मर्कुस 11
11
येसु यरुसलेम सहरहाङ पोक्सास्यावो
(मति २१:१-११; लुका १९:२८-४०; युहन्ना १२:१२-१९)
1येसु र ओउको चेलालम यरुसलेम सहर दाह्साले लागओ बेलाहाङ, ओउमय बेथफागे र बेथानिया त तोओ गाउ द्याङ्तो जयतुन दान्दाहाङ दाहाकाय। अनि येसुइ लयको चेलालम मध्येको निसचाककाय एतदाह्य्ति ङ्हा ल्होक्सास्यावा, 2“ओउ पारिको गाउहाङ आल्ज। ओउ गाउहाङ निङ्जि पोक्तोक बेलाहाङ, देङेसम्म सुमा लह्न्धाङ्मालो गधाको यातज्यो चोः पेह्न्तिगमो निङ्जिइ ङाइतेनाजु। ओउकाय फानाक्तिको इताङ लात्ति वान्जु। 3यदि कुनय मान्ताइ ‘निङ्जिइ इकाय धइति फान्धय मुतेनाज?’ त दाह्य्ति ह्वत्तेनाज त खेया, ‘प्रभुकाय इ चाहओ मुना, र प्रभुइ इ रेह्न्तोले द्याःन्ति बइसास्याउना’ त दाह्य्ति तोजु।”
4ओहाङसयको ओउनिस येसुइ तोसास्यावो गाउहाङ आलाकाच, र यातज्यो किमको दह्य्लोको ङ्हा ल्याम छेउहाङ पेह्न्तिगमो यातज्यो गधाको चोः च्यवाकाचु। अनि ओउनिसइ ओउ गधाको चोःकाय फान्धय मुतोकहाङ, 5ओहाङ द्याङ्तो चिङ्तिमुओ केहि मान्तालमइ ओउनिसकाय ह्वताथाच, “ओउ गधाको चोःकाय फान्धय निङ्जि दोह हाइधय मुतेनाज?”
6येसुइ तोति ल्होक्सास्यावो लेखाले ओउनिसइ ओउमयकाय तोआकाचु, अनि ओउमयइमा ओउनिसकाय गधाको चोः आःल्सा अनुमति बयाथाच। 7ओहाङसयको ओउ चेलानिसइ गधाको चोःकाय येसुकहाङ लात्ति वानाकाचु, र लयनिसको क्रमनाय ओउ गधाको चोःको मल्ग न्हापाक्तिको ओहाङ येसुकाय च्युःङ्ताकाकाचु। 8नाःतो मान्तालमइ येसुको ङ्हा ल्यामहाङ लयको क्रमनाय न्हापाकानि, अनि गच्युक मान्तालमइखे राङहाङ आल्ति स्याउलालम तात्ति वानाक्तिको ल्यामहाङ न्हापाकानि। 9अनि येसुको ङ्हा वाहो र लोन्हे गुह्ल्ति वाहो मान्तालमखे एतदाह्य्ति हिह्सा फाःङाकानि,
“होसन्ना!#११:९ होसन्ना होसन्ना त तोओखे हिब्रु भासाको सब्द खेना। अनि “परमेस्वरको प्रसङ्सा स्याउपाना” त दाह्य्ति तोसाको लागि यहुदिलमइ ओउ सब्दको प्रयोग जाह्ङ्नितो। प्रभु परमेस्वरको प्रसङ्सा स्याउपाना।
प्रभु परमेस्वरको मय्ङहाङ वाङ्सास्यावोकाय परमेस्वरइ आसिसित जाह्ङ्सास्याउपाना।
10निको पुर्खा राजा दाउदको वाङ्साखेओ राज्यकाय परमेस्वरइ आसिक बइसास्याउपाना।
होसन्ना! जुदासय त्याःव लाङकाहाङ मुसास्यावो प्रभु परमेस्वरको प्रसङ्सा स्याउपाना।”#भजन ११८:२५-२६; १४८:१
11येसु यरुसलेमहाङ दाह्सास्यावापछि परमेस्वरको मन्दिरहाङ पोक्सास्यावा, र मन्दिरको वरिपरि योसास्यावा। तर राह्म स्याउतिखायोझ्यान्ते लयको चेलालमकाय लाताक्तिको येसु बेथानिया गाउताङ आल्सास्यावा।
येसुइ साय साइमालो न्याम्सि सिङकाय प्रःन्सास्यावो
(मति २१:१८-१९)
12स्याह्ङ्लो पल्त, बिहान सइबर च्योक्ति येसु लयको चेलालमकुस बेथानिया गाउसय यरुसलेम सहरताङ वाङ्सास्याउधय मुतोकहाङ येसु योङक्राइसास्यावा। 13अनि येसुइ मइतो लोक्तो मुतोकहाङले लोःमातइ ब्लिङो यातज्यो न्याम्सि सिङ च्यउसास्यावा, र केहि न्यामसाय दोःनाङ या त म्हर्ति योलाङ न्याम्सि सिङको बोतहाङ आल्सास्यावा। तर न्यामसाय सायो समयले खेमालोझ्यान्ते येसुइ लोःमात बाहेक न्यामसाय च्यउसा स्याउल। 14अनि येसुइ ओउ न्याम्सि सिङकाय तोसास्यावा, “द्याहहाङसय फेरि सु मान्तालमइमा नाङको साय जेःसा दोःजेलाम!” र इ कुराखे येसुको चेलालमइमा सायाकानि।
येसु परमेस्वरको मन्दिरहाङ आल्सास्यावो
(मति २१:१२-१७; लुका १९:४५-४८; युहन्ना २:१३-२२)
15जब येसु र ओउको चेलालम यरुसलेम सहरहाङ दाहाकाय, येसुखे परमेस्वरको मन्दिरको आङ्गनहाङ पोक्सास्यावा अनि ओहाङ विःन्धय र लेःधयमुओ जुदा मान्तालमकाय बाहिरताङ रुःन्ति ल्होक्सास्यावा। येसुइ थेपो सातओलमको तेबुललम#११:१५ थेपो सातओलमको तेबुललम यहुदिलमइ अरु देसको ध्याककाय मन्दिरको तिरो बइसा अथबा भोकको रुपहाङ बइसाको लागि प्रयोग जाह्ङ्सा अनुमति बयाक्निलि खेतो। अरु देसको ध्याकहाङखे ओउमयको मान्तालमइ देउताको रुपहाङ पुजा जाह्ङो देबि-देउता र राजालमको अङ्सि स्याउतो, ओउतझ्यान्ते जब अरु देसको मान्तालम यरुसलेमको मन्दिरहाङ पुजा जाह्ङ्लाङ वाङितो, ओउमयइ लयको ध्याककाय यहुदि ध्याककुस सातसा परइतो (मति २१:१२)। र धुकुर वाः विःनो मान्तालम च्युःङो कुर्चिलम प्लउति वाइसास्यावा। 16ओहाङसयको येसुइ सुकायमा परमेस्वरको मन्दिरको आङ्गन स्याउति मालताललम इताङ-उताङ लात्सा अनुमति बइसास्याउल। 17अनि येसुइ ओउमयकाय स्यान्धय तोसास्यावा, “परमेस्वरइ तोसास्यावो कुरा धर्मसास्त्रहाङ एतदाह्य्ति लेखओ मुना—
‘ङाको मन्दिर जुदा जातिको मान्तालमको लागि प्राथनाको किम स्याउसा परना।’ #
यस ५६:७
तर निङइपाय इकाय ‘कुःरेउलम नुको ल्युमपुक’ #
यर ७:११
ते जाह्ङ्तेआकानि।”
18येसुको स्यानराय सायो जुदा मान्तालम माहा जोक्तो ग्याह्ङोझ्यान्ते मुख्य पुजारिलम र धर्मगुरुलम येसुकुस रयाकाय। अनि जब येसुइ मन्दिरहाङ जाह्ङ्सास्यावो कामको बारेहाङ ओउमयइ सायाकानि, अनि ओउमयइ येसुकाय सात्साको लागि मउका योसा फाःङाकानि।
19राह्म स्यावापछि येसु लयको चेलालमकुस यरुसलेम सहरसय बाहिरताङ ग्ल्युह्ङ्ति पाह्य्सास्यावा।
न्याम्सि सिङको बोतको स्यानराय
(मति २१:२०-२२)
20स्याह्ङ्लो बिहान सइबरले येसु र ओउको चेलालम ल्यामहाङ आल्धयमुतोकहाङ, येसुइ प्रःन्सास्यावो न्याम्सि सिङको बोतकाय रुतदोहिले झ्यार्तिमुओ ओउको चेलालमइ च्यवाकानि। 21येसुइ तोसास्यावो कुराकाय सम्झति पत्रुसइ येसुकाय एतदाह्य्ति तोआकान, “अ गुरु, योसास्याउपाना, नाङइ योह प्रःन्सास्यावो न्याम्सि सिङको बोतपाय झ्यार्ति सिमाआ!”
22ओहाङसयको येसुइ लयको चेलालमकाय तोसास्यावा, “परमेस्वरहाङ बिस्वास गम्नु। 23दोङ्सिले ङाइ निङकाय तोनेनाङ्स, यदि कुनय मान्ताइ लयको मनहाङ सङ्खा जाह्ङ्मात लयइ तोओ कुरा दोङलेना त दाह्य्ति बिस्वास जाह्ङ्ति इ दान्दाकाय ‘नाङ च्योङ्ति समुन्द्रहाङ ग्लेलाङ आल’ त दाह्य्ति तोनउ त खेयाकायमा ओउको लागि ओउत स्याउलेना। 24ओउतझ्यान्ते ङाइ निङकाय तोनेनाङ्स, निङइ प्राथनाहाङ परमेस्वरकुसि दोहले तेतेनय त खेयाकायमा, ओउ कुरा ङाइ दोःलेनाङ त दाह्य्ति बिस्वास जाह्ङ्नु, परमेस्वरइ निङकाय ओउ कुरा बइसास्याउलेना। 25तर जब निङइ प्राथना जाह्ङ्तेनानि, यदि कुनय मान्ताइ निङको बिरोतहाङ केहि पेमातो जाह्ङो मुना त खेयाकायमा, ओउकाय छेमा बइनु। ओउत हाइतोकहाङ लाङकाहाङ मुसास्यावो निङको परमेस्वर आपाइमा निङको पाप छेमा जाह्ङ्सास्याउलेना। 26[तर यदि निङइ छेमा जाह्ङ्तेनिलि त खेयाकायखे, लाङकाहाङ मुसास्यावो निङको परमेस्वर आपाइमा निङको पाप छेमा जाह्ङ्सास्याउलेल।]#११:२६ नया नेम ङ्हापाय ग्रिक भासाहाङ लेखओ खेना र ओउबेलाहाङ मान्तालमइ जुदा कितापलम क्रुतइ लेखति तयार जाह्ङ्नितो। मान्तालमइ क्रुतइ लेखओ ङ्हाको कुनय-कुनय कितापलमहाङखे ओउ ताह्ङो कोस्थभित्र मुओ कुरालम लेखओ नाःल।”
येसुको अधिकारको बारेहाङ प्रस्न
(मति २१:२३-२७; लुका २०:१-८)
27येसु र ओउको चेलालम फेरिले यरुसलेम सहरताङ द्याह्नाकाय। येसु मन्दिरको आङ्गन वरिपरि वाह्सा स्याउधय मुतोकहाङ मुख्य पुजारिलम, धर्मगुरुलम र अरु पाको अगुवालम येसुकहाङ वाङाकाय। 28अनि ओउमयइ येसुकाय ह्वताकानि, “नाङइ दोह अधिकार दोःति इ जुदा कामलम जाह्ङ्धय मुतेना? अथबा ओउत जाह्ङ्सा अधिकार नाङकाय सुइ बइतेआ?”
29येसुइ ओउमयकाय जवाफ बइसास्यावा, “ङाइमा निङकाय यातज्यो प्रस्न ह्वत्नेनाङ्स, यदि निङइ ङाको प्रस्नको जवाफ बइतेनानाङ्स त खेया, ङाइ दोह अधिकार दोःति इ जुदा कामलम जाह्ङ्नाङ त दाह्यो कुरा ङाइ निङकाय तोनेनाङ्स। 30ङाकाय जवाफ बइनाङ्स, बप्तिस्मा बयो युहन्नाइ ओउ बप्तिस्मा बइसा अधिकार लाङकासय दोःआ या मान्ताकसय दोःआ?”
31ओउमय लयमय एतदाह्य्ति नोकाइसा फाःङाकानि, “द्याह निइ दोह तोनि? यदि निइ ‘लाङकासय दोःआ’ त दाह्य्ति तोनातह्य्नि त खेया, ‘निङइ धइति युहन्नाकाय बिस्वास जाह्ङ्तेनिलि?’ त दाह्य्ति ओउइ तोनातहि। 32तर ‘बप्तिस्मा बयो युहन्नाइ ओउ बप्तिस्मा बइसा अधिकार मान्ताकसय दोःआ’ त दाह्य्ति तोसामा निइ खाइतह्य्निलि।” (ओउमयखे मान्तालमइ केहि जाह्ङ्नातहि या त म्हर्ति रयो खेइतो, धइतिदाह्य्सा जुदा मान्तालमइ युहन्नापाय अगमबक्ता खेना त दाह्य्ति बिस्वास जाह्ङ्नितो।) 33ओउतझ्यान्ते ओउमयइ येसुकाय “युहन्नाइ ओउ बप्तिस्मा बइसा अधिकार गाहाङसय दोःआ निइ चिःङसुलु” त दाह्य्ति जवाफ बयाकानि।
अनि येसुइ ओउमयकाय तोसास्यावा, “ओउतखेया ङाइ गाहाङसय अधिकार दोःति इ जुदा कामलम जाह्ङ्नाङ त दाह्यो कुरा, ङाइमा निङकाय तोनेङसल।”
Selectat acum:
मर्कुस 11: CHEP
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2024 (Active), Mother Tongue Translators Society and Wycliffe Bible Translators, Inc. All rights reserved.
