Luká 11
11
Dwáay bárawá
(Mattá 6:9–13; 7:7–11)
1Yakk baré Issá jágahé dwá kanagá at, wahdé dwái hallént, cha áiay moridán yakkéá gwasht: “Oo Hodáwand! Anchosh ke Yahyáyá wati morid dwá kanag sój dátagant hamé paymá taw ham márá dwá kanag sój beday.” 2Issáyá gwasht: “Harwahd dwá kanét, é dhawlá begwashét:
‘Oo Pet!#11:2 Lahtén daznebeshtá átkag: Oo ásmáni Pet. Tai nám sharapdár bát. Tai bádsháhi byáyát.#11:2 Lahtén daznebeshtá átkag: tai wáhag o erádah zeminay sará ham hamá dhawlá sarjam bát ke ásmáná sarjama bit.
3May har róchigén rezk o rózigá har róch márá beday.
4May gonáh o radián bebaksh, anchosh ke má wati sajjahén daynkárána bakshén. Márá ázmáesh o chakkásá dawr maday.’”#11:4 Lahtén daznebeshtá gésh kanag butag: o márá cha sherr o Shaytáná berakkén.
5Gorhá Issáyá gwasht: “Cha shomá yakké, agan shapnémá wati sangatay lógá berawt o begwashit: ‘Oo brát! Maná say nán pa badal beday, 6ke dósté cha sapará átkag o mani lógá pa waragá hecch nést,’ 7buta kant á cha wati lógá jwáb bedant o begwashit: ‘Oo dóst! Maná delsyáh makan, lógay dap band ent o man gón chokkán waptagán. Annun pád átka nakanán tará chizzé bedayán.’ 8Shomárá gwashán, é mard agan pa dóstiá pád mayayt o áiá chizzé madant, bale cha áiay bázén lézgi o lés o pellésá#11:8 Yá: pa laj o mayáray háterá. Lés o pellés, bezán bázén takrár. páda kayt o harché á lóthit danti.
9Nun shomárá gwashán: Belóthét, shomárá dayaga bit. Shóház bekanét, dara géjét. Darwázagá bethokkét, pacha bit. 10Chéá ke harkas belóthit, áiá rasit. Harkas shóház bekant, dara géjit. Harkas darwázagá bethokkit, pa áiá pacha bit.
11Shomay nyámá choshén peté hast ke agan áiay chokk máhig belóthit máré bedanti? 12Yá agan hayké belóthit, zummé bedanti? 13Nun agan shomá ke radkár ét, angat ham wati chokkán sharrén chizzáni dayagá zánét, gorhá may ásmáni Pet chinkadar shartera zánt ke wati lóthókén chokkán Pákén Ruhá bedant.”
Issá o Belzabul
(Mattá 12:22–30, 43–45; Markás 3:22–27)
14Yakk baré, Issá cha yakkéá jenné dar kanagá at ke áiá é mard gong kortagat. Wahdé jenn dar átk, gongén mard habar kanagá lagget o sajjahén mardom hayrán butant. 15Bale lahténá gwasht: “Issá cha jennáni sardár Belzabulay sarókiá, jennána kasshit.” 16Dega lahténá pa Issáay chakkásagá cha áiá ásmáni neshánié lóthet. 17Bale Issáyá áyáni delay hál o habar zántant o gwashti: “Agan yakk molkéá nátepáki bekapit, á molk gár o zawála bit, agan yakk lógéay mardom gón wat jang o jérhah bekanant, á lóg haráb o barbáda bit. 18Agan Shaytán gón wat jang bekant, gorhá áiay bádsháhi chón barjáha mánit? Shomá gwashét ke man cha jennáni sardár, Belzabulay komakká jennán dara kanán. 19Nun agan man gón Belzabulay sarókiá jennán dara kanán, gorhá shomay jenday chokk o morid gón kai zór o wáká jennán dara kanant? É paymá, shomay morid wat shomárá mayáriga kanant. 20Bale agan man gón Hodáay zór o wáká jennán dara kanán, bezánét ke Hodáay bádsháhi shomay nyámá rasetag.
21Agan yakk zóráwarén mardomé selahband bebit o wati lógay negahpániá bekant, gorhá áiay mál o melkat barjáha mánant. 22Bale agan zórmandterén mardomé áiay lógay sará hamlah o orosh#11:22 Orosh, bezán hamlah. bebárt o cha áiá sardast bebit, hamá seláhán ke á mard cha áyán deljam at, cha áiá pacha gipt o áiay mál o melkatá bahr o bánga kant. 23Kasé ke mani hamráh o dózwáh naent á mani badwáh ent, kasé ke mocch o yakjáh kanagá gón man hór naent, á tak o park o sheng o shánga kant.
24Wahdé jenné cha kaséá dara kayt, gorhá gyábánána rawt tán pa wati árámi o ásudagiá jáhé shóház bekant, bale choshén jágahé narasiti. Gorhá gwashit: ‘Cha ódá ke dar átkagán, padá hamódá rawán.’ 25Wahdé pera tarrit o gendit ke á jágah roptag o sáp o sallah ent, 26gorhá rawt o cha wat dega hapt selterén jenna kárit. Á sajjahén, hórigá ódá rawant o ord o bonaga kanant. É dhawlá, á mardomay ásar o ákebat cha pésarigéná angat badtera bit.”
27Hamé wahdá ke Issá é habarán kanagá at cha mardománi nyámá yakk janénéá gwánk jat: “Bahtáwar hamá mát ent ke cha áiay lápá taw pédá butagay o tará shiri méchéntag.” 28Issáyá áiay passawá darráént: “Bahtáwar hamá ant ke Hodáay habarán gósha dárant o áyáni sará kára kanant.”
Neshániay lóthag
(Mattá 12:39–42; Markás 8:12)
29Wahdé mardománi mocchi géshter bayán at, Issáyá gwasht: “É zamánagay mardom sherr o zenahkárén mardom ant. Ajabbatén neshánia lóthant, bale áyán Yunos nabiay neshániá abéd, dega hecch neshánié dayaga nabit. 30Anchosh ke pa Naynawáay mardomán Yunos yakk neshánié at, hamé paymá Ensánay Chokk ham wat pa é zamánagay mardomán yakk neshánié bit. 31Jost o porsay róchá, Sabáay malakah#11:31 Asligén Yunáni nebeshtánka gwashit: “jonubay malakah”. gón é zamánagay mardomán hórigá páda kayt o áyán mayáriga kant, chéá ke Sabáay malakah cha donyáay á dastá átk tán Solaymánay hekmatá beshkont. Bale nun cha Solaymáná masteréné edá ent. 32Jost o porsay róchá, Naynawáay mardom gón é zamánagay mardomán hórigá páda káyant o áyán mayáriga kanant, chéá ke áyán Yunosay dháh o hozzhárbáshay sará tawbah kort. Bale nun cha Yunosá masteréné edá ent.
Jesm o jánay rozhnái
(Mattá 5:15; 6:22–23)
33Hechkas cherágá pa chér dayagá róka nakant o na áiá tagáray chérá éra kant. Áiá cherágdánay sará éra kant, tán harkas ke lógá kayt áiay rozhnáiá begendit. 34Tai chamm, jesm o jánay cherág ent. Wahdé tai chamm wassh o dráh ent, tai sajjahén jesm o ján rozhnága bit, bale agan tai chamm nádráh bebit, gorhá tai jesm o ján ham tahára bit. 35Hozzhár bay, é nur o rozhn ke tará hastent, tahár mabit. 36Agan tai sajjahén jesm o ján rozhnág bebit o áiay hecch bahré tahár mabit, gorhá sarjamiá drapshnáka bit, anchosh ke cherágay shahm tará rozhnága kant.”
Parisi o Sharyatay zánógeráni mayárig kanag
(Mattá 23:1–36; Markás 12:38–40; Luká 20:45–47)
37Wahdé Issáyá habar halás kort, yakk Parisiéá á wati lógá mehmán kort, Issá áiay lógá shot o pa warákay waragá parzónagay sará nesht. 38Bale wahdé Parisiá dist ke Issáyá cha waragá pésar dast nashoshtant hayrán mant. 39Gorhá Hodáwandén Issáyá dém gón áiá kort o gwashti: “Shomá Parisi, pyálah o darpáni dhanni némagá sáp o sallaha kanét, bale shomay darun cha lálech o tamáh o radén kárán porr ent. 40Oo násarpadán! Áiá ke shomay dhanni némag, bezán jesm o ján addh kortag, shomay del o darun ham hamáiá najórhéntag? 41Gorhá cha darunay chizzán hayrát bedayét tán sajjahén chizz pa shomá pák o sallah bebant.
42Oo Parisián! Bazhn o apsóz pa shomá ke purchénk o sadáp o é dega káhokáni sará dahyakka dayét bale cha dádrasi#11:42 Dádrasi, bezán hakkén paysalah, hamá shawr ke cha dádgáhána kayt, dáwari. o ensáp o Hodáay mehrá béhayál o bétránag ét. Drégatá,#11:42 Drégatá, bezán drégatén, dréchá. Pársi o Orduá “kásh”. shomá é kár bekorténant o á ham yalah madáténant. 43Oo Parisián! Bazhn o apsóz pa shomá ke kanisaháni awali red o srapay nendag o bázárán mardománi wasshátk o drahbátán dósta dárét. 44Bazhn ent, shomá hamá kabráni paymá ét ke áyáni sará seng o shakk#11:44 Shakk, bezán kabray seng ke áiay sará mordagay námá nebisant. nést o gendaga nabant o mardom pa názánti áyána lapáshant o gwazant.”
45É habaráni sará Sharyatay káziéá gwasht: “Oo ostád! Taw gón wati é habarán, márá ham béezzat kanagá ay.” 46Issáyá gwasht: “Oo Sharyatay kázián! Pa shomá ham bazhn o apsóz ent. Shomá mardománi chakká gránén bára laddhét ke cha áyáni zórá gésh ent, bale wat pa komakk kanagá, lankok o mórdánagé#11:46 Mórdánag, bezán lankok, band o bóg. ham nasorénét.
47Bazhn o apsóz pa shomá! Hamá nabiáni kabráni sará gombod o addiraha bandét ke shomay pet o pirokán koshtagant. 48É paymá, shomá wat áyáni é káray sháhed o mannóger ét. Shomay pet o pirokán paygambar koshtagant o shomá áyáni kabráni sará addiraha bandét. 49Paméshká, Hodáyá cha wati hekmatá gwashtag: Man paygambar o kásed pa áyán ráha dayán, bale á lahténá koshant o lahténá ázára dayant. 50Paméshká cha donyáay bongéjá hamá sajjahén paygambar ke mardomán koshtagant, áyáni hón é zamánagay mardománi gardená ent, 51bezán Hábilay hóná beger tán Zakaryáay hóná, ke korbánjáh o mazanén parasteshgáhay nyámá réchag but. Haw! Shomárá gwashán ke é zamánagay mardom, á sajjahén hónáni daynkár ant.
52Oo Sharyatay kázián! Bazhn ent ke shomá zántkáriay hazánagay kelit zort o bort, na wat tahá átkagét o na á ke ráhá ant, tahá rawagá eshtagant.”
53-54Wahdé Issá cha ódá dar átk, Parisi o Sharyatay zánóger gón zahrnáki áiay démá óshtátant o bázén jost kanagá laggetant, tán Issáyá cha áiay jenday habarán mán begisshénant o dámá dawr bedayant.
Выбрано:
Luká 11: HPKB
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2015-2022, Wycliffe Bible Translators, Inc. and the Balochi Bible Translation Team. All rights reserved.
