उत्पत्ति 21
21
इसहाक बूगु
1परमप्रभुं सारायात थःम्हं बचं बियादी थें दया यानादिल, अले थःम्हं धया थें यानादिल। 2अब्राहाम बुरा जुइ धुंकूसां परमेश्वरं धयादीगु हे इलय् सारां काय् बुइकल। 3अब्राहामं वयागु नां इसहाक तल। 4इसहाक च्यान्हु दुबलय् अब्राहामं परमेश्वरं धयादी थें वयात म्हय् चिं तय्कल। 5इसहाक बूबलय् अब्राहाम सच्छिदँ दये धुंकूम्ह खः।
6अले सारां धाल, “परमेश्वरं जितः लसताः बियादिल। थ्व खँ न्यनीपिं सकलें जि नाप लय्ताइ। 7आः तक अब्राहामयात सुनां जिं मचायात दुरु त्वंकी धकाः धायेफु। अय्नं जिं व बुरा जुइ धुंकाः वयापाखें काय् बुइका।”
हागार व इश्माएलयात पितिनाछ्वःगु
8मचा तःधिकः जुयावल। मचायात दुरुं छीखुन्हु अब्राहामं तःधंगु भ्वय् न्याय्कल। 9छन्हु सारां हागारया काय् इश्माएलं थःकाय् इसहाकयात हाय्काच्वंगु खनाः 10अब्राहामयात धाल, “व मिश्री दासी व वया काय्यात थनं पितिनाछ्व। व दासीया काय्नं जिकाय् इसहाकं थें छंगु सम्पत्ति कायेखनि मखु।”
11थ्व खं अब्राहामया नुगः मछिन। छाय्धाःसा इश्माएल नं वया थः हे काय् खः। 12तर परमेश्वरं वयात धयादिल, “छं छिमि दासी कलाः व काय्या खँय् नुगः मछिंके मते। सारां धाःथें या। इसहाकया पाखें हे छिमि सन्तान न्ह्याइ। 13अथेसां व दासी मिसाया मचा नं छं हे काय् जूगुलिं वयापाखें नं जिं छगू तःधंगु जाति दय्काबी।”
14कन्हय् खुन्हु सुथ न्हापां अब्राहामं लः दुगु छेंगूया छगः थल व मरि हयाः हागारया ब्वहलय् तयाबिल। अले काय्म्हनापं वयात अनं छ्वयाबिल। इपिं बेर्शेबाया मरुभूमिइ उखेंथुखें जुयाः जुल।
15थलय् च्वंगु लः फुसेंलि हागारं काय्म्हय्सित छथाय् झालय् त्वःताः 16थः तापाक्क वनाः फेतुत। थः काय्यात सीगु स्वये मफयाः वं थथे याःगु खः। अले व अन च्वनाः ह्वाँय्ह्वाँय् ख्वल।
17परमेश्वरं काय्म्ह ख्वःगु सः ताल। अले परमेश्वरया दूतं स्वर्गं हागारयात धयाहल, “छन्त छु दुःख जुल, हागार? ग्याये मते। परमेश्वरं छिमि काय् ख्वःगु ताये धुंकल। 18दँ, वनाः छिमि काय्यात ल्हाः ज्वनाः थँ, अले वयात बल्लाक ज्वनाति। छाय्धाःसा जिं वयापाखें छगू तःधंगु जाति दय्के।”
19अले परमेश्वरं वयात छगू बुंगाःचा क्यनादिल। वं वनाः छेंगूया म्हिचाय् लः तयाः थःकाय्यात त्वंकल।
20परमेश्वर वया काय्म्हलिसे हे च्वनादिल। व मरुभूमिइ हे च्वनाः तःधि जुल। अले धनुष वाण कय्केगुलिइ जाःम्ह जुल। 21व पारान धाःगु मरुभूमिइ च्वनीगु खः। वया मामं वयात छम्ह मिश्रयाम्ह मिसा ब्याहा यानाबिल।
अब्राहाम व अबीमेलेकया दथुइ जूगु सन्धि
22थुबलय् हे अबीमेलेक व वया सेनापति पीकोलं अब्राहामयात धाल, “छिं यानादीगु न्ह्यागु ज्याय् नं छितः परमेश्वरं आशिष बियादिल। 23छिं आः जितः परमेश्वरया न्ह्यःने जितः व जिमि काय्म्ह्याय्पिं व छय्छुइपिन्त गुबलें हे धोखा बी मखु धकाः पाफयादिसँ। जिं छिगु लागि गथे व्यवहार यानागु दु, छिं नं अथे हे जि व थः च्वनाच्वनागु देशलिसे व्यवहार यानादिसँ।”
24अब्राहामं धाल, “जिं पाफये।” 25अले अब्राहामं अबीमेलेकया दासतय्सं लाकाकाःगु तुंयागु खँ न्ह्यथन।
26अले अबीमेलेकं धाल, “थ्व खँ जिं थौं हे तिनि न्यना। छिं थ्व खँ न्हापा हे छाय् धयामदिया? जिं मस्यू थथे सुनां यात।”
27अले अब्राहामं अबीमेलेकयात सा द्वहं व फै हयाबिल। थुकथं इपिं निम्हसिया दथुइ छगू सन्धि जुल। 28अब्राहामं थःगु फैतय्गु पुचलं न्हय्म्ह भ्याःचात चीकल। 29अले अबीमेलेकं धाल, “छिं छुकिया निंतिं थुपिं फैचात अलग्ग तयादियागु?”
30अब्राहामं लिसः बियाः धाल, “थ्व न्हय्म्ह भ्याःचात कयादिसँ। थुकिं थ्व तुं जिं म्हुयागु खः धकाः साक्षी बी।” 31थुकथं व थाय्यागु नां बेर्शेबा जुल। छाय्धाःसा इमिसं अन सन्धि याःगु खः।
32बेर्शेबाय् सन्धि याये धुंकाः अबीमेलेक व वया सेनापति पीकोल पलिश्तीतय्गु देशय् लिहां वन। 33अब्राहामं बेर्शेबाय् तितिसिमा छमा पित। अले परमप्रभु सदां दयाच्वनीम्ह परमेश्वरया नां कयाच्वन। 34अब्राहाम तःन्हु तक पलिश्तीतय्गु देशय् च्वन।
Выбрано:
उत्पत्ति 21: NEW
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2024 Nepal Bible Society, Newa Christian
Literature Center and Wycliffe Bible Translators, Inc.
