လု 22
22
ၵျၢမ်ႇပွင်ဢဝ်ၸဝ်ႈယေႇသုတၢႆ
(တူၺ်း၊ မတ်ႈ 26:1-5။ မႃႇ 14:1-2။ ယူဝ်း 11:45-53)
1ၵမ်းၼၼ်ႉ၊ပွႆးၵိၼ်ၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈဢၼ်ဝႃႈ၊ပွႆးပသၶႃႇ၊ၼၼ်ႉၸမ်မႃးယဝ်ႉလႄႈ၊- 2ယဵၸ်ႈပရေႃးႁဵၵ်ႈ#22:2 “ယဵၸ်ႈပရေႃးႁဵၵ်ႈ” - ပဵၼ်ၽူႈတၢင်တူဝ်ႁဵတ်းဝၢတ်ႈသၢၵ်ႈၵၢပ်ႈတၢင်းလူႇတီႈၽြႃးပဵၼ်ၸဝ်ႈလူင်ၶဝ်တင်းသြႃႇမေႃၵျၢမ်းထမ်ႇမႃႉတင်းလၢႆ၊လွမ်ၵျၢမ်ႇႁႃၼႄးလၢႆးဢၼ်တၵ်းဢဝ်ၸဝ်ႈယေႇသု၊တၢႆယူႇဢေႃႈ။ ႁဵတ်းသင်လႄႈလွမ်ၵျၢမ်ႇႁႃၼႄးလၢႆးယူႇဝႃႈၼႆၸမ်ႉ၊ၶဝ်ၵူဝ်ၵူၼ်းတင်းလၢႆဢေႃႈ။
လွင်ႈယုတႃႉဢိသၵႃႇရေႇဢုတ်ႈၶၢႆၸဝ်ႈယေႇသု
(တူၺ်း၊ မတ်ႈ 26:14-16။ မႃႇ 14:10-11)
3မိူဝ်ႈၼၼ်ႉ၊မႃႇၼၢတ်ႈ၊ၶဝ်ႈၵႃႈၼႂ်းတူဝ်ယုတႃႉ၊ဢၼ်မီးၸိုဝ်ႈထႅင်ႈဢၼ်ၼိုင်ႈဝႃႈ၊ဢိသၵႃႇရေႇဢုတ်ႈ၊ၵေႃႉဢၼ်ၶဝ်ႈပႃးၼႂ်းတပႄးၸဝ်ႈသိပ်းသွင်ၵေႃႉၼၼ်ႉဢေႃႈ။- 4မၼ်းဢွၵ်ႇၵႂႃႇၸူးတီႈယဵၸ်ႈပရေႃးႁဵၵ်ႈလူင်ၶဝ်တင်းႁူဝ်ၼႃႈလုၵ်ႈသိုၵ်းဢၼ်ပႂ်ႉၵျွင်းပိၵ်ႈမၢၼ်ႇၸဝ်ႈတင်းလၢႆသေယဝ်ႉ၊ဢုပ်ႇၵုမ်ၶိုင်ႁႃလွင်ႈဢၼ်တၵ်းလႆႈဢဝ်ၸဝ်ႈယေႇသု၊ဢၢပ်ႈၼႂ်းမိုဝ်းၶဝ်ၸိူဝ်ႉၼင်ႇႁိုဝ်ၼၼ်ႉဢေႃႈ။- 5ၶဝ်ၵေႃႈၸူမ်းၼႃႇလႄႈဝႆႉၵတိဝႃႈ၊တႃႇတေပၼ်ငိုၼ်းတီႈမၼ်းဢေႃႈ။- 6မၼ်းၵေႃႈၽွမ်ႉယဝ်ႉလႄႈၸင်ႇၵျၢမ်ႇႁႃဢၶိင်ႇဢၼ်သၢင်ႇထုၵ်ႇပုၼ်ႈတႃႇတေလွမ်ဢဝ်မၼ်းၸဝ်ႈဢၢပ်ႈပၼ်ၶဝ်၊တီႈဢၼ်ဢမ်ႇမီးၵူၼ်းၸုတုမ်ၵၼ်ၼၼ်ႉဢေႃႈ။
ၸဝ်ႈယေႇသုမႄးႁႅၼ်းပွႆးပသၶႃႇ
(တူၺ်း၊ မတ်ႈ 26:17-25။ မႃႇ 14:12-21။ ယူဝ်း 13:21-30)
7ၼႂ်းၸူဝ်ႈပွႆးၵိၼ်ၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈၼၼ်ႉ၊မိူဝ်ႈဢၼ်ထိုင်ဝၼ်းဢၼ်တၵ်းႁႅမ်သူဝ်းဢွၼ်ႇပသၶႃႇ၊ၼၼ်ႉၸိုင်၊- 8ၸဝ်ႈယေႇသု၊ပွႆႇၸႂ်ႉပေႇတရု၊ဢိၵ်ႇတင်းယူဝ်းႁၢၼ်ႇ၊လႄႈဝႃႈ၊ “သူၵႂႃႇမႄးႁႅၼ်းပွႆးပသၶႃႇ၊ပုၼ်ႈႁဝ်းတၵ်းၵိၼ်တႃႉ၊” ဝႃႈၼင်ႇၼႆဢေႃႈ။
9ၶဝ်ၵေႃႈလဝ်ႈထၢမ်လႄႈဝႃႈ၊ “ၸဝ်ႈႁဝ်းၶႂ်ႈႁႂ်ႈႁဝ်းၶႃႈၵႂႃႇမႄးႁႅၼ်းၵႃႈတီႈလႂ်ၶႃႈ၊” ဝႃႈၼင်ႇၼႆဢေႃႈ။
10မၼ်းၸဝ်ႈၶိုၼ်းလၢတ်ႈလႄႈဝႃႈ၊ “ထွမ်ႇတႃႉ။ မိူဝ်ႈဢၼ်သူၶဝ်ႈဝဵင်းၵႂႃႇယူႇၼၼ်ႉ၊ၵူၼ်းဢၼ်တဵင်ႇမေႃႈၼမ်ႉယူႇၵႃႈၼိူဝ်ႁူဝ်မၼ်းၼၼ်ႉၵေႃႉၼိုင်ႈတၵ်းႁူပ်ႉထူပ်းသူဢေႃႈ။ ၸွမ်းမၼ်းၶဝ်ႈၵႂႃႇၵႃႈၼႂ်းႁိူၼ်းဢၼ်မၼ်းၶဝ်ႈၵႂႃႇၼၼ်ႉသေယဝ်ႉ၊- 11လၢတ်ႈတီႈၸဝ်ႈႁိူၼ်းလႄႈဝႃႈ၊ ‘သြႃႇသင်ႇလၢတ်ႈမႃးတီႈမႂ်းလႄႈဝႃႈ၊လုၵ်းဢၼ်ၵဝ်တင်းတပႄးၵဝ်ၸိူဝ်းၼႆႉတၵ်းလႆႈၵိၼ်ပွႆးပသၶႃႇ၊ၼၼ်ႉမီးၵႃႈလႂ်၊’ ဝႃႈၼႆတႃႉ။- 12ၵေႃႉၼၼ်ႉတၵ်းၼႄပၼ်လုၵ်းလူင်ႁၢၼ်ႉၼိူဝ်ဢၼ်ႁၢင်ႈၶိူင်ႈဝႆႉၼၼ်ႉဢေႃႈ။ မႄးႁႅၼ်းဝႆႉၵႃႈတီႈၼၼ်ႈတႃႉ၊” ဝႃႈၼင်ႇၼႆဢေႃႈ။
13တပႄးၸဝ်ႈၸိူဝ်းၼၼ်ႉၵႂႃႇလႄႈထူပ်းႁၼ်လွင်ႈၵႃႈမီးတင်းသဵင်ႈတင်းလူင်ၵႃႈဢၼ်ၸဝ်ႈယေႇသု၊သင်ႇလၢတ်ႈၵႂႃႇၼၼ်ႉလႄႈမႄးႁႅၼ်းပွႆးပသၶႃႇ၊ဝႆႉဢေႃႈ။
လွင်ႈတၢင်းဢၼ်ၵိၼ်ပွႆးၸဝ်ႈ
(တူၺ်း၊ မတ်ႈ 26:26-30။ မႃႇ 14:22-26။ 1 ၵေႃး 11:23-25)
14မိူဝ်ႈဢၼ်ၶိင်ႇမၼ်းထိုင်ၼၼ်ႉၸဝ်ႈယေႇသု၊ၼင်ႈယူႇၵႃႈတီႈၽိူၼ်တီႈၵိၼ်၊လူၺ်ႈၵၼ်တင်းတမၢၼ်ႇၸဝ်ႈတင်းလၢႆလႄႈ၊- 15လၢတ်ႈဝႃႈ၊ “ၸူဝ်ႈဢၼ်ၵဝ်ဢမ်ႇပႆႇလႆႈၶၢမ်ႇတုၵ်ႉၶႃႉဝူၺ်ႇတၼႃႇၼႆႉ၊ၵဝ်မီးၸႂ်ဢၼ်ၶႂ်ႈၵိၼ်ပွႆးပသၶႃႇ၊ၼႆႉလူၺ်ႈၵၼ်တင်းသူၼႃႇလူင်လၢင်ဢေႃႈ။- 16ၵဝ်ဝႃႈတီႈသူၸမ်ႉ၊ၵဝ်တၵ်းဢမ်ႇၵိၼ်ပွႆးၼႆႉထႅင်ႈတေႃႇထိုင်ႁွတ်ႈပွႆးၼႆႉလႆႈဢွင်ႇမႅင်ႇယဝ်ႉတူဝ်ႈၵႃႈၼႂ်းမိူင်းၽြႃးပဵၼ်ၸဝ်ႈပုၼ်ႉဢေႃႈ၊” ဝႃႈၼင်ႇၼႆယဝ်ႉၸင်ႇ။
17မၼ်းၸဝ်ႈဢဝ်ၵွၵ်းလႄႈယွင်ႈယေႃးၵျေးၸူးၸဝ်ႈသေယဝ်ႉ၊လၢတ်ႈလႄႈဝႃႈ၊ “ဢဝ်ၵွၵ်းၼႆႉသေယဝ်ႉ၊မႅင်ႇပၼ်တီႈသူၼင်ႇၵၼ်ၵၼ်တႃႉ။- 18ၵဝ်ဝႃႈတီႈသူၸမ်ႉ၊ၵဝ်တၵ်းဢမ်ႇၵိၼ်ၼမ်ႉမၢၵ်ႇၸပိတ်ႉၼႆႉထႅင်ႈတေႃႇထိုင်ႁွတ်ႈမိူင်းၽြႃးပဵၼ်ၸဝ်ႈႁွတ်ႈမႃးၼၼ်ႉဢေႃႈ၊” ဝႃႈၼင်ႇၼႆဢေႃႈ။
19မၼ်းၸဝ်ႈဢဝ်ၶဝ်ႈမုၼ်းလႄႈယွင်ႈယေႃးၵျေးၸူးၸဝ်ႈသေယဝ်ႉ၊ဝိတ်းၶဝ်ႈမုၼ်းလႄႈမႅင်ႇပၼ်ၶဝ်သေလႄႈလၢတ်ႈဝႃႈ၊ “ၶဝ်ႈမုၼ်းၼႆႉၸမ်ႉ၊ပဵၼ်တူဝ်ၵဝ်ဢၼ်ၸုၼ်ႉပၼ်သူဢေႃႈ။ ပုၼ်ႈဢၼ်တၵ်းၶုၵ်းၸႂ်လႆႈၶႆႈၸႂ်ထူပ်းၵဝ်ၸိုင်၊ဢွၼ်ၵၼ်ႁဵတ်းၸိူဝ်ႉၼင်ႇၼႆတႃႉ၊” ဝႃႈၼင်ႇၼႆဢေႃႈ။- 20မိူၼ်ၸိူဝ်ႉၼင်ႇၼၼ်၊ၵိၼ်ၶဝ်ႈၶမ်ႈသေယဝ်ႉ၊ၵွၵ်းၵေႃႈမၼ်းၸဝ်ႈဢဝ်ပၼ်တီႈၶဝ်လႄႈလၢတ်ႈဝႃႈ၊ “ၵွၵ်းၼႆႉၸမ်ႉ၊ပဵၼ်ပတိၺိၺ်ႇတြႃးဢၼ်မႂ်ႇဢၼ်ဢဝ်တင်းလိူတ်ႈၵဝ်တွၵ်ႇၸုမ်ႈဝႆႉယဝ်ႉလႄႈထွၵ်ႇလႆပုၼ်ႈသူဢေႃႈ။
21“ၼႂ်းဝႃႈၼၼ်သေၵေႃႈတူၺ်းလူး။ ၵေႃႉဢၼ်ဢဝ်ၵဝ်ဢၢပ်ႈၼၼ်ႉမီးၵႃႈတီႈၽိူၼ်ၼႆႉလူၺ်ႈၵၼ်တင်းၵဝ်ဢေႃႈ။- 22လုၵ်ႈၵူၼ်း၊တၵ်းလႆႈတၢႆၸွမ်းၵႃႈၼင်ႇဢၼ်ၽြႃးပဵၼ်ၸဝ်ႈမၵ်းၶၢၼ်းဝႆႉၼၼ်ႉမႅၼ်ႈသေၵေႃႈ၊ၵေႃႉဢၼ်ဢဝ်လုၵ်ႈၵူၼ်း၊ဢၢပ်ႈၼၼ်ႉတေမီးဢႃႉမၢင်ႇၵလႃႇဢေႃႈ၊” ဝႃႈၼင်ႇၼႆဢေႃႈ။
23မိူဝ်ႈၼၼ်ႉ၊ၶဝ်ၼင်ႇၵၼ်ၵၼ်တွင်ႈထၢမ်ၵၼ်လွင်ႈဢၼ်ၼႂ်းၶဝ်တေပဵၼ်ၵေႃႉလႂ်တၵ်းႁဵတ်းၸိူဝ်ႉၼင်ႇၼၼ်ၼၼ်ႉဢေႃႈ။
တၢင်းဢၼ်တွပ်ႇထဵင်လွင်ႈၽူႈလႂ်ယႂ်ႇမျၢတ်ႈ
24ၵႃႈၼႂ်းတမၢၼ်ႇၸဝ်ႈၼင်ႇၵၼ်ၵၼ်မီးတၢင်းဢၼ်တွပ်ႇထဵင်ၵၼ်လူၺ်ႈလွင်ႈဢၼ်ၼႂ်းၶဝ်ၼၼ်ႉ ၵေႃႉလႂ်တၵ်းယဵင်ႈၶႅၼ်းယႂ်ႇမျၢတ်ႈသေပိူၼ်ႈယူႇလႄႈ၊- 25ၸဝ်ႈယေႇသု၊လၢတ်ႈတီႈၶဝ်လႄႈဝႃႈ၊ “ၶုၼ်ႁေႃၶမ်းၵူၼ်းတၢင်ႇၸိူဝ်ႉတၢင်ႇၶိူဝ်းၶဝ်မီးဢႃႇၼႃႇၵႃႈၼိူဝ်ၵူၼ်းၶဝ်၊ဢိၵ်ႇတင်းၶုၼ်ဢၼ်လႆႈဢုပ်ႉပိူင်ႇတင်းလၢႆလႆႈၶၢမ်ႇတၢင်းဢၼ်ပိူၼ်ႈႁွင်ႉဝႃႈ၊ ‘ၸဝ်ႈၵျေးၸူး’ ဢေႃႈ။- 26ၵူၺ်းၵႃႈ၊ပုၼ်ႈသူၸိုင်၊ဢမ်ႇၸႂ်ႈၸိူဝ်ႉၼင်ႇၼၼ်။ ၼႂ်းသူၼႆႉၵေႃႉဢၼ်ႁဵတ်းၵူၼ်းလူင်ပိူၼ်ႈၼၼ်ႉမၼ်းတၵ်းလႆႈပဵၼ်ၸိူဝ်ႉၼင်ႇၵူၼ်းဢွၼ်ႇဢေႃႈ။ ၵေႃႉဢၼ်ပဵၼ်ၵူၼ်းၵႄႇၵူၼ်းႁူဝ်ပိူၼ်ႈၼၼ်ႉတၵ်းလႆႈပဵၼ်ၸိူဝ်ႉၼင်ႇၵူၼ်းၸႂ်ႉၵူၼ်းသွႆပိူၼ်ႈဢေႃႈ။- 27ၵေႃႉလႂ်ယဵင်ႈၶႅၼ်းယႂ်ႇမျၢတ်ႈ။ ၵေႃႉဢၼ်ၼင်ႈၵိၼ်ၼၼ်ႉယဵင်ႈၶႅၼ်းယႂ်ႇမျၢတ်ႈႁိုဝ်း။ ၵေႃႉဢၼ်ႁဵတ်းလဵင်ႉႁဵတ်းလူၼၼ်ႉ၊ယဵင်းၶႅၼ်းယႂ်ႇမျၢတ်ႈႁိုဝ်း။ ၵေႃႉဢၼ်ၼင်ႈၵိၼ်ၼၼ်ႉ၊ယဵင်ႈၶႅၼ်းယႂ်ႇမျၢတ်ႈၸႂ်ႈတႄႉယဝ်ႉ၊ၵူၺ်းၵႃႈ၊ၵဝ်ပဵၼ်ၸိူဝ်ႉၼင်ႇၵေႃႉဢၼ်ႁဵတ်းလဵင်ႉႁဵတ်းလူၵႃႈၼႂ်းသူၼႆႉဢေႃႈ။
28“သူပဵၼ်ၶဝ်ၸိူဝ်းဢၼ်ႁူမ်ႈလူၺ်ႈၵၼ်တင်းၵဝ်ယူႇၶိူဝ်းၶိူဝ်းၼႂ်းမိူဝ်ႈဢၼ်ၵဝ်လႆႈၶၢမ်ႇတၢင်းဢၼ်ၸၢမ်းတူၺ်းယႃႉယုၵ်ႉၼမ်ၼႃႇၼၼ်ႉဢေႃႈ။- 29ၸိူဝ်ႉၼင်ႇဢၼ်ပေႃႈၸဝ်ႈၵဝ်ပၼ်ဢၶႂၢင်ႉဢႃႇၼႃႇဢၼ်ဢုပ်ႉပိူင်ႇတီႈၵဝ်ၼၼ်ႉၵဝ်ၵေႃႈတၵ်းဢဝ်ဢၶႂၢင်ႉဢႃႇၼႃႇဢၼ်မိူၼ်မိူၼ်ၵၼ်တင်းၵဝ်ၼၼ်ႉပၼ်တီႈသူဢေႃႈ။- 30သူတေလႆႈၼင်ႈလႄႈၵိၼ်သူတ်ႉၵႃႈတီႈၽိူၼ်ၵဝ်ၵႃႈၼႂ်းမိူင်းၵဝ်၊ဢိၵ်ႇတင်းသူတၵ်းလႆႈၼင်ႈၵႃႈၼိူဝ်ပလၢင်ႇတြႃးႁႂ်ႈလႆႈဢုပ်ႉပိူင်ႇၵႃႈၼိူဝ်ၵူၼ်းဢိသရေး၊သိပ်းသွင်မဵဝ်းၼၼ်ႉဢေႃႈ။
ၸဝ်ႈယေႇသုႁေႃးထႃႈလွင်ႈပေႇတရုတေထဵင်ပႅတ်ႈ
(တူၺ်း၊ မတ်ႈ 26:31-35။ မႃႇ 14:27-31။ ယူဝ်း 13:36-38)
31“သိမုၼ်ႇ၊႟။ သိမုၼ်ႇ၊႟။ ထွမ်ႇလူး။ ၸႃႇတၢၼ်ႇ၊လႆႈဢၶႂၢင်ႉဢၼ်ၸႅတ်ႈတူၺ်းၸၢမ်းတူၺ်းသူတင်းသဵင်ႈတင်းလူင်ႁႂ်ႈလႆႈၽႄဢဝ်ၵူၼ်းလီဢွၵ်ႇသေၵႃႈၼႂ်းၵူၼ်းႁၢႆႉၵူၼ်းမိူၵ်ႈမိူၼ်ၸိူဝ်ႉၼင်ႇၸဝ်ႈႁႆႈၸဝ်ႈၼႃးၽတ်းဢဝ်ၶဝ်ႈပိူၵ်ႇဢွၵ်ႇသေႁမ်းၵႅပ်ႇၼၼ်ႉယဝ်ႉလႄႈ၊- 32သိမုၼ်ႇ၊႟။ ၵဝ်သူးတွင်းပုၼ်ႈမႂ်းပုၼ်ႈလွင်ႈၼင်ႇႁိုဝ်တၢင်းယုမ်ႇမၢတ်ႈမႂ်းတၵ်းဢမ်ႇလုၼၼ်ႉယူႇဢေႃႈ။ မိူဝ်ႈဢၼ်မႂ်းၶိုၼ်းမႃးၸူးၵႃႈတီႈၵဝ်ၸိုင်၊မႂ်းတၵ်းလႆႈပၼ်ဢဵၼ်ပၼ်ႁႅင်းတီႈပီႈၼွင်ႉမႂ်းတင်းလၢႆဢေႃႈ၊” ဝႃႈၼင်ႇၼႆဢေႃႈ။
33မၼ်းၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈႁဝ်း။ ၼင်ႇႁိုဝ်တၵ်းတူၵ်းထွင်ႇလူၺ်ႈၵၼ်တင်းၸဝ်ႈႁဝ်းလႂ်၊တၵ်းတၢႆၸွမ်းၸဝ်ႈႁဝ်းလႂ်ၼၼ်ႉၸိုင်၊ၵဝ်ၶႃႈတၼ်းဝႆႉယဝ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
34မၼ်းၸဝ်ႈၵေႃႈဝႃႈ၊ “ပေႇတရု၊႟။ ၵဝ်ဝႃႈတီႈမႂ်းၸမ်ႉ၊ၼႂ်းၶိုၼ်းၼႆႉၸူဝ်ႈဢၼ်ၵႆႇယင်းဢမ်ႇပႆႇၶၼ်ၼၼ်ႉၸိုင်၊မႂ်းတၵ်းထဵင်ပႅတ်ႈၵဝ်ထူၼ်ႈထိုင်သၢမ်ပွၵ်ႈဢေႃႈ၊” ဝႃႈၼင်ႇၼႆဢေႃႈ။
လွင်ႈထူင်ငိုၼ်း၊ထူင်ပႃး၊တင်းလႅဝ်း
35 ၸဝ်ႈယေႇသု၊သမ်ႉထၢမ်ၶဝ်လႄႈဝႃႈ၊ “မိူဝ်ႈဢၼ်ၵဝ်ဢမ်ႇႁႂ်ႈသူပႃးထူင်ငိုၼ်း၊ထူင်ပႃး၊ၶႅပ်းတိၼ်၊သေလႄႈပွႆႇၸႂ်ႉသူၵႂႃႇၵမ်းဢွၼ်တၢင်းၼၼ်ႉ၊ၸွင်ႇသူလူဝ်ႇထႅင်ႈသေၸိူဝ်ႉသေပိူင်ႁိုဝ်း၊” ဝႃႈၼႆလႄႈ။
ၶဝ်ဢွၼ်ၵၼ်ၶိုၼ်းလဝ်ႈလၢတ်ႈလႄႈဝႃႈ၊ “ဢမ်ႇလူဝ်ႇၵႃႈသင်ထႅင်ႈၶႃႈ၊” ဝႃႈၼင်ႇၼႆဢေႃႈ။
36မိူဝ်ႈၼၼ်ႉမၼ်းၸဝ်ႈလၢတ်ႈလႄႈဝႃႈ၊ “ၵမ်းၼႆႉၸိုင်၊ၵေႃႉဢၼ်မီးထူင်ငိုၼ်းဢမ်ႇၼၼ်ၵေႃႈ၊ၵေႃႉဢၼ်မီးထူင်ပႃးၼၼ်ႉႁႂ်ႈဢဝ်ပႃးၸွမ်းတႃႉ။ ၵေႃႉဢၼ်ဢမ်ႇမီးလႅဝ်းၼၼ်ႉႁႂ်ႈမၼ်းၶၢႆသိူဝ်ႈၶူဝ်းမၼ်းလႄႈသိုဝ်ႉဝႆႉမၢၵ်ႈၼိုင်ႈတႃႉ။- 37ၵဝ်ဝႃႈတီႈသူၸမ်ႉ၊ၼႂ်းၵျၢမ်းလိၵ်ႈမီးဝႆႉလႄႈဝႃႈ၊ ‘ၸဝ်ႈၼၼ်ႉၸမ်ႉ၊ပိူၼ်ႈမၢတ်ႈၶဝ်ပႃးၼႂ်းၵူၼ်းဢၼ်ဢမ်ႇတြႃးဢေႃႈ၊’ ဝႃႈၼင်ႇၼႆၼၼ်ႉတၵ်းပျေႉၸုမ်ႇၵႃႈတီႈၵဝ်တေႃႈလဵဝ်ၼႆႉယဝ်ႉ။ တၢင်းဢၼ်တႅမ်ႈဝႆႉလွင်ႈၵဝ်ၸိုင်၊ပဵၼ်မႃးယူႇယဝ်ႉဢေႃႈ၊” ဝႃႈၼင်ႇၼႆဢေႃႈ။
38ၶဝ်ၵေႃႈလဝ်ႈလၢတ်ႈလႄႈဝႃႈ၊ “တူၺ်းၶႃႈလူး၊ၸဝ်ႈ။ ႁဝ်းၶႃႈမီးလႅဝ်းသွင်မၢၵ်ႈၶႃႈဢေႃႈ၊” ဝႃႈၼင်ႇၼႆလႄႈ။
မၼ်းၸဝ်ႈဝႃႈ၊ “ပေႃးယဝ်ႉ၊” ဝႃႈၼင်ႇၼႆဢေႃႈ။
ၸဝ်ႈယေႇသုသူးတွင်းၵႃႈၼိူဝ်လွႆသၢၼ်ႇလုၼ်ႇ
(တူၺ်း၊ မတ်ႈ 26:36-46။ မႃႇ 14:32-42)
39လိုၼ်းၼၼ်ႉ၊ၸဝ်ႈယေႇသု၊ဢွၵ်ႇဝဵင်းၵႂႃႇၸူးၵႃႈတီႈလွႆသၢၼ်ႇလုၼ်ႇ၊ၵႃႈၼင်ႇဢၼ်မၼ်းၸဝ်ႈယၢမ်ႈၵႂႃႇသေႇသေႇၼၼ်ႉလႄႈတပႄးၸဝ်ႈတင်းလၢႆၵေႃႈၸွမ်းၵႂႃႇဢေႃႈ။- 40မိူဝ်ႈဢၼ်မၼ်းၸဝ်ႈႁွတ်ႈထိုင်ၵႂႃႇၵႃႈတီႈၼၼ်ႉၸိုင်၊မၼ်းၸဝ်ႈလၢတ်ႈတီႈၶဝ်လႄႈဝႃႈ၊ “ၼင်ႇႁိုဝ်သူတၵ်းဢမ်ႇလွင်ႈဢမ်ႇၸွမ်းၵႂႃႇၼႂ်းတၢင်းဢၼ်ၸူဝ်းၵႂႃႇၼႂ်းဢပျတ်ႈၸိုင်၊ဢွၼ်ၵၼ်သူးတွင်းတႃႉ၊” ဝႃႈၼင်ႇၼႆဢေႃႈ။
41မၼ်းၸဝ်ႈၸင်ႇၽၢတ်ႇသေၵႃႈတီႈၶဝ်ၵႂႃႇယၢၼ်သေၸူဝ်ႈမၢၵ်ႇႁိၼ်ဝုတ်ႉၼိုင်ႈလႄႈၶုပ်ႉၶဝ်ႇသေယဝ်ႉ၊သူးတွင်းလႄႈဝႃႈ၊- 42“ပေႃႈၸဝ်ႈတီႈၶႃႈ၊ပေႃးၸဝ်ႈႁဝ်းမီးဢလူဝ်ႇၸိုင်၊ႁႂ်ႈၵွၵ်းၼႆႉပိူင်ႈၵႂႃႇသေၵႃႈတီႈၶႃႈၸဝ်ႈသေၵမ်းၶႃႈ။ ၼႂ်းဝႃႈၼၼ်သေၵေႃႈ၊ယႃႇႁႂ်ႈပဵၼ်ၸွမ်းဢလူဝ်ႇၶႃႈၸဝ်ႈလႄႈႁႂ်ႈပဵၼ်ၸွမ်းဢလူဝ်ႇၸဝ်ႈႁဝ်းသေၵမ်းတီႈၶႃႈ၊” ဝႃႈၼင်ႇၼႆဢေႃႈ။- 43[မိူဝ်ႈၼၼ်ႉ၊တမၢၼ်ႇၵၢင်ႁၢဝ်ပႃးၼိုင်ႈပေႃႇမႃးပၼ်ဢဵၼ်ပၼ်ႁႅင်းမၼ်းၸဝ်ႈဢေႃႈ။- 44မၼ်းၸဝ်ႈၶၢမ်ႇဝူၺ်ႇတၼႃႇၼမ်ၼႃႇလႄႈယိင်းၶႅၼ်းၶတ်းၸႂ်ၵျူဝ်းၸႃးသူးတွင်းယူႇ၊ထၢၼ်ႈပေႃးႁိူဝ်ႇမၼ်းၸဝ်ႈပဵၼ်မိူၼ်ၸိူဝ်ႉၼင်ႇယွတ်ႇလိူတ်ႈယွတ်ႇတူၵ်းၵႃႈၼိူဝ်လိၼ်ၼၼ်ႉဢေႃႈ။]#22:44 22:43-44 […] ၼႂ်းမူႇၵျၢမ်းလိၵ်ႈၵဝ်ႇၵမ်ႈၽွင်ႈဢမ်ႇပႃး။
45လုၵ်ႉသေၵႃႈတီႈဢၼ်သူးတွင်းၼၼ်ႉမၼ်းၸဝ်ႈၶိုၼ်းမႃးၸူးတီႈတပႄးၸဝ်ႈၸိူဝ်းၼၼ်ႉလႄႈထူပ်းႁၼ်ၶဝ်ၼွၼ်းလပ်းယူႇ၊ၵွပ်ႈပိူဝ်ႈၶဝ်ၸႂ်လုႁႅင်းဢူၼ်ႈၼႃႇၼၼ်ႉဢေႃႈ။- 46မၼ်းၸဝ်ႈၸင်ႇလၢတ်ႈတီႈၶဝ်လႄႈဝႃႈ၊ “သူၼွၼ်းလပ်းယူႇႁဵတ်းသင်။ လုၵ်ႉလႄႈဢွၼ်ၵၼ်သူးတွင်းပုၼ်ႈလွင်ႈၼင်ႇႁိုဝ်သူတၵ်းဢမ်ႇလွင်ႈဢမ်ႇၸွမ်းၵႂႃႇၼႂ်းတၢင်းဢၼ်ၸူဝ်းၵႂႃႇၵႃႈၼႂ်းဢပျတ်ႈၼၼ်ႉတႃႉ၊” ဝႃႈၼင်ႇၼႆဢေႃႈ။
တၢင်းဢၼ်တိဢဝ်ၸဝ်ႈယေႇသု
(တူၺ်း၊ မတ်ႈ 26:47-56။ မႃႇ 14:43-50။ ယူဝ်း 18:3-11)
47ၼႂ်းမိူဝ်ႈဢၼ်ၸဝ်ႈယေႇသု၊ယင်းတိုၵ်ႉလၢတ်ႈၸိူဝ်ႉၼင်ႇၼၼ်ယူႇၼၼ်ႉ၊ၵူၼ်းၸုမ်းၼိုင်ႈႁွတ်ႈမႃးလႄႈယုတႃႉ၊ဢၼ်ၶဝ်ႈပႃးၼႂ်းတပႄးၸဝ်ႈသိပ်းသွင်ၵေႃႉၼၼ်ႉဢွၼ်ႁူဝ်ၶဝ်မႃးဢေႃႈ။ မၼ်းၵႂႃႇၸူးၸဝ်ႈယေႇသု၊ႁႂ်ႈလႆႈတၵ်ႉလၢတ်ႈလႄႈၼူမ်ဢေႃႈ။- 48ၵူၺ်းၵႃႈ၊ၸဝ်ႈယေႇသု၊လၢတ်ႈလႄႈဝႃႈ၊ “ယုတႃႉ၊႟။ မႂ်းဢဝ်တင်းတၢင်းဢၼ်ၼူမ်လႄႈဢၢပ်ႈလုၵ်ႈၵူၼ်း၊ႁိုဝ်း၊” ဝႃႈၼင်ႇၼႆဢေႃႈ။
49မိူဝ်ႈဢၼ်တပႄးၸဝ်ႈဢၼ်မီးလူၺ်ႈၵၼ်တင်းမၼ်းၸဝ်ႈၸိူဝ်းၼၼ်ႉ၊ႁုႁၼ်လွင်ႈတၢင်းဢၼ်တၵ်းပဵၼ်မႃးၼၼ်ႉလႄႈၶဝ်လဝ်ႈထၢမ်လႄႈဝႃႈ၊ “ၸဝ်ႈႁဝ်း။ ႁဝ်းၶႃႈတၵ်းလႆႈဢဝ်လႅဝ်းၽၼ်းၶႃႈႁိုဝ်း၊” မိူဝ်ႈဢၼ်ယင်းဝႃႈယူႇၼၼ်ႉ၊- 50ၼႂ်းၶဝ်ၼၼ်ႉၵေႃႉၼိုင်ႈဢဝ်လႅဝ်းၽၼ်းၶႃႈၶုၼ်ယဵၸ်ႈပရေႃးႁဵၵ်ႈ#22:50 “ယဵၸ်ႈပရေႃးႁဵၵ်ႈ” - ပဵၼ်ၽူႈတၢင်တူဝ်ႁဵတ်းဝၢတ်ႈသၢၵ်ႈၵၢပ်ႈတၢင်းလူႇတီႈၽြႃးပဵၼ်ၸဝ်ႈလႄႈဝၢၼ်ႁူမၼ်းၽၢႆႇၶႂႃၶၢတ်ႇတူၵ်းၵႂႃႇဢေႃႈ။
51မၼ်းၸဝ်ႈၵေႃႈလၢတ်ႈလႄႈဝႃႈ၊ “ယႃႇပေႁဵတ်းသင်ထႅင်ႈ၊” ဝႃႈၼင်ႇၼႆယဝ်ႉၸင်ႇ၊ဢဝ်မိုဝ်းတိူဝ်ႉသႂ်ႇဝၢၼ်ႁူမၼ်းၼၼ်ႉႁႂ်ႈၶိုၼ်းလီမႃးသေဢေႃႈ။
52မိူဝ်ႈၼၼ်ႉ၊မၼ်းၸဝ်ႈလၢတ်ႈတီႈယဵၸ်ႈပရေႃးႁဵၵ်ႈလူင်လႂ်၊ႁူဝ်ၼႃႈလုၵ်ႈသိုၵ်းဢၼ်ပႂ်ႉၵျွင်းပိၵ်ႈမၢၼ်ႇၸဝ်ႈလႂ်၊တင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆၸိူဝ်းဢၼ်မႃးတိဢဝ်မၼ်းၸဝ်ႈၼၼ်ႉလႄႈဝႃႈ၊ “ၸွင်ႇသူလူဝ်ႇလႆႈပႃးဢဝ်လႅဝ်း၊ဢိၵ်ႇတင်းၶွၼ်ႉလႄႈမႃးတိဢဝ်ၵဝ်မိူၼ်ၸိူဝ်ႉၼင်ႇသူတိဢဝ်ၵူၼ်းၸူၼ်ၼၼ်ႉႁိုဝ်း။- 53မိူဝ်ႈဢၼ်ၵဝ်မီးယူႇလူၺ်ႈၵၼ်တင်းသူၼႂ်းၵျွင်းပိၵ်ႈမၢၼ်ႇၸဝ်ႈၵူႈဝၼ်းၼၼ်ႉၸိုင်၊သူဢမ်ႇႁႃတိဢဝ်ၵဝ်။ ၵမ်းၼႆႉပဵၼ်ၶိင်ႇသူယဝ်ႉ။ ပဵၼ်ၶိင်ႇတၼ်းၶူဝ်းလပ်းသိင်ႇတၵ်းဢုပ်ႉပိူင်ႇယဝ်ႉ၊” ဝႃႈၼင်ႇၼႆဢေႃႈ။
ပေႇတရုထဵင်ပႅတ်ႈၸဝ်ႈယေႇသု
(တူၺ်း၊ မတ်ႈ 26:57-58၊69-71။ မႃႇ 14:53-54၊66-72။ ယူဝ်း 18:12-18၊25-27)
54ၶဝ်တိဢဝ်ၸဝ်ႈယေႇသု၊ဢဝ်ၵႂႃႇၵႃႈတီႈႁိူၼ်းၶုၼ်ယဵၸ်ႈပရေႃးႁဵၵ်ႈၶဝ်လႄႈပေႇတရု၊ၵေႃႈယူႇတီႈဢၼ်ႁၢင်ႇၵႆသေလႄႈၸွမ်းၵႂႃႇဢေႃႈ။- 55ပိူၼ်ႈသုမ်ၽႆးဢွမ်ႇၵႃႈၼႂ်းပၢင်ႇဝၢင်းႁိူၼ်းၼၼ်ႉယူႇလႄႈပေႇတရု၊ၵေႃႈၵႂႃႇငွမ်ဢွမ်ႇၽႆးၸွမ်းၼႂ်းၵႄႈပိူၼ်ႈဢေႃႈ။- 56မိူဝ်ႈၼၼ်ႉ၊သၢဝ်လုၵ်ႈၸၢင်ႈၵေႃႉၼိုင်ႈႁၼ်မၼ်းငွမ်ဢွမ်ႇၽႆးယူႇၼၼ်ႉသေယဝ်ႉ၊ယႅၵ်ႉတူၺ်းၼႃႈမၼ်းလီလီယဝ်ႉၸင်ႇလၢတ်ႈလႄႈဝႃႈ၊ “ၵေႃႉၼႆႉပဵၼ်ၵူၼ်းဢၼ်ၸွမ်းယေႇသု၊ၼၼ်ႉယဝ်ႉ၊” ဝႃႈၼင်ႇၼႆဢေႃႈ။
57ၵူၺ်းၵႃႈ၊ပေႇတရု၊ထဵင်ပႅတ်ႈလႄႈဝႃႈ၊ “မႄႈယိင်း႟။ ၵဝ်ယင်းဢမ်ႇႁုၸၵ်းၵေႃႉၼၼ်ႉ၊” ဝႃႈၼင်ႇၼႆဢေႃႈ။
58ဝၢႆးသေၼၼ်ႉထႅင်ႈၵမ်းၼိုင်ႈ၊မီးၵူၼ်းၵေႃႉၼိုင်ႈတွင်းမၼ်းလႄႈလၢတ်ႈဝႃႈ၊ “မႂ်းၼႆႉၶဝ်ႈပႃးလူၺ်ႈၵႃႈၼႂ်းၶဝ်ဢေႃႈ၊” ဝႃႈၼင်ႇၼႆလႄႈပေႇတရု၊ၶိုၼ်းလၢတ်ႈလႄႈဝႃႈ၊ “ၵူၼ်းၼႆႉ႟။ ၵဝ်ဢမ်ႇပႃးၸွမ်းၼႂ်းၶဝ်ၵူၺ်း၊” ဝႃႈၼင်ႇၼႆဢေႃႈ။
59လိုၼ်းၼၼ်ႉႁိုင်သေၼိုင်ႈမွင်းယဝ်ႉၼၼ်ႉၸိုင်၊ၵူၼ်းတၢင်ႇၵေႃႉသမ်ႉလၢတ်ႈတႄႉတႄႉဝႃႈဝႃႈလႄႈဝႃႈ၊ “ၸႂ်ႈယဝ်ႉ။ ၵေႃႉၼႆႉပဵၼ်ၵူၼ်းပႃးၸွမ်းမၼ်းတႄႉယဝ်ႉ။ မၼ်းပဵၼ်ၵူၼ်းမိူင်းၵႃႇလိလႄး၊ဢေႃႈ၊” ဝႃႈၼင်ႇၼႆဢေႃႈ။
60 ပေႇတရု၊ၶိုၼ်းလၢတ်ႈလႄႈဝႃႈ၊ “ၶိင်းၼႆႉ႟။ မႂ်းလၢတ်ႈလွင်ႈသင်ၵဝ်ယင်းဢမ်ႇႁု၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၵမ်းလဵဝ်၊ယၢမ်းမိူဝ်ႈဢၼ်မၼ်းယင်းလၢတ်ႈယူႇၼၼ်ႉ၊ၵႆႇၵေႃႈၶၼ်ဢေႃႈ။- 61ၸဝ်ႈၽြႃးၵေႃႈဝၢႆႇတူၺ်းပေႇတရု၊လႄႈမၼ်းၶုၵ်းၸႂ်လႆႈၶႆႈၸႂ်ထူပ်းၵႂၢမ်းမၼ်းၸဝ်ႈဢၼ်ဝႃႈ၊ “ၸူဝ်ႈဢၼ်ၵႆႇဢမ်ႇပႆႇၶၼ်ၼႂ်းၶိုၼ်းၼႆႉၼၼ်ႉ မႂ်းတေတွပ်ႇထဵင်ဝႃႈ၊မႂ်းဢမ်ႇႁုၸၵ်းၵဝ်ထူၼ်ႈထိုင်သၢမ်ပွၵ်ႈဢေႃႈ၊” ဝႃႈၼင်ႇၼႆၼၼ်ႉသေယဝ်ႉ၊- 62မၼ်းဢွၵ်ႇသေၵႃႈတီႈၼၼ်ႈၵႂႃႇလႄႈႁွင်ႉႁႆႈထိုင်ၸႂ်ထိုင်ၶေႃးၼႃႇလူင်လၢင်ဢေႃႈ။
ၸဝ်ႈယေႇသုလႆႈၶၢမ်ႇပိူၼ်ႈႁဵတ်းပျၢၵ်ႈၶူဝ်
(တူၺ်း၊ မတ်ႈ 26:67-68။ မႃႇ 14:65)
63ၵူၼ်းၸိူဝ်းဢၼ်ပႂ်ႉထိင်းၸဝ်ႈယေႇသု၊ၼၼ်ႉ၊ဢွၼ်ၵၼ်ႁဵတ်းပျၢၵ်ႈႁဵတ်းၶူဝ်တီႈမၼ်းၸဝ်ႈသေလႄႈ ပေႃႉထုပ်ႉမၼ်းၸဝ်ႈဢေႃႈ။- 64ၶဝ်ဢဝ်ၽႃႈႁူမ်ႇၼႃႈမၼ်းၸဝ်ႈသေယဝ်ႉ၊ထၢမ်မၼ်းၸဝ်ႈလႄႈဝႃႈ၊ “ၽူႈလႂ်ပေႃႉထုပ်ႉမႂ်း၊တၵ်ႉတူၺ်းလူး၊” ဝႃႈၼင်ႇၼႆဢေႃႈ။- 65လိူဝ်သေၼၼ်ႉၶဝ်လၢတ်ႈၵႂၢမ်းဢၼ်သႄႉသွမ်းၼမ်ၼႃႇတီႈမၼ်းၸဝ်ႈဢေႃႈ။
ၸဝ်ႈယေႇသုလႆႈၶၢမ်ႇၸႅတ်ႈထၢမ်ၽၢႆႇၼႃႈၶုၼ်လုမ်း
(တူၺ်း၊ မတ်ႈ 26:57-66။ မႃႇ 14:55-64။ ယူဝ်း 18:19-24)
66မိူဝ်ႈဢၼ်မိူင်းလႅင်းမႃးၸိုင်၊ၵူၼ်းဢၼ်ပဵၼ်ၵႄႇပဵၼ်ႁူဝ်ၵျူး၊ၶဝ်လႂ်၊ယဵၸ်ႈပရေႃးႁဵၵ်ႈလူင်ၶဝ်လႂ်၊ဢိၵ်ႇတင်းသြႃႇမေႃၵျၢမ်းထမ်ႇမႃႉတင်းလၢႆၸုတုမ်တိူင်ႇပၢင်ႇၵၼ်သေယဝ်ႉ၊ဢဝ်မၼ်းၸဝ်ႈၵႂႃႇၸူးတီႈလုမ်းလူင်ယဝ်ႉၸင်ႇ၊- 67လၢတ်ႈလႄႈဝႃႈ၊ “မႂ်းၸႂ်ႈၸဝ်ႈၶရိၸ်ႈ၊ႁိုဝ်း၊မွၵ်ႇလၢတ်ႈႁဝ်းတႃႉ၊” ဝႃႈၼင်ႇၼႆဢေႃႈ။
မၼ်းၸဝ်ႈၶိုၼ်းလၢတ်ႈလႄႈဝႃႈ၊ “ပေႃးၵဝ်မွၵ်ႇလၢတ်ႈသူၸိုင်၊သူဢမ်ႇယုမ်ႇ။- 68ပေႃးၵဝ်ထၢမ်သူၵေႃႈသူဢမ်ႇၶိုၼ်းလၢတ်ႈ။- 69တႄႇၸႃႉဢဝ်မိူဝ်ႈလဵဝ်လႄႈလုၵ်ႈၵူၼ်း၊တၵ်းၼင်ႈယူႇၵႃႈတီႈၽၢႆႇၶႂႃဢၼၼ်ႇတႃႉတၼ်းၶူဝ်းၽြႃးပဵၼ်ၸဝ်ႈဢေႃႈ၊” ဝႃႈၼင်ႇၼႆဢေႃႈ။
70မိူဝ်ႈၼၼ်ႉၶဝ်ဢွၼ်ၵၼ်ထၢမ်လႄႈဝႃႈ၊ “ပေႃးပဵၼ်ၼႆၸိုင်၊မႂ်းၸႂ်ႈလုၵ်ႈၽြႃးပဵၼ်ၸဝ်ႈႁိုဝ်း၊” ဝႃႈၼင်ႇၼႆလႄႈမၼ်းၸဝ်ႈၵေႃႈလၢတ်ႈဝႃႈ၊
“သူလၢတ်ႈၸွမ်းၵႃႈၼင်ႇဢၼ်ၵဝ်ပဵၼ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
71ၶဝ်ၵေႃႈလၢတ်ႈလႄႈဝႃႈ၊ “ႁဝ်းဢမ်ႇလူဝ်ႇသၢၵ်ႈသေႇတၢင်ႇၸိူဝ်ႉတၢင်ႇမဵဝ်းယဝ်ႉ။ တူဝ်ႁဝ်းလႆႈငိၼ်းၵႂၢမ်းဢၼ်ဢွၵ်ႇသူပ်းမၼ်းယဝ်ႉ၊” ဝႃႈၼင်ႇၼႆဢေႃႈ။
Выбрано:
လု 22: SHNCL
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
