Luka 11

Duwa etiw haqqında

(Mat 6:9-13; 7:7-11)

1Kúnlerdiń birinde Iysa bir jerde duwa etip atırǵan edi. Duwa etip bolǵannan soń, shákirtleriniń biri Oǵan:

– Iyem! Yaqıya óz shákirtlerine duwa etiwdi úyretkenindey, Sen de bizlerge duwa etiwdi úyret, – dedi.

2Iysa olarǵa bılay dedi:

– Duwa etkenińizde bılay deńler:

Áke!#Luk 11:2 Áke! – Bazı qoljazbalarda «Aspandaǵı Ákemiz!»

Seniń atıń muxaddes bola bersin.

Seniń Patshalıǵıń kelsin#Luk 11:2 Bazı qoljazbalarda mına sózler de bar: «Aspanda orınlanǵanı sıyaqlı, jerde de Seniń erkiń orınlansın»..

3Bizlerge hár kúni kúndelikli nanımızdı bere gór.

4Gúnalarımızdı keshire gór.

Óytkeni bizler de ózlerimizge gúna qılǵan hár bir adamdı keshiremiz.

Bizlerdiń azǵırılıwımızǵa jol qoyma#Luk 11:4 Bazı qoljazbalarda mına sózler de bar: «Shaytannan qutqara gór»..

5Iysa olarǵa jáne bılay dedi:

– Aytayıq, arańızdaǵı birińizdiń dostısı bar. Ol yarım aqshamda dostısına barıp: «Dostım! Maǵan qarızǵa úsh nan berip tur. 6Saparda júrgen bir dostım kelip qalıp edi, onıń aldına qoyatuǵın hesh nársem joq», – depti. 7Sonda dostısı ishten: «Meniń tınıshımdı alma. Esigim beklewli. Balalarım da meniń menen birge tósekte jatır. Ornımnan turıp, saǵan hesh nárse bere almayman», – dep juwap beripti. 8Biraq sizlerge aytatuǵınım: ornınan turıp, dostı bolǵanı ushın soraǵanın bermese de, izinen qalmay soraǵanı sebepli ol ornınan turıp, qansha sorasa, sonsha beredi. 9Sonlıqtan sizlerge aytatuǵınım: sorańlar, sizlerge beriledi. Izleńler, tabasızlar. Esikti qaǵıńlar, ol sizlerge ashıladı. 10Óytkeni soraǵan hár bir adam aladı, izlegen tabadı, esik qaqqanǵa ashıladı. 11Arańızda qaysı áke balası#Luk 11:11 Bazı qoljazbalarda «…nan sorasa, oǵan nan ornına tas beredi. Ya bolmasa» degen sózler de bar. balıq sorasa, oǵan balıq ornına jılan beredi? 12Máyek sorasa, oǵan shayan beredi? 13Solay etip, ózlerińiz jaman bola tura, balalarıńızǵa jaqsı sıylar beriwdi bilseńiz, onda aspandaǵı Áke de Ózinen soraǵanlarǵa Muxaddes Ruwxtı beriwi sózsiz.

Iysa hám Belzebúl

(Mat 12:22-30; Mrk 3:20-27)

14Bir kúni Iysa bir adamnan gúńelek jindi quwıp shıǵardı. Jin shıqqannan soń, gúńelek adam sóyley baslaǵanda, xalıq hayran qaldı. 15Biraq olardıń geybirewleri: «Ol jinlerdi jinlerdiń baslıǵı Belzebúl-shaytannıń kúshi menen quwıp shıǵarıp júr», – desti.

16Al basqaları Iysanı sınap kórmekshi bolıp, aspannan káramatlı belgi kórsetiwdi talap etti. 17Biraq Iysa olardıń oyların bilip, bılay dedi:

– Óz ara qarsı bolıp bólingen hár bir patshalıq joq boladı. Óz ara qarsı bolıp bólingen hár bir úy qulaydı. 18Eger shaytan óz ara qarsı bolıp bólinse, onıń patshalıǵı qalay saqlanadı? Sizler Meni: «Jinlerdi Belzebúl-shaytannıń kúshi menen quwıp shıǵarıp júr», – deysizler. 19Eger Men jinlerdi Belzebúl-shaytannıń kúshi menen quwıp shıǵarıp júrgen bolsam, onda sizlerdiń shákirtlerińiz olardı kimniń kúshi menen quwıp shıǵarıp júr? Solay etip, olar sizlerdiń nadurıs ekenińizdi áshkaralaydı. 20Biraq, eger Men jinlerdi Qudaydıń kúshi menen quwıp shıǵarıp atırǵan bolsam, onda sizlerge Qudaydıń Patshalıǵınıń jetip kelgeni. 21Tis-tırnaǵına deyin qurallanǵan bir kúshli adam óz úyin qorǵasa, onıń mal-múlki aman boladı. 22Al onnan da kúshlirek birew oǵan hújim jasap, onı jeńse, onıń isengen barlıq quralların tartıp alıp, oljasın bólistiredi.

23Kim de kim Meniń menen birge bolmasa, ol Maǵan qarsı. Kim de kim Meniń menen birge jıynamasa, ol shashadı.

24Jawız ruwx adamnan shıqqannan keyin suwsız jerlerdi gezip, dem alıwǵa orın izleydi. Taba almaǵannan soń, ol: «Shıqqan úyime qaytayın», – deydi.

25Qaytıp kelgende, úydiń tazalanıp hám jıynalıp turǵanın kóredi. 26Sonda ol barıp, ózinen de jawız jeti ruwxtı ertip keledi de, kirip sol úyde turadı. Solay etip, sol adamnıń sońǵı awhalı burınǵıdan da jaman boladı.

Haqıyqıy baxıt

27Iysa usılardı aytıp turǵanda xalıq ishinen bir hayal dawıslap, Oǵan:

– Seni kótergen qursaq hám Seni emizgen kókirekler qanday baxıtlı! – dedi.

28Biraq Iysa oǵan:

– Qudaydıń sózin tıńlap, onı orınlawshılar onnan da baxıtlı! – dedi.

Káramatlı belgi haqqında

(Mat 12:38-42; Mrk 8:12)

29Xalıq jıynalıp, kóbeyip atırǵanda, Iysa olarǵa bılay dep ayta basladı:

– Bul áwlad – jaman áwlad! Ol káramatlı belgi talap etpekte. Biraq oǵan Yunustıń káramatlı belgisinen#11:29 Yuns 2:1, 11. basqası kórsetilmeydi. 30Yunus Nineviya turǵınları ushın qanday belgi bolsa, Adam Ulı da bul áwlad ushın sonday belgi boladı. 31Qubladaǵı hayal patsha húkim shıǵarılatuǵın qıyamet-qayım kúni usı áwlad penen birge ornınan turıp, bul áwladtıń adamların ayıplaydı. Sebebi ol Sulaymannıń danalıǵın esitiw ushın, jer betiniń arǵı shetinen kelgen edi#11:31 3Pat 10:1-10.. Biraq bul jerde Sulaymannan da ullı Birew bar. 32Nineviya turǵınları húkim shıǵarılatuǵın qıyamet-qayım kúni usı áwlad penen birge ornınan turıp, bul áwladtıń adamların ayıplaydı. Óytkeni Yunus járiyalaǵanda, olar táwbe etti#11:32 Yuns 3:6-9.. Biraq bul jerde Yunustan da ullı Birew bar.

Jaqtılıq hám kóz haqqında

(Mat 5:15; 6:22-23)

33– Hesh kim shıranı jaǵıp, onı jasırın jerge yamasa ıdıstıń astına qoymaydı. Kerisinshe, kirgenler jaqtını kórsin dep, onı shıra qoyǵıshqa qoyadı. 34Kóziń – deneńniń shıraǵı. Eger kóziń saw bolsa, pútkil deneń de jarıq boladı. Eger kóziń saw bolmasa, deneń de pútkilley qarańǵı boladı. 35Sonlıqtan da, abayla, ishińdegi jarıq qarańǵı bolmasın! 36Eger pútkil deneń jarıq bolıp, hesh bir qarańǵı jeri bolmasa, shıra seni óz nurı menen jaqtı qılǵanı sıyaqlı, deneń pútkilley jarıq boladı.

Iysanıń dindarlardı ayıplawı

(Mat 23:1-36; 12:38-40; Luk 20:45-47)

37Iysa usı sózlerdi aytıp turǵanda, bir parisey Onı úyine awqatqa shaqırdı. Iysa onıń úyine kirip, dasturxanǵa otırdı. 38Iysanıń awqattan burın qol juwmaǵanın kórip, parisey tań qaldı. 39Sonda Iyemiz oǵan:

– Háy pariseyler, sizler tabaq-keseniń sırtın tazalaysızlar, biraq óz ishińiz nápsiqawlıq hám jawızlıqqa tolı. 40Háy, aqılsızlar, sırtın jaratqan ishin de jaratqan emes pe? 41Jaqsısı, ıdıslarıńızdıń ishindegiden qayır-sadaqa berińler, sonda sizler ushın hámme nárse taza boladı.

42Hásiret shegesizler, pariseyler! Sizler jalbız, iyisli shóp hám hár túrli palız ónimleriniń onnan birin beresizler, biraq ádillikke hám Qudaydıń súyispenshiligine biypárwa qaraysızlar. Bunı da islep, onı da qaldırmawıńız kerek edi. 43Hásiret shegesizler, pariseyler! Sizler májilisxanalarda sıylı orında otırǵandı, bazar maydanlarında ózlerińizge sıylap sálem bergendi jaqsı kóresizler. 44Sizler hásiret shegesizler! Sebebi sizler adamlar bilmey ústilerinen basıp ótetuǵın belgisiz qábirlerge uqsaysızlar, – dedi.

45Sonda nızam muǵallimleriniń biri Iysaǵa:

– Ustaz! Sen bul sózlerdi aytıp, bizlerdi de qapa qılıp atırsań, – dedi.

46Biraq Iysa:

– Sizler de hásiret shegesizler, nızam muǵallimleri! Óytkeni sizler kóterip júriwge qıyın júklerdi adamlarǵa kótertip, ózlerińiz olardı kóterisiwge barmaǵıńızdı da qozǵamaysızlar. 47Sizler hásiret shegesizler! Sebebi sizler ata-babalarıńız óltirgen payǵambarlarǵa mazarlar ornatasızlar. 48Solay etip, sizler ata-babalarıńızdıń islerin maqullap, olardı dálilleysizler. Olar payǵambarlardı óltirgen edi, al sizler olarǵa mazarlar ornatasızlar. 49Sonlıqtan da, Qudaydıń danalıǵı bılay degen: «Men olarǵa payǵambarlar menen elshilerdi jiberemen. Olar geybirewlerin óltirip, geybirewlerin quwǵın qıladı». 50-51Sol sebepten Abıldıń qanınan#11:50-51 Jar 4:8. baslap, qurbanlıq orın menen Ibadatxana arasında óltirilgen Zexariyanıń qanına#11:50-51 2Jln 24:20-22. deyin, dúnya jaratılǵannan beri tógilgen barlıq payǵambarlardıń qanı usı áwladtan talap etiledi. Awa, sizlerge aytatuǵınım: usı áwladtan talap etiledi! 52Hásiret shegesizler, nızam muǵallimleri! Óytkeni sizler qutqarılıw haqqında bilim qapısınıń giltin tartıp aldıńlar: bul qapıdan ózlerińiz de kirmedińler, kirmekshi bolǵanlarǵa da tosqınlıq jasadıńlar, – dedi.

53Iysa sol jerden ketip baratırǵanda, ashıwlanǵan diniy muǵallimler menen pariseyler Onı qısqıǵa alıp, kóp sorawlarǵa juwap beriwge májbúrledi. 54Olar sózinen tutıp ayıplaw ushın, Iysanı ańlıdı.

Selectat acum:

Luka 11: QrqMK22

Evidențiere

Partajează

Copiază