1 Johannes 3
3
1Dikhen de baro kamimos sikhadas o Dad amenge: Ame bušovas le Devleske šavora, taj kodo sam. I luma či prindžarel amen, ke či prindžarel les. 2Mure kamade, akana sam Devleske šavora, me inke či sikhadjilas so si te avas. Žanas ke kana o Kristus sikhadjola, avasa pe leste. Ke si te dikhas les sar kaj si. 3Sako kaj bizil pe ande leste, vužarel pes sar kaj si o Kristus vužo.
Save si le Devleske šavora?
4Kodo kaj berel bezex, šinel i vorba la krisaki, ke o bezex si te šinen i kris. 5Taj tume žanen ke o Jesus sikhadjilas te lel amare bezexa, taj bezex na'i ande leste. 6Kodo kaj ašel ande leste či trajil and'o bezex. Kodo kaj kerel bezex, či dikhlas les taj či prindžardas les. 7Mure šavora, na mekhen te inkren tumen konik pa o drom le Devlesko. Kodo kaj kerel o čačimos, kodo si vorta sar kaj si o Jesus vorta. 8Kodo kaj kerel bezex, si katar o Beng. Ke o Beng anda o angluno čajto kerdas bezex. Te ašavel sa so o Beng kerdas o Šav le Devlesko sikhadjilas. 9Sako kaj si kerdjilo le Devlestar, či kerel bezex. Ke i seminča kaj šutas o Del ande leste, ašel ande leste. Vo či maj biril te kerel bezex, ke vo si kerdjilo le Devlestar. 10Pe kado sikhadjol save si le Devleske šavora taj save si le Bengeske šavora: Kodo kaj či trajil vorta taj či kamel peske phrales, na'i katar o Del. 11Kadi si i vorba kaj ašundan anglunes: Trubul te kamas jekh avres. 12Te na avas sar o Kain, ke vo sas katar o Nasul taj mudardas peske phrales. Taj sostar mudardas vo peske phrales? Ke so vo kerelas sas nasul, taj so lesko phral kerelas sas vorta. 13Na čudin tume, phralale, te na kamela tumen i luma. 14Ame žanas ke ame gelamtar katar o merimos and'o trajo, ke ame kamas le phralen. Kodo kaj či kamel, inke ašel and'o merimos. 15Kodo kaj či kamel peske phrales, si jekh kaj mudarel, taj tume žanen ke jekh kaj mudarel na'i o trajo trajostar ande leste. 16So si o kamimos sičilam katar o Jesus kaj das pesko trajo anda amende. Anda kodo sam vi ame došale te das amaro trajo le phralenge. 17Me te si varekon barvalo, taj dikhel pesko phrales and'o čorimos, taj phandavel pesko jilo angla leste, sar šaj avel le Devlesko kamimos ande leste atunči?
Ame či daras angla o Del
18Mure šavora, amaro kamimos trubul te avel čačo, te na avel ferdik vorbi, me buči. 19Kade žanas ke sam katar o čačimos, taj šaj sikhavas and'i pača amare jile angla leske jakha. 20Makar te arakhela o jilo doš amenge, si o Del maj baro sar amare jile taj vo sa žanel. 21Mure kamade, te na arakhela amare jile amenge doš, či daras angla o Del. 22Taj so mangas lestar vo del amen, ke inkras leski vorba taj keras so vo kamel. 23Taj kadi si leski vorba: Te pačas amen ande leske šavesko anav Jesus kristus taj te kamas jekh avres sar kaj vo phendas. 24Kodo kaj inkrel leski vorba ašel and'o Del, taj o Del ande leste. Taj ke ašel vo ande amende ame žanas, ke vo das amen pesko Duxo.
Выбрано:
1 Johannes 3: LOV1984
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© Det Norske Bibelselskap (Norwegain Bible Society) 1984