Markus 3
3
Isus Nafafia sik Mangama at Yud Mafalelegan at Daluap
Mt 12:9-14; Lk 6:6-11
1Isus gdog yay nasakbo sas taw Udyu at bale fakafulan. Ay sanya e sik taw at yud mafalelegan at daluap. 2Ay tibak taw gulit, laman sumaful te, o Isus ro gfafia gina Famiangalay fag Menit, aroro at algan kaylat namoyung sa tibak taw te, Isus e asalanan. 3Ay Isus nalong sat yud mafalelegan at daluap te, “Gewan, stei sfagunan.”
4Ay Isus glong sanya fag ngay taw te, “Inday tagfaning tam faugali sabaliwas Famiangalay fag Menit: o nu gfakamulun at masine, ay mannga nu gfakamulun at mauri; o nu gfalangfe sik taw ay mannga nu gfabul sik taw?” Ay kanya fag ngay taw wa gbalus.
5Ay Isus nu gdama kafag ngay taw kadotama ay kabalu, aroro kanya fag ngay taw kamaogatun at amatanganan. Ay Isus nalong sat yud mafalelegan at daluap te, “Falugdei am daluap.” Ay kafag taw nafalugde, ay at daluap anfia wan.
6Ay ngay taw Fariseu nalo ay namakamatoan sas Erudes at ngay taw sabaliwa nu namabul ban Isus.
Isus Kamoyung sas Ngayuk Taw sis Tigyangan Lino
7Ay Isus anggan at ngay tagadal nalao sas tigyangan lino. Ay ngayuk taw siginans talun Galilea tagalo. 8Ay anggan ngay taw siginans talun Udea, ay furuan Erusalem, ay talun Idumea, ay dife Liskung Urdan, ay tagligung Tiru ay Sidun fag ngay furuan galo yangay. Ngayuk taw at nanangakbang sas Isus nu nadungug at fakamulun. 9Ay Isus nasugu at ngay tagadal laman gfalganan sik sakayan lino, at fagsakayan, ngay taw ro nu namasidsikfitan way anya. 10At fagnasuguun katanya aroro nafafia ngayuk taw, nu katanya, fagayu at ke fakasaitun gtudtuludan laman nantayuk anya. 11Ay at mauri fag ngay falad nu nalag Isus, namalub sit daga salubangan ay guro te, “O wan Dius at Baguama.” 12Ay maksvn Isus nu gsalag sanya fag ngay mauri fag falad laman di kamarita sabaliwa anya.
Isus Nafili at Labi Duak Nasugu
Mt 10:2-4; Lk 6:14-16; Fkm 1:13
13Isus naundaud sa sik buksul ay nafaful sa anya at fakaylatun gfili, ay kanya fagayu nanangakbang sa anya. 14Ay Isus nafili labi dua, at nangalo ban anya ay at fagsuguun laman ban at nanfamoyung sa sangay taw. Isus nafangayan anya fagayu te, at ngay nasugu. 15Ay Isus nafon sa anya fagayu fagmabalyananun gaiyan mauri fag ngay falad siginans taw. 16Tuy Isus at ngay nafili: Simun, Isus at nafangayan yangay te, Pedru. 17Ay Santiagu ay anggan at arian Uan, Sebedeu at baguama fagdua. Isus nafangayan yangay te, Buanerges, at masuad, “Kata sik Lingsi.” 18Ay Isus nafili yangay Andres ay Felipe ay Bartulume ay Mateu ay Tumas ay Santiagu, Alfeu at baguama, ay Tadeu, ay Simun Maseganama, 19ay Udas Iskariute, at namoyung ban Isus sat mauri fag ngay taw.
Isus ay Satanas
Mt 12:24-32; Lk 11:17-22
20Ay Isus nu nfoli sat fagtaglayunan fag bale, sik ngay taw gdog yay anful. Nu katanya, Isus ay at ngay tagadal wa karan ya gfangon. 21Ay Isus at ngay kalongan nu nasaful takatanya, nalao laman nantaban anya, aroro kafag ngay taw glong te, “Kanya nalyam at amatanganan.”
22Ay ngay tagfoyung Muisis at Faugali siginans Erusalem glong te, “Lango at Fun#3:22 Lango at Fun: sas Griegu: Beelzebul, Satanas at ngayan at sadi. antayuk sas Isus. At fagmabalyananun gaiyan mauri fag ngay falad siginan way mauri fag ngay falad at fun.”
23Ay Isus nafaful sa anya kanya fag ngay taw ay nafaydayuanan te, “Tain ro Satanas nu gaiyan at sadili? 24Sik fun at fagfagtainanan fag ngay taw nu gawayan way gugat, abandi kalyam wan kanya fag fagfagtainanan. 25Ay katanya yangay at kumfasludan sa sik talafuan tagawayan gugat. 26Ay Satanas nu gfawayan way at sadili, ay at ngay taw nu gawayan yangay, wa ban gtaglayun at fagmafunanun, ay kanya wan at fakatabuan.
27“Sik taw wa masakbo sa sik maseganama at bale laman nanfangkamul at ramraman nu dway nasiuk kafag taw at maseganama. Ay kanya nu nasiuk tua, mafangkamul wan sanya fag bale at ngay ramraman.
28“Matuyan nu glong au ayu te, fagayu taw at asalanan Dius gfalyam yay, ay nusnga sinu at nalong mauri sabaliwa Dius gfalyam yangay. 29Ay dewa katanya, nusnga sinu at nalong mauri sabaliwa at Masine fag Falad, Dius wa gfalyam ya. Kafag taw e asalanan kabavn.”
30Isus at fagnalongun katanya aroro tibak taw nalong te, “At mauri fag falad antayuk sas Isus.”
Isus at Mina ay at ngay Faduksay
Mt 12:46-50; Lk 8:19-21
31Isus at mina ay at ngay faduksay andasug. Ay gina malindug sis lod bale, nafauro Isus.
32Ay ngayuk taw malunggung maligung sis Isus, ay kanya fagayu glong sa anya te, “Isna, am mina ay am ngay faduksay sis lod bale, gyalagun emu.”
33Ay Isus glong te, “Sinu nunda ku mina ay ku ngay faduksay?” 34Ay Isus nalingaman tagligung anya, ay glong te, “In ku mina ay ku ngay faduksay. 35Nusnga sinu tagfaning Dius at fakaylatun, kanya tua ku ngay faduksay ay ku mina.”
Selectat acum:
Markus 3: OCCT
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Copyright © 2021 by OMF International, Philippines
