Genesis 3
3
Yuum Narurcillra Inerquutmek
1Waniwa ciissirpak usvituyartenruqapigcami, ungungssini tamaitni Agayutem piliarini nunami, arnaq aptaa, “Agayun-qaa qanellruuq ner'arkaunritnilutek napanek tamalkuitnek naucetaarvigmelngurnek?”
2Arnam-llu ciissirpak kiugaa, “Neryugngaukuk napat atsaitnek naucetaarvigmelngurnek; 3tau͡gaam Agayun qanellruuq, ‘Napam naucetaarviim qukaanelnguum atsainek ner'arkaunritutek, agturngaunaku-llu, tuaten pikuvtek tuquyuartutek.’”
4Ciissirpiim arnaq qanrutaa, “Tuqungaitutek. 5Agayun nallunrilami nerkuvtek tuaken napamek iitek uiciiqngagnek, Agayucetun-llu ayuqlirilutek, nallunrirluku assilria assiilnguq-llu.”
6Arnam tangrramiu napa tangssunaqluni atsai-llu neqkarnirluteng umyuarturinarqellinian-llu, atsamek tegulluni ner'uq; uinga-llu cali cikiani nerluni. 7Nerngamek egmian ellanguk, elpekluku-llu matangqacirtek. Napat-llu cuyaitnek mingqulluki patukiurlutek ellmegnek.
8Taum atakuani niitaak Ataneq Agayun piyuallrani naucetaarvigmi niicamegnegu-llu iirlutek napat akuliitnun. 9Tua-llu Atanrem Agayutem qayagauraa angun apluku, “Nancit?”
10Kiugaa, “Niicamken naucetaarvigmi alinglua iirtua matangqalliniama.”
11Agayutem qanrutaa, “Kia matangqaniaten? Inerquuteklemnek-qaa napam atsainek ner'uten?”
12Angutem kiugaa, “Arnam taitellerpet cikianga nerellruunga.”
13Tua-llu Atanrem Agayutem arnaq aptaa, “Ciin waten pisit?”
Arnam kiugaa, “Ciissirpiim iqluurlua ukvercanga nerua.”
Agayutem Anucimirqecetaarutkani Qanrutkaa
14 Atanrem-llu Agayutem qanrutaa ciissirpak, “Aniqlaamaciquten waten pillruavet; ungungssini tamalkuitni elpet kiivet aniqlaan aturciqan: Wak'nirnek ayagluten aurrluten tau͡gaam pektelarciquten, urr'armek-llu neqengqerciquten unguvarpet taktaciatun. 15Ingluksaguceciiqamtek elpet arnaq-llu, kinguverpetegnun eq'ukutellertek kinguvararkauluni; arnam kinguvran qamiqun qiurqeciqaa, elpet-llu kitngiakun kinguvra kegciqan.”
16Tuamta-llu arnaq qanrutaa, “Ilaciqanka arenqialluguteten qingallerpeni, irniaqavet-llu nangteqellren. Tuaten ping'e'rpet uin aglumakelarciqan, elliin-llu atanirturciqaaten.”
17Angutmun-llu qanertuq, “Maligtaquavgu nulian nerluten-llu atsamek neresqenritlemnek, waten piavet nuna aniqlaamaarkauguq. Cakviurluten nunam naugillrinek nerangnaq'larciquten unguvarpet taktaciatun. 18Naugiciquq caarrlugnek cukilananek-llu, nerlararkauguten-llu yuilqum naunrainek. 19Cakviurluten, kiiryugluten, caliaqeciqan nuna naugivkangnaqluku neqkarpenek uterrnatkarpenun nunamun. Nunamek piliaqumallruavet nunamun uterciiquten.”
20Adam-aam-llu#3.20: Adam-aaq: Una ateq nalqigutengqertuq “yuut tamarmeng.” nuliani aciraa Eve-amek,#3.20: Una ateq kangingqertuq ayuqerrlugluku Hebrew-tun aperyaraq “unguvalria,” “yugnek” pimalria ukuni kalikarni. aanakngatgu yuut tamarmeng. 21Atanrem-llu Agayutem Adam-aankuk Eve-aq-llu aturarkiurak ungungssit amiitnek, at'elluki-llu.
Adam-aankuk Eve-aq-llu Ayagcecimauk Naucetaarvigmek
22Tua-llu Ataneq Agayun qanertuq, “Angun wangkucicetun ayuqliriuq, nallunrirluku assiilnguq assilria-llu. Aarnarquq cali tegulluni nernayukluni unguvanarqelriim napam atsainek, unguvaarkaurrluni akwarpak.” 23Tua-i Atanrem Agayutem anevkaraa naucetaarvigmek Eden-aamek nuna aulukesqelluku. 24Calaralirneranun-llu naucetaarviim elkarciuq cherubim-aanek#3.24: Unguvangqellriit piliaqumalriit: Tangerki aperyarat nalqigutait. ekualriamek-llu nuussirpagmek, calligtaalriamek. Ullagciigatevkarluku unguvanarqelria napa.
Выбрано:
Genesis 3: YPK
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Yupik Bible © 2012 American Bible Society. All rights reserved.
