Susumo 3
3
1Ko gwɔ̄m wa dal ngyāma mwa de Dagwi Darwey a yong na netsitsɛng. Wa yâng hwā mo, “A sé mwin de Dagwi a ye, yin kwon re yi e mwa yére nèy cɔ́gɔt de ya sé e ji bwi wɛt arɛt?”
2Hwā mo a toyo a wɛ, a ye, “Wot e tɔk re yi e nèy karɛ retîn cɔgɔt e ji bwi mo. 3Sɛ̌ e ra nèy retîn cɔgɔ̂t tê bwi de Dagwi a yang ot, wot kwon re wɛt kɛ wot ra nɛ wɛt. Ka wot a ra ano, ko wot e ku.”
4Gwɔ̄m wa toyo a yɛ, wa ye, “Yin a rɔda ku wɛt. 5Dagwi a tɔk, e jeng de yin e re nɛ̀, ko bayis min bê wunta hɛn. Yin e tɔk pyɛ́ de ya sé ryat na pyɛ́ de ya sé vyes tyɛng sede yɛ.”
6Hwā mo a di nèy cɔgɔt o na sé nerat yaga re, na to sé pyɛ̂ bɛrɛng, ko na sé pyɛ̂ cwey o arɔng, yaga ne nɔngɔs netsitsɛng. A vo yi e ji nèy o, a re, ko a nɔ̂ng rwas mɛ, yɛ arɔng a re. 7Ko bayis mɛn ba wunta hɛn, ko yɛn a tɔk, yɛn a sé warap. Yɛn a vos berang regwi, ko ba yong mɛ̀ pyɛ̂ banga.
8Jeng de gwi gwa ga ye cam, yɛn a wok bol Dagwi Darwey de a sé kyě kyè e ji bwi, ko mwat o na hwā mɛ ba lɛrɛ hɛn e ji batîn cɔ́gɔt. 9Dagwi Darwey a yila mwat o, a ye, “Hwà sé e gwa arɛt?”
10Mwat o a hanat, a ye, “Ma wok vey mō e bwi, ko ma tɛ̀ bengyip, yaga ma sé warap. Yaga ano ma lɛrɛ mɛ.”
11Dagwi a yang ɛ, “Wa a yang o, hwà sé warap arɛt? Hwà ga re yi e ji nèy cɔgɔt de ma ga yang o, a sé kyiri, na hwo re arɛt?”
12Mwat o a ye, “E hwā de hwà nɔng me, na a sè na me, e yɛ de a nɔng me nèy cɔgɔt o, ko ma re.”
13Ko Dagwi Darwey a yâng hwā mo, “E sɛ́ a yemo de hwà ra arɛt?”
Hwā mo a ye, “A sé e gwɔ̄m de wa kwɛlɛng me, ko ma re.”
14Ko Dagwi Darwey a yâng gwɔ̄m,
“Yaga hwà ra pyɛ yemo, ma ga kyini hwo,
hwo nju mō zɔng yi e ji ngyāma na yas.
Vɔk e yɛnɛ̂ neken mō hwô hwɔlɔ jim e vwel,
hwô re nefongol.
15Ko mê tɛ̀ repugu e tē mō na hwā mó,
e tê yere mō na yere mɛ arɔng.
Yɛ̀ e bunut to mō,
ko hwô rɔt tô bwol mɛ.”
16Dagwi a doyo vɔk na hwā mó, a yang ɛ,
“Mê gwɛ̌ a hwo yɔ̂m jeng vɔ̂k jim, na jeng tɔ arɔng.
Ko mwa ano, hwà rɔda simo rwas mō sizɔng,
ko yɛ e vɔk reto e ra hwo.”
17-18Dagwi a to doyo vɔk na rwas o, a yang ɛ,
“Hwà wet betong na hâ hwā mō,
ko hwà re yi e ji nèy cɔgɔt de ma kana nɔng o redu, hwo re wɛt.
Yaga pyɛ de hwà ra, ma ga kyini vwel.
Hê tabas serɔgɔ na shik,
ko hwô fes o e fwom mwa neyɛnɛ̂ neshey mō,
na hwo sɛ̀ pyɛ̂ re de yê vey a hwo.
19Hwô tɛrɛ long e de how cap,
na hwo sɛ̀ mɛ pyɛ́ de hwô re.
Hwô ra ano vɔk e jeng de hwô to toyo hwo fongol,
yaga yi e fongol de ba yong o.
Hwà sé fongol,
ko e fongol de hwô toyo hwo ɛ̀.”
20Mwat o a vo a hwā mɛ rezâ, Hawa,#3:20 Hawa: E lêm BeIbrani rezâ Hawa ra sé bagat na retîn ha “neken”. yaga yɛ wɛ a rɔda tɛ́ ɛ dê bemasi mwa.
21Ko Dagwi Darwey a yong a mwat o tanga hwā mɛ berugu na bahwo, a tɛ̀ a yɛn ɛ. 22E bama mo, a ye, “A remo mwat o a ga tɛ́ ɛ sede gwining e ji mot, a vɔk tɔ̂k pyɛ́ ryat na pyɛ́ vyes. Wot kwon tik ɛ, na a re yi e ji nèy cɔgɔt de ne nɔngɔs neken, na a to nàra kwen gbak-gbak wɛt.” 23Yaga ano Dagwi Darwey a ro ɛ yi e bwi mo, na a wɔ̀ how vwel de ba yi ɛ na yɛ. 24A gas ɛ na gwɛ, ko a tɛ̀ pyɛ́ cen yi e lagwi, na ye gyeng bwi mo na wal de wo lolo, ko wo nàra doysa. A tɛ̀ pyɛ́ mo e rwa rak bwi mo.
Выбрано:
Susumo 3: bomBI
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
