मर्कुस 13
13
परमेस्वरको मन्दिर म्हेत्ति वाइना त दाह्य्ति येसुइ तोसास्यावो
(मति २४:१-२; लुका २१:५-६)
1येसु परमेस्वरको मन्दिरको आङ्गनसय बाहिर ग्ल्युह्ङ्सा स्याउतोकहाङ लयको चेलालम मध्येको यातचाकइ येसुकाय तोआथय, “अ गुरु, मन्दिरको इ पेओ किमलमकाय योसास्याउपाना। परमेस्वरको मन्दिरहाङ प्रयोग जाह्ङो बाङलम गच्युक ताह्ङ्तो मुना!”
2अनि येसुइ जवाफ बइसास्यावा, “दोह निङइ मन्दिरको इ ताह्ङो किमलम च्यउतेनानि? ओउखे जुदाले भङ्ति वाइलेना र यातज्याङ बाङको त्याःउसय अर्को बाङमा चह्य्ङ्ति मुलेल।”
समस्या र सतावतलम
(मति २४:३-१४; लुका २१:७-१९)
3ओहाङसयको लोन्हे येसु मन्दिरको पारि जयतुन दान्दाहाङ च्युःङ्ति मुसास्यावो खेतो। ओउबेलाहाङ पत्रुस, याकुब, युहन्ना र अन्द्रियास येसुकहाङ सुतुक्त वाङाकाय। 4अनि ओउमयइ येसुकाय ह्वताकानि, “अ गुरु, निकाय तोसास्याउपाना, इ जुदा कुरालम गल स्याउना, र इ कुरा दोङलाङ वाङ्साखेओ बेलाहाङ निको लागि दोह चिनो स्याउना?”
5येसुइ ओउमयकाय तोसास्यावा, “होसियार स्याउति मुन, निङ सुकसयमा धोका दोःजेलाम। 6धइतिदाह्य्सा नाःतो मान्तालम ङाको मय्ङ लेःति ‘ङाले ख्रिस्त खेनाङ’ त दाह्य्ति वाङ्नय, र ओउमयइ नाःतो मान्तालमकाय धोका बइलेनानि। 7अनि जब निङइ युद्ध र कायकायो कुराको बारेहाङ खबर साइतेनानि, निङ रइलाम! ओउतताह्ङो घतनालमखे स्याउसाले परना, तर ओउच्युक खेरलेखे सङ्सारको अन्तिम स्याउलेल। 8जातिको बिरोतहाङ जाति, र राज्यको बिरोतहाङ राज्य चिङलेनय। ल्हाउदयबाङको नाःतो थाउहाङ ल्याङलम आल्लेना, र अनिकाललम स्याउलेना। इ जुदा थोकलमखे मोम्चो आमाइ बालाख नाःसा लागधार्ना सुरुको दुख लेखा मात्र खेना।
9 जब एतताह्ङो घतनालम स्याउसा फाःङ्नउ, निङ होसियार स्याउन। निङकाय मान्तालमइ पक्रति अदालतहाङ आःल्तेनय र सभाकिमलमहाङ घान्तेनय। निङ ङाको मान्ता स्यावोझ्यान्ते, मान्तालमइ निङकाय सासकलम र राजालमको ङ्हा आःल्ति चिङताक्तेनय। अनि ओउ समयखे ओउमयकाय ङाको बारेहाङ तोसाकाय निङको लागि मउका स्याउलेना। 10तर सङ्सारको अन्तिम स्याउसासय ङ्हाखे, जुदा मान्तालमकाय परमेस्वरको पेओ खबर प्रचार जाह्ङ्सा परलेना। 11तर जब मान्तालमइ निङकाय पक्रति अदालतहाङ आःल्तेनय, द्याह लयकाय दल्ताक्साको लागि दोह नोःसा त दाह्य्ति जुगाङमा लिह्लाम। ओउबेलाहाङ परमेस्वरइ निङकाय दोह तोसास्याउना ओउले नोःन, धइतिदाह्य्सा ओउ बेलाहाङ निङइ लयको मनको कुरा नोःतेइलि, तर पबित्र ग्वालाम निङ दुवारा नोःसास्याउलेना। 12मान्तालमइ लयको हउचोङ-पुःचोङ र नाःचोङलमकाय धोका बइति अरुकाय सात्ताक्नानि। अनि ओउतले आपा-आमालमइ लयको चोः चोःद्याङलमकाय र चोः चोःद्याङलमइ लयको आपा-आमालमकाय धोका बइति सात्ताक्नानि। 13निङइ ङाकाय बिस्वास जाह्ङोझ्यान्ते जुदा मान्तालमइ निङकाय हेला जाह्ङ्तेनय। तर यदि निङ लयको रुवाङको अन्तिम समयसम्म ङाकहाङ बिस्वासिलो स्याउति मुतेनय त खेया, निङखे दल्लेतेनय।”#मति १०:२२ख; २४:१३
येसुइ लयको चेलालमकाय लोन्हे स्याउसाखेओ ताह्ङो दुखको बारेहाङ दर्कसास्यावो
(मति २४:१५-२८; लुका २१:२०-२४)
14येसुइ ओउमयकाय तोसास्यावा, “गाहाङ स्याउसाले स्यावाक्ल, कुनय दिन ओहाङ निङइ माहा रइसिओ थोक#१३:१४ माहा रइसिओ थोक इ सब्दलमको मानेखे कुनय मान्तालमइ यरुसलेमको मन्दिरहाङ मुर्ति गम्तोकहाङ मन्दिर असुद्ध स्याउना त दाह्य्ति तोओ खेना। इ कुराको बारेहाङखे ङ्हाखाले दानिएल अगमबक्ताइ लयको कितापहाङ भबिस्यबानि जाह्ङो खेतो (दानिएल ११:३१; १२:११)। च्यउतेनानि। (इ कुरा पह्रओ जुदा मान्तालमइ इको माने पेतोकुसि चिःपानानि।) ओउतस्याउतोक बेलाहाङ यहुदिया छेत्रहाङ याको मान्तालमखे दान्दाताङ नुक्लाङ क्रउपनय। 15किमको त्याःउसय लेङो छानाहाङ मुओ मान्तालमखे काःम्ताङ ग्ल्युह्ङ्ति मालताललम लेःलाङ किमभित्रमा पोक्जेलाम। 16खेतराङखा मुओ मान्तालममा लयको क्रमनाय लेःलाङ किमताङ द्याह्न्जेलाम। 17ओउतोक बेलाहाङ चोः लातो मोम्चोलम र दुत तुङो चोःको आमालमकाय गच्युक दुक्तो स्याउलेना। 18एतताह्ङो घतना झ्युङकाले समयहाङ स्याउलाम त दाह्य्ति परमेस्वरहाङ प्राथना जाह्ङ्नु। 19धइतिदाह्य्सा ओउ दिनलमहाङखे माहा पेमातो दुख-कस्त स्याउलेना। ओउतपाय परमेस्वरइ जुदा सङ्सार स्रिस्ति जाह्ङ्सास्यावो समयहाङसय देङेसम्ममा स्यावो नाःलेल, र ओउत फेरि गलमा स्याउलेल। 20यदि प्रभु परमेस्वरइ ओउ माहा पेमालो दुख-कस्तको समयकाय त्युन्तो जाह्ङ्सा स्याउमालो खेया, सु मान्तालममा जिउदो स्याउलेआकिलि। तर लयइ छ्युह्ङ्सास्यावो बिसेस मान्तालमको कारनइ जाह्ङ्धार्ना ओउ दिनलमकाय परमेस्वरइ त्युन्तो जाह्ङ्सास्यावो मुना।
21 ओउ बेलाहाङ यदि कुनय मान्ताइ ‘योनु, ख्रिस्तपाय इहाङ मुना’ अथबा ‘ओहाङ मुना’ त दाह्य्ति निङकाय तोतेनय त खेयामा, निङइ ओउ कुराकाय बिस्वास जाह्ङ्लाम। 22धइतिदाह्य्सा स्याताहा ख्रिस्तलम र स्याताहा अगमबक्तालम थालेनय, र ओउमयइ ग्याह्ङ्सिओ चिनो र कामलम जाह्ङ्लेनानि। अनि ओउमयइ खाइच्युकसम्म परमेस्वरको छ्युह्ङो बिसेस मान्तालमकायमा धोका बइलेनानि। 23ओउतझ्यान्ते निङ होसियार स्याउति मुन, धइतिदाह्य्सा समय स्याउसासय ङ्हाखाले ङाइ निङकाय जुदा कुरा तोतिखायो मुनाङ।”
ङा मान्ताको चोः वाङ्साखेओ समय
(मति २४:२९-३५; लुका २१:२५-३३)
24 “ओउ दुख-कस्तको समयलम लोन्हे,
‘न्याम च्याक्तो स्याउलेना,
र लाह्इ थोङो बइलेउलु।
25 फेलबाङसय कारालम ग्लेलेनय,
र फेलबाङको जिःङकालि थोकलममा माहा रइसितो रिह्ङ्लेनय।’ #
यस १३:१०; ३४:४; योए २:१०
26 ओहाङसयको जिःङ र महान् महिमाकुस ङा मान्ताको चोःकाय मुसहाङ वाङ्धयमुओ जुदा मान्तालमइ च्यउनानि। #
दान ७:१३
27अनि ओउतोक बेलाहाङ ङाइ लाङकादुतलमकाय ल्होक्नाङ, अनि ओउमयइ सङ्सारको जुदा थाउसय ङाइ छ्युह्ङो ङाको मान्तालमकाय हुम्ति वान्नानि।”
28 “द्याह, न्याम्सि सिङकसय केहि स्यानराय लेःनु। जब न्याम्सि सिङको दालालमसय म-मयो लोःमातलम तुःर्सा फाःङ्नउ, अनि धाह्काले समय दाह्तिवाङा त दाह्य्ति निङइ चिःतेनानि। 29ओउतहाइतिले जब ङाइ तोओ एतताह्ङो घतनालम स्यावो निङइ च्यउतेनानि, ङा द्याह्न्ति वाङ्साखेओ समय द्याङ्तोले दाहो मुना त दाह्य्ति निङइ चिःसा खाइतेनानि। 30दोङ्सिले ङाइ निङकाय तोनेनाङ्स, ङाइ तोओ इ जुदा कुरालम पुत्माच्युकसम्म इ पुस्ताको मान्तालम सिति आल्लेइलि। 31फेलबाङ र ल्हाउदयबाङ अलप्ति ज्याल्लेना, तर ङाको आखर गलमा अलप्लेल।”
ङा मान्ताको चोः द्याह्न्ति वाङ्साखेओ दिन र समय सुइमा चिःसा खाइनिलि
(मति २४:३६-४४)
32 “ङा मान्ताको चोः द्याह्न्ति वाङ्साखेओ दिन र समय सुइमा चिःसा खाइनिलि, न लाङकादुतलमइ चिःनानि, न ङा लयइले चिःनाङ। ओउ कुरापाय ङाको लाङका आपाइ मात्र चिःसास्याउना। 33ओउतझ्यान्ते होसियार स्याउति मुन, र प्राथना जाह्ङ्नु,#१३:३३ र प्राथना जाह्ङ्नु कुनय-कुनय क्रुतइ लेखओ कितापलमहाङखे इ सब्द लेखओ नाःल। धइतिदाह्य्सा ओउ समय गल वाङ्ना त दाह्यो कुरा निङइ चिःतेनिलि।#लुक २१:३४-३६ 34ङा मान्ताको चोः वाङ्साखेओ समयखे लोक्तोको यात्राहाङ ग्ल्युह्ङो यातचाक मान्ताको विनराय लेखा खेना। जब ओउ मान्ता किमसय ग्ल्युह्ङा, ओउइ लयको हरेक नोकरकाय ओउमयइ जाह्ङ्सा परओ कामलम जिम्मा लावति बयाकान, अनि लय द्याह्न्ति पाह्य्ति वाङ्साखेओ समय योति मुसाको लागि पालेकाय आग्या जाह्ङाकान। 35ओउतझ्यान्ते होसियार स्याउति मुन, धइतिदाह्य्सा ङा, किमको मालिक गल द्याह्न्ति वाङ्नाङ त दाह्यो कुरा निङइ चिःतेनिलि। ङा राह्म, अथबा ल्हाक-याह्दिङ, अथबा बिहान, अथबा न्यामथोङखामा द्याह्न्ति पाह्य्ति वाङ्सा खाइनाङ। 36अचानक ङा द्याह्न्ति वाङ्तोकहाङ, ङाइ निङकाय एःन्तिमुओ क्रुस्सा परजेलाम। 37ङाइ निङकाय तोओ कुरा अरु जुदा चेलालमकायमा तोलेनाङ— होसियार स्याउति मुन।”
Selectat acum:
मर्कुस 13: CHEP
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2024 (Active), Mother Tongue Translators Society and Wycliffe Bible Translators, Inc. All rights reserved.
