Luka 13

Táwbe etiw haqqında

1Sol waqıtta geybirewler Iysaǵa kelip, Pilattıń galilalılardı óltirtkeni hám olardıń qanın ózleri shalǵan qurbanlıqları menen aralastırıp taslaǵanı haqqında aytıp berdi. 2Iysa olarǵa:

– Usınday apatqa ushıraǵanlıqtan, bul galilalılardı basqa barlıq galilalılardan gúnalıraq, dep oylaysızlar ma? 3Yaq, deymen sizlerge. Eger táwbe etpeseńler, hámmeńiz de usılay nabıt bolasızlar. 4Ústilerine Siloam minarası qulap ólgen on segiz adam Erusalimde jasawshı adamlardıń hámmesinen ayıplıraq edi, dep oylaysızlar ma? 5Yaq, deymen sizlerge. Eger táwbe etpeseńler, hámmeńiz de usılay nabıt bolasızlar, – dedi.

6Sońınan Iysa mınaday tımsal aytıp berdi:

– Bir adamnıń júzim baǵında egilgen ánjir aǵashı bolıptı. Adam onnan miywe alıw ushın kelipti, biraq taba almaptı. 7Sonda ol baǵmanǵa: «Mine, men úsh jıldan beri bul ánjir aǵashınan miywe alıw ushın kelemen, biraq taba almayman. Onı shawıp tasla! Nege ol bosqa orın iyelep tur?» – depti. 8Biraq baǵman oǵan juwap berip: «Xojayın, onı bıyıl da qaldırıń. Men onıń átirapın qazıp, qıy tógeyin. 9Múmkin, endigi jılı miywe berip qalar. Eger bermese, shawıp taslarsız», – depti.

Iysanıń búkir hayalǵa shıpa beriwi

10Bir Shabbat kúni Iysa májilisxanalardıń birinde tálim berip otırǵan edi. 11Sol jerde on segiz jıldan beri awırıw ruwxınan qıynalǵan bir hayal bar edi. Ol eki búklenip qalǵan bolıp, boyın hesh tik uslay almas edi. 12Iysa onı kórip, janına shaqırıp aldı da, oǵan:

– Hayal, sen dártińnen azat bolasań, – dep, 13onıń ústine qolların qoyǵanda, hayal sol waqıtta-aq boyın tiklep, Qudayǵa alǵıslar ayta basladı.

14Sonda májilisxana basshısı Iysanıń Shabbat kúni shıpa bergenine ashıwı kelip, xalıqqa:

– Jumıs islew ushın altı kún bar. Shıpa alıwǵa Shabbat kúni emes, al sol kúnleri kelińler, – dedi.

15Iyemiz oǵan bılay dep juwap berdi:

– Háy, eki júzliler! Shabbat kúni hár birińiz ógizińizdi yamasa eshegińizdi qoradan sheship alıp, suwǵarıwǵa aparmaysız ba? 16On segiz jıldan beri shaytan baylap qoyǵan Ibrayımnıń mına qızın Shabbat kúni bul baylawdan azat qılıw kerek emes pe edi?

17Iysa usı sózlerdi aytqanda, Oǵan qarsılıq kórsetkenlerdiń hámmesi uyalıp qaldı. Al pútkil xalıq Onıń barlıq ullı islerine quwandı.

Qıshqıl tuqım hám ashıtqı

(Mat 13:31-33; Mrk 4:30-32)

18Sońınan Iysa:

– Qudaydıń Patshalıǵı nege uqsaydı? Onı nege megzeteyin? 19Ol – bir adamnıń óz baǵına ekken qıshqıl tuqımına#13:19 Qıshqıl tuqım – gorchica. uqsaydı. Ol ósip, terek boladı hám shaqalarına aspan qusları ushıp kelip, uya saladı, – dedi.

20Iysa jáne bılay dedi:

– Qudaydıń Patshalıǵın nege uqsatayın? 21Ol bir hayaldıń úsh samar qamırǵa az ǵana ashıtqı salǵanda, barlıq qamırdı ashıtatuǵın ashıtqısına uqsaydı.

Tar qapıdan kirińler!

(Mat 7:13-14, 21-23)

22Erusalimge qaray jol alǵan Iysa qala hám awıllardı aralap, tálim berip júrdi. 23Bir adam Iysadan:

– Iyem, tek az ǵana adam qutqarıla ma? – dep soradı.

24Sonda Iysa xalıqqa bılay dedi:

– Tar qapıdan kiriwge bar kúshińizdi salıńlar! Sebebi sizlerge aytatuǵınım: kópler kiriwge tırısadı, biraq kire almaydı. 25Úydiń Iyesi turıp qapını jawıp taslaǵanda, sizler sırtta turıp, qapını qaǵa baslap: «Iyem! Bizlerge qapını ash!» – deysizler. Biraq Ol sizlerge: «Men sizlerdi tanımayman hám qayaqtan kelgenińizdi bilmeymen», – dep juwap beredi. 26Sonda sizler: «Bizler Seniń kóz aldıńda iship-jedik. Sen bizlerdiń kóshelerimizde tálim beretuǵın ediń-ǵo», – dep aytasızlar. 27Biraq Ol: «Sizlerge aytatuǵınım: Men sizlerdi tanımayman hám qayaqtan kelgenińizdi bilmeymen. Háy, jamanlıq qılıwshılardıń hámmesi Mennen awlaq ketińler!» – deydi.

28Sizler Ibrayımnıń, Ísaqtıń, Yaqıptıń hám barlıq payǵambarlardıń Qudaydıń Patshalıǵında júrgenin, al ózlerińizdiń sırtqa quwıp shıǵarılǵanıńızdı kórgenińizde jılap, pushayman jeysizler. 29Shıǵıstan hám batıstan, arqadan hám qubladan adamlar kelip, Qudaydıń Patshalıǵında dasturxan átirapına otıradı. 30Mine, sonda sońǵılardıń geybirewleri birinshiler, al birinshilerdiń geybirewleri sońǵılar boladı.

Iysanıń Erusalim tuwralı qayǵırıwı

(Mat 23:37-39)

31Sol waqıtta bir neshe pariseyler kelip, Iysaǵa:

– Bul jerden ket, Hirod Seni óltirmekshi, – dedi.

32Iysa olarǵa bılay dedi:

– Barıp, sol túlkige aytıńlar: Men búgin hám erteń jinlerdi quwıp shıǵarıp, awırıwlarǵa shıpa beremen, al úshinshi kúni isimdi juwmaqlayman. 33Solay bolsa da, Men búgin, erteń hám arǵı kúni Óz jolım menen júriwim kerek. Óytkeni hesh bir payǵambarǵa Erusalimnen basqa jerde óliwge bolmaydı.

34Oh, Erusalim, Erusalim! Payǵambarlardı óltiriwshi, Qudaydıń saǵan jibergenlerin tas boran qılıwshı qala! Óz shójelerin qanatınıń astına alǵan mákiyen sıyaqlı, Men de seniń balalarıńdı neshe ret jıynamaqshı boldım, biraq sizler qálemedińler. 35Mine, úyińizdi Quday taslap ketedi. Sizlerge aytatuǵınım: «Jaratqan Iyeniń atı menen keletuǵın jarılqansın!»#13:35 Zab 117:26. – dep aytqanlarıńızǵa deyin Meni kórmeysizler.

Selectat acum:

Luka 13: QrqMK22

Evidențiere

Partajează

Copiază