मर्कुस 12
12
धाक्सिराङ मेःनो मोहिलमको ल्हाकराय
(मति २१:३३-४६; लुका २०:९-१९)
1अनि येसुइ इ ल्हाकराय तोसास्यावा— “कुनय यातचाक मान्ताइ लयको राङहाङ धाक्सिको बोतलम सुकाक्तिको ओउको वरिपरि बार लावाकान। अनि ओउइ धाकसाय च्युर्ति रस त्याल्साको लागि यातज्यो खालाङ जाह्ङाकान र ओउ धाक्सिराङ ल्युह्ङ्साको लागि यातज्यो थारामा जाह्ङाकान। ओहाङसयको केहि मोहिलमकाय राङ मेःन्सा जिम्मा बयाक्तिको ओउ लयखे परदेसताङ आला। 2जब धाक्सिको साय मिनो समय दाहा, ओउइ यातचाक नोकरकाय लयको भाक लेःलाङ मोहिलमकहाङ ल्होकाकान। 3तर मोहिलमइ ओउकाय पक्रआक्तिको घानाथय र दोहमा बइमात द्याःन्ति ल्होकाथय। 4ओउतझ्यान्ते ओउइ अर्को नोकरकाय मोहिलमकहाङ ल्होकाकान, तर ओउमयइ ओउकाय तालाङहाङ थोःति रास्सितो जाह्ङाथय। 5ओउ मान्ताइ अर्को यातचाक नोकरकायमा ल्होकाकान, तर ओउकायखे मोहिलमइ साताथय। ओउ मान्ताइ ल्होको अरु नोकरलमकायमा कोयकाय घानाथास अनि कोयकायखे साताथास। 6द्याहखे मोहिलमकहाङ ल्होक्साको लागि ओउ धाक्सिराङको मालिककुस लयको माहा राप्तो चोः बाहेक सुमा नाःआकिलि। अनि लोन्हे, ‘ओउमयइ पक्कामा ङाको चोःकायपाय मान जाह्ङ्चानि खेचा’ त म्हर्ति लयको यातयज्यो खेओ चोःकाय ल्होकाकान। 7तर धाक्सिराङको मालिकको चोःकाय च्यउति ओउ मोहिलम लयमय नोःकायाकाय, ‘ओउखेपाय धाक्सिराङको मालिकको चोः, इ धाक्सिराङको हकवाला खेना। द्याह निइ ओउकाय सात्नि र ओउको इ जुदा सम्पति निको स्याउलेना।’ 8ओउतझ्यान्ते ओउ मोहिलमइ धाक्सिराङको मालिकको चोःकाय साताकानि र ओउको म्हाङकाय धाक्सिराङसय बाहिरताङ आःल्ति ताति वायाकानि।”
9अनि येसुइ ह्वत्सास्यावा, “द्याह धाक्सिराङको मालिकइ ओउ मोहिलमकाय दोह हाइचउ त? ङाइ निङकाय तोनेनाङ्स, मालिक वाङ्ति ओउ मोहिलमकाय सात्नउ र लयको राङ अरु मोहिलमकाय मेःन्सा बइनउ। 10दोह निङइ धर्मसास्त्रहाङ एतदाह्य्ति लेखओ पह्रओ नाःतेइलि र?
‘दकर्मिलमइ काम लागल त दाह्य्ति इन्कार जाह्ङो बाङले,
किम जाह्ङ्धार्ना कुनाको मुख्य बाङ स्याउलाङ वाङा।
11 इ कामखे प्रभु परमेस्वर लयइले जाह्ङ्सास्यावो खेना,
र निको नजरहाङ गच्युक ग्याह्ङ्सितो स्यावो मुना।’” #
भजन ११८:२२-२३
12ओहाङसयको लयमयको बिरोतहाङले इ ल्हाकराय येसुइ तोओ खेना त दाह्य्ति चिःति, पाको अगुवालमइ येसुकाय पक्रसा कोसिस जाह्ङाकानि। तर ओउमय मान्तालमको हुलकाय रयोझ्यान्ते येसुकाय पक्रमात फेति पाह्याकाय।
तिरो बयो बारेहाङ प्रस्न
(मति २२:१५-२२; लुका २०:२०-२६)
13ओहाङसयको पाको अगुवालमइ येसुकाय प्रस्न जाह्ङ्ति फसाउसाको लागि केहि फरिसिलम र केहि राजा हेरोदको मान्तालमकाय येसुकहाङ ल्होकाकानि। 14ओउमय येसुकहाङ वाङाक्तिको एत दाह्याकाय, “अ गुरु, नाङ गच्युक इमान्दार खेसास्याउतेना त दाह्यो कुरा निइ चिःनाङ्सु। नाङइ जुदा मान्तालमकाय छमात यातय खालको बेबहार जाह्ङ्सास्याउना। अनि मान्तालम गतहाइति याको परमेस्वर चाहसास्याउना त दाह्यो सत्य कुरा नाङइ मान्तालमकाय स्यान्सास्याउना। द्याह निकाय तोसास्याउपाना, दोह निको नेम-कानुनइ रोम देसको माहाराजाकाय तिरो बइसा अनुमति बइनउ? दोह निइ तिरो बइसा परना या परल या?”
15तर येसुइ ओउमयको ल्हुङतुकको दुस्त बिचार चिःति तोसास्यावा, “निङ ङाकाय धइति परिछ्या जाह्ङ्सा बोःङ्धय मुतेनय? रोमि चान्दिको यातज्यो ध्याक#१२:१५ रोमि चान्दिको यातज्यो ध्याक इकाय ग्रिक भासाहाङ, “दिनार” त तोओ मुना। वान्ति ङाकाय छ्यान्नाङ्स, अनि दोह हाइसा परना त दाह्यो कुरा ङाइ निङकाय तोनेनाङ्स।”
16ओउमयइ रोमि चान्दिको यातज्यो ध्याक वान्ति येसुकाय ल्हाआकानि, र येसुइ ओउमयकाय ह्वत्सास्यावा, “इहाङ सुको अङ्सि र मय्ङ मुना?”
ओउमय त्याङाकाय, “रोम देसको माहाराजाको।”
17अनि येसुइ ओउमयकाय तोसास्यावा, “ओउतखेया, दोह रोम देसको माहाराजाको खेना, ओउ रोम देसको माहाराजाकाय बइनु, र दोह परमेस्वरको खेना, ओउ परमेस्वरकायले बइनु।”
येसुको एतताह्ङो जवाफ साइति ओउमय माहा जोक्तो ग्याह्ङाकाय।
सिओसय उह्ति च्योकोको बारेहाङ प्रस्न
(मति २२:२३-३३; लुका २०:२७-४०)
18ओहाङसयको मान्ता सिआपछि फेरि उह्ति च्योक्ना त दाह्यो कुराहाङ बिस्वास जाह्ङ्मालो सदुकि त तोओ धार्मिक समुहको केहि मान्तालम वाङाक्तिको येसुकाय तोआथय, 19“गुरु, मोसाइ निकाय एतदाह्य्ति नेम-कानुन लेखति बयो मुना, ‘यदि कुनय यातचाक गोय्चो मान्ताइ बिह्या जाह्ङ्नउ, तर चोः नाःमाखाले सिना त खेया, ओउ पुःको लागि सन्तान स्याउपा त दाह्य्ति ओउको हउइ ओउ राङ्गि पुः कमाकुस बिह्या जाह्ङ्साले परना।’#बेब २५:५” 20ओहाङसयको ओउमयइ येसुकाय एतदाह्य्तिमा ह्वताथय, “यात समय यातज्यो माचरहाङ सात पुःचोङ खेइतो। जेथाइ बिह्या जाह्ङाकान, तर ओउ चोः चोःद्याङ नाःमाखाले सिआ। 21ओहाङसयको माइला हउइ ओउ राङ्गि पुः कमाकुस बिह्या जाह्ङाकान, तर ओउमा सन्तान नाःमाखाले सिआ। अनि साइला हउइमा ओउ राङ्गि पुः कमाकुस बिह्या जाह्ङाकान। 22ओउतहाइति सात पुःचोङइमा पालोकुसिले ओउ मोम्चोकुस बिह्या जाह्ङाकानि, तर जुदाले सन्तान नाःमाखाले सिआकाय। ओहाङसयको लोन्हे ओउ मोम्चोमा सिआ। 23द्याह, जब परमेस्वरइ मान्तालमकाय सिओसय उह्ति च्योक्ताक्सास्याउना, ओउबेलाहाङ ओउ मोम्चोखे सुको माचा स्याउना? धइतिदाह्य्सा ओउ मोम्चोकुसपाय सात पुःचोङइले बिह्या जाह्ङो खेइतो।”
24येसुइ ओउमयकाय जवाफ बइसास्यावा, “दोह निङइ लयको गल्ति चिःओ मुतेनय? निङको गल्तिखे निसज्यो मुना— ‘यातज्योखे निङइ धर्मसास्त्रको स्यानरायकाय चिःसा खाइतेनिलि, र अर्कोखे निङइ परमेस्वरको जिःङकाय तह्य्सा खाइतेनिलि।’ 25धइतिदाह्य्सा जब सिओ मान्तालम उह्ति च्योक्नय, गोय्चो मान्तालमइमा बिह्या जाह्ङ्निलि र मोम्चो मान्तालमकायमा बिह्या जाह्ङ्ति बइनिलि, तर ओउमयखे गलमा बिह्या जाह्ङ्मालो लाङकादुतलम लेखाले स्याउलेनय। 26मान्तालम सिओसय उह्ति च्योक्ना त दाह्योको बारेहाङ, दोह निङइ मोसाको कितापहाङ पह्रओ नाःतेइलि र? ल्युङ्तिमुओ झ्युरको बारेहाङ परमेस्वरइ मोसाकाय एतदाह्य्ति तोसास्यावो मुना— ‘ङाखे अब्राहामको परमेस्वर, इसाकको परमेस्वर, र याकुबको परमेस्वर खेनाङ।’#प्रस ३:६ 27ओउतझ्यान्ते परमेस्वरखे सिओ मान्तालमको खेल, तर जिउदो मान्तालमको परमेस्वर खेसास्याउना। तर इ कुराहाङ बिस्वास जाह्ङ्मालोखे निङको ताह्ङो गल्ति खेना।”
परमेस्वरको महान् आग्या
(मति २२:३४-४०; लुका १०:२५-२८)
28येसु र सदुकिलम बहस जाह्ङ्कायधय मुतोकहाङ यातचाक धर्मगुरु येसुकहाङ वाङा। येसुइ मान्तालमको प्रस्नको सहि जवाफ बयो च्यउति ओउइ येसुकाय ह्वताकान, “अ गुरु, परमेस्वरइ बइसास्यावो नाःतो आग्यालम मध्येहाङ जुदासय महत्वको आग्याखे गाउ खेना?”
29येसुइ ओउकाय जवाफ बइसास्यावा, “जुदासय महत्वको आग्याखे इ खेना— ‘अ इस्राएलको मान्तालम साइनु, निको प्रभु परमेस्वरखे यातज्योले खेओ प्रभु खेसास्याउना। 30ओउतझ्यान्ते निङइ लयको प्रभु परमेस्वरकाय लयको जुदा ल्हुङतुकसय, जुदा प्रानसय, जुदा मनसय र जुदा जिःङसय#१२:३० जुदा जिःङसय जुदा जिःङसय परमेस्वरकाय राप्सा त तोओको मानेखे प्रभु परमेस्वरकाय सेवा जाह्ङ्साको लागि लयको जुदा जिःङ प्रयोग जाह्ङ्सा परना त तोओ खेना। राप्नु।’#बेब ६:४-५ 31अनि अर्को महत्वको निसम् आग्याखे इ खेना— ‘लयको छिमेकिकायखे लयकाय रापो लेखाले राप्नु।’ #लेबि १९:१८ इ निसज्यो आग्यासय नाःतो महत्वको आग्याखे अरु नाःलेल।”
32अनि धर्मगुरुइ येसुकाय तोआथय, “गुरु, नाङ सहि नोःसा स्याउतेआ। नाङइ तोसास्यावोलेखा प्रभु परमेस्वरखे यातज्योले खेओ प्रभु खेसास्याउना, र ओउ बाहेक अरु परमेस्वरखे नाःलेल। 33निइ परमेस्वरकाय लयको जुदा ल्हुङतुकसय, जुदा मनसय र जुदा जिःङसय राप्सा परनातहि, अनि लयको छिमेकिकायखे लयइ लयकाय रापो लेखाले राप्सा परनातहि त दाह्यो कुरा सत्यले खेना। परमेस्वरकाय फुःओ भोक र अरु भोकलम बयोसयखे इ निसज्यो आग्या पालन जाह्ङोले नाःतो महत्वको स्याउना।”
34ओउ मान्ताइ बुद्दिमानि स्याउति जवाफ बयो चिःति येसुइ ओउकाय एतदाह्य्ति तोसास्यावा, “नाङखे परमेस्वरइ लयको रुवाङहाङ राज्य जाह्ङो स्याउपाना त दाह्यो कुराहाङ लगभग तयार मुतेना।”
ओउ बेलाहाङसय लोन्हेखे सु मान्तालमइमा येसुकाय अरु प्रस्न ह्वत्सा साहस जाह्ङ्निलि।
ख्रिस्तको बारेहाङ प्रस्न
(मति २२:४१-४६; लुका २०:४१-४४)
35येसुइ मान्तालमकाय मन्दिरको आङ्गनहाङ स्यानराय बइसा स्याउधय मुतोकहाङ ओउमयकाय ह्वत्सास्यावा, “धर्मगुरुलमइ मुक्ति बइसास्यावो ख्रिस्तकाय गतहाइति राजा दाउदको सन्तान त तोसा खाइनानि? 36धइतिदाह्य्सा पबित्र ग्वालामइ राजा दाउदकाय एतदाह्य्ति नोःताक्सास्यावा,
‘प्रभु परमेस्वरइ ङाको प्रभुकाय तोसास्यावा—
“ङाको ङोइसय # १२:३६ ङोइसय यहुदि रितिथिति अनुसार राजाको ङोइसयको थाउखे लोन्हेको राजा स्याउसाको लागि ज्योओ मान्ताकाय ताह्ङ्तो मान-सम्मान र अधिकारकुसि मुसाकाय गमो थाउ खेना (मति २२:४४; लुका २०:४२-४३; खबरदुत २:३४)। च्युःङ,
जबसम्म ङाइ नाङको बइरिलमकाय नाङको दोमपाकताले गम्ङल।”’ #
भजन ११०:१
37 दाउद लयइले मुक्ति बइसास्यावो ख्रिस्तकाय ‘प्रभु’ त दाह्य्ति तोओ मुना, अनि गतहाइति ख्रिस्त दाउदको सन्तान स्याउसा खाइनउ त?”
येसुइ लयको चेलालमकाय धर्मगुरुलमको बारेहाङ दर्कसास्यावो
(मति २३:१-३६; लुका २०:४५-४७)
मान्तालमको हुलइ येसुको स्यानरायकाय झाक्तिले साइतिमुओ खेइतो। 38स्यानराय बइधय येसुइ एतदाह्य्ति तोसास्यावा, “धर्मगुरुलमकसय होसियार स्याउति मुन। ओउमयपाय ब्रावो नाय लावति मान्तालमको वरिपरि घुमसा झाक्नय, र बजारको चोकलमहाङ मान्तालमइ लयकाय मान जाह्ङ्ति सेवपाताङ त म्हर्नय। 39अनि ओउमय सभाकिमलम र भोसलमको सम्मानित र मुख्य थाउहाङ च्युःङ्सा झाक्नय। 40ओउमयइ राङ्गि मोम्चोलमको किमलम लाति आःल्नानि, तर लयकाय धार्मिक मान्ता त दाह्य्ति छ्यान्साको लागि ज्याःङ्तो प्राथना जाह्ङ्नानि। इ कारनइ जाह्ङ्धार्ना परमेस्वरइ अरु मान्तालमकाय भन्दा ओउमयकाय माहा पेमातो दन्द बइसास्याउना।”
राङ्गि मोम्चोको भेति
(लुका २१:१-४)
41येसु मन्दिरको आङ्गनहाङ गमो भेति काओ बकासहाङ मान्तालमइ भेति काधयमुओ योति च्युःङ्तिमुसास्यावो खेतो। नाःतो धनि मान्तालमइ ओउ बकासहाङ नाःतो थेपो काधयमुओ येसुइ च्यउसास्यावा। 42तर यातचाक गरिब राङ्गि मोम्चो वाङाक्तिको ताम्बको मयो निसध्याक काआकान, ओउ थेपोको मोलखे माहा मइतोको खेतो। 43येसुइ लयको चेलालमकाय ब्रक्त गोताक्तिको तोसास्यावा, “दोङ्सिले ङाइ निङकाय तोनेनाङ्स, अरु जुदाइ काओ भन्दापाय इ गरिब राङ्गि मोम्चोइ नाःतो भेति काओ मुना। 44धइतिदाह्य्सा अरुइपाय लयकुस मुओ प्रसस्त धनलमसय मइतो काआकानि, तर इ गरिब राङ्गि मोम्चोइपाय गरिब स्याउतिमा लयकुस मुओ जुदाले काआकान। द्याह इकुसिपाय स्याक्साको लागि यातज्यो मयो ध्याकमा नाःलेल।”
Selectat acum:
मर्कुस 12: CHEP
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2024 (Active), Mother Tongue Translators Society and Wycliffe Bible Translators, Inc. All rights reserved.
