MATEO 25
25
Jesosaa huohuicapoa esohui ebameesahuajji diez huisome eponasho'i ahuema' anicajo
1Jesosaa huohuitiicapoa cuana jama ba'a: —Eyaya quiana huohuiaña achajja poaje e poeo'oyajji epojja poechipiajo ebajji. Majoya Eyacuiñajjiya ojjañacuana queapame huoojeacapoquijetii. Jama poaje ba'a: Ma ecua diez epona ahuema' anicuana fiesta ejjahuanaquijjijo baa poquicanaje jamaya. Ojjaña ma eponacuana cuaquijiji mejji pea-ai poquicanaje dejja jjahuanaquijeja equiyasijje o queabihui ja'ajjequiya. 2Cinco huisome eponacuana ahuema' ani ma epoqui oja equiyasijje queasapaja'a poanaje. Ma pea cinco huisome eponacuana epoqui pea-ai ca queasapaquehua poanaje. 3Ma cinco queasapaquehuaja esei edahuajijio'oyajji dojojjima poanaje. Jamatii oja cuaquijiji eshonei nequi dojocanaje. 4Ma pea queasapaja'a eponacuaa ca esei tahuoojo sho dojopea-aicanaje quijje ebionei sho oe poajo edahuajijio'oyajji. 5Majoya dejja jjeyanei jjahuanaqui queashononee poanaje, poecuaji'yojjima poanaje oja equiyasijje. Jamajjeya ma eponacuana epoqui jjaishoatiiajjaquimajje esecuejo ani queacojjacahuinee pomajje cahuinaje majotii aniya. 6Majoya quijje mecashononei shajja-ajjacanaje cuaa jama taaame poaje ba'a: “Joya jjeya jjahuanaquinaje dejja poeje'yo jjeyahuanei. Queabihuiya oya ja'ajjequicue quiaa.” 7Jama taaame poajoya eponacuana shequica'yonaje. Oja cuaquijiji huijeacuayacanaje cuaa edahuajijio'oyajji. 8Majoya eponacuaa ma queasapaquehua poanajeya huohuiajjacanaje ma pea eponacuana queasapaja'a poanaje jama ba'a: “Che oe ecuana esei oepojji esho'yojji quiacue joya miquianaja enequi. Ecuanaja cuaquijiji ca quijjo'yani seima'.” 9Jama saja-ame oya acanaje epona queasapaja'a poanajecuaa ba'a: “Chojja, ecuanaja pea-ai chama' poaje ca miquiana quiamajje. Jjeyanei oe poquicuajicue ma esei quiacani equiyasijje jjesheya ca miquianajanei epojji.” 10Jamajjeya ma queasapaquehua poanaje eponacuana poquicuajinaje esei jjesheya. Jamatii eponacuana poe'yojjimahuajo dejja jjeyanei jjahuanaqui poe'yonaje ma epoe eponacuaa ishoa-ajjaca-aninaje dejja. Majoya eponacuana ma cinco queasapaja'a poanaje seijjitii ani nobiquinaje onijjetii fiesta ejjahuanaquijjijo aa. O nobiquiajo esecuejjani ca'acanaje efiestameseya. 11Majoya quijjepishana ma pea eponacuana esei jjesheya poqui poe'yonaje. Jama poña'yonaje cuana esecuejjani eca'a nequi baña'yomajje ba'a: “Efiestamese, esecuejjani ca'apejocue, ecuana che jjequinobiapea-aicue.” 12Ma jjeyanei jjahuanaqui efiestamese dejjaa jama acanaje eponacuana ba'a: “E'ejojonei eyaya quiana aña, ¡ecuea quiana bajjimaneinei ae shai quiana!”— Jama huohuijeyomeya acapoa cuana Jesosaa eponacuana ahuema' anijo.
13Majoya aje Jesosaa huohuipea-aicapoa cuana jama ba'a: —Jjaishoatiiquipoquicue quiana oe. Miquianajaya bajjimanei ache pojjajo shai, achenei eshequi nequijo shai eya Dejjapojji epo poeje o'oya.—
Esohui ebameesahuajji tres dejjacuaa bejjo jjeshecanajejo
(Lc 19.11-27)
14Jesosaa huohuitiicapoa cuana jama ba'a: —Achajja poaje Eyacuiñajjiya ojjañacuana huoojeacapoquianitiijo miquianaja queaja'a ebajji huohuije. Jama poaje ba'a: Jiquio ecua dejja equimese pea meshiyasijje queahuesha poquije jama. Poquijjimahuaa ma ojo chacochacoanicuana iyaacanaje ehuohuinanajji oja bejjo echacojji queahuiso epomeejjijo, oja aquianacuanajaahuanajji epojjijo pea-ai. 15Ohuaya ma ojo chacochacoanicuana bejjo quiacanananaje oya huisoajja pojjeama. Joya echacojji baneineijji poani dejja ohuaya 5.000 huisome eso'dojjo quiacanananaje oja echacojji yajjijo. Pea ojo chacochacoani dejja ma echacojji ebapishana ca iyehuiso quiacanananaje, 2.000 huisome eso'dojjo ojaya echacopea-aijji. Pea dejja ma echacojji bapojjima' ca 1.000 huisome eso'dojjo quiacanananaje. Majoya ma ojo chacochacoanicuana bejjo quiananamajje oya poquinaje pea meshiyasijje. 16Ma ojo chacochacoaniya 5.000 huisome jjeshejji poanajeya chaconeineicanaje hueya-amaneiya. Jamajjeya ohuaya bejjo queahuiso chichacanaje oya huisoajjaya 5.000 pea-aiya oja chaco sosejje. 17Oya jayojja ma peaa 2.000 huisome jjeshejji poanajeya oya huisoajjaya ohuaya chichacanaje 2.000 pea-ai oja chaco sosejje. 18Ma pea 1.000 huisome jjeshejji poanajeja ca jama chacome apea-aijjima poanaje. Ohuaya o chacomeejji poanija bejjo ma ojaya echacojjijo nisho jjeshe huanaquehuacanaje meshijjani oja teohuasijje.
19—Majoya quijjenei o chacomeejji poani dejja ebejjomese poe'yonaje. Ohuaya iyaaca'yonaje yajja oja quianana bejjo acanaje cuaa ehuohuiajja'yojji. 20Ma 5.000 huisome jjeshejji poanaje dejja ebionei poquinaje o chacomeejji poani ba'yohua. Ohuaya jama acañaquinaje ba'a: “Ecuea etii poani, miyaya eya 5.000 huisome quianaje e chacochacojji. Ma-aje mique quia ebionei eso'dojjocuana. Eyaya pea 5.000 huisome pea-ai chichanaje miquea quia eso'dojjojo chaconeimajje. Ma-aje jiquio pea oya huisoajjaya.” 21O chacomeejji poaniya eso'dojjo jama quiame aca'yajje jama acanaje oya ba'a: “Ee, jamaya miya queapamenee chacochaconaje, hueya-ama. Miya queajjashahuabaquija'anee poanaje echacojjijo. Jamajjeya eyaya miya ecue aquiana queahuiso jaahuanajji nequimeeje queapame mi chacochaconaje sosejje. Jjeya queabihuinee pocue eya jama pea-aiya.” 22Majoya quijjepishana pea ma 2.000 huisome jjeshejji poanaje dejja poquipea-ainaje o chacomeejji poani ba'yohua. Jama acañaquinaje oya ba'a: “Ecuea etii poani, miyaya eya 2.000 huisome quianaje e chacochacojji. Ma-aje ma e miya ebionei quianaje huisoajjatiiya. Eyaya pea 2.000 huisome pea-ai chichanaje miquea quia eso'dojjojo chaconeimajje. Ma-aje jiquio pea oya huisoajjaya.” 23Ohua jama quiame aca'yajje o chacomeejji poaniya jama acanaje ba'a: “Ee, jamaya miya queapamenee chacochaconaje hueya-ama. Miya queajjashahuabaquija'anee poanaje echacojjijo. Jamajjeya eyaya miya ecue aquiana queahuiso jaahuanajji nequimeeje queapame mi chacochaconaje sosejje. Jjeya queabihuinee pocue eya jama pea-aiya.”
24—Majoya ma pea 1.000 huisome jjeshejji poanaje dejja poquipea-ainaje o chacomeejji poani ba'yohua. Jama acañaquinaje oya ba'a: “Ecuea etii poani, miyaya queacamajanee chacome ameepoquiaña cuana, o jomishocameeajjaneinei miya poani. Miyaya peacuanaja bana queahuisonee sejjamee'yaña miqueanei epojji. Majoya miya peacuanaja chacojo quea-aquianahuisonee popoquiani. 25Jamajjeya eya queametenee poanaje mijo echacochacojji. Miquea bejjo jjeshemajje eyaya huanaquehuaquinaje ecue teo meshijjaniyasijje. Ma-aje ca jiquio mique quia bejjo ojjañatii.” 26O chacomeejji poani etiiya oya jama tecueame acanaje ba'a: “De, miya queajjashahuabaquiquehuanee, queahueyanee. Miyaya eya jama anaje eyaya queacamajanee chacomeeme aña cuana, jomishocameejjimaneineiaña. Eya peaja sejja'yojo, peaja chacojo pea-ai quea-aquianahuisonee popoquiani. Jamaya miyaya eya baña. 27Jamajjeya eya jama poani bamajje miquea ecue quia eso'dojjo dojocajji poanaje ma onaa bejjo huanacani banco equi queaca'anee aniyasijje. Miquea cuama ehuana poanajejojjemo, ecuea eso'dojjo queahuisopishana tiiquiae majo jaajjejojoya.” 28Majoya o chacomeejji poaniya pea ojo chacochacoanicuana majo ani jama acanaje ba'a: “Jiquio nequi dejjaja bejjo 1.000 huisome jjeshe'yocue. Joya 10.000 huisome eso'dojjojji poani dejja quia'yocue. 29Joya queapame chacochacoanicuaa o chacomeejjija esohui jayojja, queahuiso aquianacuana jjeshecapoquije o sosejje. Joya queapame pojjeama chacochacoanicuaa o chacomeejjija esohui jama pojjeama ca oja aquianacuana jamatii oepojjinei ani jjeshejeacaje'yo cuaa. 30Jiquio ejo chacochacojjima poanaje dejja ca peajja, jeajeacue oya queahueshanee quea-aapohuasijje. Oya majo nequi'yo queayenoneetii popoquije'yo. Ese' ijjiayaicanequijetii neejo.”— Jama huohuimeya esohui acapoa Jesosaa.
Jesosaa ojjañajaajjicuanaja oja mimishi ja'anei huohuicaje'yo
31Jesosaa huohuitiicapoa cuana jama ba'a: —Eya Dejjapojji epo queaca'anee poeje o'oya ojjaña ecuea angelcuananijje pea-ai. Emeshimeseneitii nequipoquiya eya poeje o'oya, jamajjeya eya equii-anijji queajijineejo anioqueje ojjañajaajjicuana huoojeapoquiajjitii epojji. 32Majoya ojjañajaajjicuana ojjaña meshijo ba'eca jjachichaquicaje'yo e ani cojjaneijo enequijji. Jiquio ecua ovejajaahuanajjicuaa oja ovejacuana huapa nequiatepeya acani oopana oveja, oopana chivo, jama pea-aiya eyaya ojjañatii aje'yo cuana becaneijji pea-ai jjachichaquime epomee'yojji. 33Ojjaña joya oveja jayojja poanicuana eyaya ecuea ebañeimijijje nequimeeje'yo. Ojjaña joya chivo jayojja poanicuana eyaya ca oma ecue shanimijijje nequimeeje'yo. 34Eyaya Emeshimesenei poaniya joya ecuea ebañeimijijje nequicacuana jama huohuime aje ba'a: “Poecue quiana e aniyasijje. Ecue Chiiya quiana queapamenee acaje'yo. Jamajjeya ma ohua ojjañacuana huoojeacapoquianitii meshi Eyayasijje poquimeecaje'yo quiana cuamaya. Eyacuiñajjiya yahuajoneitii maya apoa acapoa miquianajo meshi aquianacuana oja panajjimahuajo. 35Yahuajo eya queashoe poajo miquiaaya bobianaje, queanabataja poajo ena ishimeenaje pea-ai. Eya jaajji pea jayojja ecue huapa pojjeamacuanama'tii poeajo miquiaaya eya jjequinobianaje miquianaja equiyasijje cahuiya. 36Ecuea daqui chiichii'yajo chama'nei poajo miquiaaya eya pea daqui quianaje. Eya queamano poajo pea-ai miquiaaya eya shicuimeenaje. Eya ejeanobia ani pea-ai miquiaaya bahuanaje achajja e ani baa.” Jamaya eyaya aje ojjaña joya ecuea ebañeimijijje nequica. 37Eya esohui jama poaje shajja-ajjamajje joya queajjashahuabaquija'a poani ecuea epeejjicuaa jama huohuiajjame eya acanaje ba'a: “Emeshimesenei, ¿acheshono shai ecuaaya miya queashoe ani bamajje bobianaje? ¿Ache pojjajo shai ecuaaya miya queanabataja ani bamajje ena ishimeenaje? Ecuanajaya miya jama poani bajjima. 38¿Acheshono shai ecuaaya miya jaajji pea jayojja poeani bamajje ecuanaja equiyasijje jjequinobianaje ecahuijji? ¿Ache pojjajo shai miya daquichiijji ani bamajje ecuaaya pea daqui huoshomeenaje? 39¿Acheshono shai ecuaaya miya emano jaa baquinaje, ejeanobia ani pea-ai baquinaje? Ecuanajaya ca mi jama poanaje bajjima so'o.” 40Majoya eyaya Emeshimesenei poaniya huohuije'yo cuana eya ohua jama huohuiajjame acajje ba'a: “Eyaya e'ejojonei quiana aña. Miquiaaya jiquio minijje ba'eca ecuea epeejji aema' ca'a-ama poanicuana jama asahuame ajo eya pea-aiya miquiaaya asahuaña.”
41—Majoya eyaya Emeshimesenei poaniya joya ecue shanimijijje nequicacuana jama huohuime aje ba'a: “Quea-ehueshatii nequi'yocue. Miquianaya Cuaqui-ai ma quijjo'yoajjatii jaahuasijje poqui'yocue. Maya ma Cuaqui-aiya Eyacuiñajjiya acapoa edosiquiana, eshahuamasecuana pea-ai quiyonequi'yojjitii epojji. 42Eya queashoenee ani bamajje miquianajaya jamatii bobi quiajjima poanaje, queanabataja pea-ai ani bamajje eya miquianajaya ena quiajjima poanaje. 43Eya jaajji pea jama poeajo miquianajaya jjequinobiajjima poanaje cahuiya. Eya daquichiijji ani bamajje daqui quiajjima poanaje quianaja. Eya emano jaa, ejeanobia ani pea-ai miquianajaya baquijjima poanaje achajja e ani baa.” Jamaya eyaya aje ojjaña joya ecuea shanimijijje nequica. 44Eya esohui jama poaje shajja-ajjamajje joya ecue shanimijijje nequicaa jama huohuiajjame acaje ba'a: “Emeshimesenei, ¿acheshono shai ecuaaya miya queashoenee ani, queanabatajanee ani, jaajji pea jayojja poeje, daquichiijji ani, queamano jaa, ejeanobia ani pea-ai jama bamajje asahuajjima anaje ecuaaya miya?” 45Majoya eyaya Emeshimesenei poaniya huohuije'yo cuana eya jama huohuiajjame acajje ba'a: “Eyaya quiana e'ejojonei aña. Miquiaaya jiquio minijje ba'eca ecuea epeejji ca'a-ama aema' poanicuana jama asahuajjima ajo eya pea-aiya asahuajjima aña quiaa.” 46Jamajjeya quiana poquicaje'yo queaneeneetii ponequi'yohua. Joya queajjashahuabaquija'a ecuea epeejjicuana ca ba'etiitiipoquije'yo Eyahuasijje.—
Selectat acum:
MATEO 25: ESE
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Copyright Mision Nuevas Tribus, 2006
