Зун чвас агъая, дава! Ӏаре са маслихӀет фай дава, къигӀ файра э! 52Гьалдин хаб, хулаъ гӀифуд аячин, гебур Ӏу пай хьасе: хьибуд са усал хьуна, Ӏуйихъай гӀахъасе, Ӏуд са усал хьуна, хьибуйихъай гӀахъасе. 53ГӀахъасе дад кӀиркӀахъай, кӀиркӀ дадахъай, баб рушахъай, руш бабахъай, хьиджарбаб сусахъай, сус хьиджарбабахъай.

Фас ме вахттунин чун гъавурдиъ архьафттава?

54Халкьдис Ӏисайи пуная:

– Завар алчадивугуна къирибури, чун агъа: «Угъвал угъвасе». Угъайра э. 55Ппай кьибла багуйихъас кулак ичагуна, чун агъа: «Куче хьасе». Куче вейра э. 56Эй, Ӏу сурат гӀаттар! Джилихъна заварихъ хъуланди чвафас гьава ягӀар акьас ве, ппай агьал фишттин вахтт хьунаячин гъавурдиъ архьас вейду чвафас?

57– Фикьас чвафас чвас фи дузди ичин ягӀар акьас верефттава? 58Ваалас гӀерз аркьаттихъай суттиди верегуна, рекъуьъ ами димари алучӀ тихъай маслихӀет акьас. Давайчин вун гъасе ти суттилди, сутти есе вун дусттагъин къаравуларилди, къаравулари ачикасе вун дусттагъиъ. 59Зун вас дузди агъая, вун тисаас аттесттава, вак кӀаре Ӏебасин бурдж кимедегьен гагьди.

Выбрано:

Лука 12: AGU

Выделить

Копировать