MATEO 24
24
Jesosaa huohuicapoa Eyacuiñajjija equi-ai quijje quecuajeabichajea'yojjijo
(Mc 13.1-2; Lc 21.5-6)
1Majoya aje Jesosa Eyacuiñajjija equi-aiquiquibojo ani esohui huohuijeyomajje cuayaqui'yapoa poquiya. O poquianijo o shajja-ajjajji poanicuana Jesosa nequiyasijje jjanequichipiquiapoa. Eyacuiñajjija equi-ai queapamenee ani, pea equi-aicuana queapame majotii ani pea-ai bameecapoa cuaa oya. 2Equi-aicuana queapame ani bamajje Jesosa jama poa ba'a: —Bacue, ojjaña jiquio equi-aicuana equiquibocuana queapamenee ani Eyacuiñajji bihuiajji. Eyaya quiana e'ejojonei huohuiaña, quijje ojjaña jiquiojo ani Eyacuiñajjija equi-aijo miquiaaya jjeyanei baña huisotii chama'neinei acaje'yo. Ojjaña meicuana quecuajeabichajeajeyocaje'yo cuaa. Chama'neinei che oema'nei mei pea meibiajje eanijji poaje'yo.—
Jesosaa huohuicapoa yajja poaje quijje oe-ejjenei epojja poechipiajo
(Mc 13.3-23; Lc 21.7-24; 17.22-24)
3Majotii aniya aje poquiapoa cuana eyiyoiyeao Olivos bajjani nequiyasijje. Ma nequi eyiyojotiiya Jesosa anioqueñaquiapoa. O shajja-ajjajji poanicuana oopana o aniyasijje jjanequichipiquiapoa o huohuiajjaa. Jama acapoa cuaa ba'a: —Huohuicue ecuana acheshono shai jama acaje'yo equi-aicuana. ¿Ae shai bacaje cuaa mi poeo'oyajji epojja poechipiajo? ¿Acheshono shai jiquio meshi chama'yo pomeeje'yo? Majoya che ecuana huohuicue ebajji.—
4Jesosaa saja-acapoa cuana jama ba'a: —Jjajaahuananeineiquicue quiana oe peacuanaja esohuijo. A'a jjadasiameequijji quiana pea dejjacuanajo. 5Queahuisocuana poemajje jama quiana anishocañaje ba'a: “Jiquia aje eya Eyacuiñajjija huoojeaneiya miquiana nahue'yojji epojji poeyanaje.” Majoya queahuisocuana dasiacañaje cuaa. 6Miquiaaya shajja-ajjaje queahuisocuana jjaquecuaquicaje'yo queahuesha ba'ecacuana, jiquio chipinei ba'eca pea-aiya. Peajaajjicuana jama jjaquecuaquica'yani shajja-ajjamajje a'a queamete pojji quiana majoya. Jamaya acapoquije queahuisojaajjicuaa oe-ejjenei epojja poechipijjimahuajo, apoa pojjima' so'o. 7Oejaajjicuana jjaquecuaquicaje'yo peajaajjicuananijje. Oe meshicuiñajjicuanaja soldadocuana pea meshicuiñajjicuanaja soldadocuananijje jjaquecuaquicaje'yo pea-ai. Queahuiso meshiyasijje majo ba'ecacuana bobiyasijje pocaje'yo bobi chamajo, meshicuana queahuiso pea-ai huehuahuehuaneije. 8Jamaya ojjañajaajjicuana ebionei queanee pocoocaje. Jiquio ecua eponacuana bacuaneecoomajje jjabaquiani quijje queaneenee poaje jama pea-aiya queacamaja pocoocaje cuana.
9—Majoya quiana quijje iñameecaje cuaa etii poanicuanaja ejeanobiameejji. Queaneenee pomeecaje quiana. Beca quiana quecuapea-aicaje'yo cuaa. Ojjaña meshijo ba'ecacuaa miquiana botiamanei acaje ejo jjashahuabaqui'yonajejojoya. 10Majoya ecuea epeejjicuana queahuiso jjashahuabapajeaquicaje'yo ecuea esohuijo. Pea onijje Jesosaja epeejji poani pea-ai botiamanei acaje'yo cuaa. Etii poanicuana huohuipea-aicaje cuaa onijje ba'eca Jesosaja epeejjicuana jeanobiameejjijo. 11Eyacuiñajjija esohuihuohuijjinisho poani dejjacuana queahuiso majoya poepea-aije. Ma dejjacuaa esohui huohuitaimajje queahuisocuana dasiacaje oja esohui siajjejo. 12Dejjacuana, eponacuana pea-ai quea-ojamimishihuisonee ba'ecapoquije. Onijje ba'ecacuana queajea apajeacaje cuaa, botiama acaje'yo. 13Ma quijje ojjaña meshijo ba'eca queamimishi popoquijji apoa poajo, ojjaña joya e cajaa a pojjima'tii poanicuana jjanahuemeequije'yo ejo ma queaca'atii ba'epoquinaje huisotii. 14Ojjaña meshijo ba'ecacuaa shajja-ajjacaje esohui queapame Eyacuiñajji ojjañacuana huoojeapoquiajjitii poani poeje. Ojjañacuiñajjicuaa jiquio esohui queapame shajja-ajjajeyocajo Eyacuiñajjiya jiquio meshi chama'yo pomeecaje.
15—Yahuajonei esohuihuohuijji poa dejjaa Daniel bajjaniya tehuecapoa ma quijjenei queatainee acajejo. Dejjaja ne eyacuiñajjinisho nequiacaje cuaa Eyacuiñajjija equi-ai queatainee ajji. Jamajjeya cua jiquio esohui ajji poajecuana queaja'a jjashahuabaquicue jiquio esohuijotii. 16Miquianaya Judea meshijo ba'ecacuana Eyacuiñajjija equi-aijo nequiya queatainee acaje bamajje quehuapoquicuajicue eyiyo nequicahuasijje. 17Ojjaña joya oja equishashajo anicuana dejjacuaa Eyacuiñajjija equi-aijo nequiya queatainee acaje shajja-ajjamajje poquicuajica'yojji. Oja equiyasijje nobiquinanaca'yoajja oja aquianacuana, camacuana dojo'yohua. 18Oya jayojja pea-ai joya oja quejo chacochacoanicuana jamatii poquicuajica'yojji ojaya equiyasijje huacuaya poqui'yojjimatii oja daqui ejeanana ani jjehua'yohua. 19Queacamajaneenee poaje joya oejji ani eponacuanaja. Joya tojjojo ba'e bacuajji anicuanaja pea-ai queacamajaneenee poaje equehuapoquicuaji'yojji ma pojjajotiiya. 20Eyacuiñajjinijje oe mimicue ma quijje miquiana quehuapoquicuaji'yojji epojja epoejjijo queahuoe epojji pojjeama ba'ijo, epojja ejomishocajji pojjeamajo mimipea-aicue. 21Ma quijje queacamajanee poaje'yo ba'icuanajo queahuisonee jiquio meshijo ba'ecacuana queaneenee pocaje'yo. Ma ecua yahuajoneinei meshi panacapoajo dejjacuana eponacuana pea-ai queanee pocapoa jama pojjeama ca jjeya pocaje'yo. Quijje pea-aiya chama' poaje quiajjaya queaneenee epo'yojji cuanaja. 22Eyacuiñajjiya ma quijje ojjaña meshijo ba'eca queacamajanee pomee'yojji iyeba'ihuiso jama epojji mipomeecajo chama'neinei pocaje'yo cuana, che oema'nei eshe ba'eje. Jamajjeya Eyacuiñajjiya iyeba'ihuisonei queacamajanee pomeecaje oja babacacuana ojaya queajeanee poanijojoya.
23—Dejjacuaa esohui jama acaje ba'a: “Bacue, jiquia aje Eyacuiñajjija huoojea ese nahue'yojji poani.” Ohua jama acajo, ¡a'a oya shajja-ajjajji! Peaa jama acajo ba'a: “Chojja, coma pojjeama, joma nequi caca oe Eyacuiñajjija huoojea ese nahue'yojji epojji.” Ohua jama acajo, ¡a'a e'ejojonei acani poso ajji! 24Queahuiso esohuihuohuijjinishocuana poeje siajjepohua. Peacuaa ca Eyacuiñajjija huoojea poani miquiana nahue'yohua anishocaje. Dejjaja ajjima'neineicuana ohuaya queahuiso apea-aicañaje queahuisocuana ojo ejjashahuabaqui'yojji. Eyacuiñajjija epeejjicuana oja babaca siajje pea-ai acañaje cuaa ojo ejjashahuabapea-aiqui'yojji nisho. 25Shajja-ajjaneicue, eyaya quiana jjeyanei queaja'a huohuiaña dejjacuana siajjepojji poejjimahuajotii miquianaya ohua edasiaca poanijje quijje. 26Jamajjeya ohua jama acajo ba'a: “Shajja-ajjacue, Eyacuiñajjija huoojea se-ejjama' meshijo nequi baquicue.” Ohua jama acajje, a'a cuamaya poquijji o baa. Siajje coma. Peaa jama acajo ba'a: “Bacue, jocuama Eyacuiñajjija huoojea ejja-aniquehuaqui ani.” Ohua jama acajo, a'a e'ejojonei ohua acani poso ajji. 27Eya caca oe e'ejojonei Dejjapojji epo poeo'oyajo queaja'anee ojjañacuaa bacaje. Jiquio ecua baasiyohua ojjaña eyatahuatahuahuasijje queahueshayee jeaja'ajeacani jama pea-ai eya poeje o'oya bacaje ojjaña meshijo ba'ecacuaa. 28Miquiaaya be'ocuana queahuisonee cuabesa ba'e bamajje jjashahuabaquije queahuiso emano'yocuana cuamaya jaa. Jamajjeya jiquio eya huohuiaña esohui jama poaje bamajje jjashahuabaquicue oe-ejjenei epojja poechipiani.—
Dejjapojji epo poeje o'oya quijje jiquio meshiyasijje
(Mc 13.24-37; Lc 17.26-30,34-36; 21.25-33)
29Jesosaa huohuitiicapoa cuana jama ba'a: —Ma quijje ba'icuana ojjañacuana queacamajanee po'yojji oe poajo eshequi jijipajeaje'yo. Ba'i pea-ai jijipajeaje'yo. Majametacuana eyatahuatahuajo nequi oqueje'yo. Ojjaña eyatahuatahuahuasijjeyee huehuahuehuaje janobajjimanei. 30Majoya queahuisocuaa ma oja bajjimatii poanaje ja'anei bacaje eyahuasijje Dejjapojji epoja epoeo'oyajji apoa poajo. Ojjañajaajjicuana jiquio meshijo queamimishitii ba'ecacuana eya Dejjapojji epo e'ejojonei poeje o'oya bamajje queayenonee pocaje'yo. Eyaya botejjee nequiya queaca'anee poaniya jeaja'aja'aoqueaje meshiyasijjeyee ojjañacuanaja eya queaja'a ebajji. 31Emiajji queaquemo miasajajeacajo queashajjaquijjo eyaya angelcuana ojjaña meshiyasijje huoojeaoqueaje. Eeno poeanimijiyasijje, eeno poquianimijiyasijje pea-ai huoojeaje. Eshequi jaasohuanimijiyasijje, eshequi oquequianimijiyasijje pea-ai angelcuana huoojeaje ojjaña ecue babacacuana ecue nahue'yo jjequi'yohua ojee eque ejjachichaqui'yojji.
32—Jamajjeya jiquio eya huohuiaña esohui queaja'a ebajji higo acui ebanajo jjashahuabapea-aiquicue. Oja aacuana shashaje'yo eiña'yojji bamajje miquiaaya baña nayaja poechipi'yani. 33Oya jayojja jiquio ecua higo acui shasha'yani ebajji jjeya nayaja poechipi'yani jama pea-ai jiquio eya huohuinaje esohui jama poajoya eya Dejjapojji epo poeje o'oya baje quiaa. 34Eyaya quiana e'ejojonei huohuiaña. Eyacuiñajjiya jiquio eya huohuiaña esohui oya jayojjaya ajeyocaje'yo jiquio jjeya judiocuana eshe ba'eca manojeyojeyo'yojjimahuajo. 35Jiquio eyatahuatahua majametacuana nequijji chama'yotii poaje. Jiquio meshi pea-ai ojjaña ba'ecacuana nequijji chama'yotii poaje. Ecuea esohui caca oe jiquio eyaya aña anitiitiipoquije'yo. Ojjañatii ecuea esohui oya jayojjaya Eyacuiñajjiya ajeyocaje'yo.
36—Ojjaña meshijo ba'ecacuanaja che oema'neija bajjimanei poani ache pojjajo shai, achenei eshequi nequijo shai Eyacuiñajjiya jama pomeecaje e poeo'oyajjijo. Angelcuanaja pea-ai bajjimaneinei e poeo'oyajjijo, ecuea pea-ai oja Bacuaejjaja bajjimaneinei. Ecue Chii Eyacuiñajjija caca oe ojayanei eba acheshono ohuaya jamaya pomeejeyocaje e poeo'oyajjijo.
37—Eya Dejjapojji epo poeo'oyajo queahuisocuana jamatiiya e ishoapojjima'tii ba'ecapoquije. Ma ecua yahuajoneinei Noenijjejaajjicuana ba'ecapoquiapoa jamatii ena queaquemonee eoquejjijo jjashahuabaquijjimatii ba'e, jama pea-aiya pocaje queahuisocuana e poeo'oyajo. 38Yahuajonei ena queaquemonee oja oquemeejjimahuajo ma Noenijje ba'ecacuana ijjiaijjiapoquiapoa, ishi-ishipoquiapoa, jjahuanaquicapoquiapoa pea-ai. Jama ba'emeya pocapoquiapoa cuana Noé bishe'aiyasijje nobiquijji epojja poeajo. 39Majoya macuana jamatii ena queaquemoneejo jjashahuabaquijjimatii ba'ecajo ena queaquemonee oqueapoa. Jamajojoya ojjañatii hui'ijeaca'yapoa. Jama pea-aiya ba'ecapoquije queahuisocuana e ishoapojjima'tii ba'eca eya Dejjapojji epo poecuajio'oyajo. 40Ma pojjajotii beca dejja ojee quejo chacochacoqui, oe jjequisohuacuajicaje'yo, pea ca jiquio meshijotii nequijeaje. 41Oya jayojja epona beca anosoai jajapashapo-ani, oe epona jjequisohuacuajicaje'yo, pea ca anijeaje majotii.
42—Jamajjeya quiana oe jjaishoatiiquipoquicue miquianaja bajjimajojoya acheshono shai eya miquianaja Emeshimesenei poani poecuajije o'oya. 43Bacue, equimeseja ojaya ebajojjemo ache mecashono shai siipojji poeje siipohua, ojaya jama ebajojjemo, oya ma mecashono cahuijjimatii eshe anichichame o ishoajji. Siipojji nobimeejjima acaje ohuaya oja equiyasijje. 44Jamajjeya quiana oe apoa epo anicue e poeo'oyajjijo. E'ejojonei eya Dejjapojji epo poecuajije o'oya miquianajaya bajjimaneitii ache pojjajo shai.—
Jesosaa huohuicapoa beca dejjajo oe echacosahuajji queapame, pea ca queamimishi poani
(Lc 12.41-48)
45Jesosaa huohuitiicapoa cuana jama ba'a: —Equimeseya pea meshiyasijje poquijjimahuaa dejja o chacosahuajji poani queasapaja'a, hueya-ama babacacanaje. Majoya oya huohuicanananaje ma ojo chacochacoanicuana bobi oja equiapoquiajji. 46Bobi quiapoquiajji poani dejja queabihuinee poaje equimeseya oya hueya-ama chacochacoani bacaña'yajje. Ma ohua o huohuicanananaje huisotii echacojji ohua ajeyocanaje. 47E'ejojonei eyaya quiana huohuiaña, joya hueya-amanei chacochacoani baña'yomajje equimeseya coma dejjaya ojjaña oja aquianajaahuanajji epojji nequimeecaje. Majoya ohuaya queahuiso oya sosequiacapoquije. 48Pea dejja o chacosahuajji poani pojja'a queaquehua jjashahuabaquimajje jama poaje ba'a: “Jjeya ca dejja jiquio equimese epoecuaji'yojji pojjeama. Quijje pojja'a poeje'yo oya.” 49Majoya ohuaya onijje chacochacoanicuananijje quenequenemajje cuiasejjajeacaje. Majoya oya chacochacoajja poaje, ijjiaijjiapoquije, ishi-ishije, huooje pea-ai. 50Majoya ma o chacosahuajji poani dejja jamatii equimesejo o jjashahuabaquijjimanei nequijo, ache pojjajo shai oya poeje'yo ojaya bajjimanei poanijo pea-ai, equimese poeje'yo o ba'yohua. 51Equimeseya ma o chacosahuajji poani dejja queamimishitii poani baña'yomajje queaneenee pomeecaje'yo oya. Ohuaya oya queahuesha huoojeacaje'yo ma ojjaña oja epeejjinisho poanajecuana huoojeaca'yapoa meshiyasijjeya. Majotiiya oya patiitiinequije'yo yenojo, ese' ijjiayaicanequije'yo neejo pea-ai.—
Selectat acum:
MATEO 24: ESE
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Copyright Mision Nuevas Tribus, 2006
