MATEO 23
23
Jesosaa fariseocuana, Moisesja tehuehuohuijji poanicuana pea-ai huohuicapoa queamimishi nequica
(Mc 12.38-40; Lc 11.37-54; 20.45-47)
1Majoya aje Jesosaa o shajja-ajjajji poanicuana majo anicapea-ai huohuicapoa jama ba'a: 2—Moisesja tehuehuohuijji poanicuana, fariseo dejjacuana pea-ai nequiani Eyacuiñajjija esohui Moisesja tehuecuana huohuipoquiajji epojji. 3Jamajjeya oe cua ohua huohuicaje huisotiiya esohui shajja-ajjapoquiacue. Jamatii a'a oya jayojja pea-ai ba'epoquijji. Oya e'ejojonei pojjeama poani. Ohuaya peacuana esohui huohuicanitii achajja ba'ecapoquijji, jamatii cua ohua huohuicani esohui jayojja ba'eneipoquiajja. 4Jiquio ecua dejjacuaa aquiana queabiquieneenee peacuana abomeeajjacani jamatii oya asahuajjimanei nequiya oya jayojja Moisesja tehuehuohuijjicuaa, fariseocuaa pea-ai queahuisonee esohui huohuineineicapoquiani cuana o majo jjashajja-ajjaquipoquijji nisho. 5Ojjaña cua fariseocuaa chacocaje huisotii ohuaya jamaya acani ojjañacuanaja oya queapame poani ebajji. Oyaneitii queapame poani oya jjabaquiani. Eyacuiñajjija esohui etehue queaquemo oja aajo ejeyo jaa, oja bahuajo pea-ai jaa dojocanitii ojjañaja ebajji oya queapame. Oja daqui-ao queanahuejo hilocuana ejeapashajjajja ba'ehuanacani oya Eyacuiñajjija epeejjinei poani queahuisocuanaja oya ebihuiajjequijji cua o poquijeyasijje. 6Oya ojee eijjiaijjiajji equiyasijje nobiquimajje anioquesapoani equimesepejjeneijo oya queaca'anee poani peaja ebajji. Oya judiocuanaja equi-ai ejjachichaquijji aniyasijje nobiquimajje ehuiyasijje anioqueñaquisapoani ojjaña majo anicaja oya ebajji. 7O ejeojjijo nequijo pea dejja jjacuianohuequiñani o esohui queapame ja'ajjequijji bamajje queabihuinee poani. Peacuaa oya esohuihuohuijji queapame poani ja'acajjequiajje oya queabihui pea-ai poani. Jama peaja oya eajji ojaya queabotinee esohui o bihuiajjequijji.
8—¡A'a oe jama popea-aisapojji! ¡A'a peacuanajo esohuihuohuijji poani jjapomeequijji quiana! Enequi oenei esohuihuohuijji e'ejojonei queapamenee poani. Miquianaya caca oya jayojja pea-aiya poani oya dohue jayojja pea-ai. 9¡A'a pea jiquio meshijo nequica dejja ecue chii a'a ajji! Miquianajaya Chii-ai caca oenei enequi, maya Eyajo nequianitii. 10A'a miquiananijje ba'ecacuanajo mimijji jama ba'a: “Jiquio ese huohuipoquiajji poani”. Chojja, Quito Eyacuiñajjija huoojeaneiya caca miquiana huohuipoquiajjinei poani. 11Jamajjeya joya jiquiojo ani oe queaca'a pea huoojeajji posapoani comaya pea chacosahuajji jjapomeequicajji jamatii sosema'. 12Ojjaña joya oyaneitii queaca'a jjabaquianicuana peacuana huoojeajji epojji Eyacuiñajjiya comacuanaya ca'a-ama pomeecaje'yo, peacuana huoojeajji epojji pojjeama acaje'yo quijje. Ojjaña joya oyanei ca'a-ama jjabaquiani peacuana huoojeajji epojji Eyacuiñajjiya ca oma queaca'a pomeecaje quijje onijjejaajji huoojeapoquiajji epojji, etii epojji— jama huohuimeya acapoa Jesosaa.
Fariseo dejjacuana oyaneitii queapame poani poso jjabaquipoquiapoa
13-14Majotiiya Jesosaa janobajjimanei tecueacapoa cuana jama ba'a: —Moisesja tehuehuohuijji poanicuana, fariseocuana pea-ai, miquianaya queapame jayojja ba'e bacani cuaa ebiajjejje. Eyamiquipajje ca queamimishihuisotii poani quiana. Eyacuiñajjija epeejjinisho quiana jja coma. Eyacuiñajjiya quiana queaneenee pomeecaje'yo quijje. Miquianaya poquisapo-ajjatii poani Eyacuiñajjiya ojjañacuana huoojeacapoquianitii meshi Eyahuasijje. Peacuana poquimee'yojjima aña pea-ai quiaa cuamaya. Jiquio ecua dejjaa esecuejjani ca'aca'yani jama pea-aiya aña quiaa pea nobiquijjima epojji. Jamajjeya aje queaneeneetii poaje'yo quiana.
15—Moisesja tehuehuohuijji poanicuana, fariseocuana pea-ai, miquianaya Eyacuiñajjija epeejjinisho quiana jja coma. Queaneeneetii poaje'yo quijje. Ojjaña meshicuanahuasijje ma queahueshanee bae-aiaijje pea-ai quiana besapoquiani. Ejeojjijje pea-ai queahuesha poquiani quiana peajaajji sohuihuohuiya oya judío jayojja pea-ai o pomeeya Eyacuiñajji bihuiapoquiajji. Majoya oya miquianajaya esohui shajja-ajjamajje queamimishi ba'epoquije miquiana jayojja pea-aiya. Oya e'ejojonei Cuaqui-aiyasijje queaneeneetii quiyonequipoquije'yo miquianaya beshahuanei jama pojjeama.
16—Miquianaya minijje cojjama' jayojja dojojji poani pea-ai quiana jja coma. Miquiaaya jama aña ba'a: Joya dejjaa oja esohui oya jayojjaya eajeyo'yojji huohuicaje Eyacuiñajjija equi-ai queajeajo. Majoya quijje ohua oja huohui esohui pajeaca'yajo, oja esohui eajeyomee'yojji pojjeama poaje quianaja. Siajje ajjima' quiaa oya aña. Oya dejjaa oja esohui oya jayojjaya eajeyo'yojji huohuicajo Eyacuiñajjija equi-aijo ani orojo ca e'ejojonei oja esohui jayojjaya quiaa ajeyomeeje'yo. Pajeamee'yojjima aje. Jamaya quiaa esohui huohuitaiaña cuana. 17Miquianaya queasapaquehuanee poani joya ecua dejja cojjama' poani jama pea-aiya. ¿A'a quianaja bajjima Eyacuiñajjija equi-ai queanahuenee poani, ma aquiana oro ojaya equi-aijo ani jama pojjeama queanahuepishana? Majo ani aquiana queanahuenee poani oya Eyacuiñajjija equi-aijo anijojoya, oyatii pojjeama. 18Miquiaaya jama huohuitaipea-aime aña ba'a: Joya dejjaa oja esohui oya jayojjaya eajeyo'yojji huohuicaje Eyacuiñajjija equi-aiquibojo nequi altarjo. Majoya quijje ohua oja esohui pajeaca'yajo eajeyomee'yojji pojjeama poaje quianaja. Siajje ajjima' quiaa oya aña. Oya dejjaa oja esohui oya jayojjaya eajeyo'yojji huohuicajo oja quianeijo ma altarjo jaa ca oja esohui jayojjaya e'ejojonei quiaa ajeyomeeje'yo oya. Pajeamee'yojjima aje. 19Miquianaya joya ecua cojjama' jayojja pea-ai poani. A'a quianaja bajjima poani ma altar Eyacuiñajji bihuiajji queanahuenee poani. Dejjaja quia ehuone enaa jehui'yo ca queanahuepishana. Jamajojoya aje ma altarya oja quia ehuone enaa jehui'yo queanahue pomeecani, oyaneitii queanahue pojjeama poani. 20Joya dejjaa oja esohui oya jayojjaya eajeyo'yojji huohuicani ma altar queajeajo, mayaneitii ohuaya queanahue bacani pojjeama. Ma altarjo jaa ehuone enaa jehui'yo pea-ai ohuaya queanahue bacani. 21Joya dejjaa oja esohui oya jayojjaya eajeyo'yojji huohuicani Eyacuiñajjija equi-ai queajeajo, mayaneitii pojjeama bacani queanahue. Eyacuiñajji majo pea-ai ani ohuaya bacani queanahuenee. 22Joya dejjaa oja esohui oya jayojjaya ajeyo'yojji huohuicani Eyajo anija ebajjijo, ma meshineitii pojjeama ohuaya bacani queanahue. Eyacuiñajji majo pea-ai anijojoya ohuaya queanahuenee bacani.
23—Miquianaya fariseocuana, Moisesja tehuehuohuijji poanicuana pea-ai, Eyacuiñajjija epeejjinisho quiana jja coma. Queaneeneetii poaje'yo quiana quijje. Miquiaaya aquiana, bejjocuanaya oepojji décima parte Eyacuiñajjija esohui jama iyashiñaña Eyacuiñajji quiajji. Bobi huajjicuanaya iyashiñaña bisonei décima parte Eyacuiñajji quiajji. Jamaya miquianaya ba'epoquiani Moisesja tehuecuana jayojjaya. Ma pea Eyacuiñajjija esohuicuana queapamenee poanijo ca miquianaya jjashajja-ajjaneiquisapo-ajja. Ma pea esohuicuana queapame jama poani ba'a: Peacuana oja mimishijo queanee pomeecuajijjima acapoquijji so'o. Queaja'a mimishiama ba'ecapoquijji peacuananijje, Eyacuiñajjija esohuijo e'ejojoneitii jjashahuabaquicapoquijji. Jama epojjiya jiquio esohui queapamenee poani jamaya miquianaya ba'ecapoquijji. Ma pea esohuicuanaya apea-aicajji, pajeaca'yoajja quianaja.#23.23 Nota: Oepojji décima parte jama poanijje ba'a: Dejjaa 10 arroba huiso anoso sejja'yomajje oe arroba iyashiñacaje Eyacuiñajji quiajji ojaya echacojji yajjijo.* 24Miquianaya minijje cojjama'cuana jayojja dojojji pea-ai poani. Beca Eyacuiñajjija esohuicuana jayojja miquianaya ba'epoquiani. Ma pea esohuicuana queapamenee jaa ca oya jayojja ba'epoquiajja. Jiquio ecua dejjaa eshajajjijo ena shocani shama' epojji eishijji, majoya oja canecojo nequitii eshaa camello quemoajja ishijeacani, jama pea-aiya quiana queaquehua poani.
25—Miquianaya Moisesja tehuehuohuijji poani, fariseocuana pea-ai, Eyacuiñajjija epeejjinisho quiana jja coma. Miquianaya queaneeneetii poaje'yo quijje. Miquianaya jiquio ecua plato, caneco pea-ai ebiajjejjetii shacuacani cuaa queaboejea epojji jamatii eyiyedojjojje shacuajjima queajehuetii poani, jama jayojja quiana queamimishinee ba'e. 26Fariseo quiana cojjama' jayojja poani, shajja-ajjaneicue. Ebionei oe miquianaja eyamiquipajje, sapadojjojje queaboejea pocue. Majoya quiana jama pomajje eyamibiajje queapame pea-ai jjabaquije. Jiquio ecua caneco ebionei eyiyedojjojje shacuacoocani queaboejea epojji jama pea-ai oe pocue.
27—Miquianaya Moisesja tehuehuohuijji poani, fariseocuana pea-ai, Eyacuiñajjija epeejjinisho quiana jja coma. Queaneeneetii poaje'yo quijje. Miquianaya jiquio ecua emano'yocuana huananobiajji equisisi ecuia-asha oshe jama pea-aiya poani. Ebiajjejjetii queapame poani quiana jjabaquiani, ecuia-asha oshe jayojja. Eyamiquipajje ca queamimishineetii poani quiana emano'yo sa'cuana ehuananobia jaa quea-ihuinee poani jama pea-aiya quiana poani. 28Queahuisocuaa quiana ebiajjejjetii queapame poani poso bacani. Jamatii eyamiquipajje, esapadojjojje queamimishineetii poani quiana. Esohuihuohuijji quiana poani peacuanaja quiana queapamenee poani ebajji, mahuisojoya.
29—Miquianaya Moisesja tehuehuohuijji poani, fariseocuana pea-ai, Eyacuiñajjija epeejjinisho quiana jja coma. Queaneeneetii poaje'yo quijje. Eyacuiñajjija esohuihuohuijji poa emano'yocuana huananobiajji meshi chacopoquiaña quiaa. Mei-ai nequiamajje ma queapame ba'ecapoquiapoaja sa'biajje queapame pomeeaña o shahuabapoquiajjitii. 30Majoya miquianaya jama poani ba'a: “Eseya yahuajonei eseja etiiquiananijje eshe enequipea-aiapoaajjemo Eyacuiñajjija esohuihuohuijji yahuajonei poacuana eseyaya quecuamee'yojjima aquiae etiiquiana” jama poani quiana. 31Jama pomajje miquianaya jjabaquiani Eyacuiñajjija esohuihuohuijji poacuana quecuamee'yojji epoja osecua poani. 32Yahuajonei miquianaja babacuaa Eyacuiñajjija esohuihuohuijji poacuana chama'yo pomeeca'yapoa. Oya jayojjaya quiaa jjeya chama'yo ameeje'yo Eyacuiñajjija esohuihuohuijji poanicuana ma ecua miquianaja babacuaa chama'yo pomeeca'yapoa jama pea-aiya.
33—Miquianaya peyo quease'nee jayojja popoquianitii. Cuaqui-aijo epoquiquehuajji pojjeamatii quiana poaje'yo. Cuamatii enequipoqui'yojjiya quiana Eyacuiñajjiya jeajeameecaje'yo. 34Jamajojoya eyaya huoojeaje dejjacuana queasapaja'a miquiana sohuihuohuiya, Eyacuiñajjija quia esohui huohuijji epojji huoojeaje. Jamatiiya quiaa oya ecue huoojea cajaa aje. Ma esohuihuohuijji poajecuana quecuameeje'yo quiaa, peacuana manomeeje'yo acui ecuiata'apeejo ba'ehuanasohuajeameemajje. Pea ma esohuihuohuijji poaje ca cuiasejjajeameeje quiaa jjono ejeapashajjajjaa judioja equi-ai ejjachichaquijji eyiyedojjojotii nequiya. Pea meshicuanahuasijje sa-ajjaa quiaa apoquiaje oya enapameejji. 35Jamajjeya quiana jjeya eshe nequica Eyacuiñajjiya queaneenee pomeecaje oja huoojea dejjacuana yahuajonei esohuihuohuijji poa minijjejaajji judiocuaa oya cuiameecapoqui'yapoajojoya. Queahuiso esohuihuohuijji poacuana cuiameecapoqui'yapoa cuaa jamatii mimishiama nequi. Yahuajonei Abel queajjashahuabaquija'a nequi cuiacooca'yapoa. Majoya quijjenei Zacarías Berequiasja bacuaejja jajahuejjajeaca'yonaje miquiananijjejaajji judiocuaa. Oya Zacarías Eyacuiñajjija equi-aichipineijo nequi altarchipineipejjejotii jajahuejjajeaca'yonaje. 36E'ejojonei eyaya quiana huohuiaña. Jjeya quiana jiquio eshe ba'eca Eyacuiñajjiya queaneenee pomeecaje miquiananijjejaajji judiocuaa Eyacuiñajjija babaca dejja esohuihuohuijji poacuana queahuiso cuiameejeyoca'yapoajojoya. Miquianaya majoya queacamajanee, queaneenee pea-ai poaje— jamaya poa.
Jesosa queayenonee poa Jerusalencuiñajjicuanajo
(Lc 13.34-35)
37Majoya aje Jesosa queayenonee jjashahuabaquiapoa Jerusalencuiñajjicuanajo. Oya jama poa ba'a: —Eyacuiñajjija esohuihuohuijji poacuana miquiaaya manomeepoquia'yapoa. Oja huoojeacuana esohui yejji jajahuejjajea'yapoa quiaa. Eyaya quiana iyaa-majamaja-ajjapoquianaje ejo ejjanahuemeequi'yojji nisho. Jiquio ecua cachinaa oja bacuacuana iyaaca'yani oja aaquimejjejje enequijji jama pea-ai epojji nisho quiana eyaya a-ajjamajamajanaje. Miquianaya ca eque poesapo-ajjatii poanaje. 38Jamajjeya bacue quiana. Jjeya miquianaja meshi miquiana ba'ejji poani se-ejjama'yo poaje. Eyacuiñajjija miquianaya eba'emeesahuajji pojjeama poaje. 39Eyaya quiana esohui jama huohuime aña jjeya miquiaaya eya bapajeaje'yo so'o. Quijjepishana esohui ejo jama huohuime aje quiaa ba'a: “Emeshimesenei Eyacuiñajjiya queapame ca-acapoquiahuatii oja huoojea ese nahue'yojji poani.” Esohui ejo jama amajje eya baje o'oya quiaa— jama huohuime acapoa cuana Jesosaa.
Selectat acum:
MATEO 23: ESE
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Copyright Mision Nuevas Tribus, 2006
