ಮತ್ತಾಯ 5
5
ಯೇಸು ಕುಂದ್‌ರ ಕೊಡಿಲ್ ಮಾಡ್‍ನ ಉಪದೇಶ
1ದುಂಬ ಜನಡ ಗುಂಪ್ ಬಂದಂಡಿಪ್ಪದ್‍ನ ಕಂಡಿತ್ ಯೇಸು, ಅಂವೊಂಡ ಶಿಷ್ಯಂಗಡ ಕೂಡೆ ಕುಂದ್‌ರ ಕೊಡಿಕ್ ಪೋಯಿತ್ ಅಳ್‌ತತ್. ಅಕ್ಕ ಅಂವೊಂಡ ಶಿಷ್ಯಂಗ ಅಂವೊ ಎಣ್ಣ್‌ವಾನ ಕ್‍ೕಪಕ್ ಅಂವೊಂಡ ಪಕ್ಕ ಬಾತ್.
ನೇರಾನ ಆಶೀರ್ವಾದ
(ಲೂಕ 6.20–23)
2ಅಂವೊ ಬೋದನೆ ಮಾಡ್‌ವಕ್ ಸುರ್ ಮಾಡ್‍ಚಿ.
3ಆತ್ಮತ್‍ಲ್ ಗರೀಬ#5.3 ದೇವ ನಾಕ್ ಬೋಂಡೂಂದ್ ಗೇನ ಮಾಡ್‌ವಯಿಂಗ ಆಯಿತುಳ್ಳಯಿಂಗ ಆಶೀರ್ವಾದ ಪಡ್ಂದಯಿಂಗ;
ಪರಲೋಕ ರಾಜ್ಯ ಅಯಿಂಗಡದಾಯಿತ್‌ಪ್ಪ.
4ದುಃಖ ಪಟ್ಟಂಡುಳ್ಳಯಿಂಗ ಆಶೀರ್ವಾದ ಪಡ್ಂದಯಿಂಗ;
ದೇವ ಅಯಿಂಗಳ ಸಮಾದಾನ ಮಾಡ್‌ವ.
5ತಗ್ಗಿತ್ ಉಳ್ಳಯಿಂಗ ಆಶೀರ್ವಾದ ಪಡ್ಂದಯಿಂಗ;
ಈ ಲೋಕ ಅಯಿಂಗಡದಾಯಿತ್‌ಪ್ಪ.
6ನೀತಿಕಾಯಿತ್ ಕೆಲ ಪಯಿಚಿತುಳ್ಳಯಿಂಗಳು, ಬಾಯಾರಿಕೆ ಆಯಿತುಳ್ಳಯಿಂಗಳು ಆಶೀರ್ವಾದ ಪಡ್ಂದಯಿಂಗ;
ಅಯಿಂಗಳ ದೇವ ತೃಪ್ತಿ ಪಡ್‍ತ್‍ವ.
7ಕನಿಕರ ಕಾಟ್‍ವಯಿಂಗ ಆಶೀರ್ವಾದ ಪಡ್ಂದಯಿಂಗ;
ಅಯಿಂಗಕ್ ಕನಿಕರ ಕ್‍ಟ್ಟುವ.
8ಶುದ್ದ ಹೃದಯ ಉಳ್ಳಯಿಂಗ ಆಶೀರ್ವಾದ ಪಡ್ಂದಯಿಂಗ;
ಅಯಿಂಗ ದೇವನ ಕಾಂಬ.
9ಸಮಾದಾನ ಮಾಡ್‌ವಯಿಂಗ ಆಶೀರ್ವಾದ ಪಡ್ಂದಯಿಂಗ;
ಅಯಿಂಗಳ ದೇವಡ ಮಕ್ಕಾಂದ್ ಎಣ್ಣ್‌ವ.
10ನೀತಿಕಾಯಿತ್ ಹಿಂಸೆನ ಸಹಿಸುವಯಿಂಗ ಆಶೀರ್ವಾದ ಪಡ್ಂದಯಿಂಗ;
ಪರಲೋಕ ರಾಜ್ಯ ಅಯಿಂಗಡದಾಯಿತ್‌ಪ್ಪ.
11ಜನ ನಿಂಗಳ ನಾಡಗುಂಡ್ ಅವಮಾನ ಮಾಡಿತ್, ಹಿಂಸೆ ಮಾಡಿತ್ ಪಿಂಞ ನಿಂಗಡ ಮೇಲೆ ಕೆಟ್ಟ ತಕ್ಕ್ ಪರ್ಂದತೇಂಗಿ, ನಿಂಗ ಆಶೀರ್ವಾದ ಪಡ್ಂದಯಿಂಗ; 12ಸಂತೋಷವಾಯಿತ್ ಇರಿ, ಕುಶಿ ಪಡಿರಿ; ಪರಲೋಕತ್‍ಲ್ ನಿಂಗಡ ಫಲ ಬಲ್ಯದಾಯಿತ್‌ಪ್ಪ. ಎನ್ನಂಗೆಣ್ಣ್‌ಚೇಂಗಿ, ನಿಂಗಕಿಂಜ ಮಿಂಞ ಇಂಜ ಪ್ರವಾದಿಯಂಗಕ್ ಸಹ ಅಯಿಂಗ ಇನ್ನನೆ ಹಿಂಸೆ ಮಾಡ್‍ಚಿ.
ಉಪ್ಪ್ ಪಿಂಞ ಬೊಳಿ
(ಮಾರ್ಕ 9.50; ಲೂಕ 14.34,35)
13ನಿಂಗ ಈ ಲೋಕತ್‍ರ ಜನಕ್ ಉಪ್ಪಾಯಿತ್ ಉಳ್ಳಿರ. ಆಚೇಂಗಿ ಉಪ್ಪ್‌ರ ಸತ್ವ ಪೋಚೇಂಗಿ ಎಂತ ಫಲ? ಪುನಃ ನಿಂಗಕ್ ಉಪ್ಪ್‌ನ ಎನ್ನನೆ ಸತ್ವ ಮಾಡ್‌ವಕಯ್ಯು?#5.13 ಕ್ರಿಸ್ತಂಡ ಗುಣ ಇಲ್ಲತ ಬದ್‍ಕ್, ಸತ್ವ ಇಲ್ಲತ ಉಪ್ಪ್‌ರನೆಕೆ. ಅದ್‍ನ ಚಾಡಿತ್ ಚೌಟ್‍ವಕ್ ಅಲ್ಲತೆ ಬೋರೆ ಒರ್ ಕೆಲಸಕೂ ಅದ್ ಪ್ರಯೋಜನ ಆಪುಲೆ.
14ನಿಂಗ ಈ ಲೋಕತ್‍ರ ಜನಕ್ ಬೊಳಿ ಆಯಿತುಳ್ಳಿರ. ಕುಂದ್‌ರ ಕೊಡಿಲ್ ಉಳ್ಳ ಪಟ್ಟಣತ್‍ನ ಒಳ್‌ಪ್‍ಚಿಡುವಕಯ್ಯುಲೆ. 15ದಾರೂ ಬೊಳ್‌ಚತ್‍ನ ಕತ್ತ್‌ಚಿಡುವಂಜಿ ಒರ್ ಪಾತ್ರತ್‍ರ ಒಳ್‍ಲ್ ಮುಚ್ಚಿತ್ ಬೆಪ್ಪುಲೆ. ಅದ್‍ನ ಬೊಳ್‍ಚ ಕಂಬತ್‍ಲ್ ಬೆಪ್ಪ. ಅದ್ ಮನೆಲ್ ಉಳ್ಳಯಿಂಗಕೆಲ್ಲಾ ಬೊಳಿಯಾಯಿತ್ ಮಿನ್ನುವ. 16ಆನಗುಂಡ್ ನಿಂಗಡಲ್ಲಿ ಉಳ್ಳ ಬೊಳಿ, ಜನಡ ಮಿಂಞತ್ ಪ್ರಕಾಶವಾಯಿತ್ ಕಾಂಗಡ್, ನಿಂಗ ಮಾಡ್‌ವ ನಲ್ಲ ಕೆಲಸತ್‍ನ ಕಂಡಿತ್ ಪರಲೋಕತ್‍ಲ್ ಉಳ್ಳ ನಿಂಗಡ ಅಪ್ಪನ ತುದಿಪಕ್ ಕಾರಣ ಆಪ.
ನ್ಯಾಯಪ್ರಮಾಣತ್‍ರ ವಿಷಯತ್ ಬೋದನೆ
17 ನ್ಯಾಯಪ್ರಮಾಣ ಅಥವ ಪ್ರವಾದಿಯಂಗಡ ಬೋದನೆನ ನಾಶ ಮಾಡ್‌ವಕಾಯಿತ್ ನಾನ್ ಬಂದಿಯೇಂದ್ ನಿಂಗ ಗೇನ ಮಾಡತಿ. ನಾಶ ಮಾಡ್‌ವಕಾಯಿತ್ ಅಲ್ಲ ಆಚೇಂಗಿ ಅದ್‍ನ ನೆರೆವೇರಿಚಿಡ್‌ವಕಾಯಿತ್ ಬಂದಿಯೆ. 18ನಿಂಗಕ್ ನೇರಾಯಿತು ಎಣ್ಣ್‌ವಿ: ಬಾನವು ಬೂಮಿಯು ಮಾಯ ಆಚೇಂಗಿಯು, ನ್ಯಾಯಪ್ರಮಾಣತ್‍ರ ಒಳ್‍ತ್‍ರ ಒರ್ ಚೆರಿಯ ಬಾಗ ಕೂಡೆ ಪಾಳಾಕತೆ, ಅದ್ಂಡ ಉದ್ದೇಶ ನೆರೆವೇರುವಕತ್ತನೆ ಅನ್ನನೆ ಇಪ್ಪ. 19ಆನಗುಂಡ್ ಒಬ್ಬ, ನ್ಯಾಯಪ್ರಮಾಣತ್‍ಲ್ ಉಳ್ಳ ಒರ್ ಚೆರಿಯ ವಿಷಯಕ್ ಸಹ ಬಗ್ಗಿತ್ ನಡ್‍ಕತೆ ಪೋಯಿತ್, ಅನ್ನನೆ ಬೋರೆಯಿಂಗಕು ಬೋದನೆ ಮಾಡ್‌ವಂವೊ ಪರಲೋಕ ರಾಜ್ಯತ್‍ಲ್ ಎಲ್ಲಾರ್ಕಿಂಜ ಚೆರಿಯವಂವೊನಾಯಿತ್‌ಪ್ಪ. ಇದ್‍ನೆಲ್ಲ ಮಾಡಿತ್ ಅನ್ನನೆ ಬೋದನೆ ಮಾಡ್‌ವಂವೊ ಪರಲೋಕ ರಾಜ್ಯತ್‍ಲ್ ಎಲ್ಲಾರ್ಕಿಂಜ ಬಲ್ಯಂವೊನಾಯಿತ್‌ಪ್ಪ. 20ನಾನ್ ನಿಂಗಕ್ ಎಣ್ಣ್‌ವಿ: ನಿಂಗಡ ನೀತಿ ಫರಿಸಾಯಂಗಡ ಪಿಂಞ ನ್ಯಾಯಪ್ರಮಾಣತ್‍ರ ಉಪಾದ್ಯಂಗಡ ನೀತಿಗಿಂಜ ಬಲ್ಯದಾಯಿತ್ ಇಲ್ಲತೆಪೋಚೇಂಗಿ ನೇರಾಯಿತು ನಿಂಗ ಪರಲೋಕ ರಾಜ್ಯತ್‍ಲ್ ಪ್ರವೇಶ ಮಾಡುಲೆ.
ಚೆಡಿರ ವಿಷಯತ್ ಬೋದನೆ
21ಕೊಲೆ ಮಾಡ್‌ವಕ್ಕಾಗ,#5.21 ಪ್ರಯಾಣ ಪುಸ್ತಕ 20.13 ಅನ್ನೆನೆ ಕೊಲೆ ಮಾಡ್‍ಚೇಂಗಿ, ನಿಂಗ ನ್ಯಾಯತೀರ್ಪ್‌ಕ್ ಒಳಪಡ್‍ವಿರಾಂದ್ ನಂಗಡ ಪೂರ್ವೀಕಂಗಕ್ ಎಣ್ಣ್‌ನಾನ ನಿಂಗ ಕ್‍ೕಟಿತುಳ್ಳಿರ. 22ಆಚೇಂಗಿ ನಾನ್ ಎಣ್ಣ್‌ವಿ, ನಿಂಗ ನಿಂಗಡ ಅಣ್ಣತಮ್ಮಣನಂಗಡ ಕೂಡೆ ಚೆಡಿಲ್ ಉಂಡೇಂಗಿ ನ್ಯಾಯತೀರ್ಪ್‌ಕ್ ಒಳಪಡ್‍ವಿರ; ನಿಂಗಡ ಏದೋರ್ ಅಣ್ಣತಮ್ಮಣನಂಗಕ್: ನೀನ್ ಒಂದಾಂಗು ಲಾಯಕ್ ಇಲ್ಲೇಂದ್ ಎಣ್ಣ್‌ಚೇಂಗಿ ಯೆಹೂದ್ಯಂಗಡ ಆಲೋಚನೆ ಸಬೇಕ್ ಮಿಂಞತ್ ನಿಪ್ಪಿರ. ನಿಂಗಡ ಅಣ್ಣತಮ್ಮಣನಂಗಳ ನಿಂಗ ಮುಠಾಳಂಗಾಂದ್ ಎಣ್ಣ್‌ಚೇಂಗಿ, ನಿಂಗ ನರಕ ಲೋಕತ್‍ಲ್ ಉಳ್ಳ ತಿತ್ತ್‌ಕ್ ಪೋಪಕ್ ಬಟ್ಟೆ ಮಾಡ್‌ವಿರ. 23ಆನಗುಂಡ್ ನಿಂಗ ನಿಂಗಡ ಕಾಣಿಕೆನ ಬಲಿಪೀಠಕ್ ಎಡ್‌ತ ಬಪ್ಪಕ, ನಿಂಗಡ ಮೇಲೆ ನಿಂಗಡ ಅಣ್ಣತಮ್ಮಣಂಗಕ್ ವಿರೋದ ಉಂಡ್‍ೕಂದ್ ನಿಂಗಕ್ ಗೇನ ಬಾತೇಂಗಿ, 24ನಿಂಗಡ ಕಾಣಿಕೆನ ಬಲಿಪೀಠತ್‍ರ ಪಕ್ಕ ಬುಟ್ಟಿತ್, ನಿಂಗ ಅಂವೊಂಡ ಪಕ್ಕ ಪೋಯಿತ್, ಅಂವೊಂಡ ಕೂಡೆ ಸಮಾದಾನ ಆಯಿತ್, ಬಯ್ಯ ಬಂತ್ ನಿಂಗಡ ಕಾಣಿಕೆನ ಅರ್ಪಣೆ ಮಾಡಂಡು.
25ದಾರೇಂಗಿ ನಿಂಗಡ ಪಕ್ಕ ಬಂದಿತ್ ನಿಂಗ ತಪ್ಪ್‌ಮಾಡಿತುಳ್ಳಿರಾಂದ್ ನಿಂಗಳ ನ್ಯಾಯಾದಿಪತಿರ ಪಕ್ಕ ಕಾಕಿಯಂಡ್ ಪೋಪಕ, ಆ ವಿಷಯತ್‍ನ ಬಟ್ಟೇಲೇ ಸಮಾದಾನ ಮಾಡಿಯೊಳಿ. ಇಲ್ಲತಪೋಚೇಂಗಿ ನೀಡ ವಿರೋದಿ ನಿನ್ನ ನ್ಯಾಯಾದಿಪತಿಕ್ ಒಪ್ಪ್‌ಚಿಟ್ಟಿತ್, ಪಿಂಞ ಅಂವೊ ನಿನ್ನ ಅದಿಕಾರಿಕ್ ಒಪ್ಪ್‌ಚಿಟ್ಟಿತ್, ನಿನ್ನ ಜೈಲ್‌ಕ್ ಇಡ್‌ವ. 26ನೀಡ, ಕಡೆ ಕಾಸ್‍ನ ಕೊಡ್‌ಪಕತ್ತನೆ ನಿಂಗ ಜೈಲಿಂಜ ಪೊರಮೆ ಬಪ್ಪ್‌ಲೇಂದ್ ನಿಂಗಕ್ ನಾನ್ ನೇರಾಯಿತು ಎಣ್ಣ್‌ವಿ.
ವ್ಯಬಿಚಾರತ್‍ರ ವಿಷಯತ್ ಬೋದನೆ
27ವ್ಯಬಿಚಾರ ಮಾಡ್‌ವಕ್ಕಾಗಾಂದ್#5.27 ಪ್ರಯಾಣ ಪುಸ್ತಕ 20.14 ಎಣ್ಣ್‌ವ ದೇವಡ ಆಜ್ಞೆನ ಎಣ್ಣ್‌ನಾನ ನಿಂಗ ಕ್‍ೕಟಿತುಳ್ಳಿರ. 28ಆಚೇಂಗಿ ನಾನ್ ನಿಂಗಕ್ ಎಣ್ಣ್‌ವಿ: ಬೋರೆ ಪೊಣ್ಣಾಳ್‍ನ ಆಸೆಯಿಂಜ ನೋಟ್‍ಚೇಂಗಿ ಸಹ, ಅಂವೊ ತಾಂಡ ಹೃದಯತ್‍ಲ್ ಅವಡ ಕೂಡೆ ವ್ಯಬಿಚಾರ ಮಾಡ್‍ನನೆಕೆ. 29ನೀಡ ಬಲ್‌ತೆ ಕಣ್ಣ್ ಪಾಪ ಮಾಡ್‌ವಕ್ ಕಾರಣವಾಚೇಂಗಿ, ಅದ್‍ನ ಬಲ್‍ಚಿತ್ ಕನ್‍ಚಿರ್. ನೀಡ ಪೂರ್ತಿ ತಡೀನ ನರಕತ್‍ಲ್ ತಳ್ಳ್‌ವಕಿಂಜ, ನೀಡ ತಡೀರ ಒರ್ ಬಾಗ ಇಲ್ಲತಿಪ್ಪದ್ ನಲ್ಲದ್. 30ನೀಡ ಬಲ್‌ತೆ ಕೈ ಪಾಪ ಮಾಡ್‌ವಕ್ ಕಾರಣವಾಚೇಂಗಿ, ಅದ್‍ನ ಕೆತ್ತಿತ್ ಆ ಕೈಯಿನ ಚಾಡಿರ್. ನೀಡ ಪೂರ್ತಿ ತಡೀನ ನರಕತ್‍ಲ್ ತಳ್ಳ್‌ವಕಿಂಜ, ನೀಡ ತಡೀರ ಒರ್ ಬಾಗ ಇಲ್ಲತಿಪ್ಪದ್ ನಲ್ಲದ್.
ವಡಿಯ ಪೊಣ್ಣ್‌ನ ಬುಡ್‌ವ ವಿಷಯತ್ ಬೋದನೆ
(ಮತ್ತಾಯ 19.9; ಮಾರ್ಕ 10.11,12; ಲೂಕ 16.18)
31ಒಬ್ಬ, ತಾಂಡ ಪೊಣ್ಣ್‌ನ ತ್‍ಕ್ಕಾರ ಮಾಡಿತ್ ಬುಟ್ಟಿತ್ ಪೋಂಡೂಂದ್ ಗೇನ ಮಾಡ್‍ಚೇಂಗಿ, ಒರ್ ಕಾಗದತ್‍ಲ್ ಅಂವೊ ಅವಳ ಬುಟ್ಟಂಡುಳ್ಳ್‌ಂದ್ ಒಳ್‍ದಿತ್ ಕೊಡ್‍ಕಂಡೂಂದ್ ಉಳ್ಳ ದೇವಡ ಆಜ್ಞೆನ ಕ್‍ೕಟಿತ್ತುಳ್ಳಿರ.#5.31 ದರ್ಮಶಾಸ್ತ್ರ ಪುಸ್ತಕ 24.1 32ಆಚೇಂಗಿ ಇಕ್ಕ ನಾನ್ ನಿಂಗಕ್ ಎಣ್ಣ್‌ವಿ: ವ್ಯಬಿಚಾರ ಮಾಡ್‍ನ ಕಾರಣಕ್ ಅಲ್ಲತೆ ಬೋರೆ ಏದ್ ಕಾರಣಕಾಯಿತು ಒಬ್ಬ ತಾಂಡ ಪೊಣ್ಣ್‌ನ ಬುಟ್ಟ್‌ರ್‍ತೇಂಗಿ, ಅವ ವ್ಯಬಿಚಾರ ಮಾಡ್‌ವಕ್ ಇಂವೊ ಕಾರಣ ಆಪ. ಅನ್ನನೆ ಬೋಂಡಾಂದ್ ಬುಟ್ಟ ಪೊಣ್ಣಾಳ್‍ನ ಮಂಗಲ ಕಯಿಪಂವೊನು ವ್ಯಬಿಚಾರ ಮಾಡ್‍ವಂವೊನಾಯಿತ್‌ಪ್ಪ.
ತಕ್ಕ್ ಕೊಡ್‍ಪ ವಿಷಯತ್ ಬೋದನೆ
33ಕೊಡ್‍ತ ತಕ್ಕ್‌ನ ಪೂರೈಚಿಡತೆ ಇಪ್ಪಕ್ಕಾಗ, ದೇವಡ ಪಕ್ಕ ಮಾಡ್‍ನ ಆಣೆನ ನೆರವೇರಿಚಿಡಂಡೂಂದ್ ಪಂಡತ ಕಾಲತ್‍ಲ್ ಎಣ್ಣ್‌ನಾನ ನಿಂಗ ಕ್‍ೕಟಿತುಳ್ಳಿರ.#5.33 ಯಾಜಕ ಪುಸ್ತಕ 19.2; ಲೆಕ್ಕ ಪುಸ್ತಕ 30.2; ದರ್ಮಶಾಸ್ತ್ರ ಪುಸ್ತಕ 23.21 34ಆಚೇಂಗಿ ನಾನ್ ಎಣ್ಣ್‌ವಿ: ಆಣೆ ಇಡಂಡ. ಪರಲೋಕತ್‍ರ ಮೇಲೆ ಆಣೆ ಇಡಂಡ, ಎನ್ನಂಗೆಣ್ಣ್‌ಚೇಂಗಿ, ಅದ್ ದೇವಡ ಸಿಂಹಾಸನವಾಯಿತುಂಡ್. 35ಬೂಮಿರ ಮೇಲೆ ಆಣೆ ಇಡಂಡ, ಅದ್ ಅಂವೊಂಡ ಪಾದಪೀಠ. ಯೆರೂಸಲೇಮ್‍ರ ಪೆದತ್‍ಲು ಇಡಂಡ, ಅದ್ ಮಹಾರಾಜಂಡ ಪಟ್ಟಣವಾಯಿತುಂಡ್. 36ನೀಡ ಮಂಡೆರ ಮೇಲೆ ಸಹ ಆಣೆ ಇಡಂಡ. ಎನ್ನಂಗೆಣ್ಣ್‌ಚೇಂಗಿ, ನೀನ್ ಒರ್ ತಲ್‌ಮಿನ ಕೂಡೆ ಕರ್ತಿತ್ ಅಥವ ಬೊಳ್‌ತಿತ್ ಮಾಡ್‌ವಕಯ್ಯುಲೆ. 37ನಿಂಗಡ ತಕ್ಕ್ ಅಕ್ಕೂಂದ್ ಎಣ್ಣ್‌ಚೇಂಗಿ ಅದ್ ಅಕ್ಕುವಾಯಿತಿರಡ್, ಇಲ್ಲೇಂದ್ ಎಣ್ಣ್‌ಚೇಂಗಿ ಇಲ್ಲೇಂದಿರಡ್. ಇದ್ ಬುಟ್ಟಿತ್ ಬೋರೆ ಏದ್ ಎಣ್ಣ್‌ಚೇಂಗಿಯು, ಅದ್ ಸೈತಾನಿಂಜ ಬಪ್ಪದೇ.
ಪಗೆ ತ್‍ೕಪ ವಿಷಯತ್ ಬೋದನೆ
(ಲೂಕ 6.29,30)
38ಕಣ್ಣ್‌ಕ್ ಬಂದದ್ ಕಣ್ಣ್‌ಕ್, ಪಲ್ಲ್‌ಕ್ ಬಂದದ್ ಪಲ್ಲ್‌ಕ್, ಇನ್ನನೆ ಎಣ್ಣ್‌ವಾನ ಕ್‍ೕಟಿತುಳ್ಳಿರ.#5.38 ಪ್ರಯಾಣ ಪುಸ್ತಕ 21.24; ಯಾಜಕ ಪುಸ್ತಕ 24.20; ದರ್ಮಶಾಸ್ತ್ರ ಪುಸ್ತಕ 19.21 39ನಾನ್ ಇಕ್ಕ ಎಣ್ಣ್‌ವಿ. ನಿಂಗಕ್ ಮೋಸ ಮಾಡ್‍ನಯಿಂಗಡ ಮೇಲೆ ಪಗೆ ಬೆಕ್ಕತಿ. ಒಬ್ಬ ನೀಡ ಬಲ್‌ತೆ ದವಡೆಕ್ ಪೊಜ್ಜತೇಂಗಿ, ಅಂವೊ ನಿಂಗಡ ಎಡ್‍ತೆ ದವಡೆಕ್ ಸಹ ಪೊಯ್ಯುವಕ್ ಕಾಟಿಕೊಡಿ. 40ಒಬ್ಬ ನೀಡ ಬಟ್ಟೆ ಬೋಂಡೂಂದ್ ನಿನ್ನ ನ್ಯಾಯಾಲಯಕ್ ಅಯಿಚತೇಂಗಿ, ನೀನ್ ಅಂವೊಂಗ್ ನೀಡ ಕೋಟ್‍ನ ಸಹ ಕೊಡ್‍ತ್‍ರ್. 41ಒಬ್ಬ ಅಂವೊಂಡ ಚೀಲತ್‍ನ ಒರ್ ಕಿಲೋಮೀಟರ್‌ಕ್ ಎಡ್‍ತಂಡ್ ಪೋಂಡೂಂದ್ ನಿನ್ನ ಒತ್ತಾಯ ಮಾಡ್‍ಚೇಂಗಿ, ನೀನ್ ಆ ಚೀಲತ್‍ನ ದಂಡ್ ಕಿಲೋಮೀಟರ್‌ಕ್ ಎಡ್‍ತಂಡ್ ಪೋ. 42ನೀಡ ಪಕ್ಕ ಉಳ್ಳದ್‍ನ ಬೋಂಡೂಂದ್ ಕ್‍ೕಪಂವೊಂಗ್ ಕೊಡ್, ಸಾಲ ಕ್‍ೕಪಯಿಂಗಕ್ ಒಂದು ಗೇನ ಮಾಡತೆ ಸಾಲ ಕೊಡ್.
ಶತ್ರುವಳ ಪ್ರೀತಿಚಿಡುವ ವಿಷಯತ್ ಬೋದನೆ
(ಲೂಕ 6.27,28; 6.32–36)
43ನಿಂಗ ನಿಂಗಡ ಸ್ನೇಹಿತಂಗಳ ಪ್ರೀತಿ ಮಾಡಂಡು, ಶತ್ರುವಳ ದ್ವೇಶ ಮಾಡಂಡೂಂದ್ ಎಣ್ಣುವ ನ್ಯಾಯಪ್ರಮಾಣತ್‍ನ ಕ್‍ೕಟಿತುಳ್ಳಿರ.#5.43 ಯಾಜಕ ಪುಸ್ತಕ 19.18 44ಆಚೇಂಗಿ ನಾನ್ ಇಕ್ಕ ಎಣ್ಣ್‌ವಿ, ನಿಂಗಡ ಶತ್ರುವಳ ಪ್ರೀತಿ ಮಾಡಿ, ನಿಂಗಳ ಹಿಂಸೆ ಮಾಡ್‌ವಯಿಂಗಕ್ ಪ್ರಾರ್ಥನೆ ಮಾಡಿ. 45ಅನ್ನನೆ ಮಾಡ್‍ಚೇಂಗಿ ನಿಂಗ ಪರಲೋಕತ್‍ಲ್ ಉಳ್ಳ ದೇವಡ ಮಕ್ಕಡನೆಕೆ ನಡ್‍ಪಿರ. ಅಂವೊ ನಲ್ಲಯಿಂಗಕು ಕೆಟ್ಟಯಿಂಗಕೂ ಸೂರ್ಯತ್‍ನ ಉದಿಪ್‍ಚಿಟ್ಟಿತ್ ಬೊಳಿನ ಕೊಡ್‍ಪ ಪಿಂಞ ನೀತಿವಂತಯಿಂಗಕು ಅನೀತಿವಂತಯಿಂಗಕು ಮಳೆ ತಪ್ಪ. 46ನಿಂಗಳ ಪ್ರೀತಿ ಮಾಡ್‌ವಯಿಂಗಳ ಮಾತ್ರ ನಿಂಗ ಪ್ರೀತಿ ಮಾಡ್‍ಚೇಂಗಿ ಎಂತ ಫಲ? ಕಂದಾಯ ಎಡ್‌ಪಯಿಂಗಳು ಅನ್ನನೆ ಮಾಡ್‌ವಲ್ಲ? 47ನಿಂಗ ನಿಂಗಡ ಸ್ನೇಹಿತಂಗಡ ಕೂಡೆ ಮಾತ್ರ ಕುಶೀಲ್ ಇಂಜತೇಂಗಿ, ನಿಂಗಕು, ಬೋರೆಯಿಂಗಕು ಎಂತ ವೆತ್ಯಾಸ? ದೇವನ ಗೊತ್ತಿ‌ಲ್ಲತಯಿಂಗಳೂ ಅನ್ನನೆ ಮಾಡ್‌ವಲ್ಲ? 48ಆನಗುಂಡ್ ನಿಂಗಳ ಪ್ರೀತಿ ಮಾಡತಯಿಂಗಳ ಸಹ ನಿಂಗ ಪ್ರೀತಿ ಮಾಡಿತ್, ಪರಲೋಕತ್‍ಲ್ ಉಳ್ಳ ನಿಂಗಡ ಅಪ್ಪ ಪೂರ್ತಿಯಾಯಿತುಳ್ಳನೆಕೆ ನಿಂಗಳು ಪೂರ್ತಿಯಾಯಿತಿರಿ.
Выбрано:
ಮತ್ತಾಯ 5: ಕೊಡವ
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2017, New Life Literature (NLL)
