Yoane 19

1Lyene Pilato apeela ilamulo kuti yume Yesu vikoti. 2Alino asilika yaluka ingala ya myunga, yamuzwika ku mutwe. Lyene yamuzwika mwingila uyenzulukile. 3Alino yamupalamila, yamunena yati, “Kwaita, Mwene wa Ayuda!” Lyene yamuma impi.

4Nupya kwene afuma aya avwanga kwi umba ati, “Lolini namufumya kunomuli, kuti mumanye vino nemo ntamuzanyile nu mulandu.” 5Caleka Yesu afuma, ala azwite ingala ya myunga nu mwingila uyenzulukile. Lyene Pilato ayanena ati, “Lolini! Umuntu auwi!”

6Lino yasimapepo akalamba na yakalinda ya Ng'anda ikulu yakwe Leza yamulola, yasanzika mazwi yao yati, “Atanwe pa lupanda! Atanwe pa lupanda!”

Pilato ayanena ati, “Mwemwe kwene musendini mukamutane, pano kwene nemo ntamuzanyile nu mulandu.”

7Iumba nalyo lyasuka liti, “Swemo twakwata isunde litu lino likati alinzile ukufwa, pano wene akuilanda vino Mwana wakwe Leza.”

8Lino Pilato uvwa vino yavwanga, auvwa intete cuze. 9Alino aingila nupya mwi sano, nga auzya Yesu ati, “Uzye kuno wafuma aukwi?” Lelo Yesu ataaswike. 10Alino Pilato amunena ati, “Uzye ukunziya uli? Iusya vino nemo nkweti insambu iya kukusapula nga ni nsambu iya kukutana pa lupanda.”

11Yesu amunena ati, “Utangaya ni nsambu panondi, suka ndi nsambu yapeelwa kunuli kufuma kuli Leza. Caleka wino uwatapela nene kunuli ali ni iifyo likulu kuluta.”

12Lyene lino Pilato uvwa cii, aezya kulonda inzila yakuti asapule Yesu. Lelo iumba lisanzika izwi liti, “Ndi umamusapula, ale usi cuza wakwe Kesa! Wino wensi akuitaka vino wene mwene ala akusangukila Kesa!”

13Caleka lino Pilato uvwa mazwi yaa, afumya Yesu panzi aikala na pa cilimba cakwe kapingula wa milandu mu ncende ii yamwangwa ukuti, “Musolo wa mawe.” (Mu Ciyebulai incende ikaamwa ukuti, “Gabata.”) 14Cali pa wanda wa kuteyanya kuzevya Cimulo ca Ucilo, manye lino ilanzi lyafika mutwe papela (12 koloko). Pilato anena antu ati, “Mwene winu auwi kuno!”

15Caleka yasanzika mazwi yao yati, “Mukome! Mukome! Atanwe pa lupanda!”

Pilato ayauzya ati, “Uzye mukulonda ntane mwene winu pa lupanda?”

Yasimapepo akalamba yaasuka yati, “Tutakweti mwene muze suka Kesa!”

16Lyene Pilato amupeela kunoyali kuti atanwe pa lupanda.

Yesu watanwa pa lupanda

(Mat 27:32-44; Mk 15:21-32; Luk 23:26-43)

Caleka asilika yasenda Yesu. 17Yesu nawe afuma mu musumba, ala asenzile lupanda lwakwe, aiiza ku cifulo camwangwa ukuti, “Pa cifulo ci Panga.” (Mu Ciyebulai cikaamwa ukuti, “Gologota.”) 18Kuku akuno yamutana pa lupanda, nga yatana na antu yauze yaili, wenga kwi kasa lilunji nu muze kwi mani lyakwe, wene yamwika pakasi kao. 19Pilato walemvile cimanyisyo nu kucipampamila pa lupanda. Palemvilwepo ukuti “Yesu uwaku Nazaleti, Mwene wa Ayuda.” 20Antu aingi yaciwelenzile, pano cifulo cino Yesu watanyilwepo citali kutali nu musumba wa Yelusalemu. Cimanyisyo cii calemvilwe mu Ciyebulai, mu Cilatini, nga nu mu Cigiliki. 21Yasimapepo akalamba yanena Pilato yati, “Utalemba ukuti, ‘Mwene wa Ayuda.’ Lelo ulembe ukuti, ‘Umuntu wii wailandanga vino wene Mwene wa Ayuda.’”

22Pilato nawe aasuka ati, “Cino nati ndemba, nati ndemba.”

23Lino asilika yatana Yesu pa lupanda yatoola vizwalo vyakwe yankanya pani, nga cila musilika atoola cino yamwankinye. Yatozile nu mwingila wakwe kwene, uno wapanzilwe kwaula mulundo. 24#Malg 22:18 Asilika yavwanzyanya yati, “Lekini tutaulepula. Lekini tupendole kuti tulole wino amautola.” Cii cacitike kuti cifikiliziwe cino calembwa mu malembelo cikati,

“Yankine nsalu zyane aisikulu nga

na pa mwingila wane yacita usilizi.”

Vii avino asilika yacisile.

25Pipi nu lupanda lwakwe Yesu paimi nyina wakwe Yesu, na kaci muze mwina wakwe nyina, na Maliya muka Keleopa, nga na Maliya uwaku Magadala. 26Lino Yesu walola nyina, nu mulondezi wino watemilwe cuze, ala yaimi pipi, anena nyina ati, “Mayo, wii umwana wako.”

27Alino anena nu mulondezi wakwe ati, “Mwana, wii a nyoko.” Kufuma pa kasita kwene kako mulondezi amutola kuti aikala nawe ukwakwe.

Imfwa yakwe Yesu

(Mat 27:45-56; Mk 15:33-41; Luk 23:44-49)

28 # Malg 22:15; Mas 69:21 Alino pa nsita ilya Yesu wamanyile vino vyonsi vyati visila, nga pakuti cifikiliziwe cino calembwa mu malembelo, avwanga ati, “Nuvwa lusala.”

29Ulweso lwali penepo, ulwazilemo waini musasalume. Caleka yaombeka umwepu muli waini, nga yautunga ku kamuti kakwe isopu nga yamutambikila pa mulomo. 30Lelo lino Yesu wafyompako, avwanga ati, “Casila!” Alino ainama nga afwa.

Yesu yamutota ni sumo mu mbazo

31Wali uwanda wakuteyanya Sabata. Na Sabata walondelile wali uwamuzilo kuluta. Na Ayuda yatalondanga antu kusyala pa lupanda pa wanda wi Sabata. Acino yuzya Pilato kuti yavune maulu yakwe yao atanyilwe, nga yaisye. 32Caleka asilika yaya yavuna maulu yakwe wiyo wakutandika nga namuze kwene, yao atanyilwe pamwi na Yesu. 33Lelo lino yafika pali Yesu, yalola vino watafwa mpiti. Caleka yatamuvunyile maulu. 34Lelo wenga uwamu asilika amutota ni sumo mu mbazo, nga lilyo kwene mufuma wazi na manzi. (35Wiyo uwaweni kuno vintu vii vikucitika, watapela umboni, kuti namwe kwene mutaile. Umboni wakwe uwa cumi, nupya wamanya vino akavwanga icumi.) 36#Kuf 12:48; Mpe 9:12; Mas 34:20 Cii cacitike kuti cifikiliziwe cino calembwa mu malembelo cikati, “Kusi ifupa lyakwe nanti lyonga ililavunwa.” 37#Zak 12:10; Umb 1:7 Nacuze calembwa mu malembelo cikati, “Antu yalalola wino uwatosilwe ni sumo mu mbazo.”

Kuzikwa kwakwe Yesu

(Mat 27:57-61; Mk 15:42-47; Luk 23:50-56)

38Pacisila ca vintu vii, Yosefu uwaku Alimatiya aya alenga Pilato kuti amuzumilizye kusenda icala cakwe Yesu. (Yosefu wali mulondezi wakwe Yesu mu umfisolo, pano oopanga intunguluzi zya Ciyuda.) 39#Yoa 3:1 Nikodemo, wino nkolelo waile kuli Yesu usiku, nawe waileko pamwi na Yosefu. Ala asenzile vya mununko usuma, mulembo mule uminkane na aloe, kulingana na yalita ikumi. 40Antu ya oili yatoola icala cakwe Yesu, yacipomba mu nsalu itiswe yamutengo kumwi ni vya mununko usuma, kulingana nu lutambi lwa Ciyuda lwa kuteyanya kuzika icala. 41Kuno Yesu watanyilwe kwali calo, nga nu mukasi kaciko mwali lindi muno mutatazile mwikwemo icala. 42Pamulandu wakuti wali uwanda wakuteyanya uwa Ayuda, nga na pano ilindi lyali pipi, antu yaa oili iika cala cakwe Yesu mwenemo.

Выбрано:

Yoane 19: MamL13

Выделить

Копировать