Ягья 21

Ирид тилмизни Иса

1Хьайи крарилай кьулухъ Тибердин вирин патав Иса мад Вичин тилмизрин вилик акъатна. Амни икӀ хьайи кар я: 2Симун-Петру, «Кьветхвер» тӀвар алай ТӀумай, Галилейдин Кана шегьердай тир Натанаил, Зебедеян кьве хва ва мад кьве тилмиз вири санал алай. 3Симун-Петруди абуруз лагьана:

– Зун вирел гъетер кьаз физва.

Абуру адаз «Чунни вахъ галаз къведа» лагьана. Фена абур луьткведа акьахна, амма а йифиз абуруз затӀни гьатнач. 4Пакама хьайила, вирин къерехдал Иса акъвазнавай; амма тилмизриз Иса чир хьанач.

5– Аялар! – лагьана Исади. – Квев недай затӀ гвани?

Абуру Адаз «Ваъ» лагьана жаваб гана.

6– Чил луьткведилай эрчӀи патаз вегь, гьанай квез гъетер гьатда, – лагьана Исади.

Абуру чил вегьена, амма абурувай ам акъудиз хьанач, вучиз лагьайтӀа чилина гъетер гзаф гьатнавай. 7Гьа чӀавуз Исадин рикӀ алай тилмизди Симун-Петрудиз лагьана:

– Ам Ребби я.

Гъетер кьадайла, Симун-Петру кьецӀил тир. Ам Ребби я лагьай гафар ван хьайила, ада вичин винелай алукӀдай пекер алукӀна, циз хкадарна, къерехдихъ сирнавна. 8Муькуь тилмизар луьткведа аваз къерехдиз хтана, ацӀай чилни абуру луьткведихъ галкӀурна чӀугуна. Абуру гъетер кьазвай чка къерехдивай яргъа авачир, авайди кьве виш кьуьнт тир. 9Луьткведай эвичӀайла, абуруз цӀай акуна, адал гъетер вегьенвай, патавни фу гвай.

10– Куьне гила кьунвай гъетерикайни са тӀимил гъетер гъваш, – лагьана Исади.

11Симун-Петруди, луьткведа акьахна, анай зурба гъетер авай чил акъудна чилел вегьена. Чилина вишни яхцӀурни цӀипуд гъед авайтӀани, ам пад хьанвачир.

12Исади абуруз лагьана:

– Ша, ацукьна неъ.

Ам Ребби тирди чир хьайи тилмизрикай садавайни рикӀна «Вун вуж я?» лагьана хабар кьаз хьанач. 13Исади, атана, фу къачуна, абуруз пайна, гъедни гьакӀ авуна. 14Гьа икӀ Иса, кьена чан хтайдалай кьулухъ, Вичин тилмизрин патав пуд лагьай гъилера атанвай.

Иса ва Петру

15Исадини тилмизри фу тӀуьна куьтягьайла, Исади Симун-Петрудиз лагьана:

– Ягьядин Хва Симун, ваз Зун амай вирибурулайни гзаф кӀандани?

– Эхь, Ребби! – жаваб гана Петруди. – Заз Вун кӀандайди Ваз чизва.

– Зи кӀелер хуьх, – лагьана Исади.

16Кьвед лагьай гъилера Исади мад лагьана:

– Ягьядин хва Симун, ваз Зун кӀандани?

– Эхь, Ребби! – жаваб гана Петруди. – Заз Вун кӀандайди Ваз чизва.

– Зи хипер хуьх, – лагьана Исади.

17Исади пуд лагьай гъилера лагьана:

– Ягьядин хва Симун, ваз Зун кӀандани?

Ада пуд лагьай гъилера «Ваз Зун кӀандани?» лагьана хабар кьазва лугьуз, Петрудин кефияр хана.

– Я Ребби! – лагьана ада. – Ваз вири чизва. Заз Вун кӀандайди Ваз чизва.

– Зи хипер хуьх, – лагьана Исади. – 18За ваз лап рикӀивай лугьузва: Вун жегьил тирла, жуван юкьва чӀул туна, кӀандай чкадиз фидай. Амма вун кьуьзуь хьайила, ви юкьва чӀул масада кутӀунда ва вуна куьмек кӀанз гъилер яргъи авурла, вун ваз такӀан чкадиз тухуда.

19И гафар лугьудайла, Адан фикирда Петруди Аллагьдин баркалла гьикӀ къалурдатӀа, яни Петрудин ажал гьихьтинди жедатӀа авай. И гафарилай гуьгъуьниз Исади Петрудиз лагьана:

– Зи гуьгъуьнаваз ша.

Иса ва Адан рикӀ алай тилмиз

20Петру элкъвена килигайла, адаз чпин гуьгъуьна аваз Исадин рикӀ алай тилмиз къвезвайди акуна. Ам, Исади эхиримжи гъилера тилмизрихъ галаз нянин фу недайла, Исадив агатна «Я Агъа! Ваз хаинвал ийидайди вуж хьурай» лагьана хабар кьур гьа тилмиз тир. 21Петрудиз ам акурла, ада Исадиз лагьана:

– Я Ребби! Бес и тилмиз гьикӀ хьурай?

22– Ваз адакай вуч ава? – лагьана Исади. – Белки, Заз ам, Зун элкъвена хкведалди, амукьна кӀанзава жеди. Вун Зи гуьгъуьна аваз ша!

23И гафар ван хьайила, вирибуруз и тилмиз са чӀавузни рекьин тийидайди хьиз хьанай. Гьа икӀ а гафар тилмизрин сивера гьатна. Амма Исади а тилмиз рекьидач лагьайди тушир. Ада анжах лагьанай: «Ваз адакай вуч ава? Белки, Заз ам, Зун элкъвена хкведалди, амукьна кӀанзава жеди».

24И вири вакъиайрин шагьид хьайи гьа тилмизди и ктаб кхьена. Вири крар гьада кхьенвайвал хьайиди чаз чизва. 25Исади мадни гзаф крар авуна: абурукай вирибурукай кхьейтӀа, за фикирзавайвал, а ктабар вири дуьньяда гьакьдачир.

Selectat acum:

Ягья 21: ЛезПК

Evidențiere

Partajează

Copiază