Mark 4
4
Doa tapuna ma tapuna ai awanaina
(Mat 13:1-9; Luk 8:4-8)
1 Iesu, giu i rau-karena melei Galili topana au adana. Ma patara i riei da ita rau-taniḡanei. Ma patara i rata, au baina tauna au waga i geru ma i kiala ma waga i dudui da ivi rau-opu au topei ma patara au gera i mae.
2Ma kaua maḡamaḡaui awanainei i giu ma ivi araramana. 3Tauna awanainei i babani ma i riwa i pa, “Ona rau-taniḡana! Taupaewa, ana wapu ivo kaukauei ma pei i ravi awawari. 4Pei ḡelaui au eta i peu. Ma kiu i ḡeta ma i ani. 5Ma pei ḡelaui doa au ḡaiḡaimana i peu mepa doa au avavana. Ma lamna au baina maratagogi i gogo. 6Wate maranai madeḡa i rarani, maratagogi i poi, anona warami eḡa ita ḡaira guratana doa au orana. 7Pei ḡelaui, ai donadonai au poui i peu. Ma ai donadonai i gogo ma pei i gogogo i lavani ma eḡa ita ua. 8Ma pei ḡelaui doa au aiaina i peu ma i gogo kaua ma i ua, ḡelaui 30, ḡelaui 60 ma ḡelaui 100.”
9Ma Iesu i riwa i pa, “Mepa da taniḡami e mamae, riwa ona nonori!”
Aiwai au baina Iesu awanainei i babani
(Mat 13:10-17; Luk 8:9-10)
10Maranai Iesu ainelana i mamae ma ana tauvotaḡotaḡo 12 ma tau-rautaniḡana ḡelaui i ḡeta ma Iesu ivi baḡai da awanaina anona ita riwei.
11Ma Iesu i paribelei i pa, “God ana vigulau ana kaua mamae govaḡana; taumi ivi eḡemi ma rava au tano maemaei, taui aiwai anatapui awanainei e pari pariverei. 12Lamna ana kauei da wariaḡa peroveta aiwai i girugirumia ina tupua:
‘Taui e inainana ma eḡa ita inainanai.
Taui e rarau-taniḡana ma eḡa ita araramanei;
ma lamna au baina taui eḡa ita nenei God awarina
da ai ḡoa-apoapoe ita nota-tawanei.’” (Isa 6:9-10)
Doa tapuna ma tapuna anoi.
(Mat 13:18-23; Luk 8:11-15)
13Anina ma Iesu i riwei i pa, “Wei awanainei a babani ma anona eḡa ota aramanei bo? Ma awanaina ḡelaui menanare ona aramananei? 14Taupaewa, God riwana, rava anatapui e pari pariverei. 15Rava ḡelaui orai i bagibagi me etanai. Riwa au tepana e raurauei, wate maratagogi Satan e nenei da riwa rava au orai e vaivai-tawanei. 16Ma rava ḡelaui orai me doa viḡaiḡaimana. Taui, riwa i nonori ma maratagogi ana nuaiaii riwa e vaivaia. 17Wate warami eḡa da eḡa ita mamae guratana. Ma maranai nuabola bo rau-iviapoapoe e nenei taui awari, au baina taui ai tumaḡana God awarina e tereterei. Taui maratagogi e peupeu. 18Rava ḡelaui orai me pei, ai donadonai au orai e gogogolana. Taui anina riwa e nononori. 19Wate lawana ai nuabola ma mane ai nuavainana ma kaua ḡelaui ai au nuaiai e ruirui ma God riwana e lavalavani da eḡa ita uaua. 20Ma ḡelaui, taui me pei doa au aiaina i peu. Taui, lamna anina riwa e nononori ma e vaivai-kauei ma e uaua: ḡelaui 30 ma ḡelaui 60 ma ḡelaui 100.”
21Iesu i riwei i pa, “Rava, eḡa aniravilala ita neineiai da iriga au gabaurina ita tereterei bo vatara au gabaurina ta pa? Aniravilala ana au anikiala e tereterei ta pa? 22Kaua mamae govaḡai, anataputapui avi eḡai ma kaua govagovaḡai nanarena anavi eḡai. 23Mepa da taniḡami e mamae, riwa ona nonori!”
24Iesu i riwa i pa, “Aiwai o nononoria ona rau-taniḡanana kauei, ruva o ruveruveia, God nanare awarimi ina ruvai ma ḡelauna ina tavipotoi. 25Lamna au baina, mepa da riwau ona aramanei, tau ḡelauna ma ḡelauna ana veremi. Ma taui eḡa ita aramanei, lamna aiwai aburuna i nononoria, lamna ina vineboai.”
Pei gogogona ana awanaina.
26Iesu e ririwa i pa, “God ana vigulau me rava, witi peina au doa ita paepaewi. 27Ma waguvara e matamatave ma maratom evovo mairi ma pei e gogogo ma e rarata. Wate aiwaiei e gogogo, tauna evivi nuanainei. 28Doa ana nuaina, pei me witi evivi gogoi ma e uaua. Au naona e rarau-pairei ma muriai e roverove ma muriai anona e magumagura au tapina. 29Maranai i magura, rava petona e rarau-karei. Tuaruta marana i ḡetai.”
Pei aburuna ana awanaina
(Mat 13:31-32, 34; Luk 13:18-19)
30Iesu i riwa i pa, “God ana vigulau aiwai ana parivai-patepatei bo aiwai awanainei ana pariveremi? 31Wenanare, wei aina peina, lamna me gaga peina, pei aburuoina au dobu ma au doa i paewi. 32Ma peina i gogo ma i rata da ai muomuoi i ḡetawanei ma raḡaraḡai ḡaeḡae i tere ma au ḡoui, kiu ai noḡi ita voai.”
33Ma Iesu, awanaina maḡamaḡaui, rava au matai i rau-gugulei da taui ai rau-taniḡana ana au ruva nanare. 34Awanainei, rava awari i giugiu, wate ana tauvotaḡotaḡo, taui ava awari kaua anatapui ivivi eḡai.
Iesu, kojikojira i ravidaumorai
(Mat 8:23-27; Luk 8:22-25)
35Nai au bigaina Iesu, ana tauvotaḡotaḡo i riwei i pa, “Tana damana topa au baba ḡelauna.” 36Anina ma Tauvotaḡotaḡo, patara ivo terei. Ma Iesu, metauna wagana au tepana i kiakiala. Kampa i geru ma anatapui i nae, waga ḡelaui maiteni. 37-38Iesu, waga au murina unutana i terei ma i rau-nuavuru. Ma kojikojira ḡaeḡaena i tupua ma rabama, waga au tepana i raurauei ma waira, waga i oaoai. Ma ana tauvotaḡotaḡo, tauna i ravidagudagui ma i riwei i pa, “Taugiu, nuanuam e bolabolai bo eḡa da tana iraḡe?”
39Ma tauna ivo mairi ma ive ivi ḡaei ma i riwei i pa, “Ma genuana!” Ma rabama i riwei i pa, “Ma mae genuatau!” Ma ive i wana-tuini ma daumora ḡaeḡaena i matave. 40Iesu ana tauvotaḡotaḡo i riwei i pa, “Aiwai au baina o rovorovo? Taumi amapo da eḡa ota vitumaḡana!”
41Ma taui i rovo kaua ma i riwa vivira i pa, “Wei tauna aiai da ive ma rabama tauna evovo teletelei?”
Выбрано:
Mark 4: WEDW
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© (Active), Wycliffe Bible Translators, Inc. All rights reserved
