Luká 13
13
Tawbah kanét
1Hamá wahdá, lahténá gón Issáyá á Jalili mardománi bárawá hál o habara kort ke Pilátusá koshtagatant o áyáni hón, gón hamáyáni korbánigén dalwatáni#13:1 Dalwat, bezán lógay dapi jánwar chó ke pas o gók. hóná hór o hawár kortagat. 2Issáyá áyáni passawá gwasht: “Shomá gomána kanét, á Jalili ke pa choshén bazzagi o syahróchié dochár kaptant, cha á degarán gonahkárter atant? 3Man shomárá gwashán na, chosh naent, bale agan tawbah makanét, shomá ham hamáyáni dhawlá gár o gomsára bét. 4Gomána kanét hamá hazhdahén mardom ke Siluháay borj áyáni sará kapt o mortant, cha Urshalimay á dega sajjahén mardomán radkárter atant? 5Man shomárá gwashán na, shomá ham, agan tawbah makanét, hamáyáni dhawlá gár o gomsára bét.”
6Padá Issáyá pa áyán mesálé jat: “Mardéá wati anguri bágá enjiray drachké hastat. Yakk róché, á enjiray baráni cháragá bágá shot, bale baré nadisti. 7Gorhá gón wati bágpáná gwashti: ‘Say sál ent ke man é enjiray baráni cháragá káyán bale heccha nagendán. Begoddhi tán zeminá bébar o bésamar makant.’ 8Bale bágpáná passaw dát: ‘Wájah! Dega yakk sálé belli, man eshiay boná kóchán o kolóndhán o samáta dayán, 9démi sálá, agan bari dát sharr, agan nadáti gorhá begoddhi.’”
Kompén janénéay drahbakshi
10 Shabbatay róché, Issá yakk kanisahéá mardomán sabakk o tálim dayagá at. 11Yakk janéné hamódá at ke hazhdah sálá, yakk arwáhéá nádráh kortagat. Kompi jatagat o hecch dhawlá wati sréni tachk korta nakort. 12Wahdé Issáay chamm pa áiá kaptant, tawári kort o gwashti: “Oo janén! Taw cha wati nájórhiá rakketay.” 13Issáyá wati dast áiay sará ér kort o hamá damáná á kompén janénay srén tachk but o Hodáay sepat o sanáyá lagget.
14Bale kanisahay master pa é sawabá ke Issáyá Shabbatay róchá drahbakshi kortagat nárazá but o gwashti: “Shomárá pa wati kárán shash róch hast o hamá róchán pa wati drahbakshiá byáét, na ke Shabbatay róchá.” 15Hodáwandén Issáyá áiay passawá darráént: “Oo shatalkárén ryákárán! Cha shomá hechkas Shabbatay róchá wati har o gókán cha wati banjáhána nabójit o dhanná pa áp dayagá nabárt? 16Gorhá, é janén, ke Ebráhémay nasl o padréch ent o hazhdah sál ent ke Shaytáná wati bandig kortag, chéá Shabbatay róchá cha wati azábán ázát o ásudag kanag mabit?”
17Wahdé Issáyá chosh gwasht, áiay sajjahén badwáh pashal o sharmendag butant. Bale é dega sajjahén mardom cha Issáay é mójezah o ajabén kárán báz washdel o shádán butant.
Hodáay bádsháhiay do mesál
(Mattá 13:31–33; Markás 4:30–32)
18Randá, Issáyá gwasht: “Hodáay bádsháhi che paymá ent? Áiá gón chónén chizzé hamdarwar bekanán? 19Hodáay bádsháhi, thélkáhay#13:19 Thélkáh, bezán hardal. tohmay paymá ent ke mardéá zort o wati bágá kesht. Á dánag rost o drachkéay dhawlá but o báli morgán áiay ták o tháláni chérá kodóh o kodám bast.”
20Padá gwashti: “Man pa Hodáay bádsháhiá chónén mesálé pésh bekanán? 21Hodáay bádsháhi hamá homiray paymá ent ke janénéá zort o gón bázén ártéá#13:21 Asligén Yunáni nebeshtánka gwashit: “say sátá”, bezán cha bist litará gésh. hawár kort o kamm kammá sajjahén árt gwát gept o homir but.”
Tankén darwázag
(Mattá 7:13–14, 21–23)
22Issá shahr pa shahr o métag pa métag mardomán tálim dayán dém pa Urshalimá rawagá at, 23yakkéá jost kort: “Oo wájah! Bárén, cha mardomán, tahná kammokéné rakkit?” 24Áiá passaw dát: “Johd kanét cha tankén darwázagá begwazét, chéá ke man shomárá gwashán, bázéné cha hamé darwázagá gwazagay johdá kant, bale gwasta nakant. 25Wahdé kayt ke lógay hodábond páda kayt o lógay darwázagá banda kant, gorhá shomá lógay dapá óshtét o harchont darwázagá thokkét o tawára kanét: ‘Oo wájah! Darwázagá pa má pach kan!’, bale á passawa dant ke ‘man shomárá pajjáha nayárán o nazánán cha kojá ét.’ 26Shomá gwashét: ‘Má gón taw hamwán#13:26 Hamwán, bezán yakjáh warák warag. o hamdiwán butagén o taw may damk o kuchahán márá tálim dátag.’ 27Bale á passawa dant: ‘Man shomárá pajjáha nayárán o nazánán cha kojá ét? Oo radkárán! Cha mani démá dur bét.’ 28Á wahdá, gréwét o dantán pa dantána droshét, chéá ke Ebráhém, Esák, Ákub o sajjahén paygambarán, mán Hodáay bádsháhiá gendét, bale wat cha Hodáay bádsháhiá dhanná dawr dayaga bét.
29É dega mardom cha ródarátk#13:29 Ródarátk, bezán hamá némag ke róch dara kayt, mashrek. o rónend o cha shomál o jonubay chárén némagána káyant o Hodáay bádsháhiay parzónagay sará nendant. 30Haw, anchosh ent ke áheri, awalia bant o awali, áheria bant.”
Pa Urshalimá Issáay gam o andóh
(Mattá 23:37–39)
31Hamá wahdá, lahtén Parisi, Issáay gwará átk o gwashtesh: “Nun taw é jágahá yalah kan o dega jáhéá beraw, chéá ke Hirudis tai koshagay randá ent.” 32Áyáni passawá gwashti: “Berawét á róbáhá begwashét ‘Maróchig o bándá, jennána kasshán o mardomán dráha kanán o sayomi róchá, wati kárá sarjam pa sara rasénán.’ 33Bale maróchi, bándát o póshi, allamá wati é sát o sapará démá barán, chéá ke hecch paygambaray kósh cha Urshalimá dhanná nabit.
34Urshalim, oo Urshalim! Taw paygambarána koshay o Hodáay ráh dátagénán sengsára kanay. Báz randá man lóthetag tai chokkán wati kerrá mocch o yakjáh bekanán, anchosh ke nekénkén morgé chureg o chippokán wati bál o bánzoláni chérá moccha kant, bale shomá nalóthet. 35Nun shomay lógay ákebat, shomay wati dastá yalah dayaga bit. Shomárá gwashán dega baré maná nagendét tán á wahdá ke cha wati zobáná begwashét: ‘Mobárak bát hamá ke pa Hodáwanday námá kayt!’”#13:35 Zabur 118:26.
Выбрано:
Luká 13: HPKB
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2015-2022, Wycliffe Bible Translators, Inc. and the Balochi Bible Translation Team. All rights reserved.
