Markus 5
5
Isus Nafafia sik Mangama at ke Mauri fag Falad
Mt 8:28-34; Lk 8:26-39
1Isus ay at ngay tagadal andasug sas dife lino, sa sangay taw Gerasa at talun. 2Ay Isus nu naduksun siginans sakayan, sik mangama at ke mauri fag falad andasug siginans fagfolian ngay kinbul ay gfablang anya. 3Kanya gbanwan sis fagfolian, ay we masiuk ya anya. Aroro dewa e nasiuk anya salambitan, malfas way. 4Ngayu ginan oma kasiuk salambitan sit bitis ay sit take, ay kafag mangama magatvng way. We mafafatawad ya anya. 5Kayu yabi ay kayu menit kanya guro ay gfilas anya gang gina sis fagfolian ay sis buksul.
6Ay kanya fag mangama nu nalag Isus, masakit nu nangakbang sat daga salubangan ay malub. 7-8Isus glong sa anya te, “O fag mauri fag falad, loi wan sanya ginan fag taw!”
Ay maksvn kafag taw nu guro te, “Nataw am fagyafakamulunun ro sa angku, Isus, Tiba Tungud fag Dius at Baguama? Maksvn nu glong au emu sis Dius at daga salubangan te, lag gfauri angku.”
9Ay Isus nainto anya te, “Sinu am ngayan?”
Ay kafag mauri fag falad gbalus te, “Ku ngayan Tangayu, aroro ngayu ami.” 10Ay kafag falad maksvn nu get sas Isus te, “Lag gaiyan emi ste ginan fag talun.”
11Ay sanya sik ngay bumbu gfangudkudan sa sangaba tigyangan tubi. 12Ay kafag ngay mauri fag falad maksvn nu get sas Isus te, “Fasai emi sangay bumbu, laman gsakbo ami sanya.”
13Ay Isus gfaning at fagetun. Ay kafag ngay mauri fag falad naubun kafag taw ay nasakbo sa sangay bumbu. Ay kafag ngay bumbu natarung siginans tungud tubi ay nataglayun sasad lino ay napnut. At kayuan kafag ngay bumbu malgau duak libu.
14Ay ngay tagalaga kafag ngay bumbu gabanganan guli laman namansulit sat furuan ay sa tagligung fag ngay furuan. Ay ngayuk taw andasug, laman nanlag te, nataw at kinfasludan. 15Ay kanya fagayu nu ndasug sas Isus, nalag aro taw at ke mauri fag ngay falad nu malunggung ay galanbungan ay e amatanganan wan. Ay at nananlag maksvn nu kalimu. 16Ay kanya fagayu nalong sa sangay taw at bagu kadasug at kinfasludan sanya fag taw, ay anggan sa sangay bumbu. 17Ay kafag ngay taw gfainfanyuan sas Isus te, “Anin ngatu, loi wan ste ginan.”
18Ay Isus gina gsakbo sas sakayan lino, aro taw ke mauri fag ngay falad kaylat nangalo. 19Ay Isus glong anya te, “Ulii wan sa am kaiban ay namoyung o tam Fun at mabalyanan at nafakamulun sa emu ay nu kafanyu emu.”
20Ay kafag taw nalo wan ay gfoyung sas Safuluk Furuan Daul fag talun Isus at mabalyanan fag fakamulun sa anya. Ay fagayu taw nu nadungug kadulo.
Sik Baguina at Kinbul wan ay sik Mangena at ke Fakasaitun
Mt 9:18-26; Lk 8:41-56
21Isus gdog yay nasakay sas sakayan lino ay anfoli sas dife lino. Ay gina sis tigyangan lino, ngayuk taw gligung anya. 22Ay sik tagfangguna sis taw Udyu at bale fakafulan andasug, at ngayan Ayru. Ay Ayru nu nalag Isus namalub sit daga salubangan, 23ay maksvn nu gfainfanyuan glong te, “Ku baguina gakabulun. Wainyayo, aloi angku, ay fatayuki am daluap sa anya, laman umfia yay ro ay gleleg yay.” 24Ay Isus nanangalo anya. Ay sik ngay taw galo Isus, ay gsidsikfitan.
25Ay sanya e sik mangena labi dua wak banwa nu yud karagang nu gfangigusan. 26Ay maksvn at fagidapun siginan ngayuk tagfafia, ay kafag mangena dewa nafamin at ramraman, wa nfia, sarokta nkugat way baliwa. 27Ay kafag mangena nu nadungug sabaliwas Isus, kanya nkakbang sas Isus at day guyuy, gina si sangay taw at wabilug, ay nated Isus at lanbung. 28Aroro kafag mangena at amatanganan te, “Nu nated kdi ro at lanbung, kafia kwan.” 29Ay arodi vtv anragang wan nu gfangigusan, ay nu gamatang anya, anfia wan.
30Ay Isus nasaful te, at fagmabalyananun naduksun siginan anya. Ay arodi vtv Isus anbiling ay glong te, “Sinu at nated ku lanbung?”
31Ay at ngay tagadal gbalus te, “Glag wo ngayuk taw tagligung ay tagtayuk emu, ay wain yay am fagintoun te, ‘Sinu at nated angku?’ ”
32Ay Isus nafandama laman grvbvy te, sinu at nated anya.
33Kafag mangena nu nasaful at kinfasludan sa anya, gtadtaruyan kalimu nangakbang sas Isus ay namalub sit daga salubangan ay gfoyung sa anya at matuyan. 34Ay Isus glong sa anya te, “Fagmangena, am fagafanudun nafafia emu. Loi wan, manabayan tua ro wo, am fakasaitun anfia wan.”
35Ay gina Isus garingang, sik ngay taw andasug siginan Ayru at bale ay nalong te, “Anbul wan am baguina. Lag gfasalag ya tam takamoyung.”
36Isus wa nasalagan kanya fag ngay taw at longan ay glong sas Ayru te, “Lag gafanawa, afanudi way.” 37Ay Isus gsalag ngay taw nu galo anya sas Ayru at bale, sas day Pedru, Santiagu ay Uan, Santiagu at arian. 38Ay kanya fagayu nu ndasug sanya, Isus nalag te, ngay taw garingangan ay e gwayway ya. 39Isus nasakbo ay glong sa anya fagayu te, “Nataw ay fagaringanganun ay ay fagwaywayun? Kanya fag baguina wa nbul, gtiug way.”
40Ay kafag ngay taw kase, gfalingun Isus, ay Isus naiyan fagayu taw siginan sad bale, ay nataban kafag baguina at mama ay at mina ay anggan at ufud fag tulu, ay nasakbo sanya fag baguina at fagtiugan. 41Ay Isus nated kafag baguina at daluap ay nalong sa anya te, “Talita kumi.” At masuad te, “Fagbaguina, alindugi.”
42Ay arodi vtv kafag baguina namalindug ay glodloan. Kanya labi dua at banwa. Ay sanya fag ngay taw maksvn nu kadulo. 43Ay Isus maksvn nu gsalag sanya fag ngay taw te, “Lag gfoyung sa tibak taw.”
Ay Isus nasugu laman namon sanya fag baguina sik fakonun.
Selectat acum:
Markus 5: OCCT
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Copyright © 2021 by OMF International, Philippines
