Markus 4
4
Isus at Faydayuanan sabaliwa sik Tagtanum
Mt 13:1-9; Lk 8:4-8
1Isus gdog yay gfoyung sis tigyangan lino. Ay aroro ngayuk taw tagligung anya, Isus nasakay sa sik sakayan lino ay malunggung sanya. Ay kafag ngay taw si way stigyangan lino. 2Ay ngayu at foyungan faydayuanan sanya fag ngay taw. Glong te, 3“Sik tagtanum nakoko laman nananum at ngay bvtang. 4Ay gina gtanum, tiba at bvtang antong sasad dalan. Ay sik ngay manuk tungud andasug sanya ay nasinduk wan. 5Ay tiba at bvtang antong sa tagagangun ay tagsanya fag daga mayangfis way. Ay kafag bvtang masakit nu gtugbung, aroro kafag daga wa ngabasad. 6Ay menit nu masugba wan, at bagu gtugbung fag bvtang kalangke wan, aroro at lalid wa kaabasad, ay kayango wan. 7Ay tibak bvtang antong sas wa makmak madugi, ay kafag makmak anbia ay nafaut at tanuman, ay at tanum wa narawvg. 8Ay tibak bvtang antong sat masine fag daga, ay natugbung ay anbia ay narawvg tua. Sik raug at bilug, tuluk safulu, ay tiba unumk safulu ay tiba sik sandan.”
9Ay Isus nalong te, “Fagayu am tagdungugan, amatangani tua fia.”
Isus at Algan at Fagfaydayuananun
Mt 13:10-15; Lk 8:9-10
10Tangayu noli wan. Gina Isus ansadili, at ngay ufud, anggan at labi dua, nainto sabaliwa at faydayuanan. 11Ay Isus nalong te, “Dius nafayamag sa ayu at ngay masuksuk sabaliwa at fagfagtainanan. Ay sa tibak taw nu gfoyung, faydayuanan way. 12Laman kanya fag ngay taw,
‘dewa gdama, wa glag,
aroro nu natogdungug di,
kanya ban fag ngay taw umfoli sa angku,
ay namalyam au at ngay asalanan.’ ”#4:12 Isayas 6:9,10.
Isus at Faydayuanan sabaliwas Tagtanum at Masuad
Mt 13:18-23; Lk 8:11-15
13Isus glong yangay te, “O natogdungug am aro fag faydayuanan? Nu dyayam natogdungug, tain ban nu saful am tibak faydayuanan? 14Tagtanum, at natanum, Dius at Longan. 15Kafag bvtang at kintong sa sangaba dalan kata ngay taw at nadungug Dius at Longan. Arodi vtv Satanas andasug ay nabul kafag longan, aro at kintanum sit ngay amatanganan. 16Ay at kintong fag ngay bvtang sa tagagangun, kata ngay taw at nadungug Dius at Longan ay masakit nu gafanud ay guseganan. 17Ay kanya fag ngay taw nu gafanud wa glugo, kata kafag bvtang nu yud nalalid. Fagidapun ay famaskud nu ndasug aroro siginan at nadungugan Dius at Longan, kanya fagayu gfangafoliun way. 18Ay at kintong fag ngay bvtang sas wa makmak madugi, kata ngay taw at nadungug Dius at Longan, 19ay dewa katanya, kanya fagayu gafanawa at leleg ste swa daga, ay kesug at fagmaramramanun, ay anggan galabian ramraman, ay kanya nafaut at nadungug fag longan, ay wa narawvg. 20Ngay taw at nadungug ay at natogdungug Dius at Longan, kata ngay bvtang at kintong sit masine fag daga. Kafag ngay taw at fakamulun masine tua, kata yangay kafag tanum nu narawvg. Sik raug at bilug, tuluk safulu, ay tiba unumk safulu ay tiba sik sandan.”
Sik Salung at Masukluban si sik Alungkung
Mt 5:15; Lk 8:16-18, 11:33
21Isus nainto sa anya fagayu te, “O sik taw nu nafasalung sik salung, nanuklub sik alungkung ay mannga namasas daga fagtiugan? Abat ngate, namasa tua fia sik fagfatungkudan. 22Aroro fagayu at yud kalag umsure ban, ay fagayu at masuksukan umsaful ban. 23Am at nadungug, amatangani.”
24Isus glong yangay te, “Amatangani tua ay nadungug. Ay nusnga se aksvn nu gfaurianan am ay iba, katanya yangay nu gafaurianan am, ay e famamut yay. 25Aroro sik taw at ke kwa, e gfamut yay ban. Ay sik taw nu alay way tagsi anya, e namul yay ban siginan anya.”
Isus at Faydayuanan sabaliwa sik Bvtang nu Natugbung
26Isus glong yangay te, “Dius nu gfagtainan kata sik taw nu natanum at bvtang sit gamasun. 27Kafag taw gtiug sad yabi ay gfanlo swa menit, ay kadugenya kafag bvtang gtugbung ay kabia, dewa katanya, kafag taw wa saful nu setain nu kabia. 28Daga gfatugbung. Taguna gbilugan, ay at fadogan gfangkura ay grawvg, ay at fadogan karaska wan. 29Ay nu nraska wan, kafag taw ggutlu wan aroro fanggutluan wan.”
Isus at Faydayuanan sabaliwa sik Rigrig Burarad
Mt 13:31-32; Lk 13:18-19
30Isus glong yangay te, “Tain ro nu gfafaskudanan au Dius at fagfagtainanan, ay tain nu gfafaydayuanan? 31Kanya kata sik rigrig burarad. Kanya wan tiba alay fag bvtang sas fagdaul daga. 32Ay nu natanum wan, gtugbung ay nu nbia, abat yap tibak makmak. Ay gbia at sanga, ay ngay manuk tungud gfugad tua sanya.”
33Ngayu takatanya fag faydayuanan Isus nu gfoyung Dius at Longan sat ngay fadgaloan, kaksvn at fagmakatuun gtogdungug. 34Isus wa gfoyung nu dway gfaydayuanan. Ay at ufud nu at ngay tagadal tua lang, Isus gfayamag at ngay faydayuanan at masuad.
Isus Nafasiwang sik Fulug
Mt 8:18,23-27; Lk 8:22-25
35Menit nu nfalyu wan, Isus glong sat ngay tagadal te, “Bastam, nandife watam lino.” 36At ngay tagadal naubun ngay taw ay nasakay sas Isus at fagsakayan fag sakayan lino. Anggan tibak sakayan gfadgaloan yangay anya fagayu. 37Ay gina sis wabilug lino, sik maksvn fag tagmara andasug, ay maksvn nu glugwak sak gasuklubun at sakayan, ay mamam arvs gakapnun sit sakayan. 38Ay Isus gtangilan gtiug sis sakayan at faguyanan baliwa fag fungfung. Ay at ngay tagadal gfulo anya te, “Takamoyung, o wo gafanawa te, gakalubgubun watam?”
39Isus anfulo ay nasalag tagmara, ay glong sas lugwak te, “Aragangi wan!” Ay anragang wan ay anke fagmanabayanun wan.
40Ay Isus nalong sat ngay tagadal te, “Wain ay fakalimuun? O yam e fagafanudun?”
41Ay at ngay tagadal kalimu ay gidgintoan te, “Sinu tuy fag taw? Newa dewa tagmara ay lino gfaning tua anya.”
Selectat acum:
Markus 4: OCCT
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Copyright © 2021 by OMF International, Philippines
