Yoˇhaˬ 20

Yeˬsuˇ gʼoꞈ dehꞈ laˇ-euˬ

(Maꞈtehˬ 28.1-8; Maˬkuˆ 16.1-8; Luˇkaꞈ 24.1-12)

1Tiˬ jaw laꞈ kʼoeˇ aˇ dahˬ beh-eu nah#20.1 Ka li zaˬ-euˬ Jawˇ nah-ahˇ ehˇ mawꞈ-eu meh. uˬ shawˬ paw uˬ bya maˬ bya laˇ mi naˆ-ehˇ, Maˬgaˬdaˬlaˇ meuˬ-ahˇ jawˇ-eu Maˬliˇ kʼoeˇ gʼaˬ lmˬ bymˇ-ahˇ iˇ haw ngeh, lmˬ bymˇ mehˬ kʼehˬ-ahˇ jaˆ-eu kʼaˬ lo ngawˬ dzeh-awˇ jaˆ gaˇ ya mawˇ-euˬ meh. 2Kʼoeˇ ngeh, Siˇmoˬ Beˬtuˆluˆ hawˇ-eu Yeˬsuˇ gaˬ dui dui-eu zaˬ lahˇ kʼoeˇ gʼaˬ jawˇ gaˇ aˬ yawꞈ cehˆ gʼeh-awˇ, “Aˬ yawꞈ maꞈ Sahˬpaˬ-ahˇ lmˬ bymˇ laꞈ kʼoeˇ neh baꞈ doˆ gʼeh-awˇ, aˬ gaˇ baꞈ taˬ-iˇ-euˬ lehˇ maˬ paˇ siˬ ngaˇ” lehˇ ehˇ nehˬ-euˬ meh.

3Kʼoeˇ naˇ, Beˬtuˆluˆ hawˇ-eu zaˬ lahˇ kʼoeˇ gʼaˬ lmˬ bymˇ-ahˇ iˇ-euˬ meh. 4Aˬ yawꞈ nyaꞈ tiˬ kawˆ loꞈ-ehˇ cehˆ cehˆ-ehˇ iˇ-euˬ meh. Ehˇ kʼawꞈ, zaˬ lahˇ kʼoeˇ gʼaˬ Beˬtuˆluˆ naˆ maˬ tseˇ kawˇ dzehˬ-eu miˇ neh, Beˬtuˆluˆ-euˬ jeˬ hu lmˬ nymˇ-ahˇ cehˆ keuˆ-euˬ meh. 5Aˬ yawꞈ awˆ kʼoꞈ-awˇ haw ngeh, mawˇ tawˆ saˬ paˇ jaˆ gaˇ ya mawˇ-euˬ meh. Ehˇ kʼawꞈ, aˬ yawꞈ lmˬ bymˇ lo kʼahˬ laꞈ kʼoeˇ maˬ uˇ-iˇ haw ni jawˇ-euˬ meh. 6Aˬ yawꞈ-euˬ mehˬ nah Beˬtuˆluˆ cehˆ keuˆ leꞈ-awˇ, tiˬ poˆ tehꞈ-ehˇ lmˬ bymˇ lo kʼahˬ laꞈ kʼoeˇ uˇ-iˇ-euˬ meh. Mawˇ tawˆ saˬ paˇ ga gaˇ Beˬtuˆluˆ mawˇ-euˬ meh. 7Yeˬsuˇ-euˬ uˬ duˬ-ahˇ lahˇ nehˬ-euˬ paˇ jeh kʼoeˇ kahˇ kʼawꞈ, kʼoeˇ gaˇ ga-eu meh. Paˇ jeh kʼoeˇ-aˬ, mawˇ tawˆ saˬ paˇ nehˬ-ehˇ tiˬ kawˆ loꞈ-ehˇ maˬ ga ni, yawˬ gaˇ yawˬ yaw yoˆ yoˆ-ehˇ jaˆ-eu meh. 8Kʼoeˇ ngeh, lmˬ bymˇ-ahˇ jeˬ huˬ cehˆ keuˆ leꞈ-euˬ zaˬ lahˇ kʼoeˇ gʼaˬ gʼeh lmˬ bymˇ lo kʼahˬ laꞈ kʼoeˇ uˇ leˇ-awˇ, kʼoeˇ loꞈ-ehˇ jaˆ gaˇ ya mawˇ-awˇ jah-euˬ meh. 9Kʼoeˇ ngeh keuˆ ni, Yeˬsuˇ gʼoꞈ dehꞈ laˇ tehꞈ-a lehˇ Jaˇliꞈ laꞈ kʼoeˇ ehˇ taˬ-euˬ gaˇ kawˆ kʼoeˇ-ahˇ aˬ yawꞈ nyaꞈ yaw muiˬ paˬ-ehˇ maˬ gʼoˆ shaw-aˬ siˬ. 10Kʼoeˇ naˇ, aˬ yawꞈ nyaꞈ gʼoꞈ leˇ-euˬ meh.

Maˬgaˬdaˬlaˇ Maˬliˇ-ahˇ Yeˬsuˇ dawˬ ngehˬ cawˬ-euˬ

(Maꞈtehˬ 28.9,10; Maˬkuˆ 16.9-11)

11Maˬliˇ-aˬ, lmˬ bymˇ lo kʼahˬ laꞈ nyiˇ yawꞈ-awˇ ngoeˇ luꞈ-eu meh. Aˬ yawꞈ ngoeˇ ngoeˇ-ehˇ awˆ kʼoꞈ-awˇ, lmˬ bymˇ lo kʼahˬ laꞈ kʼoeˇ haw ahˇ gʼeh-euˬ meh. 12Mˬ taˆ gʼaˬ kʼehˇ nyiˬ gʼaˬ mehˬ tsoeˬ yaw pyuˇ dm-awˇ, Yeˬsuˇ-ahˇ baꞈ taˬ-awˇ bi jaˆ-euˬ kʼoeˇ tsahˇ-ahˇ, mˬ gʼmˬ paw tiˬ gʼaˬ, kuiˇ bi paw tiˬ gʼaˬ jawˇ luꞈ gaˇ aˬ yawꞈ ya mawˇ-euˬ meh. 13“Zaˬ miˬ aˬ buˇ-oˇ, aˬ jeˬ miˇ neh ngoeˇ te” lehˇ mˬ taˆ gʼaˬ kʼehˇ kʼoeˇ nyiˬ gʼaˬ ehˇ-eu meh.

Aˬ yawꞈ ehˇ-eu, “Aˬ yawꞈ maꞈ neh ngaˬ-euˬ sahˬ paˬ-ahˇ baꞈ doˆ gʼeh-awˇ, aˬ gaˇ baꞈ taˬ-iˇ-euˬ maˬ siˬ ngaˇ.”

14Aˬ yawꞈ kʼoeˇ loꞈ-ehˇ ehˇ gʼaˬ-awˇ zeuˆ pyawˇ ngeh, Yeˬsuˇ kʼoeˇ gaˇ yawꞈ luꞈ gaˇ ya mawˇ-euˬ meh. Ehˇ kʼawꞈ, Yeˬsuˇ nga lehˇ aˬ yawꞈ maˬ siˬ nya-a. 15Yeˬsuˇ aˬ yawꞈ-ahˇ ehˇ nehˬ-eu, “Zaˬ miˬ aˬ buˇ-oˇ, aˬ jeˬ miˇ neh ngoeˇ te. Nawˇ aˬ suˇ gʼaˬ-ahˇ poˆ luꞈ te.”

Yeˬsuˇ-ahˇ yaˇ kmˇ laˆ saˆ-eu tsawˇ haˬ nga lehˇ duˇ-awˇ ehˇ-eu, “Aˬ yuiꞈ-oˇ, nawˬ neh aˬ yawꞈ-ahˇ baꞈ doˆ gʼeh-euˬ ngeuˇ naˇ, aˬ gaˇ baꞈ taˬ teˬ lehˇ ngaˬ-ahˇ tiˬ poˆ ehˇ nehˬ laꞈ-awˬ. Aˬ yawꞈ-ahˇ ngaˇ baꞈ kʼoꞈ laˬ-iˇ ma.”

16Yeˬsuˇ aˬ yawꞈ-ahˇ “Maˬliˇ-oˇ” lehˇ kuˇ nehˬ ngeh, aˬ yawꞈ ciˬ pyawˇ-awˇ, “Laˬboˇniˇ-oˇ” lehˇ oˬ toˬ kʼoꞈ nehˬ-euˬ meh. “Laˬboˇniˇ” lehˇ ehˇ-eu-aˬ, Heˬbyehˇ dawˬ pyeuꞈ-awˇ, “saˬlaˬ” lehˇ ehˇ mawꞈ-euˬ meh.

17Yeˬsuˇ aˬ yawꞈ-ahˇ ehˇ nehˬ-eu, “Ngaˬ-ahˇ taˬ nyehꞈ tehˬ. Aˬ jeˬ miˇ neh ehˇ naˇ, ngaˇ Aˬda jawˇ gaˇ maˬ gʼoꞈ leˇ-aˬ siˬ. Ngaˬ-euˬ zaˬ lahˇ deuˬ jawˇ gaˇ iˇ-awˇ, ngaˬ-euˬ Aˬda hawˇ-eu aˬ yawꞈ maꞈ-euˬ Aˬda pyeuꞈ-eu, ngaˬ-euˬ Miˬyehˇ hawˇ-eu aˬ yawꞈ maꞈ-euˬ Miˬyehˇ jawˇ gaˇ ngaˇ gʼoꞈ leˇ ma lehˇ ehˇ-eu meh lehˇ ehˇ nehˬ-iˇ-awˬ.”

18Kʼoeˇ ngeh, zaˬ lahˇ deuˬ jawˇ gaˇ Maˬliˇ Maˬgaˬdaˬlaˇ iˇ-awˇ, aˬ yawꞈ Sahˬpaˬ Yeˬsuˇ-ahˇ ya mawˇ-euˬ gaˇ kawˆ hawˇ-eu, Sahˬpaˬ Yeˬsuˇ neh aˬ yawꞈ-ahˇ ehˇ nehˬ-euˬ dawˬ deuˬ dzawˇ nehˬ-euˬ meh.

Yeˬsuˇ aˬ yawꞈ-euˬ zaˬ lahˇ deuˬ-ahˇ gʼawˇ mawˇ bi mawˇ le-euˬ

(Maꞈtehˬ 28.16-20; Maˬkuˆ 16.14-18; Luˇkaꞈ 24.36-49)

19Tiˬ jaw laꞈ kʼoeˇ aˇ dahˬ beh-eu aˇ nah pyeuꞈ-eu kʼoeˇ ngeh nah uˬ ciꞈ paw, zaˬ lahˇ deuˬ Yuˇdaˆ tsawˇ haˬ aˬ yuiꞈ aˬ tsu deuˬ-ahˇ guˆ-eu miˇ neh, tiˬ gaˇ uiˬ leˇ jiˇ-awˇ, laˇ gʼoˆ sehˬ sehˬ tehˬ-awˇ jawˇ-eu meh. Kʼoeˇ ngeh, Yeˬsuˇ aˬ yawꞈ maꞈ jawˇ gaˇ yawꞈ le-awˇ, “Naw maꞈ nui saˇ oꞈ luꞈ-uˇ” lehˇ ehˇ le-euˬ meh. 20Kʼoeˇ loꞈ-ehˇ ehˇ gʼaˬ-awˇ, aˬ yawꞈ maꞈ-ahˇ aˬ yawꞈ-euˬ aˬ laꞈ hawˇ-eu byaˇ gʼaˇ bi haw-euˬ meh. Zaˬ lahˇ deuˬ Sahˬpaˬ Yeˬsuˇ-ahˇ ya mawˇ-euˬ miˇ neh laˬ kʼaˬ cehˇ dui dui-eu meh. 21Yeˬsuˇ aˬ yawꞈ maꞈ-ahˇ tiˬ poˆ paˇ ehˇ nehˬ-eu, “Naw maꞈ nui saˇ oꞈ luꞈ-uˇ. Aˬda ngaˬ-ahˇ kʼehˇ gʼeh leꞈ-euˬ loꞈ-ehˇ, naw maꞈ-ahˇ ngaˇ kʼehˇ gʼeh-eu ma.” 22Kʼoeˇ loꞈ-ehˇ ehˇ gʼaˬ ngeh, aˬ yawꞈ maꞈ kʼoeˇ taˆ aˬ yawꞈ saꞈ baw nehˬ-awˇ, heu loꞈ-ehˇ ehˇ nehˬ-euˬ meh. “Muiˬ-eu Shawˇ-eu Yaw sahˇ Miˬyehˇ-ahˇ ha geuꞈ-awˬ. 23Naw maꞈ neh iˬ baˇ pyehˬ nehˬ-euˬ tsawˇ haˬ-ahˇ Miˬyehˇ iˬ baˇ pyehˬ nehˬ tehꞈ-a. Naw maꞈ neh iˬ baˇ maˬ pyehˬ nehˬ-euˬ tsawˇ haˬ-ahˇ Miˬyehˇ iˬ baˇ maˬ pyehˬ nehˬ-aˇ.”

Yeˬsuˇ Toˇmaˆ-ahˇ dawˬ ngehˬ cawˬ le-euˬ

24Zaˬ lahˇ deuˬ jawˇ gaˇ Yeˬsuˇ oe ngeh, Yeˬsuˇ-euˬ zaˬ lahˇ tiˬ gʼaˬ pyeuꞈ-eu “Nyiˬ gʼaˬ dehꞈ le-euˬ” lehˇ kuˇ-eu Toˇmaˆ kʼoeˇ gʼaˬ kʼoeˇ gaˇ maˬ jawˇ-a. 25Kʼoeˇ miˇ neh, “Nga maꞈ Sahˬpaˬ Yeˬsuˇ-ahˇ ya mawˇ-euˬ ma” lehˇ, zaˬ lahˇ deuˬ aˬ yawꞈ-ahˇ ehˇ nehˬ-euˬ meh.

Aˬ yawꞈ maꞈ-ahˇ Toˇmaˆ ehˇ-eu, “Aˬ yawꞈ-euˬ aˬ laꞈ-ahˇ shmˇ sehˬ taꞈ-euˬ maˇ byawꞈ-ahˇ ngaˇ mawˇ duˬ-awˇ, ngaˬ-euˬ laꞈ noeˇ neh maˇ byawꞈ kʼoeˇ-ahˇ toeˬ haw gʼaˬ-awˇ, aˬ yawꞈ-euˬ byaˇ gʼaˇ-ahˇ ngaˬ-euˬ laꞈ zaˬ neh yaw muiˬ paˬ-ehˇ sawˆ duˬ haw gʼaˬ miˇ tsa maˬ ngeuˇ naˇ, ngaˇ maˬ jah.”

26Tiˬ jaw dzeuˇ-iˇ ngeh, zaˬ lahˇ deuˬ nymˇ tiˬ nymˇ laꞈ kʼoeˇ uiˬ leˇ-awˇ jawˇ-eu meh. Toˇmaˆ kʼawꞈ, aˬ yawꞈ maˬ nehˬ-ehˇ jawˇ-eu meh. Aˬ yawꞈ maꞈ laˇ gʼoˆ sehˬ sehˬ tehˬ taˬ-euˬ meh. Ehˇ kʼawꞈ, Yeˬsuˇ aˬ yawꞈ maꞈ jawˇ gaˇ yawꞈ le-awˇ, “Naw maꞈ nui saˇ oꞈ luꞈ-uˇ” lehˇ ehˇ-eu meh. 27Kʼoeˇ ngeh, Toˇmaˆ-ahˇ aˬ yawꞈ ehˇ nehˬ-eu, “Nawˬ-euˬ laꞈ noeˇ neh toeˬ haw-awˇ ngaˬ-euˬ aˬ laꞈ-ahˇ haw duˬ laˇ sheˇ. Kʼoeˇ naˇ, nawˬ-euˬ aˬ laꞈ cawˬ ja-awˇ, ngaˬ-euˬ byaˇ gʼaˇ-ahˇ sawˆ haw-awˇ, poˆ poˆ laˆ laˆ-ehˇ maˬ paˇ noeˬ ni jah-awˬ.”

28Toˇmaˆ ehˇ-eu, “Nawˇ-aˬ, ngaˬ-euˬ Sahˬpaˬ hawˇ-eu ngaˬ-euˬ Miˬyehˇ meh.”

29Aˬ yawꞈ-ahˇ Yeˬsuˇ ehˇ nehˬ-eu, “Nawˇ ngaˬ-ahˇ mawˇ-euˬ miˇ neh jah te loˇ. Ngaˬ-ahˇ maˬ mawˇ-euˬ kʼawꞈ jah-eu tsawˇ haˬ deuˬ aˇ naˆ ni guiˬ lahˬ huiˬ-eu nga.”

Aˬ jeˬ miˇ neh sahˬ boꞈ heu taꞈ boꞈ-euˬ gaˇ kawˆ

30Sahˬ boꞈ heu taꞈ laꞈ kʼoeˇ maˬ boꞈ ahˇ jiˇ taˬ-euˬ zahˬ leˇ paˬ-ehˇ gʼeh-eu gʼawˬ mya jeˬ, zaˬ lahˇ deuˬ mehˬ shi Yeˬsuˇ mˇ-euˬ meh. 31Ehˇ kʼawꞈ, heu gaˇ kʼaˇ boꞈ taˬ-euˬ heu deuˬ-aˬ, Yeˬsuˇ-aˬ Meˬsiˇya hawˇ-eu Miˬyehˇ-euˬ Zaˬmaˇ pyeuꞈ-eu naw maꞈ jah laˇ ni maˬ ehˇ, naw maꞈ aˬ yawꞈ-ahˇ jah-eu laꞈ kʼoeˇ dehꞈ-eu jeˬ za nya ni maˬ ehˇ, boꞈ taˬ-euˬ jeˬ pyeuꞈ-eu ma.

Выбрано:

Yoˇhaˬ 20: AHK

Выделить

Копировать