Yoane 20
20
Yesu wazyukuka kufuma ku afwe
(Mat 28:1-8; Mk 16:1-8; Luk 24:1-12)
1Katondo tondo pa wanda wakutandika mulungu, lino kucili mfinzi, Maliya uwaku Magadala aya kwi lindi, nga alola vino iwe lyati lisisiwa pa mulyango wi lindi. 2Caleka asimula aya kuli Simoni Petulo nu mulondezi muze, nga ayanena ati, “Yati yafumya Mwene mwi lindi, nga tutamanyile kuno yati yamwika.”
3Caleka Petulo nu mulondezi muze yafuma yaya kwi lindi. 4Oili yasimula pamwi lelo mulondezi muze asimula kuluta Petulo nga aliwe aya uwankolelo kufika kwi lindi. 5Alino ainama nu kusungamila mwi lindi, nga alola insalu zitiswe zyamutengo zituzi, lelo atingile mukasi. 6Lyene Simoni Petulo wino wamulondelile cisila, aiiza aingila mwi lindi. Nawe kwene alola nsalu zitiswe zyamutengo zituzi, 7nga ni citambala cino canyefilwe ku mutwe wakwe Yesu. Cene citali pamwi ni nsalu zitiswe zyamutengo, lelo cakonzine conga pa mbali. 8Alino mulondezi muze, wino wali uwankolelo kufika pi lindi, nawe kwene aingilamo. Lino walola vii, ataila. (9Kufika na pa kasita kwene kaka ala yatali yataile vino malembelo yalanda ukuti alinzile azyukuke kufuma ku afwe.) 10Lyene alondezi yaswilila kumwao.
Yesu waloleka kuli Maliya uwaku Magadala
(Mat 28:9-10; Mk 16:9-11)
11Lelo Maliya asyala aimi kunzi pipi ni lindi ala akulila. Walanga acili akulila, ainama asungamila mwi lindi, 12nga alola angeli yaili yazwite vizwalo vitiswe. Angeli yao yatenzi pano icala cakwe Yesu cali lino atali azyukuke, wenga ku mutwe nu muze ku ntambalilo. 13Angeli yamuzya yati, “Kaciwe, uzye pacani ukulila?”
Nawe aasuka ati, “Yati yafumya Mwene wane mwi lindi, nga ntamanyile kuno yati yamwika.”
14Lino wavwanga vii aseleuka alola umuntu aimi penepo lelo wene atamanyile vino umuntu wilya a Yesu. 15Alino Yesu amunena ati, “Kaciwe, uzye pacani ukulila? Uzye aweni wino ukulonda?”
Maliya welenginye vino umuntu wii umulimi wa calo, caleka amunena ati, “Ndi cakuti wewe watumufumya, unene kuno watumwika nga nani namaya nkamutole.”
16Yesu amunena ati, “Maliya!”
Nawe Maliya aseleukila kunoli nga amuvwanzya mu Ciyebulai ati, “Laboni!” (Kuli kuti, “Kasambilizya.”)
17Yesu amunena ati, “Utandemamo pano ntali nkwele inje kuli Tata. Lelo yanga ku inane ukayanene vino nkukwela inje kuli Tata, ali So, Leza wane nupya Leza winu.”
18Caleka Maliya uwaku Magadala aya anena alondezi vino watalola Mwene nga ayalondolwela vyonsi vino wamutumilizye.
Yesu waloleka ku alondezi yakwe
(Mat 28:16-20; Mk 16:14-18; Luk 24:36-49)
19Lyene manguzi pa wanda wakutandika mulungu, lino ilanzi lyatemba, alondezi yakongine pamwi. Milyango ya ng'anda nayo ala yatifiikilwa, pano yoopanga intunguluzi zya Ciyuda. Alino Yesu aiiza aimilila pakasi kao, ayanena ati, “Mutende uye namwe.” 20Walanga wavwanga vintu vii ayalanga makasa yakwe nga nu mu mbazo. Lyene alondezi yazanga cuze pano yalola Mwene. 21Yesu nupya ayanena ati, “Mutende uye namwe. Ndi vino Tata wantumile avino nani namutuma.” 22Lino wavwanga vii ayaputa mupu, ayanena ati, “Pokelelini Mupasi Wamuzilo.”
23 #
Mat 16:19; 18:18 Ndi mwelela antu maifyo yao, na Leza kwene alayelela. Ndi musyakwelela antu maifyo yao, na Leza kwene atalayelela.
Yesu na Tomasi
24Lelo Tomasi, wenga uwamu alondezi ikumi na yaili (akaamwa ukuti Didimo) atali pamwi nao lino Yesu wizile. 25Caleka alondezi yauze iiza yamunena yati, “Twati tulola Mwene.”
Lelo wene ayanena ati, “Ntakutaila, suka ndi nalola viyazi ivyacisilwe ni nsunga mu makasa yakwe nga nu kwika umunwe wane pa viyazi vivyo, nga ni kasa lyane mu mbazo zyakwe.”
26Pacisila ca manda cinani, alondezi yakwe pali pamwi na Tomasi nupya yali mukasi ka ng'anda. Alino Yesu aiiza aimilila pakasi kao, ala ni milyango yatifiikilwa, nga ayanena ati, “Mutende uye namwe.” 27Lyene anena Tomasi ati, “Ndu simpe umunwe wako paa nu kulola makasa yane. Tambika ikasa lyako ulipisye mu mbazo zyane. Taa ukutwisika, nga utaile!”
28Tomasi amunena ati, “Mwene wane, Leza wane.”
29Yesu amunena ati, “Uzye wataila pano wandola? Alongo ayao akataila na lino yataweni.”
Cino lupapulo luu lwalembilwe
30Yesu wacisile vilangililo vingi pa manso ya alondezi yakwe, vino vitalembwa mu lupapulo luu. 31Lelo vii vyalemvilwe kuti mutaile vino Yesu ali Katuula, Mwana wakwe Leza, nga nu mukutaila munoli muye nu umi wape.
Выбрано:
Yoane 20: MamL13
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Mambwe-Lungu Bible © The Bible Society of Zambia, 2013
