ꞌLuuka 19
19
ꞌThakeeo, luttioohit cĩ occoro
(Tigiil Maatteeo 25:14-30)
1Ma baa uppwaanĩ Yeesu ꞌJeriko nẽ ũũk õtõ ꞌtaaũnatõõ, 2baa aaĩ eet umwaa ꞌcĩ haĩ ꞌThakeeo ꞌcĩ ĩĩn makayyioohit cĩ luttiook cĩg occoro. Baa ĩĩn nẽẽ eet ꞌcĩ aballi gẽrrẽẽt. 3Baa adiim acĩn nẽẽ Yeesu, nẽẽthĩ hinnia, ahaca huturꞌthẽẽta, hĩnĩngĩtĩ baa maka lothippiti gẽrrẽẽt. 4Nĩngĩtĩ avviri õkõõĩ ĩĩcĩ oou nẽ ũũk õtõd hẽẽt, hátĩ hĩcĩn Yeesu, hĩnĩngĩtĩ baa õkõ Yeesu ĩĩcĩ ꞌgõõl tĩho.
5Ma baa õdõlan Yeesu ngaatĩho ho, acĩnoothi hinnia ꞌThakeeo hẽẽta lokora. Nĩngĩtĩ õthõõthĩkĩ annẽẽkĩ, “ꞌThakeeo, luuccia hataman, hõkõ aattĩ haaĩ naa õlõõ cunni kõr nicci.” 6Nĩngĩtĩ alluuccianĩ ꞌThakeeo hĩdĩĩkoothong nẽ ikia ĩꞌtha Yeesu taliitta.
7Ma acĩn eeta vẽlẽk ꞌcĩg baag aattĩg nĩngaata, ngaatĩ ĩꞌthaaõnĩ Yeesu hĩ ꞌThakeeo ho, adahit ngunungunu ĩĩtõ, “Õkõ bẽrẽ Yeesu õlõõ cĩ ꞌthẽccanniookto.”
8Ma urutaa cĩnnĩ, ĩtĩnga ꞌThakeeo ĩĩnnĩk Yeesu, “Makayyioohit, kõr nicci, hẽꞌngẽraahi hatĩ naa hullaha ijjio cĩgannĩg hõrggẽẽna nẽ má baa hõmmõdanaa eet umwa ꞌrabbẽẽta, hadũmani hatĩ ĩnõõnnõ tabattĩ ꞌwec.”
9Nĩngĩtĩ õthõõthĩ Yeesu aĩnnĩ, “Ikia elliaanĩtĩ kõr icci ꞌcieethaa cĩ, hĩnĩngĩtĩ ĩĩn ẽẽtĩ ciee buúk ngeertĩ Abũrahamĩ. 10Baa hakuu naa Ngeertĩ Eeto hikia hidiima nẽ hẽẽla eet ꞌcĩg iꞌngittõõthĩ.”
Dticcianniook õmmõtõ
(Tigiil Maatteeo 25:14-30)
11Ma baa nga athĩhĩ eeta thõõth icci, ikia uduhaak Yeesu ĩhõõggõ thõõth ꞌcĩ awantoothĩk, hĩnĩngĩtĩ baa õbõktõ nẽẽ hĩ ꞌJeruꞌthalẽm nẽ baa ammuhuneek eeta aĩ, õkõ hatĩ edeeꞌnyia habuccieet cĩ Nyekuci nĩĩcĩ noho. 12Baa aduhaak nẽẽ ĩhõõggõ anneek, “Baa aaĩ eet umwaa ꞌcĩ ĩĩn ngeertĩ habuuo ꞌcĩ baa õkõ ĩĩcĩ looc ꞌcĩ ꞌrẽẽnĩ, hũũk hĩĩ habu nẽ õbõda. 13Ma baa õbõhĩ ĩtĩnga, ũtũvvũ dticcianniook cĩgĩnnĩg õmmõtõ nẽ aaꞌnyĩk ĩhõõggõ hõdẽĩ hõdẽĩ ꞌrabbẽẽt ꞌcĩg mẽẽlĩg#19:13 ꞌRabbẽẽt ꞌcĩg mẽẽlĩg: Ũũppan ꞌrabbẽẽta cieeg ngaatĩ adũmaniini ẽẽtĩ ꞌcĩ adticanni nyĩlõhĩ iyyio. nẽ ĩĩnnĩk, ‘Idticattĩ ꞌrabbẽẽt iccig tũjaar ĩꞌthõng hõbõda naana.’
14“Baa ammũdeek hinnia abũrĩ eeta ĩnõõnnõ ngaatĩ ĩĩnĩ habu, nĩngĩtĩ ĩꞌthõõĩ nyeemuut hũũk ĩĩcĩ oou anneek, ‘Hõllõngaa hadiimma naag eet icci hĩĩ habu cĩnaang.’
15“Ũũk nẽẽꞌthẽk ĩĩ ẽẽtĩ ciee habu, nĩngĩtĩ õbõdaanĩ õlõ. Ma ho, ikia ũtũvvũ dticcianniook baag aaꞌnyĩk nẽẽ ꞌrabbẽẽt, hũmmũda hatĩ má ittoorri ꞌrabbẽẽta.
16“Baa aku aduhaak ꞌcĩ oou ĩnõõnnõ anneek, ‘Makayyioohit, ĩttõõrĩ ꞌrabbaacit baa nunni aꞌnyaha ꞌrabbẽẽt ũgĩ õmmõtõ.’
17“Ẽdẽcĩ makayyioohiti cĩnnĩ ho anneek, ‘Idticanuu jurrung ẽlẽ. Nẽ hĩnĩngĩtĩ ĩĩnĩ eet ꞌcĩ aꞌthũũnnĩ ꞌgii ꞌcĩ hidici, iinu hatĩ eet ꞌcĩ aggami ꞌtaaũnniook õmmõtõ.’
18“Ma ho, ikia dticciannioohiti ꞌcĩ anũẽẽkĩ nẽ ĩĩ, ‘Makayyioohit, ĩttõõrĩ ꞌrabbaacit baa nunni aꞌnyaha ꞌgõõnõgĩ ꞌtur.’
19“Ẽdẽcĩ makayyioohiti aĩ, ‘ꞌGaam nii ꞌtaaũnniook ꞌtur.’
20“Ma tarĩ ho, ikia dticciannioohiti umwaa tarĩ nẽ ĩĩ, ‘Makayyioohit, ꞌrabbaacit baa nunni cieeni, baa hitiangithi locoburoatõõ. 21Baa hiteellinnii, hĩnĩngĩtĩ ĩĩnĩ eet ꞌcĩ okomi kak. Ĩĩnĩ eet ꞌcĩ adiim õkõõĩ hẽlẽggĩ ꞌcĩg hõllõngaa ĩĩn cugunnig nẽ tarĩ, ĩĩnĩ eet ꞌcĩ adiim ajanni ngaatĩ nga katõõĩ.’
22“Ẽdẽcĩ Makayyioohit anneek, ‘Nii tahahaacĩ cieeni, etteedihuu nii ẽlẽ cunni thõõth ẽmmẽn thõõthaa ꞌcĩ aduha hataa. Má aga nii ngaatĩ hĩĩnnĩ naa eet ꞌcĩ hokomi kak nẽ hĩĩna eet ꞌcĩ hõkõõyyĩ hẽlẽggĩ ꞌcĩg hõllõngaa ĩĩn cĩgannĩg nẽ hajanõ ngaatĩ nga hakatõõĩ, 23nẽ baa hõllõngaa aarihi ꞌrabbaacit caannĩ ꞌbẽẽngĩatõõ inni? Occa ꞌyioko hũmmũdaaha ĩttõõrĩ.’
24“Nĩngĩtĩ annẽẽkĩ eet ꞌcĩg baag abĩlĩ nĩngaata, ‘Aggamta eet icci ꞌrabbaacit nẽ aanytĩhu eet ꞌcĩ aꞌnyak õmmõtõ hata.’
25“Ẽdẽcĩ hinnia eeta tĩko anneek, ‘Makayyioohit, ma tarĩ aꞌnyak ꞌcĩ umwa ho õmmõtõ ẽlẽk ko!’
26“Ẽdẽcĩ makayyioohiti anneek, ‘Ẽẽtĩ ꞌcĩ aꞌnyak ꞌgii ꞌcĩ abadtẽc, aaꞌnyĩhoothĩk hatĩ ꞌgii ꞌcĩ maka nẽ ẽẽtĩ ꞌcĩ hiꞌthihi ꞌgiimwa, aggammiaa hatĩ ꞌgii ꞌcĩ abadtẽc ꞌcĩ aꞌnyak nẽẽ haau athĩnĩĩ ꞌtẽl. 27Aꞌnyakta thĩ mĩrõk cĩgannĩg ꞌcĩg hõllõngaa adiimma hĩĩ habu haggam ĩhõõggõ ho ngaati nẽ uruktu hẽbẽrẽẽnnĩĩ cĩgannĩg.’ ”
Uduhun Yeesu ꞌJeruꞌthalẽm bulẽẽtta
(Tigiil Maatteeo 21:1-11; Maarko 11:1-11; Yõaannẽ 12:12-19)
28Ma baa ẽdẽcaak Yeesu ngaatĩ aduhaanĩ thõõth icci, ĩtĩnga ũũk ĩĩcĩ ꞌJeruꞌthalẽmĩ. 29Ma baa õbõktõ hĩ olooyyiok ꞌcĩg haĩ Bẽthvaje hĩ Bẽthani, Muuraa ꞌcĩ avvĩ eeta anneek Oliv, ĩꞌthõ nuyyiook ꞌramma anneek, 30“Õõt õlõõ ꞌcĩ obohoonnu ho nẽ ma uduhuttu, ammũdoothiku hatĩ thigir ꞌcĩ hidici ꞌcĩ nga hõtõõĩ eet umwaa ũdũt ecebbi nĩngaata. Õõkta nẽ aꞌnyaktaau ngaati. 31Nẽ má ajinnuung eet umwaa anneekuung, ‘Õõgannu inni?’ Ĩĩttĩk, ‘Adiim Makayyioohiti.’ ”
32Ma baa õõ nuyyiooha tĩko ho, ammũdoothĩk ꞌthẽk aaĩ hĩaa adukiaak ĩhõõggõ. 33Ma aĩ hõõgtawa ho, ajin hinnia maajihi thigiirak ĩhõõggõ anneek, “Õõgannu thigir inni?”
34Ẽdẽcĩ nẽẽg maajihi thigiirak ko anneek, “Adiim Makayyioohiti.”
35Nĩngĩtĩ aꞌnyahõõthĩkĩ nẽẽg Yeesu nẽ arrik ceremwa cĩggĩĩng bahuuca nẽ odongteek Yeesu hataadoothĩk. 36Ma baa iꞌthianaanĩ Yeesu weet ko, iita eteettik eeta ceremwa cĩggĩĩng ꞌgõõlaa ꞌcĩ õkõõĩ nẽẽ ho.
37Ma baa õdõlan nĩngĩtĩ allũũcẽnĩ ꞌgõõl õkõõĩ Muuraa cĩ Olivi, iꞌthianaaĩ lothippiti cĩ nuyyioohu ubuluthit Nyekuc gẽrrẽẽt taliitta, hĩnĩngĩtĩ thooꞌthiok baag ĩnaat eeta baag adĩman Yeesu. 38Baa ebenni nẽẽg aĩ,
“Aꞌnyĩĩk Nyekuc haggatan habu ꞌcĩ aku ꞌthaarĩĩ ĩcĩg Makayyiookto!”#Tigiil ꞌBuuk cĩ Tegellwaanu 118:26
“Aꞌnyĩĩk bũnnai hĩ bulẽẽnĩt haau hĩ Nyekuc hẽẽtahujjieen!”
39Aduhaak hinnia Variꞌtheei ũgẽẽgĩ Yeesu lothippitatõõ anneek, “ꞌLimmannioohit, ꞌgerenyeek nuyyiook cugunnig ko hĩjjaaktõ.”
40Ẽdẽcĩ Yeesu anneek, “Haduhaakuunga, má ĩjjaaktõ nẽẽgĩ, occa hinnia hatĩ ebenni biyyiẽẽna.”
41Ma baa õbõktõ nẽẽ hĩ ꞌJeruꞌthalẽm nẽ ĩcĩn ꞌtaaũn, ikia utulu, 42nẽ õthõõth ĩĩ, “Kõr nicci, aitiõõ eeta cugunnig hõllõngaa aga ꞌgii ꞌcĩ hatĩ aꞌnyahaak ĩhõõggõ ganõn! Nẽ ꞌyioko, aguꞌthi hĩ ĩhõõggõ hẽbẽrẽẽnnĩĩ cĩggĩĩng. 43Niig eeta cĩg ꞌJeruꞌthalẽmĩ, aku hatĩ kõrra ꞌcĩ irriamaneekuung ngagiit mĩrõha cugguung nẽ uuktuunga. Irriamaneekuung hatĩ mĩrõha nẽ ũꞌnyũũgĩtõ lõkõrẽẽt vẽlẽk. 44Õrrõyõõhaneekuung hatĩ nẽẽg ngagiit looc, hõdẽĩ hĩ lõhõlĩ cugguung vẽlẽk. Hĩnĩngĩtĩ hõllõngaa hatĩ ũũnnĩk mĩrõha cugguung bẽẽ umwa hataadĩ ꞌgoonnia, hĩnĩngĩtĩ hõllõngaa elemmu niig kõr cĩ elliaanĩt cunuung.”
Yeesu ꞌCieethaa cĩ Nyekuci
(Tigiil Maatteeo 21:12-17; Maarko 11:15-19; Yõaannẽ 2:13-22)
45Ma nĩngaata, ũũk uduhun Yeesu halang cĩ ꞌCieeth cĩ Nyekuci nẽ itiggiawaak eet ꞌcĩg baag ũũtẽnĩ ijjio battaali. 46Nẽ ĩĩnnĩk, “Eheeddi thõõth aĩ, ‘Haĩ ꞌcieeth caannĩ, ꞌCieeth cĩ Laiitto,’#Tigiil ꞌBuuk cĩ Iꞌthaia 56:7 Au hinnia aarru niig hĩĩ ‘ꞌcieeth cĩ igorriaahu.’#Tigiil ꞌBuuk cĩ ꞌJeremia 7:11 ”
47Nẽ waathinniook nicciag vẽlẽk, baa gõõng alliman nẽẽ eet ꞌCieethaa cĩ Nyekuci. Adiim hinnia aruk makayyiooha cĩg paadĩrꞌnyaannu hĩ ꞌlimmanniook cĩg nyattaalak, hĩ makayyiook cĩg eetuk ĩnõõnnõ thõng. 48Nẽẽthĩ, baa aꞌnyaman ĩhõõggõ ꞌgõõl ꞌcĩ occa aruhi, hĩnĩngĩtĩ baa aalla eeta vẽlẽk nĩngaata athĩhĩ ĩnõõnnõ.
Выбрано:
ꞌLuuka 19: did
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2017, Wycliffe Bible Translators, Inc., All rights reserved.
