Tutui Makasososak 11
11
Manara Babel
1Lele uluk, basa hatahorir rai dae-bafok kokolak pake kada dedeꞌak esak ka. 2Neu sira ketuk mulai lali reni boboan dulu reu, ara losa dae matetuk esa nai Sinear, boe ma ara leo reu naa.#11:2:‘Muni boboan dulu muu’ nai dedeꞌa Ibrani sosoa-ndandaan oo bisa boe nae, ‘numa boboan dulu mai’. Sinear naden laen, ndia ‘Babel’.
3-4Basa sara rala harak rae, “Wee! Toranoo nggara ein! Mai fo ita tambaririik kota moꞌok esa. Ita muste tao batu mbilas, boe ma ita hotun losa natea. Ma ita totodo batu mbilas raa pake ter. Basa boe ma ita tambaririik manara mandema esa, suꞌun losa lalai, mita fo ita hambu nade kokoak. Mita fo ita dadi teu hatahori nusa moꞌok esa, hae tabingga-baꞌek.”
5Boe ma MANETUALAIN konda mai titino soba kota naa no manaran, fo ara rambaririik kana. 6Basa boe ma Ana kokolak nae, “Basa hatahori dae-bafok kara iar hatahori nusak esa, ma pake dedeꞌak esa. Hata fo ara taok hatematak ia, ia bei fo kada ue makasososak. Mbila-beinesak, mete ma basa sara rakaesa dadi reu esa, sama leo hatematak ia, neu ko ara bisa tao hata a mesan. 7Malole lenak Ita konda fo tao dedeꞌan nara esak matan, mita fo sira esa ta nala esa dedeꞌan bali.”
8Basa boe ma MANETUALAIN konda fo tao babalik sira dedeꞌan. No dalak naa, Ana tao hatahori dae-bafok kara raa sasarak reni basa mamanak kara rai dae-bafok ia reu. De ara ta rambaririik rakandoo kota naa ena bali. 9Huu naa de ara foi kota naa, nade Babel, (fo sangga sama leo dedeꞌa deꞌek esa sosoa-ndandaan ‘panggananaa’), nahuu MANETUALAIN tao babalik sira dedeꞌan ma tao sasarak kasa reni sudi bee reu, ndule dae-bafok ia.
Numa Sem mai losa Abram
10Ia Sem tititi-nonosin nara. Neu faa moꞌok basa teuk dua ena, nandaa no Sem teun nara 100, boe ma ana hambu ana touk esa, nade Arpaksad. 11Basa boe ma Sem bei nasoda teuk 500 bali, ma ana hambu tamba seluk ana touk ma inak.
12Neu Arpaksad teun nara 35, boe ma ana hambu ana touk esa, nade Sela. 13Basa boe ma Arpaksad bei nasoda teuk 403 bali, ma ana hambu tamba seluk ana touk ma inak.
14Neu Sela teun nara 30, boe ma ana hambu ana touk esa, nade Eber. 15Basa boe ma Sela bei nasoda teuk 403 bali, ma ana hambu tamba seluk ana touk ma inak.
16Neu Eber teun nara 34, boe ma ana hambu ana touk esa, nade Pelek. 17Basa boe ma Eber bei nasoda teuk 430 bali, ma ana hambu tamba seluk ana touk ma inak.
18Neu Pelek teun nara 30, boe ma ana hambu ana touk esa, nade Rehu. 19Basa boe ma Pelek bei nasoda teuk 209 bali, ma ana hambu tamba seluk ana touk ma inak.
20Neu Rehu teun nara 32, boe ma ana hambu ana touk esa, nade Seruk. 21Basa boe ma Rehu bei nasoda teuk 207 bali, ma ana hambu tamba seluk ana touk ma inak.
22Neu Seruk teun nara 30, boe ma ana hambu ana touk esa, nade Nahor. 23Basa boe ma Seruk bei nasoda teuk 200 bali, ma ana hambu tamba seluk ana touk ma inak.
24Neu Nahor teun nara 29, boe ma ana hambu ana touk esa, nade Tera. 25Basa boe ma Nahor bei nasoda teuk 119 bali, ma ana hambu tamba seluk ana touk ma inak.
26Neu Tera teun nara 70 lenak, boe ma ana hambu ana touk telu, ndia Abram, Nahor ma Haran.
Tera tititi-nonosin nara
27Tera tititi-nonosin nara, talo ia: Tera anan nara, ndia Abram, Nahor ma Haran. Haran hambu ana touk esa, nade Lot. 28Haran mate numa ndia nggoro-tadu huun, nade Ur, nai hatahori Kasdim daen. Neu ana mate naa, aman Tera bei masodak. 29Abram sao nala Sarai. Nahor sao nala Haran ana inan, nade Milka. Haran oo hambu ana touk esa, nade Yiska. 30Tehuu Sarai kala tedis, ana ta bisa bonggi.
31Laꞌe esa, Tera nuni nala anan Abram, feto-feun Sarai, ma umbun Lot, de ara kalua laꞌo ela nggorok Ur. Lelek naa, ara sangga reni dae Kanaꞌan reu. Tehuu losa nggorok Haran, boe ma ara leo reu kada naa leo. 32Numa naa, Tera maten, neu teun nara 205.
Выбрано:
Tutui Makasososak 11: txqNTPO
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2016, Wycliffe Bible Translators, Inc. in cooperation with (UBB) Unit Bahasa dan Budaya
