John 7

Jesu Chule Asopiho

1Hicheng jou chun Juda hon tha ding agot jeh-un, Jesu Judah gama vale anomta hih-in, Galilee gama avahle tai. 2#Thmpu 23:34; Danb 16:13. Hiche pet chun Juda ho lhambuh kut anaitan ahi. 3Hijeh chun asopihon ajah-a, Nathil bol chengse hi naseijui hon jong amuna dingun, hikom mun dalhanlang, Juda gama chen. 4Ijeh-inem itile, minthan go-an koiman guhthimin thil abol ngaipoi. Thil hicheng hi nabol ahi ngalleh, vannoi kimusah-in, atiuve. 5Ijeh ham itile asopiho jengin jong ama atahsan louvu ahi.

6Chuin Jesu'n ajah uva, Keima tun kaphat alhing hih laije, nangho phat vang alhing jinge. 7Vannoi'in nangho naho theipouve; keibou eihouve; ijeh ham itile athilbolu aphapoi tia keiman amaho thudol ka hettohsah ji ahi. 8Hiche kut nachun nangho cheovin; keima vang tun hiche kutna chehih laijinge, kaphat alhing hihlaije, ati. 9Amaho jah-a chun thu hicheng chu aseijin ama Galilee'a aumden tan ahi.

Lhambuh Kut Laija Jesu

10Ahivangin asopite hi kutna dinga ache nungun, ama jong lhang phonga hilouvin, guhthimin achen ahi. 11Hiche chun Judah hon kut nachun ama chu aholun, Hoija umham? atiuve.

12Chule mipi lah-a miho chu ama thudola aphun melmul jengui; ajehchu abangin, Ama chu mipha ahi, atiuvin abangin, Ahipoi, mipi lam hilouva apuimang bouve, atiuve. 13Ahivangin Juda ho ginan ama thudol chu lhang phonga seija koima aumpouve.

14Chuin kut kim dontah ahi-in, Jesu houin'a achetouvin, thu agahil tan ahi. 15Chuin Juda hon adatmo lheh jengun, Hichepan kihilna neikha louva, lekha iti ahet ham? atiuve.

16Jesu'n amaho chu adonbutnin, Kathuhil hi kei thu ahipoi, eisolpa-a ahibouve. 17Koi hijongle ama lunggot lam bol nom-an, kathuhil hi Pathen'a kon ahi, keima chama kasei ahi, ahet ding ahi. 18Ama chama thuseija chun ama kichoi-at ding agot ahin, asolpa choiat ding go-a vang chu, ama chu dihtah ahin, ama-a chu chonphat louna aumpoi. 19Mosi'n nangho chonna dan napeh lou uham? Nangho khatchan jong chonna dan bang chun nachonpouve. Ibola tha dinga eigo-a nahiuvem, ati.

20Chuin mipi chun adonbutnun, Nangma thilha vop nahi; koiham tha dinga nago-a, atiuve.

21Jesu'n adonbutnin ajah uva, Keiman na khat katongin ahile nabonchaovin hichu kidang nasauve. 22#Semt 17:10; Thmpu 12:3. Hiche jeh-a chu, Mosi'n cheptan thu napeh-u ahin; (Mosi'a kon ahijeh hilouvin, puluiho-a kon joh ahin) chule nanghon cholngah nin mi chep natan jiuve. 23#Jhn 5:9. Mosi thupeh suhkeh louna dinga cholngah ni-a mi khat chep akitanle, cholngah ni-a mi khat kadamsah hel jeh-a kachunga nalunghanu ham? 24Alimsoa thu tan louvin, dihtah-in thu tan jouvin, ati.

Jesu Chu Messiah Ham?

25Hichun Jerusalem'a kon mi kimkhatnin, Tha dinga agotpau chu ama hi hilouham? 26Ahivangin, veuvin, phongtah-in thu aseijin, amahonla ajah-a ima aseipouve. Vaipohon ama hi Christa tah chu ahi ti ahet tahbeh mongu hita ham? 27Ahinla ama hi hoija hung kon ahi keihon kaheuve; Christa vang chu akonna koima ahea umlou ding ahi, atiuve.

28Hijeh chun Jesu'n houin'a thu ahil tolhonin, hatah-in asamin, nanghon keima jong neiheovin, chule hoija kon kahi jong naheuve; ahin keima kachama hunga kahipoi, ahinla eisolpa chu dihtah ahi, ama chu nanghon nahepouve. 29Amavang keiman ama chu kahei; ijeh-inem itile keima ama-a kon kahi, chule ama sol kahi, ati.

30Hiche chun amahon mat dingin agouvin, ahin aphat alhin loulai jeh chun, koiman achungah khut alhapon ahi. 31Chule mipi lah-a mi tamtah-in ama chu atahsan taovin, chule Christa chu ahung tengle, hichepan abol melchihna ho sanga tamjo abolnah dingham? atiuve.

Jesu Man Dinga Sottolho Kisol

32Mipin chutia ama thudola chuche aseijuva aphun melmulu chu Pharisai hon ajauvin; chuin thempu pipuiho le Pharisai hon ama man ding chu sottolho asolui. 33Chuin Jesu'n, ajah uva aseijin, Chomcha khat nalah uva umtadi nalai ding kahi, chujou tengle eihin solpa henga kache ding ahi. 34Nanghon neiholun natin, neimu lou dingu; chule kaumna-a chu nahung thei lou dingu ahi, ati.

35Hichun Juda ho khatle khat akidongun, Eihon ama iholuva imu lou dingu chu, ama hoijabep che ding hintem? Ole Greek mi lah-a cheng chehho henga chea Greek miho agahil ding khattou ham? 36Nanghon neiholun natin neimu lou dingu, kaumna dinga jong nahung thei lou dingu ahi, ati hi ipi aseina ahidem? atiuve.

Hintwi Pe-a Luidung

37 # Thmpu 23:36. Chuin kut kichai nin, hichu nipi ni ahin, Jesu adingin hatah-in asamin, Koi hijongle adangchah-a chu kahenga hunghen, hung donhen. 38#Ezek 47:1; Zech 14:8. Keima eitahsana chu, Pathen lekhabun asei bang banga, asunga kon twihing putdoh-a luija long ding ahi, ati. 39Hichu ama tahsan hon anei dingu, Lhagao Theng chu aseina ahi; ijeh-inem itile Jesu choi-atna aum loulai jeh-a, Lhagao theng chu kipe loulai ahi.

Mipi Abung Bunga Akikhenu

40Thu hicheng chu ajauvin mipi lah-a abang bangin, Tahbeh-a ama hi themgao mongmong chu ahi, atiuvin;

41Akimkhatnin, Ama hi Christa ahi, atiuve. Akimkhat vang chun Christa Galilee'a kona sohdoh ngaijem? 42#2 Sam 7:12; Mica 5:2. Christa chu David son hi ding, David chenna khopi Bethlehem'a kon hungdoh ding ahi, tia Pathen lekhabun asei hilouham? atiuve. 43Chuti chun ama thudola chun mipi chu abung bungin akikhentaove. 44Chule abangho chun ama chu mat ding agouvin; ahivangin koiman achungah khut alhapouve.

Juda Thunei hon Atahsan Louvu

45Chuin sottol mimanho chu thempu pipuiho le Pharisai ho henga ahungun ahile, amahon anadongun, Ibola nahinpui daoham? atiuve.

46Chuin sottol mimanho chun adonbutnun, Khuchepa thusei tobang khun mi koiman thu aseikhapoi, atiuve.

47Chuin Pharisai hon adonbutnun, ajah uva, Nangho jong doha lha-a nahiu hitam? 48Vaipoho le Pharisai ho lah-a khatbeh-in ama chu atahsanem? 49Ahin danthu helou mipi ho hi sapset changjia ahi, atiuve.

50 # Jhn 3:1-2. Nicodemus (Amaho lah-a khat, janna Jesu henga gachepa) chun ajah uva, 51Idan uvin mi chu athu ajah masang le athilbol ahet masanga themmo achansah ngaijem? ati.

52Chuin amahon adonbutnun, ajah-a, Nang jong Galilee mi nahim? Holin lang, ven; ajehchu Galilee'a konin themgao asohdoh ngaipoi, atiuve.

53Hichun amaho a-in cheh-a ache taovin ahi.

Выбрано:

John 7: THADBSI

Выделить

Копировать