Luka 14

Shabbat kúninde shıpa beriw

1Bir Shabbat kúni Iysa pariseylerdiń bir basshısınıń úyine awqatqa kelgende, hámme Onı baqlap otırdı. 2Sonda sarsıq keselden azap shekken bir adam Iysanıń aldına keldi. 3Iysa diniy muǵallimler menen pariseylerden:

– Shabbat kúni awırıw adamǵa shıpa beriw nızamǵa tuwrı kele me yamasa tuwrı kelmey me? – dep soradı.

4Olar úndemedi. Sonda Iysa sol adamǵa qolın tiygizip shıpa berdi de, qaytarıp jiberdi. 5Sońınan olarǵa bılay dedi:

– Arańızdaǵı birińizdiń balańız yamasa ógizińiz qudıqqa túsip ketse, Shabbat kúni bolıwına qaramastan, onı dárriw shıǵarıp almaysız ba?

6Olar Iysanıń bul gápine juwap bere almadı.

Ózińdi joqarı tutpa!

7Qonaqlardıń ózlerine tórdegi orınlardı tańlap atırǵanın kórgen Iysa olarǵa mınaday bir tımsal ayttı:

8– Seni birew neke toyına shaqırǵanda, tórdegi orınǵa otırma. Shaqırılǵanlar arasında sennen de sıylıraq birew bolıwı múmkin. 9Olay etpeseń, ekewińizdi de shaqırǵan adam saǵan kelip: «Mına adamǵa ornıńdı ber» dese, sen uyalıp, esik bettegi orınǵa otırıwǵa májbúr bolasań. 10Sonlıqtan qonaqqa shaqırılǵanıńda, barıp esik bettegi orınǵa otır. Sonda seni qonaqqa shaqırǵan adam janıńa kelip: «Dostım, tórge shıǵıp otır», – deydi. Solay etseń, óziń menen otırǵan hár bir adamnıń aldında abırayǵa iye bolasań. 11Sebebi kim de kim ózin joqarı tutsa, ol pásletiledi, kim de kim ózin pás tutsa, ol mártebeli qılınadı.

12Sońınan Iysa Ózin shaqırǵan úy iyesine:

– Túski yamasa keshki zıyapat bergenińde doslarıńdı, tuwısqanlarıńdı, aǵayinlerińdi, ya bay qońsılarıńdı shaqırma. Óytkeni olay etseń, olar da seni qonaqqa shaqırıp, saǵan qaytaradı. 13Kerisinshe, zıyapat bergenińde jarlı, mayıp, aqsaq hám soqırlardı shaqır. 14Solay etseń, sen baxıtlı bolasań. Sebebi olar saǵan qaytara almaydı. Biraq haq adamlar qayta tirilgende, Quday saǵan qaytaradı, – dedi.

Toyǵa mirát etilgenler

(Mat 22:1-10)

15Iysa menen dasturxan átirapında otırǵanlardıń biri bul sózlerdi esitip, Oǵan:

– Qudaydıń Patshalıǵında duz tatqan adam baxıtlı, – dedi.

16Iysa oǵan bılay dedi:

– Bir adam úlken zıyapat berip, kóp qonaq shaqırıptı. 17Awqatlanatuǵın waqıt bolǵanda: «Kelińler, hámmesi tayar boldı», – dep aytıw ushın, mirát etilgenlerge óz xızmetshisin jiberipti. 18Biraq hámmesi oylasıp qoyǵanday, sıltaw taba baslaptı. Birinshisi oǵan: «Men jer satıp aldım, sonı barıp kóriwim kerek, ótinemen, meni keshir», – depti. 19Al ekinshisi: «Men bes jup ógiz satıp aldım, solardı sınap kóriwge baratırman. Ótinemen, meni keshir», – depti. 20Úshinshisi de: «Men tap jańa úylendim, sonlıqtan bara almayman», – depti. 21Xızmetshi qaytıp kelip, bulardıń hámmesin xojayınına aytıp beripti. Úy iyesi ashıwlanıp, xızmetshisine: «Tez bar da, qalanıń úlken-kishi kóshelerin aralap, jarlı, mayıp, soqır hám aqsaq adamlardı bul jerge alıp kel», – dep buyırıptı. 22Sońınan xızmetshi: «Xojayın, buyırǵanlarıńızdı orınladım, biraq jáne de bos orın bar», – depti. 23Xojayın xızmetshisine: «Jollarǵa hám awıl soqpaqlarına barıp, adamlardı bul jerge keliwge kóndir. Sonda úyim adamlarǵa tolı boladı. 24Óytkeni sizlerge aytatuǵınım: mirát etilgenlerdiń hesh qaysısı da meniń zıyapatımnan duz tatpaydı#Luk 14:24 Bazı qoljazbalarda mına sózler de bar: «Óytkeni mirát etilgenler kóp, al tańlap alınǵanlar az».», – depti.

Iysaǵa shákirt bolıwdıń shárti

(Mat 10:37-38)

25Iysa menen birge kóp xalıq júrgen edi. Iysa olarǵa burılıp bılay dedi:

26– Kim de kim Maǵan kelip, Meni ata-anasınan, hayalınan, balalarınan, aǵa-inisinen, apa-qarındaslarınan, hátte, óz ómirinen de artıq kórmese, ol Meniń shákirtim bola almaydı. 27Kim de kim óz atanaq aǵashın arqalap, Meniń izimnen júrmese, ol Meniń shákirtim bola almaydı. 28Arańızdaǵı birińiz minara qurmaqshı bolsa, onı pitkeriw ushın qárejet jete me dep, aldın ala otırıp, esaplap shıqpay ma? 29Olay etpese, tiykarın salıp bolıp, qurıp pitkere almay qalsa, bunı kórgenler onıń ústinen kúlip: 30«Mına adam qurıwdı baslap, pitkere almadı», – deydi.

31Bir patsha basqa patshaǵa qarsı urısqa shıǵajaq bolsa, ózimniń on mıń áskerim menen, kiyatırǵan qarsılasımnıń jigirma mıń áskerine qarsı tura alaman ba dep, aldın ala otırıp oylanıp almay ma? 32Kúshi jetpeytuǵın bolsa, sol patsha ele uzaqta bolǵanda oǵan elshi jiberip, tınıshlıq pitimin jasawdı soraydı. 33Solay etip, sizlerdiń hár birińiz ózińizge tiyisli hámme zattan waz keshpeseńiz, Meniń shákirtim bola almaysız.

34Duz – jaqsı nárse. Biraq duz óz kúshin joytsa, onı qalay jáne shorlı qılıwǵa boladı? 35Ol topıraqqa da, qıy bolıwǵa da jaramaǵanlıqtan, sırtqa ılaqtırıp taslanadı. Qulaǵı bar adam jaqsılap esitip alsın!

Selectat acum:

Luka 14: QrqMK22

Evidențiere

Partajează

Copiază